الأربعاء، 29 ديسمبر، 2010

تمانيه وأربعين


وحياتنا ايه غير زمان ماشى فى المكان

وحاجات بتعدى وتخلص وحاجات بتعيش زمان


بس حتة البازل اللى ضاعت من سنين


دلوقتى لقيتها لكن خلاص مالهاش مكان




الأربعاء، 22 ديسمبر، 2010

ليه يا عمرو !



كانت ليلى تجلس أمام التلفاز تشاهد أحدى حلقات المسلسل التركى الشهير اللذى تمت دبلجته للعربيه وحقق نجاحا فى الدول العربيه مؤخرا , كانت تراه مملا ومكررا لأقصى درجه ولكن ما هو الشئ الجديد على أى فضائية عربيه كلها أشياء مكرره , أخذتها أفكارها بعيدا عن المسلسل , ذهبت بأفكارها لأبنها عمرو اللذى تخرج من كلية الزراعه منذ 3 سنوات فى تخصص الزهور والزينه بتقدير جيد جدا , ألتحق بالكثير من الوظائف فى مجالات مختلفة بأستثناء الزراعه , لم يستطع أن يجد أى عمل مجدى فى تخصصه طوال السنوات الثلاثه , عدا المره اللتى حاول فيها ان يعمل فى أحدى شركات تصميم المسطحات الخضراء , واللتى لم يكن لها أى خبره فى هذا المجال من الأساس , كانت متخصصه فى مجال الأمن ولكن كانت الفكره كما أخبره مدير الشركه وهم يبلوغنه خبر الأستغناء عنه أنهم بس كانوا عايزين يعملوا سبوبه على جمب كده يعنى , كانت ليلى تعرف كم كان أبنها يملك من أحلام يريد تحقيقها فى مجال تخصصه , كم يحزنها أن ترى أحلامه تتحطم هكذا , والمشكله الأكبر أن عمرو لم يكن يمتلك العديد من الأصحاب أو يمارس أى نشاط يمكن أن يخرجه من حالة الأكتئاب اللتى أصابته , كان يجلس طوال الوقت فى غرفته أمام شاشة الحاسب لفترات تصل لعشرة ساعات متواصله , كانت تعلم أنه يقضيها على الأنترنت , ولكن فى الفتره الأخيرة بدأ تشك فى بعض الأشياء بدأ فى أغلاق باب حجرته لفترات طويله , وبدأت تسمع بعض الأصوات الغريبه تصدر من غرفته , حتى أكتشفت يوما أن عمرويقضى معظم وقته فى مشاهدة نوعية معينه من الأفلام , لم تكن تتخيل أنه يشاهد هذه الأفلام بهذه الكثافة وقد أقترب سنه من الثلاثين , لم تكن تأكدت بعد من هذا الأمر , ولكنها قررت أن تتحقق من شكوكها , هو الأن يغلق باب حجرته , أقتربت من باب الغرفه تمشى على أطراف أقدامها , كان ما يحركها هو أحساسها كأم تخاف من الأحتمالات اللتى يمكن أن يسببها الأكتئاب لأبنها , ألصقت رأسها بباب الغرفه , بدأت ترهف سمعها , ميزت بعد الأصوات , صوت صراخ مستمر , وشهقات مكتومه , وصوت نوع معين من الموسيقى اللتى تميز هذه الأفلام , ولم يكن هناك حوار بين أبطال الفيلم فى الغالب الا نادرا , أبتعدت ليلى عن الباب قليلا ووقفت تعيد ترتيب أفكارها , ثم جلست أمام الباب ونظرت من ثقب المفتاح كانت ترى جزء من الشاشه يظهر عليها بطلا الفيلم وأحدهما يمسك بالأخر فى وضع لا يمكن أن تراه الا فى هذه النوعيه من الأفلام , ورأت جانب من وجه عمرو تظهرعليه نشوة لم تراها عليه من قبل , الأن وقد تأكدت ماذا تفعل, فكرت أن تدخل عليه غرفته , وتحدثه مباشرة بأسلوب متعقل , ولكنها أبعدت الفكره عن رأسها وذهبت لتجلس ثانية أمام التلفاز , قررت أن تنتظر محمود زوجها ووالد عمرو وتحدثه فى الأمر , بعد دقائق دخل محمود من باب المنزل وألقى التحيه على ليلى وجلس بجوارها , التفتت اليه , محمود عايزه أكلمك فى موضوع عمرو , ماله عمرو بس يا ليلى , انا قلت لك قبل كده على اللى بيحصل أنا النهارده أتاكدت , يا ليلى دى فتره كده بس الواد مكتئب أنا كلمتله الحاج أحمد فى الأمارات وقالى خلاص ها يبعتله العقد على الشهر الجاى بالكتير , برضه عملت اللى فى دماغك وها تسفر الواد , يعنى عاجبك قعدته جمبك كده مافيش فايده الواد لازم يسافر يشوف مستقبله بدل ما يضيع هنا , ما تشوفله شغل هنا يكون فيه جمبنا يا محمود , أديكى شايفه أهوه عمرو مش قادر يمشى فى أى شغلانه مصمم يشتغل فى الزراعه , ماشى يا محمود بس برضه لغاية ما يسافر لازم نعرضه على دكتور كده مش طبيعى خالص ده بيقعد بالتلات أربع ساعات يتفرج على الأفلام دى , هوه ايه اللى مش طبيعى بس يا أم عمرو والله أنتى تضحكى ما احنا كلنا كنا بنتفرج عليها وأحنا صغيرين , بس مش فى السن دى ومش تلات أربع ساعات ويقفل الباب على نفسه ,طب تصدقى أنا بقه ها ادخل أتفرج معاه شويه ما شفتهاش من زمان اوى , يا سلام يبقى الواد وأبوه , ايه يعنى همه العيال الصغيريين بس همه اللى بيتفرجوا على توم وجيرى !

الاثنين، 13 ديسمبر، 2010

سبعه وأربعين


امى ياما حكتلى زمان عن السندباد

والزمن عدى لكن الحكايه لسه بتتعاد

بس الساحر العجوز أصبح ألف من الأسياد

ويا عينى لساه واقف لوحده السندباد


السبت، 11 ديسمبر، 2010

كيف تصبح سائق ميكروباص فى عشر خطوات بسيطه



1. اول حاجه لازم تلاقى لنفسك اسم حركى يعنى لو انت خريج هندسه ها يبقى اسمك حماده مسطره , لو خريج طب ها يبقى اسمك حماده سماعه , لو خريج صيدله ها يبقى اسمك حماده برشام , كده يعنى وما تخافش لو ما لقتش لنفسك اسم حركى او لقيت الاسم ده مكرر , ما تقلقش أصحابك من السائقين فى الموقف ها يتبرعوا ويطلعوا عليك اسم حسب سلوكك بقى .

2. من ناحية السلوك بقى لازم تنسى كل حاجه عن السلوك اللائق اتعلمتها فى حياتك أول ما تخش الموقف يبقى انت دخلت عكر دار سواقين الميكروباص , لازم تندمج وتبقى واحد منهم ولا تتاكل أكل , لازم تتف فى الارض طول ما انت ماشى عمال على بطال , هزارك مع السواقين لازم يكون شتيمه بالام وسب التييت ده أقل واجب يعنى , مافيش مانع تهرش فى اعضاءك التناسليه من حين لأخر وانت واقف فى وسط الموقف

3. شرايط الكاسيت موضوع مهم جدا لاوم تنزل تشترى كل شرايط الكاسيت الشعبيه من العربيات الخشب فى محطة مصر أو اى حد فارش بشرايط مش مهم تعرف مين بيغنى المهم صوته زى الحمار أو ألعن وبيقول حاجه حزينه مهببه بهباب أو بينقط فى فرح شعبى أو بيغنى عن البيره والحشيش

4. انسى لغتك حالص واتعلم مصطلحات سواقى الميكروباص , قدامك حاجات كتير تتعلمها , يا ساحبى , الأجره مع بعض ورا يا أفنديه , انا طالع على طول الأجره جنيه ونص , نازله فين يا أبله , والنبى يا أخويا اللى بيقزقز لب ورا ,والنبى يا اخويا بلاش تحط رجلك فى ضهر الكرسى بتاعى , ها تاخد الكرسين قدام ياكابتن

5. من المفضل انك تاخد ختم صياعه فى وشك ولو حاجه بسيطه موس مثلا ممكن قرن غزال تحت دقنك ممكن تخليك وسيم على فكره وبرضه تخلى اى زبون يفكر ميت بمره قبل ما يتخانق معاك , وما تنساش تشيل شومه حلوه كده تحت الكرسى بتاعك فى الميكروباص ده غير الكوريك طبعا أحسن حاجه فى الخناقات

6. لازم تتعلم تزبط أمورك مع العساكر وامناء الشرطه كل يوم جنيه كده الصبح فى ايد العسكرى اللى واقف برا موقف الميكروباصات وخمسه جنيه تطبقها فى ايد الصول اللى عند الملف اللى بتحمل منه برا الموقف كل كام يوم كده لو دماغه هفته ولا حاجه وحب يستخدم دفتر المخالفات

7. لازم تتعلم بعض المهارات الضروريه لسائق الميكروباص , لم الأجره وانت بتشرب الشاى وبتفطر وبتتكلم فى الموبايل وبتتخانق مع السواق اللى كسر عليك وكل ده وانت بتسوق طبعا وطبعا مهارات الهروب من الكمائن واللجان والهروب من الازدحامات المروريه والطرق التقليديه وده ها يحتاج منك حفظ مفصل لجميع زقايق ومنافذ المنطقه اللى انت شغال فيها

8. لازم تكون استغلالى لأقصى درجه فى أيام الاعياد والمناسبات والأجازات وماتشات الكوره ها تلاقى الناس طبعا واقفه مش لاقيه اى حاجه تركبها انت طبعا تحمل اربعات وتاخد ضعف الاجره وممكن تاخد اتنين على الشبكه وتلاته على الباب واتنين متشعلقين ورا وما تنساش ترسم دور الطيب اللى مش بيستغل الموقف انما نفسه كل الناس تروح بيوتها بسلام وساعو بعض يا جماعه معلش

9. الميكروباص بتاعك هو شرفك يعنى اللى يفرط فى ميكروباص ه أكنه فرط فى انتوا عارفين بقى بالظبط , ده غير كمان ان الميكروباص بيدل على شخصيتك , لازم تدورلك على حكمه كده حلوه من اختراعك وتحطها على ضهر الميكروباص , الكفن مالوش جيوب , اللى يفوت يموت , أبو أيه بيمسى , الدنيا زى الست عقلها ناقص , أى تييت مش مهم المهم تكتب حاجه

10 . أخيرا ما تنساش شوية حاجات مهمه , تشترى نضاره شمس من أم أربعه جنيه من المنشيه عشان تكمل الهيئه الاجتماعيه , حاول تنقى دايما المزز بس وتقعدهم جمبك فى الكرسين اللى قدام , لازم تتعلم تنزل وتحمل الناس فى وسط الشارع ولا ليك دعوه باى حد يديك كلاكس عشان تمشى ولا عسكرى مرور بيشاورلك ولا الكلام ده كله ماياكلش معاك , كبر دماغك من موضوع لم الاجره ده عشان ما تلاقيش حد مزوغ ويطلعوك انت اللى علطان فى الحساب انت تخلى الناس تلم الأجره مع نفسها ورا ويدولك أجرة العربيه كامله وانت باشا .

الاثنين، 29 نوفمبر، 2010

سته وأربعين

صناديق متقفله من قبل ما تتفتح

قول للى جاى يصوت صوتك اتمسح

والنعمه ما انتخبناك الناس صوتها اتنبح

ببلطجه الحكومه والناس المحكومه مجلسنا افتتح



الأربعاء، 24 نوفمبر، 2010

المحاكاه الافتراضيه للانتخابات المصرية


تعالوا نبص مع بعض على احلى لعبة محاكاه افتراضيه مزلت فى السزق السنه دى , لعبة انتخابات مجلس الشعب المصريه , اللعبه متوفره بمستويات لعب متعدده من الايزى للفرى هارد , مش محتاجه مساحه كبيره واى جهاز من غير بروسيسور اصلا ممكن يشغلها , تعالوا نتعرف اكتر على اللعبه وناخد جوله فيها
الليفل الاول ها تلاقى فيها التسجيل للأنتخابات وده متاح لأى مواطن طبعا زى ما بيقول الدستورومش محتاجين غير شويه شروط بسيطه كده ممكن همبكه بتاع البسبوسه يحققها , وفيه شروط مش مكتوبه زى الرش والرش هنا هو اختصار للرشوه , ودى ممكن تخليك تلحق رمز كويس شويه بعيد عن البسكلته وعنقود العنب , ممكن تلحق رمز ساعة الحائط ويا بخت لو لحقت رمز ساعة اليد وتمشى فى الحمله تشاور للناس على ساعتك مافيش اسهل من كده , انسى بقى الهلال والجمل دول طبعا رموز محفوظه لحد يوم الدين للحزب الوطنى حبيب الملايين , خد بالك كمان ها تلاقى حاجه اسمها فئات ما تسئلش يعنى ايه وحاجه اسمها عمال وفلاحين ودى حاجه ترجع لتقدريك انت الشخصى شوف انت عامل ولا فلاح ولا فئات اللى مش عارف يعنى ايه وعادى يعنى خد بالك ممكن الدوره دى تنزل عمال والدوره الجايه تنزل فلاحين لو زهقت ما حدش ها يقولك بتعمل ايه
يدخلنا للليفل التانى وده فيه أكتر من فريق ممكن تختار من بينهم
أولا :الحزب الوطنى الفريق اللى بيكسب فى كل سيناريوهات اللعبه ولو لعبت بيه يبقى متاح قدامك اكتر من سيناريو عشان تكسب بيه
1. سيناريو التزوير وده بتقفيل الصندوق بتاع مرشح الحزب الوطنى من قبل المخبرين وخلافهم يجيبوا الفين ورقه كده ويملوهم كلهم لصالح مرشح الحزب ودى طريقه ممتازه ومضمونه ده غير العب فى الجداول الانتخابيه واضافة اسماء ناس ماتوا وناس لسه فى بطن امها اصلا وكمان عندك خيار حلو انك ترمى صناديق الاصوات فى اى ترعه وتجيب صناديق جاهزه بالنتيجه اللى انت عايزها ,
2. سيناريو البلطجه وده عن طريق ترهيب المرشحين الاخرين قدام مرشح الحزب وترهيب مؤيديه كمان وده بتأجير بلطجيه والبلطجيه فى اللعبه من نوعين ممكن تختار النوع الحر أو النوع اللى شغال بتوصيه من الداخليه ده غير الامن المركزى وكل دى خيارات ترهيب لسحل وتأديب مؤيدى اى مرشح تسول له نفسه النزول قدام الحزب
3. سيناريو شراء أصوات الناخبين بكيلو لحمه أو ازازة زيت أو عشره جنيه تتقطع نصين نص وهو داخل اللجنه والنص التانى وهو خارج بعد ما يخلص مهمته أو الوعود بتشغيل شباب المنطقه أو تعملهم جمعيه تجيب لهم رمز كبير بيحبوه ممكن داعيه او لعيب كوره او هيفاء وهبى انت وشطارتك بقى
أحلى حاجه بقى ان لو اختارت الحزب الوطنى عشان تلعب بيه فعندك خيار انك تستخدم كل السناريوهات دى مع بعضها عشان تكسب التزوير والبلطجه وشرا الاصوات
ثانيا : عندك كمان الاخوان المسلمين ودول أحلى فريق افتراضى فى اللعبه لأن المفترض انهم جماعه محظوره اصلا ومع ذلك بينزلوا بأسمهم وده عادى لأن الحزب الوطنى بيسيبهم لغرض فلا نفس يعقوب , بس المشكله انهم بيتمادوا فى الغباء السياسى وينزلوا فى الانتخابات بشعار الاسلام هو الحل فى دواير ممكن يكون نصها مسيحيين , والأخوان عندهم سيناريوهاتهم برضه وهى بتلعب فى مجملها على وتر الحس الدينى للشعب المصرى , والراجل الطيب بتاع ربنا اللى بيخدم لوجه الله
ثالثا : عندك شوية أحزاب كده بتكح تراب كحال كل الأحزاب فى مصر لو نزلت بواحد فيهم أخرك ها ينجح منهم اتنين تلاته على مستوى الجمهوريه وده مش من شطارتهم يعنى بس ده عشان حرص الحزب الوطنى حبيب الكل على التمثيل الحر فى البرطمان قصدى البرلمان وايمانهم بمبدأ حرية المشاركه السياسيه فى احزاب منهم ممكن تكون مؤمنه باللى بتعمله أما الغالب فبيعمل سبوبه حزبيه وانتخابيه والباقى هو ولا معارض ولا منيل هو بينزل عشان يكمل اللعبه الافتراضيه جمب الحزب الوطنى عشان اما تضحك الصوره تطلع حلوه
رابعا : المرشحين المستقلين ودول بقى ايدك منهم والأرض ممكن ينجح بعيلته بقى وعزوته وفلوسه وحاجات كده بس اول ما بينجح بيتحول حزب وطنى وش , مع ان الناس انتخبته عشان هو مستقل بس طبعا هو من نفسه بيحول حزب وطنى عشان يضمن انه متبت فى كرسى الدايره ليوم الدين
فى حاجه تانيه نسيت اقولك عليها كمان الوزرا , كل الوزرا فى اللعبه بتاعتنا بيرشحوا نفسهم يمكن طفاسه باين يمكن استغلال لسلطته تقدر تقول , يمكن زيادة الخير خيرين , وطبعا ما فيش وزير بيخسر ها يكسب ها يكسب ايا كانت الوسائل , مش ممكن طبعا الوزير يخسر يبقى شكل الحكومه ايه ساعتها

ايا كانت طريقتك فى اللعب اللعبه بتقفل بسيناريو واحد وهو فوز الحزب الوطنى بأغلبيةمقاعد مجلس الشعب الساحقه الماحقه والحياه ها تبقى زى الفل وسيعم البلد الامان واللى مات فى الانتخابات مات واللى انصاب انصاب واللى اتخطف اتخطف واللى خسر كل فلسوه ماشى واللى كسب ملايين ماشى ويرجع البلطجيه الى قواعدهم سالمين امنين ويعم البلاد السلام وتقعد تتفرج على برنامج مصر النهارده وانت بتشرب كوباية الشاى مع مراتك وعيالك وانت بتتابع مسيرة الانجازات اللى بيكملها الحزب بقيادته الحكيمه , مسيرة الانجازات اللى مش بتشوفها لما تنزل الشارع تانى يوم الصبح , مش بتشوفها غير بالليل وانت بتتفرج على التليفزيون المصرى , اه طبعا مش كله حصرى على التليفزيون المصرى وكل انتخابات وانت طيب


الأحد، 14 نوفمبر، 2010

بحبك يا ريس أكتر من النسوان





مدونى الصخور على كورنيش اسكندريه

الأربعاء، 10 نوفمبر، 2010

التطور الطبيعى للربع جنيه المخروم


وأنا صغير عندى بتاع 8 سنين كده مش من زمان يعنى أول التسعينات كان كيلوا اللحمه ب 10 جنيه وبعدين بقى 11 ولما غلى اوى بقى ب 12 ولما خلاص خلاص يعنى بقى سعره قاتل بقى 16 جنيه , جرام الدهب عيار 18 كان 28 جنيه وعيار 21 كان 32 جنيه ونص , كنت باخد مصروف ربع جنيه فى اليوم ربع جنيه من الورق السليم ده مش المخروم , كان باكو البسكوت اللوكس ب 15 قرش والنايتى ببريزه وكيس الشيبسى الأحمر اللى مرسوم عليه فيل بريال 20 قرش يعنى , والحاجه الساقعه الكندا دراى والسبورت وما ادراكم ماهى السبورت ب30 قرش , واللبان السحرى بشلن اللى هو خمسه قروش ,كان الكراتيه ببريزه وبيطلع فيه بتوع كده كنا بنشترى الكاراتيه عشانها اصلا , كانت العسليه بشلن والعسليه الكبيره اوى ال30 سنتى تاكل فيها يومين بريزه , والدومه من عند عم موسى اللى بيقف قدام المدرسه ببريزه وبنفش البريزه تجيب كيس لب تأكل بيه الفصل كله ونفس الريزه تجيب كيس فشار تقعد تاكل فيه من الفسحه للحصه الخامسه والشوكولاته النوتيلا اللى كان معاها تماثيل بلاستيك كده كنت بحب اجمعها كانت بربع جنيه , الشوكلاته الجيرسى والماكسى اللى مافيش منها اصلا دلوقتى ب 15 قرش , كيلو الفراخ البلدى بسته جنيه ونص وكرتونة البيض برضه بسته جنيه ونص , كان الشلن أكبر من الجنيه بتاع دلوقتى , وكان الريال كبيييير قد كده وعليه نسر كده شادد حيله , أنا ليه مصدعكم بكل ده وبقلب عليكم الذكريات اللى تخلى الواحد يعيط , عشان انا عمرى ما تخيلت انى وانا عندى 26 سنه ها اقعد أحكى الكلام ده اللى كنت متوقع انى احكيه مثلا لأحفادى وأنا عندى 80 سنه ولا حاجه والعيال تقعد بقى تفتح بقها مش مصدقه , وانا عندى 8 سنين كنت بلعب فى حاجات بابا القديمه لقيت برطمان ازاز كبير اوى مليان لأخره عملات قديمه , طلعت العملات لقيت مكتوب 5 مليمات و 1 قرش ومليم وحاجات غريبه اوى كده قلت لبابا ايه العملات دى يا بابا قالى دى عملات قديمه من ايام ماكان مش عارف ايه بكام وايه بكام وقعد يحكيلى بقى عن وقية اللحمه اللى بجنيه ونص والسكر اللى مش عارف بكام قرش صاغ والزيت مش عارف بكام والشاى وحاجات غريبه كده وانا أضحك ومستمتع اوى وأقول ياااااااه ايه ده يا خبر دا الدنيا غاليه اوى دلوقتى يا جدعان دا انا بجيب المصاصه بشلن بحاله والشلن ده كان يجيب بلاوى زمان , السؤال اللى كان محيرنى وعمرى ما سألته لبابا ازاى هو جمع العملات دى , يعنى هو كان عارف ان العملات دى ها تتلغى فجمعها قبلها يعنى ولا ايه بس مش منطقى طبعا هو ازاى عرف قبلها انها ها تتلغى , بعد حوالى 20 سنه دلوقتى عرفت اجابة السؤال ده وعمليا بنفسى دلوقتى انا عندى برطمان مليان برايز وشلنات وريالات مع انهم لسه ما اتلغوش بس البرطمان بيكبر لان العمله بقت غير متداوله هيه موجوده صحيح بس ما حدش بيقبلها خلاص كل سنه وانتوا طيبين , الشلن دلوقتى بقى عايز ميكروسكوب عشان تشوفه والبريزه شرحه والربع جنيه خرموه يا عينى وراح النسر والصقر البقاء , دخلت العملات فى دورة التضخم الربع جنيه المخروم حل محل الشلن وبقى اصغر عمله متداوله دلوقتى زى ما حصل من سنين كتير اوى والشلن حل محل القرش صاغ والقرش صاغ قبلها حل محل المليم بس المره دى التضخم حصل بسرعه أكبر بكتير من المعتاد , كيلوا اللحمه بقى ب 60 جنيه والفراخ ب20 ومافيش حاجه اسمها فراخ بلدى اصلا , جرام الدهب بقى 136 جنيه , والباقى انتوا عارفينه مش ها اصدعكم بيه , وربنا يخلى البرازيل الراعى الرسمى للشعب المصرى اللى لولا اللحمه البرازيلى والفراخ البرازيلى كان المصريين فعليا نسيوا شكلهم , برطمان العملات بيكبر بيكبر وشكلى ها احتاج صفيحه بس الحمد لله عرفت ازاى يبقى عندى برطمان عملات لما ولادى يكبروا ويلعبوا فحاجاتى القديمه يلاقوه واقعد أحكيلهم عن الدنيا وانا صغير كانت رخيصه ازاى , وساعتها طبعا هايكون الجنيه حل محل الربع جنيه والخمسه جنيه حلت محل الجنيه وطبعا ها يخرموا الخمسه جنيه ساعتها ويكون كيلوا اللحمه بقى بألفين جنيه وأدى ولادى مصروف 100 جنيه فى اليوم ويبدأ ولادى يجمعوا الربع والنص جنيه وجنيه فى برطمناتهم بس كل ده لو قدرت اتجوز وأخلف اصلا , بذمتك امتى اخر مره شفت 20 قرش معدن , كل واحد يبقى يلحق يجمع البرطمان بتاعه .

الخميس، 21 أكتوبر، 2010

خمسه وأربعين

تعيش تعيش تموت تموت مالكش ديه

أصل اللى زيك يا ابنى مش قضيه

تعيش خدام لللئام فى الوسيه

لحظة تفتكر انك عليت تموت فى اللحظه اللى جايه



السبت، 16 أكتوبر، 2010

مين اللى حرك حتة الجبنه بتاعتى يا ولاد ال...


التأقلم والتفاعل مع المتغيرات هو ده اساس الحياه على الأرض اللى بيقدر يتغير مع المتغيرات اللى حواليه يكمل واللى ما يقدرش جيم أوفر يطلع برا اللعبه , ألاف الفصائل النباتيه والحيوانيه انقرضت عشان ما قدرتش تلبى المتطلبات المتغيره للحياه حواليها , الجفاف , الحراره, البرد , نقص الغذاء , وجود كائن أقوى , الديناصورات انقرضت بكل قوتها الله أعلم ليه بس بالتأكيد ما قدرتش تكمل

المهم قريت كتاب مشهور جدا فى العالم كله بيتكلم عن فكرة التعامل مع التغيير اسمه من حرك قطعه الجبن الخاص بى who moved my cheese الكتاب بيتكلم عن متاهة عايش فيها فاربن وقزمين عايشين جوه المتاهه على الجبنه , فى يوم يصحوا الصبح يلاقوا الجبنه خلصت , الفيران عشان بتتبع غريزيتها فبدأت على طول تدور على الجبنه فى مكان تانى بس القزمين عشان بيفكروا شويه قالوا نستنى مكاننا بالتأكيد ها تييجى جبنه تانى مكان اللى خلصت , الخلاصه ان فى الاخر القزيمن بيوصلوا لفكره انهم لازم يتحركوا ويدورا على الجبنه فى مكان تانى لانهم لو فضلوا فى مكانهم مستنيين ها يموتوا من الجوع , الخلاصه انهم بيوصلوا لفكرة التفاعل مع المتغيرات المحيطه , تعرفوا ان الصراصير من أقدم الكائنات على سطح الارض عمرها اكتر من 6 مليون سنه , الصرصار قدر يكيف نفسه انه يعيش فى الحر والبرد الرطوبه والجفاف , فى الخشب فى الحجر فى المجارى فى اى حته وخلاص وبيتغى عل ا حاجه اى حاجه بيعيش كائن رهيب الى اقصى درجه كل ده وبيطير كمان قال كان ناقص يعنى , الانسان كمان قدر يعمل كده قدر يعيش فى روسيا وفى ساحل العاج وفى جزر القمر والبرازيل وايسلندا , والكائن المصرى خصوصا اتاقلم احسن من الصراصير تلاقيه فى قصور مارينا وتلاقيه فى عشش الصفيح فى افقر العشوائيات اللى حتى الصراصير هربت منها , بياكل الفول بسوسه والمش بدوده والقمح المشع والفاكهة المرشوشه بكل الكيماويات المحرم استعمالها دوليا والخضار اللى مرو بمية الصرف الصحى , ومع كل ده ما عندوش مانع انه ياكل اللحمه فى الاعياد والفراخ ف المواسم , او يشترى اللحمه بسعر رخيص جدا محليه أو مستورده ويتحمل مخاطره انها ممكن تكون لحمة حمير أو كلاب أو قطط او كائن يعيش فى ماوراء البحار الله اعلم نوعه ايه , وايه المشكله المهم انها لحمه , خلى العيال تاكل , و المصرى برضه هو اللى عايش على أفخر أنواع السيمون فيميه والكافيار ولحم النعام , المصرى اللى بيموت كل يوم فى قطارات وعبارات غير صالحه للأستخدام الأدمى والمصرى برضه اللى بيركب المرشيدس اس 500 والهامر والبى ام الفئه السابعه , المصرى اللى بيتحشر فى التكتك فى اضيق شوارع مصر , والمصرى اللى بيركب البيتش باجى على اوسع شواطئ مصر , المصرى اللى بيعيش هوه وافراد عيلته اللى على الاقل خمسه فى مساحة 80 متر والمصرى اللى عايش فى فيلا الجنينه بتاعتها بس 280 متر , مش عارف جبنة ايه اللى كان بيتكلم عليها مؤلف الكتاب , ايه يعنى صحوا مالقوش الجبنه , المصرى بيصحى كل يوم ما بيلاقيش مواصلات ما بيلاقيش رغيف العيش بيلاقى كيس السكر بضعف الثمن وأنبوبة البوتاجاز حسب الموسم واللحمه بقت للفرجه بس , مابيلاقيش تعليم , ما بيلاقيش رعايه صحيه , مش لاقى شغل , ولو اشتغل يبق بيشتغل نفسه لان مرتبه ما يغطيش مواصلاته اصلا , مش لاقى يجيب شقه يتلم فيها هو وشريكة حياته اللى مش لاقيها برضه ولما بيبص على الصحرا بيلاقيها مزروعه فيلات وقصور بالألاف والألاف مش عارف مين ها يسكنها بس بالتأكيد مصريين برضه .

الجزء الأخير من الكتاب بيوضح فكرة ازاى الأتنين الفيران بيعيشوا مع الوضع الحالى اللى هيه وجود الجبنه الجديده اللى لقيوها وبيكلوا ومدلعين نفسهم لغاية ما تخلص وها يرجعوا تانى بعد كده يدورا حسب غريزتهم لما ها يبقوا مضطرين وهو ده نفس المنطق اللى المصرى ماشى بيه المصرى مش بيتغير غيرلما يجبر على كده مش ها يلبس حزام الأمان غير لما يبقى عليه غرامه قد كده مش عشان مثلا الحزام ده لأمانه هوه حتى ساعتها ها يستعبط ويجيب ايد شنطة ابنه اللى فى الابتدائ ويعملها حزام , الست المصريه اللى بترمى الزباله فى منور البيت اللى هيه عايشه فيه وعلى سلالم العماره اللى ساكنه فيها , ومش ها تهتم بنضافة سلم العماره غير يمكن لما ييجى لبنتها عريس يزورهم فى بيتهم , المصرى اللى مش بياخد دورة الى سى دى ال غير لانهم طلبوها منه فى مصوغات التعيين وحتى بعد ما يخدها بيفضل برضه يستعمل الماوس بايديه الأتنين , المصرى اللى مش بيتقن شغله غير لما رئيسه يقف فوق دماغه , اللى مش بيجمل الشارع غير لما يبقى فيه زياره لمسئول كبير , المصرى اللى بكل بساطه بيعيش حالة رد الفعل عمره ما قرر انه يعيش الفعل , الشعب المفعول به دايما وليس الفاعل , الأقزام بقى فى الجزء التانى من الكتاب بيمثلوا الخيار المنطقى والتعامل الذ كى مع المتغيرات او لا يلدغ مؤمن من جحر مرتين الأقزام مش ها يتبعوا غريزتهم تانى لا المره دى قبل ما مخزون الجبنه يخلص ها يطلعوا يدورا على طرق جديده فى المتاهه ويرسموا خريطه ليها ويكتشفوا مناطق جديده فيها مخزون جديد من الجبنه ويمشوا الموضوع بشكل منطقى , الأقزام بيمثلوا الشعوب المتقدمه اللى اختارت انها تتغير من جواها عشان عايزه تعيش حياه أفضل مش عشان غيرهم بيجبرهم على كده مش عشان حد ماسكلهم الكرباج , سبنسر جونسون بفكرته البسيطه عن التعامل مع المتغيرات وصل لفكره متهيالى كلنا عارفيها اصلا ودى المصيبه لا يغير الله ما بقوم حتى يغيروا ما بأنفسهم , واحنا مش باين اننا ناويين , ماهى الحكومه منينا واحنا من الحكومه وبما ان الحكومه تيييييييييييت فده مش من حاجه غير ان كل واحد مننا من جواه تيييييييييت كبير اوى , طبعا سبنسر جونسون ما سمعش عن الكائن المصرى , تيجى ايه متاهته دى فى المتاهة اللى اسمها مصر يروح فين اقزامه وفرانه دول مع الكائن اللى بيحاول بقاله سبعتلاف سنه يفضل عايش , وعايش ليه مش عشان يحقق حاجه لا ده عايش عشان فى كل يوم يدى فرصه للكبار انهم يمصوا جزء من دمه ويبيعوا حته جديده من جسده ومن ترابه وأرضه , ها اقولك ايه ربنا يستر عرضك يا عم الحاج خليك انت فى الجبنه بتاعتك وخلينا احنا كمان بلاش الجبنه لحسن غليت خليها رغيف عيش على الأقل اللى بناكله مضطرين يمكن نتغير بس مش بكره بالتأكيد اصبر لليوم اللى نصحى ما نلقيهوش ساعتها ها نتغير بس برضه وأحنا مضطرين مش عشان عايزين .

الجمعة، 15 أكتوبر، 2010

أربعه وأربعين

يا غربه يا أم عيون مغربه

سيرتك بتلمسنى ولا ألف سلك كهربا

لياليكى الطويله والفكره المتعبه

كل ما عنك أبتعد ألاقيكى منى مقربه

السبت، 9 أكتوبر، 2010

الغباء السياسى


زى أى مواطن مصرى بيحترم نفسه اشتريت جرنان الجمعه بتاع امبارح مش عشان أقرى الجريده طبعا لأ , عشان اشوف اعلانات الوظايف وملحق السيارات و احرق فى دمى شويه , اذ فى احدى الصغحات لقيت البتاع اللى فوق ده , مش بقول بتاع قلة تقدير يعنى ولا حاجه , لا خالص انا بقول بتاع عشان مش عارف أوصفه فى الحقيقه , الله الله ماشى يا ستى وماله الله أكبر , ايه بقى اييييييييييييييه
يعنى مين حضرتها مش واخد بالى , مديرة مش عارف ايه وعضو ما ادركش ايه , ايوه وبعدين يا ست الحاجه بتبيعى ايه سيادتها يعنى مش فاهم , هل ده اعلان ولا حد صحا الصبح من النوم فرحان بنفسه يعنى فنزل صورته ووظيفته فى الجريده الرسميه وكتب الله الله عشان الحسد يعنى ولا ايه حد يفهمنا يا جدعان احترت صراحه عشان افهم , بس مر بخاطرى ان الغباء ده مش بيطلع غير من ناس معينه فى البلد الحزب الوثنى الديمقراطى اللهم أحفظنا , المنطق بيقولك ان البتاعه اللى فوق دى مالهاش اى معنى غير عند صاحبة الصوره غير انها كاتبه انها عضوه فى اربع جميعات من جمعيات المجتمع اى حد ماشى فى الشارع ممكن يكون عضو فى عشر جمعيات زيهم مش اختراع يعنى ودافعه الاف عشان تعرفى الناس انك عضوه فيهم بالطريقه دى الواحد ها يدفع نص مليون جنيه عشان يكتب اسامى جمعيات المجتمع اللى مشارك فيها وده لا يقدم ولا يأخر يعنى , ليه محسسانى انها اتت بما لم يأت به أحد , بص طبعا هيه كلمة أمين الاعلام فى الحزب الوطنى دى كافيه بتبرير الغباء السياسى اللى عايزله بردعه ولجام , اخدت اسم السيده الفاضله وكتبته فى جوجل والفيس بوك والحمد لله ما خبوش عليا حاجه , لقيت على الفيس بوك جروب اسمه
الجروب الرسمي لمؤيدي فاطمة السباع فيه بتاع40 عضو , تقريبا كده الست الفاضله وجوزها والعيال والعيله والجيران يعنى والجروب ده ليه بقى لدعم الحمله الأنتخابيه للأستاذه اللى هيه مرشحة الحزب الوطنى الديمقراطى فى انتخابات مجلس الشعب فى جنوب سيناء , الست الفاضله ماسكه منصب أمين الاعلام بالحزب الوطنى الديمقراطى , لما يحب أمين الاعلام فى الحزب الوطنى الديمقراطى انه يعمل دعايه لنفسه فى الانتخابات فينشر صوره ليه فى الجريده الرسميه مكتوب فوقها الله الله وشويه كلام لا يودى ولا يجيب تحت صوره ممكن تنفع لألبوم جواز او حاجه زى كده , لازم ساعتها نعرف الاعلام فى البلد دى وصل لفين ومع الدم الجديد فى الحزب الوطنى ان شاء الله ها نوصل لفين ولفين

الاثنين، 27 سبتمبر، 2010

تلاته وأربعين

يا تعيش أسد فى الكون تزيط

يا تكون تعبان ألعبان حويط

أو سلحفه تتفرج من بعيد عامل عبيط

بس ويلك لو تعيش انسان طيب بسيط

الثلاثاء، 14 سبتمبر، 2010

فوزيه متين وأربعتاشر أت ياهو


تحذير : أى تشابه بين فوزيه وأى فوزيه تانيه هو تشابه غير مقصود ... مش انتى يا ماما بلاش استعباط


عرفت فوزيه من كام سنه على الانترنت عن طريق موقع من مواقع التعارف كان ليه شعبيه كويسه فى مصر قبل اكتساح الفيس بوك , على الموقع ده كنت حاطط صوره واحده على البروفايل بتاعى وكانت صوره للتطفيش أكتر منها للجذب لأن الموقع صراحه كنت تحسه مريب الى حد ما , اذ فى يوم فوزيه دخلت وعملت كومنت عل صورتى الوحيده , ده كان كفايه اوى ان الموضوع يتطور لرسايل وميلات بقه وشاتنج , صراحه فوزيه كانت مشكله كانت بتهلكنى من الضحك بس أسلوبها كان رجولى أوى لدرجة مره قلتلها والنعمه انتى ولد وبتشتغلينى , فوزيه قعدت تحلفلى بس انا كنت مقتنع من اسلوب كلامها صراحه انها ولد , وأخيرا قررت انها تفتح الكام عشان تقنعنى , وقد كان و فتحت الكاميرا لحوالى 3 ثوانى كانوا كافيين انى أتاكد انها بنت بس مالحقتش صراحه أخد بالى اذا كانت مزه ولا لأ , طبعا بعد شويه بدأنا تليفونات بقه وكده الغريب ان صوت فوزيه كان فيه بحه غريبه كده زى ما يكون نامت فى الطل وجالها التهاب فى الحنجره عارفين صوت شيرين أه يا ليل كده , وده اللى كان محسسنى برضه انها ولد وبيشتغلنى , وصلنا لمرحله تلت مكالمات فى اليوم مكالمة الصبح صحيتى ولا لسه رحت الشغل ولا لسه ومكالمة نص النهار روحت من الشغل ولا لسه ها تقعدىعلى النت بالليل , ومكالمة بالليل بقى ايه اللى مسهرك وخش نام بقى عندك شغل بدرى

كان لازم طبعا ننتقل للخطوه اللى بعدها نتقابل بقى عشان ما يتخربش بيتنا فى التليفونات بدل ما فودا فون مطلعه احلى سبوبه على قفانا , فوزيه صراحه حاولت تعمل تقيله شويه ودى خطوه تتحسبلها جدا , وده لو عرفنا ان فوزيه خريجة أحد المعاهد ذات السمعه الدوليه فى الشقط والتزبيط والبنات هناك مش بيحتاجوش أكتر من صباح الخير ولو زمزقت اوى معاك يبقى ديتها ساندوشت وحاجه ساقعه , المهم أتفقنا على يوم وميعاد الساعه 3 قدام مكانى المفضل فى المواعيد سينما أمير , وده مكان استراتيجى على فكره اول حاجه ممكن ندخل سينما تانى حاجه فيه قدامها جاد بتاع الساندوشتات وعليه واحد بتنجان ايه وجمبك خروب أمال تذرب شوية سوبيا ايه وورا السينما فيه جونينه حلوه كده متداريه لو طلبت معاكم كده يعنى واخدلى بالك , المهم وصلت متأخر عن ميعادى كالعاده وتخيلت طبعا ان فوزيه ها تكون مستنيانى وخدوا بالكم أنا كل ده ما أعرفش شكل فوزيه غير طشاش من التلت ثوانى بتوع الويب كام , وقفت قدام السينما كان فيه بنت واقفه لوحدها وواضح انها مستنيه حد وبتبص فى الساعه وبتتلفت حواليها كانت بنت ستايل صراحه وأموره كده وبسكوته , لخبرتى ببنات المعهد اللى فوزيه متخرجه منه قلت انى دى مش ممكن فوزيه , استنيت شويه وفضلت اراقب البنوته دى وهيه على نفس الحال , شكرت ربنا وقلت يا سلام لو دى هيه فوزيه فعلا يبقى موز موز موز بجد , مشيت خطوتين ووقفت قدامها مساء الخير انتى فوزيه , البنت تنحت كده وأنا مركز أوى ومستنيها تقول أه واذ بها بتقول لأ فى حاجه , قمة قمة الاحراج مش عايز اقولكم البنت بصتلى زى ما اكون لسه نازل من الطبق الطاير حالا , أنا اسف أوى معلش اصلك تشبهى جدا لحد أعرفه وسحبت نفسى ورجعت لركنى البعيد جمب السينما , يا خساره بجد ليه ما طلعتش فوزيه , ايه اللى اخرها البت دى كده الله يحرقك , قلت اتصل بيها وخلاص يا خساره الدقيقه , الو يا فوزيه انتى يا فين يا ماما انا هنا بقالى نص ساعه , فى السكه والله خمس دقايق خلاص , انجزى والنبى يلا

دقايق وظهرت بنت لأول وهله لازم تعرف انها فوزيه حسب التصور المنطقى , نضاره سوده كبيره من ام 5 جنيه فى المنشيه , مكياج أوفر أوى , اللبس ألوانه كتير بس للأمانه كانت عامله توليفه حلوه برضه للحق يعنى ذوقها حلو , شاورتلى وهيه جايه ناحيتى , اتحركت ناحيتها انا كمان وانا بألقى نظرة حسره على البنت اللى ما طلعتش فوزيه , ازيك , الحمد لله , انت عامل ايه , كويس اتأخرتى ليه , مواصلات وكده بقى ها نروح فين , يعنى ممكن نتمشى شويه وبعدين نقعد فى اى حته , لا ما بحبش امشى تعال نقعد على طول ,طبعا حسيت بالغدر اول ما قالتلى مش بمشى يعنى عايزه تقعد والقعاد بفلوس ماشى ماشى لما نشوف اخرها, طيب ماشى تحبى تقعدى فين , كنت متخيل فوزيه ها تقولى على البورصه مثلا أو قهوة فاروق , لقيت فوزيه بتقولى على اسامى كافيهات ما اعرفش عرفتها منين دى أنا ما اعرفهاش أصلا , حسيت ان فوزيه ناويه تقلبنى من اولها كده بفتح ال ق وكسر اللام, المشكله انى لو عودتها على كده من أول مره ها تتعود على كده على طول , بس معلش اول مره ادلعها وخلاص , اخدتها واتمشينا لحد سيتى كافيه فى شارع سيزوستريس , وقعدنا فى الدور التانى , انتى ليه لابسه النضاره دى يا بنتى ما تخلعيها بقى , عادى يعنى ادى النضاره , صراحه النضاره كانت مخبيه كتير هيه فوزيه ما كانتش وحشه صراحه عادى يعنى , بنت مصريه جدا خمريه مصابه بأنيميا البحر المتوسط بتلبس حاجات كتير كده فى ايديها وشنطه كبيره شايله فيها عزالها , بس كانت سكر والله دمها خفيف جدا ده اللى خلانى ما ازعلش على العزومه , تانى مره اتقابلنا صممت اننا نتمشى بقى عشان ما تاخدش على الكافيهات والكلام ده اللى ها نوفره من فودا فون يروح للخواجه كوستا ولا ايه اتمشينا عند القلعه وقعدنا هناك وغلست علينا البت بت التييييييييت بتاعت الورد اللى هناك دى وضربنا سندوتشين كبده وعصير قصب فى المنشيه, تالت مره قررنا ندخل سينما , اتقابلنا طبعا عند سينما أمير وسيبتها تختار الفيلم أختارت فيلم هابط ومنيل بنيله بس بيؤدى الغرض فيه افوره ومشهدين تيت وكده وجو مناسب للنيه السوده اللى كنت ناويها ,القاعه كانت الا من كام كابل كده متنتورين فى المكان أخدنا كرسين فى جمب القاعه كده , والفيلم بدأ قلت لفوزيه ما تيجى نعمل زى الحبيبه , استعبطت طبعا وقالتلى يعنى ايه , قلتها يعنى اعمل انى بحبك واعملى انك بتحبينى , وكده يعنى , كنت فاكر فوزيه عمليه أكتر من كده بس لقيتها بتقولى وليه تعمل ما انت بتحبنى فعلا , ضحكت وقلتها انت شايفه كده يعنى , اه طبعا , ماشى يا فوزيه زى ما تشوفى يعنى , مديت ايدى ومسكت ايديها بس ما حستش بالأحساس اللى كنت متوقعه خالص , اكتشفت ان ايد فوزيه أخشن من ايد عم محسن البواب يمين شمال مافيش فايده وبعدين فوزيه ما كانش عندها سينس كده , زى الكرسى اللى قاعد عليه , اتقفلت صراحه وطنشت موضوع مسك الايدين ده وما يليه من تبعات , المشكله ان فوزيه كان فيه حد مديها فكره انها الملكه فوزيه بنت الملك فؤاد مش فوزيه بنت الحاج فتحى , اتقابلنا كتير , عادى يعنى من غير أفوره خالص , شويه كده لقيتها بتستعبط بقى وبتعيش الدور وطبعا مش طالباها خالص , المره قبل الاخيره اللى اتكلمنا , ايه يا فوزيه فينك , موجوده اهوه انت اللى مش باين , لا خالص انا فى الدنيا اهو انتى فاضيه بكره, لا بكره ما ينفعش خالص , طب ايه نظامك يوم التلات , لا برضه خارجه مع البنات , ممممممممم طب خلاص يبقى الخميس بقى ان شاء الله , معلش بقى مش ها ينفع الاسبوع ده خالص مواعيدى مش متزبطه بص لو فضيت ها اكلمك أنا ونتفق , طيب يا فوزيه ماشى خلاص انتى عارفه مواعيدى عموما زبطى كده وكلمينى يلا سلام , الفار صراحه لعب فى عبى البت دى بتستهبل مواعيد ايه اللى مش متزبطه هيه البت دى وراها حاجه اصلا وبنات مين اللى خارجه معاهم فوزيه اصلا ما تعرفش بنات , استعباط واضح يعنى , المهم انها فعلا ما اتصلتش الاسبوع ده ولا الل بعديه ولا اللى بعديه وأنا كمان ما كلمتهاش لانى حسيت ريحه غريبه فى الموضوع

بعد شهرين كده من غير كلام , لقيت اسم فوزيه بينور ويطفى على الموبايل , استغربت اوى , الو فوزييييييييييييه ايه يا ماما ازيك , الحمد لله فينك يا ندل هوه انا اللى لازم اسال , شغل والله يا فوفو بقه انتى عارفه أخبارك ايه , انا كويسه واحشنى والله , وانتى كمان بس انتى اللى مش فاضيه , اه دا انت زعلان بقى , ههههههه لا خالص بس انتى اصلك بتستعبطى صح ولا غلط , عادى والله ايه اللى زعلك بس , بصى من الاخر انتى اخر مره كلمتك حسستينى انك الأميره ديانا وأنا يا بنتى مش دودى ( الجمله دى أقتبستها من فيلم تقريبا او مسلسل حاجه كده ) وانتى يا فوزيه مش ديانا برضه عموما ولا يهمك , ماشى يا سيدى خلاص انت فاضى امتى , بصى انا الاسبوع ده زفت خالص الاسبوع الجاى اكلمك ونزبط ونتقابل , خلاص ها استنى تليفونك سلام , بما انى جدع الاسبوع اللى بعديه كلمتها بس فوزيه ما كنتش بترد خالص , واضح ان موضوع ديانا ده زعل فوزيه أوى وهوه لازم يزعلها صراحه لو عندها دم , وانا كنت شاكك فى الموضوع ده , يلا بقى بس انتى اللى بوظتي الدنيا يا فوزيه عل فكره , أنا صعبان عليا بس الكابتشينو وساندوشتات الكبده و عصير القصب وتذ اكر السينما , الا عمرك ما عزمتينى على باكو شيبسى , بنضاراتك السوده دى عاملالى ناديه لطفى فى فيلم النظاره السوداء حد يلبس نضاره سوده فى السينما , ما علينا , يلا فوزيه تفوت ولا حد يموت .

السبت، 4 سبتمبر، 2010

أتنين وأربعين

اوعى يا شاطر تفتكر انك عايش
مش ده حلمك اللى عالأرض ممدد وفارش
مش دى أفكارك اللى عملتها حلق وغوايش
دايبه فيك أيه بس دا انت اللى جواها بايش

الأربعاء، 1 سبتمبر، 2010

ولا ايه




يجد بجد التهييس ملا الكيس ودلدأ , دلوقتى عندنا الجبهة الشعبيه للتغييراللى أطلقها البرادعى مستمره فى حملة المليون توقيع عشان تغيير الدستور وضمان انتخابات ديموقراطيه وتمثيل حقيقى فى الأنتخابات ده غير أيمن نور وحمدين صباحى اللى كل واحد فيهم برضه بيحمل حملته المستقله اللى ليها نفس المطالب , كلام جميل أوى الناس دى بتطالب بحق هيه محرومه منه , قوم ايه تصحى الصبح تلاقى جمال مبارك هوه كمان عامل حمله لجمع مليون توقيع عشان ترشيحه ويفط يمين وملصقات شمال وأطبع يا جدع , الله الله الله ايه يا جدعان اللخبطه دى طب وهوه جمال محتاج حملة دعم للأنتخابات طب ماهو لو جمال كان مرشح الحزب الديمقراطى حزب تعداد أعضاء الحزب الوطنى البورقراطى العريق فالمليون دول مضمونين ايه كده بفرقعه صباع , والراجل فيه كل المواصفات لا محتاج دا ابن الريس يا جدعان توقيعات ايه اللى محتاجها والنعمه انتوا بتهزروا , المشكله بقى تصحى بعد بكره الصبح بقى تلاقى عمك صفوت الشريف بيقولك ان بابا حسنى هوه المرشح المتوقع لخوض الأنتخابات الرئاسيه وده بأجماع الحزب وده فى حالة موافقته لخوض الأنتخابات , لا حول ولا قوة الا بالله , طب ايه اييييييييييييه منين الناس حبايب أنكل جمال حبيبى قاعدين يصرفوا ملايين ويلموا توقيعات ويحطوا نفسهم فى مواقف وحشه والناس بدل ما تكتب موافقتها على دعم مبارك يغيروا البيان ل لا أوافق على ترشيح جمال مبارك , ويقولك ماشى معلش وهتافات ويا جما ويا جمال وبعدين تقولى فى الأخر ان الحزب ها يرشح بابا مبارك , هى حاجه من اتنين يا ده قمة الغباء السياسى يا ده قمة الذكاء واللعب بالبلد والشعب فى لعبه طويله ممله ما بتنتهيش طب أفرض مبارك دلوقتى والراجل صحته أحسن منى ماشاء الله قرر انه ها يرشح نفسه يحصل ايه دلوقتى حرام عليكوا يا ناس عايزين الراجل يزعل مع ابنه يعنى طب ده كلام , طب الراجل اللى مكلف نفسه شوف كام ألف جنيه ده وحاطط يافطه 10 متر على الكورنيش عشان خاطر أنكل جمال ياخد زومبه طب يرضى حد الكلام ده برضه , بس انا بحب اطمن صاحب اليافطه وبقوله ما تخافش يا عم الحاج فيه ناس بتقول ان دى مناوره سياسيه وفى اليوم القبل الخير لقفل باب الأنتخابات الريس ها يعلن عدم مشاركته فى الأنتخابات والحزب ها يعلن جمال مرشح وكده يبقى انت فى السليم , وعموما يعنى سيبك انت لو قفلت معاك زود بس على اليافطه نبايع أنكل جمال ووالده الريس وكل عام وانتم بخير ويبقى انت كده مسكت العصايه من النص وكده كده الريس ولا ابنه أهى فى بيتها ولا ايه .

الثلاثاء، 31 أغسطس، 2010

واحد وأربعين

يا غربه يا أم عيون مغربه
سيرتك بتلمسنى ولا ألف سلك كهربا
لياليكى الطويله والفكره المتعبه
كل ما عنك أبتعد ألاقيكى منى مقربه

السبت، 28 أغسطس، 2010

تخاريف صيام


حد شاف فيلم البحر بيضحك ليه بتاع محمود عبد العزيز ونجاح الموجى , فيلم كده لما تشوف مشهد منه هاتصنفه كفيلم مقاولات ونفسك مش ها تطاوعك تشوفه , بس مره وانا بدور فى ال500 قناة بتوع النايل سات على اى حاجه اشوفها لقيت الفيلم ده عند مشهد معين , محمود عبد العزيز أتخنق من حياته وعيشته فصحا فى يوم الصبح , لقى مراته راح ضاربها حتت قلم من غير ما يتكلم ولا كلمه وراح نازل رايح الشغل , دخل على الموظفين زمايله راح ضارب كل واحد منهم قلم وبعدين دخل مكتب المدير وراح مديله قلم برضه محترم , وراح نازل رايح لأصحابه فى المكان اللى بيقعدوا فيه وراح ضارب كل واحد فييهم قلم برضه , بعد ما فش غله من كل الناس اللى خانقينه , طلق مراته وساب شغله ودار فى الشوارع يشتغل حاوى , بذمتك مش نفسك تعمل زيه مش قصدى تشتغل حاوى يعنى , بس ما فيش يوم كده حسيت انك نفسك تصحى الصبح تخبط على جاركم اللى بيرمى الزباله فى مدخل العماره وتديله قلم , وتنزل للميكانيكى اللى جمبك اللى نازل ضرب فى الواد اللى شغال معاه طول النهار اشى شلاليت وبونيات وتضربه قلم , وتكمل بقى على سواق الميركوباص اللى بيغلى الأجره كل يوم على مزاجه , ومديرك فى الشغل اللى مؤهلاته أصلا ما تخليهوش يدير عربية كبده ده لو عربية الكبده ليها مدير يعنى , وزميلك ابن التييييييييت اللى ما بيعملش حاجه طول النهار غير نقل الكلام وتدبير الأسافين المحترمه , والراجل اللى بيدخل فى وسط طابور العيش ما تعرفش بيجى منين وتلاقيه طلع بطاوله عيش بحالها وانت مش عارف تجيب بنص حنيه , والموظف اللى بياخد الرشوه بوش مكشوف زى الأتاوه بتاعت بلطجيه نجيب محفوظ بس بلطجيه نجيب محفوظ ما كانوش موظفين حكومه , والواد والبت اللى قاعدين على كورنيش البحر حتى فى رمضان وعاملين فيلم للكبار فقط دول بقى باللذات عايزين ينضربوا بس على قفاهم كده عشان تدلقهم فى الميه , ما نفسكش تجيب الواد الرخم التكن اللى فى كل العبر اللى بيقدم برنامج ضحكنى شكرا وتحلقله زلبطه وتلبسه البوكسر بتاعه فى راسه , ما نفسكش تمسك ايناس الدغيدى و خالد يوسف ومعاهم غادة عبد الرازق وسميه الخشاب , وتشترى ب3 جنيه سبرتوا وسخ وتولع فيهم سوا , ما نفسكش تضرب ميلودى مان وعم أنور قلمين محترمين وتضرب بوبى بس مش على وشها , ما نفسكش تضرب اللى قتللوا خالد سعيد فى ميدان عام , ما نفسكش تضرب اللى سرقوا أراضى البلد عشان يبنوا عليها قصورهم , واللى سرقوا فلوسنا وسمموا أرضنا وميتنا , حتى الدوا بقى فاسد , ما نفسكش تدخل على رئيس الوزرا فى مكتبه وتديله قلم محترم كده تطلع فيه غل السنين , ووزير التعليم اللى كان السبب انك ما دخلتش الكليه اللى كان نفسك فيها عشان عشر درجه ولا دكتور الماده فى الكليه اللى بقالوا تلت سنين بيشيلك الماده عشان شفته فى وضع يحاسب عليه القانون مع زميلتكم فى سكشن 3 , ولا ولا ولا مش نفسك تنزل تصرخ كده فى الناس اللى ها تموت بعضها فى الطوابير والزحمه وسايبن ناس تانيه تبنى ملاعب جولف وما عندناش حد فى البلد بيعرف يلعبه أصلا , يلا أدينا بنفضفض , اهى دى باين اللى بيسموها تخاريف صيام

السبت، 21 أغسطس، 2010

أربعين

رحال فيكى من يوم ما جيت
لا عرفتلى يوم عنوان ولا بيت
أسألك يا دنيا سؤال بسيط
أنا ابنك صحيح ولا أنا لقيط

الجمعة، 13 أغسطس، 2010

مائدة الرحمن كمان وكمان


رمضان يمكن هوه الأهل والبيت ولمة العيله على ترابيزة أو طبيلة الفطار , رمضان فى الغربه والغربه هنا نسبيه قصدى وانت لوحدك بيبقى حاجه صعبه اوى وانت قاعد تفطر لوحدك احساس وحش اوى زى ما تكون منبوذ , اول رمضان ليا بعيد عن البيت ماكانش بعيد أوى يعنى , كان فركة كعب ولا اسمها فردة كعب ولا ايه مش عارف , كان فى اسوان , على بعد 1000 كيلو من بيتنا , كانت اول سنه ليا فى كليتى فى جامعه جنوب الواد فى اسوان كان عند 16 سنه ساعتها , اسوان بلد جميله اوى , بلد صغيره نصها اجانب صحيح بس بلد لسه بكر لسه روحها ماماتتش تحس فيها بروح رمضان فى المدن الصغيره , التقارب بين الناس والود والمحبه , فى المدن الكبيره رمضان بيفقد شكله غير من شوية الزينه اللى متعلقه على الجامع ده ولا على محل الملابس ده , اسوان كان لسه فيها الروح الحميمه لرمضان ده غير بقى ان اسوان اصل التمور اللى بتميز رمضان , اول مره فى حياتى اشوف كمية أنواع التمور المختلفه اللى شفتها ف اسوان دى , الكلام ده كان من عشر سنين تقريبا كانوا بيسموا التمور باسماء زى شارون وصدام وليلى علوى ويسرا وحاجات غريبه كده تمر ليلى علوى كان اغلى حاجه صراحه , السنه دى ما نزلتش السوق صراحه ما اعرفش التمر بقت اسماؤه ايه دلوقتى بس بالتأكيد ها تلاقيها بقت أوباما وتامر حسنى وشاكيرا , المهم اول رمضان ليا بره البيت ف اسوان كانت تجربه ما تتنسيش بجد رمضان كان جا اخر الشهر والفلوس اللى كانوا بيبعتوهالى من البيت تقريبا خلصت , وساعتها كنت مقيم فى المدينه الجامعيه فى اسوان ودى كانت منتجع سياحى 7 نجوم , كنا 6 بنى ادمين فى اوده 2 متر فى 2 متر , المهم بما ان مافيش مونى يبقى مضطرين ناكل فى مطعم المدينه الجامعيه وده بيعمل اكل بقه ايه تمن تسع عشر نجوم كده , كتله بيضا كده اللى هيه رز المفروض مع حاجه برتقانى كده عايم فيها حاجات سودا عمرى ما عرفت ايه ده صراحه بس لما كنت بسال فى المطعم ايه ده يقولولى طبيخ , بس عمرى ما حد قال ايه نوع الطبيخ ده يعنى وطبعا عمرى ماجرؤت استكشف ما هو كنهه , ورغيف عيش كده قطره بتاع 10 سنتى بس ايه سلاح دمار شامل تخبطه فى الحيط يردلك تانى , العيال فى المدينه الجامعيه كانت بتشيله تحت المخده كسلاح يعنى ينفع فى اى خناقه , كانفيه كمان كائن غريب كده مشوه الملامح بيحطوهلنا مع الاكل ساعات يوم الجمعه والسبت المفروض انه لحمه يعنى , وما اكدبش عليكم حاولت معاه اكتر من مره عشان انتزع منه اعتراف انه لحمه بس ما قدرتش , اول يومين رمضان مع نوعية الاكل دى كان شئ صعب فعلا , تالت يوم واحنا قاعدين فى شقة 16 أوضه 2 بنناقش ها نعمل ايه فى موضوع الفطار ده , اذ دخل علينا الواد براشوت وده اسمه وصفته فى نفس الوقت , الواد قالنا وهو بيهمس كده وبيتلفت حواليه ان فيه مطعم سياحى فى اسوان بيعمل مائدة رحمان بس ايه كباب وكفته وايه درمغه , أنا عن نفسى ماكنتش لحد دلوقتى اعرف حاجه عن مائدة الرحمن غير انها مكان بيتقدم فيه اكل للفقرا فى رمضان , بس اذا كانت مائدة الرحمن فيها كباب وكفته يبقى بالتأكيد اللى عندنا فى المدينه الجامعيه هنا اقل بكتير من مائدة الرحمن ومنزلتنا بالتأكيد اقل من الشحاتين , عموما قررنا بالأجماع اننا ننزل ناكل فى مائدة الرحمن دى وعلى رأى الواد باراشوت البلد اللى ما حدش يعرفك فيها تييييييت و أجرى فيها , المغرب كانت على 6 وتلت تقريبا نزلنا على اسوان الساعه 5 وربع تقريبا توجهنا الى المطعم الفاخر اياه ويا لهول المفاجأه ومع ان لسه فاضل اكتر من ساعه على الفطار مائدة الرحمن كانت كومبليت يا معلم , لما سالنا ولاد الحلال قالولنا ان المائدة دى بتتملى من بعد العصر على طول , وهكذا راحت احلام الكباب والكفته , ,بس يا معلم ومشينا هائمين على وجهنا فى المدينه بندور على ايتها ما ئدة رحمان وأكتشفنا ان اسوان فيها مؤائد رحمن كتير جدا فمشينا ننقى واحده نضيفه وتليق بمقامنا كده , قال اقرع ونزهى , المغرب كان خلاص يعنى واغلب الموائد كانت اتملت فعلا , ربنا هدانا لمائدة رحمن ظريفه ولطيفه كده وقريبه من الكورنيش والجو فيها طراوه وفل , جدعت انا والجرمأ اللى معايا اختلينا ترابزتين , الترابيزه كان عليها كوز ميه وكوبايات عصير وطبق تمر واطباق رز وبطاطس وملوخيه وقلب ما المغرب يضرب بثوانى كل واحد اتحط قدامه جزء من فرخه كده مش بطال , الناس اللى كانت قاعده جمبينا مش شحاتين ولا حاجه كان فيه ماس لابسه بدل وكان فيه ناس تحسهم موظفين وشباب وولاد , حسيت ان موائد الرحم د مش للشحاتين ولا حاجه لا الفكره اكبرمن كده , المدفع ضرب وانطلق البشر يأتون على ما فى الاطباق , وتصدقوا الاكل كان حلو والأغرب بقه انى لأول ولأخر مره فى حياتى يومها أكلت الملوخيه وانا مش بأكلها على فكره بحب ريحتها بس ممكن اخلى ماما تعمل طبق عشان اشمه , احلى حاجه بقى واحنا فى وسط المعمعه واذ عدى من جمبنا فوج سياح بيتفسحوا فى الحناطير وهات يا صور يا معلم , فل او الواحد ضمن انه اتفضح رسمى كده على غلاف مجلة التايمز , اكلنا وشربنا والأكل كف وفاض الحمد لله , وبقى نشاطنا اليومى فى رمضان اننا ننزل نجرب كل يوم مائدة رحمن جديده وأكلنا فى المائده اياها بتاعت المطعم السياحى الفاخر وفعلا كان الفطار عليها كباب وكفته بس يومها فطرنا على المائده قبل المغرب لأن المائده فى وش باب المطعم وقبيل الأذان بدقيقتين اذ بعربيه مرشيدس تقف امام باب المطعم نزل منها احدى اخواتكم اللبنانيات لابسه فيمتوجيب مع لا شئ تقريبا من فوق , طبعا بنت حلال أخدت ثواب افطار الصايم من المطعم وفطرتنا كلنا , المفروض كنت أكتب المقال ده بعد الفطار عشان ما افتكرهاش ربنا لا يباركلها تصدقوا وحشتنى بفكر أنزل السنه دى افطر على مائدة الرحمن حد جاى , وربنا يعيدوا علينا وعليكم بالخير واليمن والبركات وأبو تريكه كمان .

الخميس، 15 يوليو، 2010

تسعه وتلاتين

فى بلدى جلد تمساح وشرابات مهلهله
ناس عايشه الحلول وناس عايشه الأسئله
فيه فقر مدقع عايش فى فحش الغنا
حاكم بيوعد بعيد وهو البعيد أصل المشكله

الأحد، 11 يوليو، 2010

عن غباء النظام


فى خلال شهر واحد ومن خلال موقع الفيس بوك تم تنظيم ثلاث وقفات احتجاجيه صامته ناجحه , لم يعد ادانة قتلة خالد سعيد هو الغرض الوحيد لهذه الوقفات ولكن خالد سعيد أصبح رمز لثورة عاشت فى جوف جيل بأكمله ولد تحت ظلام نظام يعيش على كبت الحريات وتغييب الشعب ومسح هويته ومحو ثقافته , فى نظام يزداد فيه أثرياء النظام ثراء يوم بعد أخر على حساب عشرات الملايين من هذا الشعب يزدادون فقرا ومعاناة لتوفير سبل الحياه الأدميه فى تحت مظلة من القمع والهاء الشعب عن المطالبه بحقوقه المنهوبه , لصالح مجموعة من الأشخاص يمتصون مصر يوم بعد يوم بمباركة نظام بأكمله لا يدير مصر بما يحقق مصالح الشعب بل يدير مصر بما يحقق مصالح جمعية المنتفعين من مصر , فتوزع عليهم المناصب وتسن من أجلهم القوانين , يتصرفون فى مقدرات الشعب وموارد الدوله بما يحقق مصالحهم ويزيد مليارات فوق ملياراتهم , مسخ مشوه نتج من تزاوج السلطه بالمال و30 عاما من حكم وصل بالدين المحلى لمصر الى 841 مليار جنيه , وبلغت ديون مصر الخاريجه وحدها لغت ديون مصر الخارجية 33 ملياردولار حيث يبلغ نصيب كل مواطن مصري نحو 9527, فى الوقت الذى تملأ حكومتنا الدنيا كلاما عن معدلات التنميه الغير مسبوقه اللتى ليس لها أساس من الصحه فقد أتت من الأستدانه وعمليات البيع الغاشم للقطاع العام ومشاريع مشكوك فى جدواهاا يخرج رئيس الحكومه ليقول أن الدين مازال فى الحد الامن , الحد الأمن لماذا لا أعلم , ربما الحد الأمن لأستكمال عملية أمتصاص خيرات مصر وبيع أراضيها وأملاكها وشركاتها ومصانعها بأبخس الأسعار أمام شعب قد أصابه ما اصابه من الفقر والأمراض والجهل والقمع والتعذيب والفساد الأدارى ومحو للهوية والثقافه , حتى اصبح الشعب فى غيبوبه ليس مقدر له أن يصحو منها , عندما نزل الألاف من الشباب للشوارع فى وقفه سلميه صامته لا يفعلون شيئا ولا ينتون شيئا غير التعبير عن أن ارداة الشعب مازالت موجوده لا يمكن محوها , كان 90 % ممن شاركو ليس لهم اى صلة بالعمل السياسى وممن لم يشتركوا فى مظاهرة من اى نوع طوال حياتهم فتيان وفتيات وأمهات وشيوخ وأطفال ولكن هذا النظام بضعفه وهشاشتة أضعف من أن يتحمل هذا عندها قررت الحكومة بغبائها المعتاد معاملتهم كالمجرمين ومواطنى الدرجه الثالثه كما تعودت دائما ان تعامل أبناء هذا الوطن طوال 30 عاما سوداء, فنزل النظام الى الشارع بكامل عتاده من ظباط القمع والتعذيب ومئات المخبرين وجنود الأمن المركزى اللذين حقا لا يعقلون اى شئ مما يحدث حولهم يتحركون وفقا لما يأمرون به غير مدركين لأى ابعاد منتقون ممن فقدوا القدره على الأدراك فى هذا الوطن , تعرض النظام بالحصار والمضايقات والتهديد والتحرش بالفتيات والضرب والسب بأقذر الألفاظ , فعل النظام فعلته الحمقاء غير مدرك هو أيضا كجنوده بأنه بهذا قد فض بكارة ألاف الشباب ممن لم يتعرضوا لمثل هذه المواقف بطريقة مباشرة لأول مره وأنه قد حول الألاف من الشباب غير المهتمين بالسياسه الى ناشطين سياسيين من الدرجه الأولى , الموقف يخرج من سيطرة النظام مما سيضطرهم لزيادة القمع وزيادة جرعات العنف ما سيؤدى بهم فى النهاية لثورة شعبيه لا يعلم أحد نتيجتها الا الله , ربما قد فقد هذا النظام سمعه وبصره فما عاد يميز الحقائق ولا يرى الا غروره , لا يدركون بغفلتهم الى اين يمكن ان يصلوا بمصر , اتمنى من الله ان يفيقوا ويستغلوا الفرصه الأخيره للأصلاح قبل ان يفقدوا كل شئ رغما عنهم

السبت، 10 يوليو، 2010

الاثنين، 5 يوليو، 2010

تمانيه وتلاتين


كاسين غرور وعنطزه وشربتهم
من كأس الذل سنينى سقتنى مرهم
لا ها تطول الجبال يا ولدى ولا تبقى زيهم
أخرك مترين تراب وها ترقد تحتهم



السبت، 19 يونيو، 2010

بروفة النهايه



ما حدث الجمعه الماضيه 18-6-2010 فى مصر تحديدا فى القاهرة والأسكندريه وأكثر تحديدا فى الأسكندريه , هى حاله جديده من الصحوه , تلك الوقفه الصامته التى حدثت الجمعه الماضيه هى من أكثر الأفكار الحضاريه فى التعبير عن الرأى , انطلقت من الفيس بوك عن طريق الشباب لتصل لجميع الفئات التى شاركت فى الوقفه من أباء وامهات وقفوا جنبا الى جنب بجوار ابناءهم من الشباب , رأينا أطفال رأينا عائلة بأكملها من أب وأم وأبنهم الصغير , يثبت الفيس بوك مرة أخرى انه أقوى من الأحزاب المصريه وأقوى من جرائد المعارضه , مايفعله الفيس بوك يخضع تحت فعل السحر , ولكن الأكثر سحرا هو التجاوب الشعبى والتجاوب هنا هو فى اساسه ليس فقط غضبا وأحتجاجا على موت خالد سعيد , بل هى وقفة فى وجه نظام كامل مشوه , ما حدث وما يحدث فى الحقيقه هو ما يمكننا تسميته بروفة النهاية , هو بداية ادراك للشعب أنه لو أتحد فلن يردعه اى قوى أمنيه غاشمه , فالأمر هنا أكبر من هذا بكثير هى اردادة شعب بأكمله , يظن الحمقى أن الأمر ليس أكثر من هوجة شوية عيال , الحق ان الله قد وضع غشاوة على عيونهم ليستمروا حتى النهاية فى ظلمهم حتى تفاجأهم النهايه القادمه لا محاله , خالد محمد سعيد ليس هو الضحيه الأولى لقضايا التعذيب سبقه ألاف ولكن ربما خالد سوف يكون هو القشه التى سوف تقصم ظهر البعير , هم يستمرون بالكذب ومع كل كذبه تكشف , يخرجون علينا بكدبة أكبر واكبر واكبر فى كل مره حتى اصبحوا مجرد أثواب مهلهلة أمام الناس يحتمون وراء الألاف من جنود الأمن المركزى الذى هم بالأساس أفراد من المفترض انهم جندوا لخدمة الدوله لا لخدمة أفراد وأحزاب , لن أطيل عليكم , ليس هناك أعظم مما قاله الله تعالى
بسم الله الرحمن الرحيم *( حَتَّى إِذَا فَرِحُوا بِمَا أُوتُوا
أَخَذْنَاهُمْ بَغْتَةً فَإِذَا هُمْ مُبْلِسُونَ فَقُطِعَ دَابِرُ الْقَوْمِ الَّذِينَ ظَلَمُوا وَالْحَمْدُ لِلَّهِ رَبِّ الْعَالَمِينَ )* صدق الله العظيم الانعام 44 - 45

الخميس، 10 يونيو، 2010

أنا أعرف , أنا أطنش , أنا ميت


سبحان الله ميز الانسان بالقدره على الأدراك , الأدراك هنا هو القدره على تحليل موقف معين وأتخاذ القرار تجاهه فى ظل وجود معطيات معينه ,وسبحان اللذى اعطانا الحواس وأعطانا العقل اللذى يصل بالأدراك الى المعرفه الكامله , فالمعرفه هى اعلى مراتب الادراك , عندما بعث الله بالرسل كان وظيفتهم هوه توجيه الناس لأدراك وجود الله والوصول بهم الى يقين المعرفه بالله , فاذا وصلت الى المعرفه فهنا انت تتحمل مسؤلية المعرفه , وهى المسؤوليه اللتى حملها الأنسان وحده فى الكون , فأن تدرك أن صاحب عملك لا يعطيك حقك كاملا ويستغلك وتظل تعمل بنفس العمل متحججا بالظروف وما شابه , أنت هنا وصلت للمعرفه ولم تتخذ اجراءا تجاه معرفتك فكأنك هنا أصبحت حيوان لأن لم تستغل معرفتك , عندما تدرك أن التعليم اللذى تتلقاه لا جدوى منه وتظل تتلقاه , عندما تدرك ان لديك أسوا حكومات العالم وتظل تتذلل لها لتعطيك بدلا من أن تطالب بحقك , عندما تدرك أن حاكمك له فى الحكم ربع قرن من الزمان وتظل تنتظر منه الاصلاح فتذهب لتنتخبه فأنت هنا اصبحت أقل من الحيوان بكثير فحتى الحيوان عندما يرى ما سوف يضره مثل النار فهو يتراجع , عندما تتنازل عن ادراكك ومعرفتك وتصبح كالحمار مساق بالضرب والأهانه على أمل ان يعطيك صاحبك بعضا من البرسيم المتعفن بالأساس فتأكل وترضى , أن تدرك من هوه عدوك اللذى يسمم طعامك ويغتصب أرضك ويقتل أولادك وييتم نساء وطنك وتتعامل معه بل تصادقه بل تنتظر منه معونه فأنت قد وصلت لمرحله لم أجد وصفها فى القاموس حقيقة هى كلمة لابد من أضافتها للغه , ففوق أنك حيوان تعش لتعش وكفى بل أقل وفوق أنك خائن لنفسك ووطنك ودينك فأنت خائن لبشريتك , بشريتك اللتى أعطاها لك الله لتكون ذلك البشرى اللذى يمكنه التفكير يمكنه الأعتراض اللذى يملك تحديد مصيره , منذ أيام شاهدنا أسطول الحريه اللذى كان متوجه الى غزة بغرض فك الحصار جزئيا بنقل المعونات , احدى سفن الأسطول واللتى سميت بأسم راشيل كورى , الأسم اللذى أعاد للأذهان ذكرى صاحبة هذا الأسم , راشيل كورى الفتاة أمريكية المولد والجنسيه واللتى أدركت ووصلت للمعرفه فتصرفت بما املته عليها كونها بشريه , راشيل كورى التى أدركت أن اسرائيل تغتصب وطنا بأكمله بأرضه بموارده بمقدراته بشعبه وأدركت ان اللذى يساعد اسرائيل هو وطنها أمريكا , أدركت أن هؤلاء الأطفال انما يموتون برصاصات أمريكيه , فتحركت راشل لانها ادركت أيضا انها كأمريكيه تقف صامته فهى اذن جزء من ألة القتل الوحشيه , فذهبت للأرض المحتله عاشت معاناة الفلسطينين وضعت الشال الفلسطينى على كتفها ووضعت الحجاب على رأسها وعبرت معهم الحواجز ونامت فى البيوت المهدمه ووقفت أمام الجرافات الأسرائيليه , حتى جاء اليوم اللذى يودع فيه جسد راشيل الدنيا تحت احدى الجرافات الأسرائليه وهى تقف فى مواجهة الجرافة لتمنعها من هدم منزل فلسطينى , وتبقى روح راشيل وذكراها , لأن راشيل أمنت , أمنت بقضيه ليس محاباة لعرقها ولا دينها أو لقوميتها ايمناها كان أكبر بكثير من هذا أمنت بالعطيه التى اهداها الله اياها أمنت بكونها بشر وتصرفت من هذا المنطلق , كنت سوف أنهى الموضوع عند هذه النقطه ولكن عند بدأت اكتب وصل الى خبر هو فاجعة فى الحقيقه , منذ يومين بالأسكندريه , توجه الشاب خالد محمد سعيد صبحى الى أحد مقاهى الانترنت بمنطقة كليوباترا , حيث فوجى بعدد من المخبيرين يقتحمون المكان ويطلبون من الموجودين أبراز تحقيق الشخصيه ثم قاموا بتفتيش الموجودين بدون وجه حق مستعملين مسمى قانون الطوارئ وعندما أبدى خالد أعتراضه على ما يحدث قام أحد المخبرين بتقييده من الخلف لشل حركته، وعندما حاول خالد الخلاص منه قاموا بطرحه على الأرض وركله في البطن والصدر، وقاموا بسحله واصطحابه إلى أحد المنازل المجاورة لمحل الإنترنت , وواصلوا الاعتداء عليه بالضرب المبرح والركل بأقدامهما في مختلف أنحاء جسده، مما جعله يفقد الوعي ونزف سيلا من الدماء من أنفه، واعتقد المتهمون أن هذه هي تمثيلية من المجني عليه، فحاول أحدهم إفاقته بضرب رأسه في ترابزين سلالم العقار المشار إليه ما أدى لحدوث كسور بالجمجمة التي أودت بحياته , وأكد عدد من شهود العيان لجريدة الشروق ، أن واقعة الاعتداء كانت على مرأى ومسمع من الموجودين بالسيبر والمارة بالشوارع، مشيرين أن الضرب والاعتداء استمر لأكثر من 20 دقيقة متواصلة وسط توسلات واستغاثة ودموع المجني عليه , كما ذكر أحد الشهود أن المتهمين قاما باصطحاب المجني عليه وهو جثه هامدة إلى ديوان قسم شرطة سيدي جابر، ثم فوجئنا بعد أقل من 15 دقيقة بالمخبرين يعيدان جثته مرة أخرى إلى مكان الواقعة وتركوها مسجاة على الأرض، ثم قام أحدهما بالاتصال بسيارة الإسعاف لإخلاء مسئوليتهما .
كيف يمكننا تصور ما حدث وقد حدث ليس تحت ظروف الأحتلال أو الحرب بل حدث حيث من المفروض أنك أمن على ارضك وعرضك ومالك وروحك ,حيث من المفترض انك على أرض بلد , لم يقف خالد أمام جرافه أو امام دبابه أو او بنادق أليه جاهزة لتقضى عليه , هذه المره اصبح الأمر أهون من هذا بكثير , كل ما فعله خالد هوه أنه ادرك أن ما يحدث خطأ وتصرف كبشرى وأعترض فمات , بهذه البساطه لا أكثر , هل هذا ما وصل اليه امرنا , هل سكتنا وسكتنا وسكتنا وتخلينا عن كل أدراكنا ومعرفتنا وتخلينا عن حتى أن نكون بشر حتى لم يعودوا يتوقعوا مننا لا فعل ولا كلام ولا شئ , فيكفى أن تبدى أمتعاضك فقط لتقتل بنفس بساطه كتابة الكلمه , لن أحدثك عن السفر بلادا وبلادا او أن تقف ا امام المدافع أو تتعرض لأطلاق الرصاص أو أن تبيت بالعراء لشهور أو أن تجوع أو ان يموت أحبائك أمامك وأنت عاجز حتى عن مواراتهم التراب أو أن تموت غريبا عن أرضك وأهلك أو أو أو أو , هل يمكن أن أطلب منك فقط أن تتحقق من كيانك , لست اطلب منك ان تتحقق من كونك تتنفس أو تأكل أو تشرب أو تذهب لمباراة الأهلى والزمالك لترفع راية التعصب أو تجلس تشاهد بترقب كم سيفوز المتسابق ببرنامج لعبة الحياه أو تخمن من تكون هى فتاة أعلانات ميلودى القادمه أو تبعث بكلمة حلم لقناة ام بى سى منتظرا ان تتغير حياتك, أطلب منك أن تتحقق من عقلك هل لازال يؤدى عمله الأساسى هل تفكر هل لازلت بشر أم ان عقلك يؤدى وظائفه اللا اراديه فقط و حقيقة الأمر انك فى موت سريرى لن تصحو منه على الأقل فى هذه الحياه

سبعه وتلاتين

من تحت الترابيزه خيرها منباع والحمار عارف
مقلوع جذورها ومسلوبه دورها والحمار شايف
هالهليبه والنهيبه والسليكه الحمار موالف
ليبيع رفوفها ويجيب ضرفها الحمار حالف

الثلاثاء، 1 يونيو، 2010

احترس التحشيش ضار جدا بالصحه


- جريدة الأخيار:-

قامت وزارة الداخلية بالأمس ممثله فى جهاز مكافحة المخدرات بأحباط عملية لتهريب المخدرات على حدود مدينة الأسكندريه فى قضيه من أكبر القضايا فى تاريخ جهاز مكافحة المخدرات وتم القبض على مجموعه من المهربين, و المضبوطات عباره عن ستة أطنان من الحشيش المغربى الفاخر درجه أولى ومبالغ ماليه وأسلحه ناريه من أعيره مختلفه



* بعدها بخمسة أيام - الأسكندريه *

حسنى : صبح يا مصرى

المصرى : مساء الفل يا حسنى , شد كرسى وأقعد ياض

حسنى : ايه يا معلم أخبارك ايه , بقالك اد ايه فى اسكندريه

المصرى : يا دوب لسه من أول امبارح , انت اخبارك ايه

حسنى : والله حاجه بت تيييت الشغل زفت والبت خطيبتى هباب , والحشيش شاحح والدنيا مش لذيذه خالص , ما الاقيش معاك قرش ولا مسمار ولا أى حاجه

المصرى : منييين ما انت عارف ماليش فيه

حسنى : مش عارف فيه ايه الواحد بقاله كام يوم بيبرم على أى حتة حشيش مافيش أنقرض , حتى العيال اللى بجيب منهم كلهم قافلين موبلاتهم , مش عارف ايه اللى حصل

المصرى : ما انت مسطول صحيح ها تعرف ازاى , يا ابنى بيقولك الحكومه ظبطت تموين الحشيش بتاع باقى السنه .

حسنى : ازاى بس الحكومه عمرها ما تعمل كده أبدا

المصرى : عمرها ما تعمل كده ليه يعنى , مش الحشيش ده مخدرات ودى الحكومه ايه الغريب فى ان الحكومه مسكت تجار حشيش

حسنى : يا مصرى انت مش واخد بالك حكومتنا انصح من انها تعمل كده , انت عارف لو الناس مالقتش الحشيش ها تعمل ايه

المصرى : عادى يا حسنى يعنى هيا جات على الحشيش يعنى بناقص يا أخى

حسنى : بناقص ايه بس يا ابنى السكر ينقص مش مهم الزيت تمنه يزيد عادى , اللحمه ما نعرفلهاش طريق ماشى , كل ده بنفسين حشيش أخر الليل بيتنسى انما تخيل بقه لما الحشيش ذات نفسيته مش موجود , دى البلد تولع الناس ها تنسى ازاى , لو الناس ما عرفتش تنسى ها تفوق وتفتكربلاوى الحكومه وساعتها ها تبقى خراب , الراجل اللى عمل زبطية الحشيش ده واضح انه عايز يمهمز الحكومه

المصرى : والله بتفكر برضه لسه ياض يا حسنى , الا صحيح هوه مش انت كنت قلتلى انك بطلت حشيش

حسنى : أه ما أنا بطلت , دلوقتى خميس وجمعه وفى الخروجات والمناسبات بس

المصرى : عالبركه



* بعدها بأسبوعين – القاهرة *

المصرى : صباح الفل يا كوكى

كوكى : مساء العسل يا معلم , حمد لله على السلامه كايرو منوره , ايه الاخبار

المصرى : فل والله يا معلم الحمد لله , شويه كده وشويه كده

كوكى : تمام , اومال فين يا عم موضوع الحشيش اللى قلت لبك تعمله على أحيه , يا جدع لازم الحكومه تحل المشكله الوضع بقى صعب خالص

المصرى : والله انشغلت بقى معلش , انتم برضه الحشيش لسه شاحح عندكم

كوكى : يا معلم ده الناس قربت تنسى شكله , ده فيه واحد دلوقتى بيعمل النفس ب 5 جنيه تروح عنده تلاقى الناس واقفه طابور لحد أخر الشارع

المصرى : يا راجل هيه وصلت لكده , اومال انتم عملتوا ايه فى اسكندريه من يومين

كوكى : العيال ضربوا تقريبا مش عارف , استنى الواد نصر أهوه

نصر : صبح كوكى صبح مصرى

المصرى : أخبارك ايه يا معلم

نصر : الحمد لله , كنا لسه فى اسكندريه من يومين بس الواد حسنى ده طلع سيس , جابلى قرش ب 60 جنيه ابن اللذين , ومش عارف ده ايه اصلا شكلها نشارة خشب على حنه

المصرى : طب وأخدتها منه ليه

نصر : يا عم ده القرش دلوقتى بقى ب 300 جنيه ده لو لقيته أصلا

المصرى : أقولك أشتكى حسنى لجهاز حماية المستهلك عشان بيغش فى المواصفات القياسيه المصريه للحشيش

نصر : يا عم حماية مستهلك مين دا تلاقيهم همه نفسهم بيدورا على حشيش ومش لاقيين



* بعدها بأيام كتيييييييييييير *


- جريدة المصرى النهارده : -

نظمت الجبهة الشعبيه للتحشيش اليوم الخميس , قعدة أحتجاجيه للمطالبه بدعم أسعار الحشيش فى السوق المصريه بعد وصولها الى معدلات غير مسبوقه وذلك لنقص المعروض من السلعه عن احتياجات السوق المحلى


- جريدة المستور : -

أعلنت جبهة ( فلة السوجاره حمرا ) اليوم عن أنها ستنظم مسيرة أحتجاجيه غدا بوسط العاصمه يتبعها اعتصام لحين نظر الحكومه فى مطالب الجبهة وقد طالبت الجبهة بدعم الحشيش وأضافته لقائمة السلع التموينيه لضمان وصوله لمستحقيه


- جريدة الشروء : -

أعلنت وزارة الزراعة فى مؤتمرها اليوم عن مستقبل الزراعه فى مصر تشجيعها للمستثمرين على زراعة الخشخاش وذلك لتحقيق الأكتفاء الذاتى من الحشيش فى السوق المحليه ذلك وقد كشفت الوزراه عن أبحاثها فى مجال الزراعات المحميه لنبات الخشخاش فى الصوب المجهزة


وكالات أنباء مختلفه : -


- اعلنت الغرفه التجاريه اليوم أنها ستجتمع مع مستوردى الحشيش لمناقشة وضع الضوابط والمحددات للألتزام بالسعر العالمى للحشيش وذلك بعد أنخفاض سعر الخام الأفغانى عالميا


- أعلنت الهيئة العامة لجمعيات حماية المستهلك عزمها طرح مشروع جديد للمواصفات المحليه القياسيه للحشيش يتضمن عقوبات رادعه للمخالفين


- أفتتح أمس السيد وزير الصناعه المصنع الجديد لأنتاج الحشيش واللذى يعتبر قمة ما وصل اليه التقدم العلمى يعمل المصنع على ثلاثة خطوط انتاج تنتج 15 ألف طربة حشيش سنويا منتجه حسب المواصفات العالميه



..................... أنتهى البيان