الأحد، 22 مارس 2009

أحيه بقى عندك سنه


الشهر ده مدونة احيه هيه بقت كده يبقى بقالها سنه بتقول أحيه , اول ما بدأت كان نفسى أكتب حاجات جوايا ومش مهم حد يقراها أو يشوفها بس نوع كده من التنفيس عشان الواحد ما يتجنش ولا يحصله حاجه , كنت عايز أقول حاجات كتير أوى بس ما تخيلتش انى عايز أقول كل ده والأخطر أنى حاسس دلوقتى أنى لسه ماقولتش حاجه والل عايزه أقوله أكتر بكتير أوى , يوم ما دخلت على بلوج سبوت عشان أسجل عليها ويبقى عندى مدونه ساعتها ما أكدبش عليكم كنت عاطل رسميا , متخرج من بتاع 9 شهور ولا حاجه خلصت ورق الجيش بتاعى زى أى أبن بار من أبناء مصر اللى برضه لسه عاطلين , ولفيت بشهادتى على بتاع 30 مكان بيشتغلوا فى التخصص بتاع شهادتى , والحمد لله ما لقيتش فى أى مكان فيهم شغل , فجبت الشهاده بتاعتى وحطيتها فى درج المكتب التحنانى تحت كل الكتب القديمه اللى أنا أنا نفيتها فى الدرج ده , وقلت أحيه يا جدعان والله ما أنا شغال بأم الشهاده دى , فيه ناس كتير بتقول ان انتشار المدونات ده حاجه واحد من أسبابها زياده معدل البطاله بصوره كبيره جد وزيادة معدل العنوسه كمان بصوره كبيره جدا ,ماشاء الله 60 فى الميه من المدونات أصحابها بنات , ده ممكن يكون حقيقى لحد ما , بس الحقيقه أن انا لما بدأت المدونه كان عندى كام موضوع أساسيين كده متغصين عليا حياتى كعاطل أولا و كمصرى ثانيا , بعد ما بدأت المدونه بكام شهر أشتعلت , مش فى مجال تخصص شهادتى طبعا , المفروض ان ده كان يحل المشكله لو البطاله هيه السبب بس , بس اللى حصل انى بقه عندى مشكلات كمصرى أولا وكشاب كادح ثانيا , لو قعد بمرتيه ده عمرين فوق عمره ولا ها يتجوز ولا ها يحقق نفسه كوحده بشريه منتجه ليها الحق فى تكوين كيان منفصل , وأعيش بقه ما أنا بقالى 25 وعشرين سنه مأجل حياتى بس نقول ايه طلع ان أنا المفروض أأجل حياتى كمان 25 سنه ده اذا ماكانش 50 , لأن الشاب اللذيذ مننا عشان يكوم نفسه أه يكوم مش يكون ويعمل كيان وأسره وعيشه وحياة طبيعيه يعنى من بتاعة اللى أسمهم البنى أدمين دول , ده معتمدا على نفسك يعنى ان شاء الله , ده بعد أعتمادك على ربنا ومرتب الحكومه لو انت شغال فى الحكومه وده يا دوب يكفيك فطار الصبح فى الشغل ومواصلاتك وانت جاى وأنت مروح , أو القطاع الخاص اللى ها يمص دمك ولا كأنك عبد أيام الجاهلية, وساعتها ممكن تزود على الفطار والمواصلات علبة سجاير أل أم كل يومين و وتى شيرت وبنطلون من العتبه أول الشهر , عشان تبقى شاب كول كده تليق بالقطاع الخاص ,ربنا يخليلك الحاج أبوك بقه اللى ممكن يختصرلك بتاع 10 سنين ويجيبلك شقه و5 سنين كمان ويجهزك وسنتين كمان لزوم الشبكه والذهب غالى الأيام دى وأنت سيد العارفين غير كده يبقى قدامك من 10 الى 17 سنه ان شاء الله وتلبس دبل , المهم انها ما طلعتش أحيه واحده ولا أتنين ولا ألف حتى , ده طلع عدد متنامى لا محدود عشان تحسبه عايز معادله من 10 مجاهيل ولا أينشتين نفسه ممكن يسلك معاها , أهم حاجه أنى بحس براحه غريبه جدا وأنا بهلفط وببعبع كده بالكلام بحس راحه لا يضاهيها الا دخول الحمام بعد زنقتك تلات ساعات فى أشارات وسط البلد فى القاهرة , لا فيه أحساس كمان جامد أوى لما لقيت ان فيه ناس بتدخل تسيب تعليقات ما بالكم انها تعليقات حلوه كمان أو لو حتى شتيمه أحساس لذيذ جدا أنك تلاقى حد يقرا الكلام الفارغ اللى انت بتكتبه ده لا وكمان تعب نفسه ودخل كتب كومنت وبتاع ده كلام كبير أوى , أحساس زى ماتكون بتبعت رسايل لسكان المريخ بعلبة التونه اللى انت خارمها ومركب فيها فتله عشان ما عندكش سلك وأخيرا سكان المريخ زهقوا منك وردوا عليك بعد ما زهقوا من عبطك حتى لو كان ردهم ده فى صورة صوت أبيح ما كنتش تعرف أنه ممكن يصدر من الأحبال الصوتيه الرقيقه للمريخيين , أفتكر انى قعدت فتره كبيره أول ما بدأت المدونه دى ما قلتش لناس من أقرب أصحابى أنها بتاعتى مع أنى كنتى بحاول أرمى اللينك فى سكتهم كده , حتى شخصيتى خليتها مبهمه شويه الى حد ما مش عشان حاجه على فكره أحنا حلوين أوى بس كنت عايز أخليها كده عشان أدى أنطباع محايد للى بيقرا من غير ما يكون أى أفكار مسبقه عن الشخص اللى كتب الكلام ده , حتى أصحابى كنت عايز أعرف رد فعلهم على الكلام من غير ما يعرفوا انه أنا, كان بيعجبنى أوى رأيهم لما حد يتكلم عنها وأنا معاه ويقول مثلا بس والله دماغ الواد بتاع أحيه ده أو شفت الموضوع البيض اللى على أحيه , دلوقتى الحمد لله ربينا زبون وفيه بتاع أربع أو خمس بنى أدمين بيدخلوا على المدونه , الله أكبر مش عايزين قر , متشكر متشكر متشكر أوى أوى اوى لكل الناس اللى قلتلى كلامك حلو أوى أول مابدأت وعملوا حاجات ما كنتش أتخيلها والناس اللى شتمت وغلست عليا حبايبى وأصحابى , ربنا يقدرنى السنه الجايه دى أن شاء الله وأكون أغلس وأغلس , كبرتى يا أحيه وبقى عندك سنه خلاص بدأتى تمشى أهوه شويه كده وتتكلمى وتقولى أحيه بصوت عالى بدل بابا وماما , كل سنه وأنتى طيبه يا أحيه

تسعتاشر

وحدى على القمر أملأ أوراق الهجرة لكى أستقر
أتملل أحيانا فأخرج عدستى السحريه والى الأرض أطيل النظر
للأن لم يظهر المهدى المنتظر
لا مفر على القمر سوف أستقر

الخميس، 12 مارس 2009

فيفا فوزيه



تحذير : أى تشابه بين فوزيه وأى فوزيه تانيه هو تشابه غير مقصود ... والنعمه

فوزيه كانت بنت عاديه ويمكن نظلم الكلمه لو قلنا انها عاديه , فوزيه كان تحت العادى بشويه , فوزيه عرفتها فى الكليه , اول مره شفتها فى محاضرة الكيمياء العضويه , والمفاجأه انها كانت معايا فى السكشن اللى انا الولد الوحيد فيه , ها تقولو لوحدك فى سكشن كله بنات طب ده ميه ميه , لكن بما انى ديك البرابر فى السكشن فكانت مسؤليه , حلو القافيه دى ولا مش عارف كانوا بيسموها ايه فى النثرالمهم فككم منها , كان فيه معايا فى السيكشن بنات جامده صحيح بس عمرى ما لفت نظرى غير فوزيه , فاكر أول مره كلمتنى كنا فى المعمل قالتلى يا كابتن ممكن تنزاح شويه عشان أعرف أحط الأدوات بتاعتى , شوفتوا كده رومانسيه , فاكر أول مره قررت أكلمها وكنت حالق دقنى ولابس الحته اللى على الحبل , قولتلها فوزيه ممكن المحاضره اللى فاتت بتاعت الأناتومى , فاكر بصتها ليا بأستحقاروهيه بتقولى وانت ليه ما حضرتش المحاضره ولا احنا نحضر ويطلع تييييت أهلنا وأنتوا تاخدوا المحاضرات على الجاهز ساعتهاما كنتش مركز هيه بتقول ايه كنت مركز أوى فى شفايفها بتتحرك ازاى وهيه بتتكلم يا سلام ولفت نظرى انها عندها فوق شفايفها الحلوه دى شنب أكبر من شنبى حبتين , يا سلام مش بقولكم مش عاديه , فاكر لما كنا بنقعد ناكل فى كافيتريا الكليه , ها تفطرى يا فوزيه , أه طبعا , تحبى أجيبلك ايه , أنت ها تجيب ايه , انا ها اجيب اتنين فول وأتنين فلافل , تبص لى بعينيها اللى مش باينه من تحت حواجبها وتقولى طب زيك بس خليهم خمسه وخمسه , خمسه ايه يا فوزيه , خمسه فول وخمسه فلافل يا أخى فيه ايه , مافيش يا فوزيه بالهنا والشفا , يا سلام عليها وهيه بتلف السندوشت كده بطريقه لولبيه وتروح ضارباه فى قطمه واحده , وبعدين نطلب كبايتين الشاى ونحبس , تحفه وهيه بتشرب الشاى وبتعمل صوت كده , مش ناقصها والله غير انها تتك-- ولا بلاش خليها تتجشأ بالفصحى , يا سلام عليها وهيه بتعمل نفسها بتطلع الفلوس من الشنطه كده عشان تحاسب وأنا اقولها عيب يا فوزيه انتى قاعده مع كيس جوافه ولا ايه , مع انى عارف ان فوزيه ما حيلتهاش فى الشنطه غير حنيه ونص عشان مواصلاتها وهيه مروحه , بص كنت ببقى مبسوط , ما شفتوهاش بقه يوم بقه ما تبقى جايه الكليه مزبطه شكلها تلاقيها حاطه بتاع أزرق كده لونه شبه الزهرة بتاعة الغسيل حاطاه فوق عينيها وساعات تحت عينيها كمان عادى ما فيش مشكله , والبنطلون الجينز الغريب اللى لو مستر جينز ذاته (اللى أخترع الجينز ) لو شافه كان بقه ها يدلدل فى الأرض من الجينز العجيب اللى مش ممكن تعرف هوه فين الخياطه فيه , الصراحه فوزيه بشكلها بألفاظها اللى زى وشها كانت بيئه أيه ون , بس بحبها يا جدعان , فاكر يوم ما الدكتور فى السكشن مسح بكرامتها الأرض عشان شرحت الضفدعه من غير أدوات تشريح , يومها الدكتور طردها بره السكشن , تخيلت انها هاتكون بره طبعا واقفه منهاره وبتعيط , قلت قشطه دى فرصتى أطلع انا بقه أمسح دموعها وشويه سهوكه وأديها 5 حنان أبقى كده زبطت الكلام , وزوغت من السكشن وطلعت أدور على فوزيه , ويالهول المفاجأه لقيت فوزيه واقفه بتضحك مع واحده صاحبتها ولا فى الدماغ , أستغربت قلتلها يا فوزيه معلش ده دكتور عبيط فكك منه أوعى تزعلى , فتحت بقها بضحكه ولا يوسف بيه وهبى فى زمانه لما كان بيعمل دور الشيطان , قالتلى يا ابنى ده متخلف فكك منه ده عبيط دكتور ايه , يا فوزيه يا جامده دا انا لو مكانك كنت عيطت بقى الراجل يمسكك موشح تهزيق ربع ساعه وفى الأخر فكك , بجد حبيتها , بقيت بحلم بفوزيه كل يوم وحفلتين كمان مش حفله واحده , بس دايما حتى فى الحلم فوزيه كان أخر أحترام الصراحه , أفتكر يوم ما وافقت أننا نروح السينما وده طبعا بعد محاولات شهرين , ليه بقه أقولكم , فوزيه فيه فيلم جامد أوى فى السينما ما تيجى نفك من المحاضره ونحضر حفلة الساعه 1 , ساعتها فوزيه بصت لى زى ما أكون قتلت أبوها طلعت صوت من بقها كده متهيألى يندرج تحت قائمة الأصوات المحظوره دوليا وقلتلى سينما أنت بتستعبط , ليه يا فوزيه عادى يعنى ما الناس كلها بتروحى السينما , لا ياأخويا السينما دى قلة أدب , ليه يا فوزيه عادى يعنى ده حتى فيلم محترم ,هوه كده انا مش بروح سينما غير مع بابا , بابا ايه بس يافوزيه حد يروح السينما مع أبوه وايه أخر فيلم بقه روحتيه مع بابا , مممممم كان فيلم تفاحه بتاع ليلى علوى , يادى المصيبه يا فوزيه ده من أيام السينما الصامته وبعدين فيه أب يدخل بنته فيلم تفاحه برضه وتقوليلى عيب ..بصى يا بنتى أحنا ندخل حفلة الساعه واحده وبنرجع على سكشن النبات الساعه 4 وتمام كده , يا سلام بس حفلة الساعه واحده دى بيبقى كلها عيال هربانين من المدرسه وحاجات كده , وانتى ايه اللى عرفك بالكلام ده يا فوزيه مش بتقولى انك مش بتروحى سينما غير مع بابى , لا يا ابنى ما همه بيقولولى , همه مين اللى بيقولولك دول يا فوزيه , مالكش دعوه , كده يا فوزيه ماشى المهم ها تروحى ولا ايه , ماشى بس انا ما فطرتش , ماشى نروح نضرب اى حاجه قبل ما ندخل السينما لسه بدرى ( بموت فى طفاسة أمك يا فوزيه ) , طب ها ندخل فيلم ايه , ها ندخل فيلم السلم والثعبان , اه مش ده بتاع الواد هانى سلامه عسل الواد ده , عسل ايه بس ده حتى ما بيعرفش يمثل , يا عم روح ده كفايه عينيه , انا مش عارف كل بت تقولى عينيه مش عارف انا مالها عينيه نفسى أعرف .. ده حول يا ماما,لا وحياتك ده قصر ديل يا , يا ايه يا فوزيه , يلا يا فوزيه نقوم عشان نلحق ها تخلينى أندم من قبل ما نروح , نزلنا وسط البلد وفوزيه طبعا عايزه تاكل , ما انا بعلف فى اللى خلفوها من يوم ما عرفتها , تأكلى ايه يا فوزيه , تعال نروح ناكل كشرى , كشرى على الصبح كده يا فوزيه , اه يا عم نفسى فيه يلا بس , رحنا محل كشرى أنا طلبت طبق صغنون كده على قدى فوزيه طلبت طبق من السوبر وأول ما جه الطبق لقيتها مسكت ازازة التوم وكبت نصها على الطبق بتاعها , الله ينور يا فوزيه حد يعمل كده برضه يا بنتى , أه يا ابنى الثوم ده اجمد حاجه اصلا من غيره الكشرى مالوش طعم , يا فوزيه شطه ماشى انما توم ليه وبعدين نص ازازه ليه هيه طفاسه وخلاص الكشرى بقه شوربه, اسكت يا ولا انت ما تفهمش أصلا فى الاكل , طبعا بعد ما خلصنا أكل وفوزيه مسحت طبق الكشرى طبعا حتى أخر حبة عدس بجبه , وأنا طبعا دفعت الحساب , ساعتها كان ماشى جمبى برميل ثوم مخلل مش بنى ادمه ( ده لو كان التوم بتخلل), طبعا انا كنت مخطط ندخل السينما فيلم السلم والثعبان بقه وحركات ورومانسيه يمكن البت تحس على دمها ونعمل حركتين من اللى العيال الهربانين من المدرسه بيعملوهم فى حفلة الساعه واحده الضهر ولا احنا مالناش نفس , لكن ربنا يسامحك يا فوزيه قتلتى فيا كل أحلامى الرومانسيه واللى مش رومانسيه وازاى ها يبقى فيه رومانسيه وانتى ريحت التوم اللى طالعه منك كفيله انها تهرب الصراصير اللى فى صالة السينما , مافيش سينما يا فوزيه أبقى روحى مع أبوكى بقى خليه يدخلك فيلم هجوم المريخ ده لو كان الحاج بابى يعرف يعنى ايه مريخ أصلا , الله يخرب بيت أيامك يا فوزيه .