الخميس، 27 أغسطس 2009

فوزيه أم رجلين حلوه (مع الأعتذار للاستاذ رأفت الميهى)

تحذير : أى تشابه بين فوزيه وأى فوزيه تانيه هو تشابه غير مقصود ... فكوكم منى

أحكى عن ايه ولا ايه ولاايه عن شعرها الكاريه اللى أحلى من كاريه ميج رايان ولا عينيها السود اللى أسود من صامويل أيتو , ولا أحكى عن أبتسامتها اللى أحلى من ابتسامة نيكول كيدمان , ولا ضحكتها اللتى كادت أن تقارب سعاد حسنى , ولا عن القوام اللى فاق قوام الأخت شاكيرا وهند رستم مضروبين فى الخلاط مع بعض مش القوام اللى عايزه بردعه ولجام على رأى عبد الفتاح القصرى , ولا المناخير والشفايف اللى أحلى من كاترين زيتا جونز مع الأعتذار وكل الأسف للأخ الرفيق مايكل دوجلاس , مش ها أتكلم عن كل ده يا جدعان ها أكلمكم عن الجديد بقه , رجليها اللى ما ينفعش أقول زى رجلين اى حد لا العكس هوه اللى ممكن يمشى أنك تشبه رجلين جوليا روبرتس مثلا او جينيفر لوبيز بأنهم يشبهوا رجل فوزيه فأنت كده بتهلوس وما شفتش رجل فوزيه كويس , أول مره شفتها كانت لابسه البدى الأبيض اللى يهوس أصلا على المينى جيب الروز على الكاوتشى الصغنون اوى اوى اللى يادوب محتوى رجلها المنمنه اللى تقريبان مقاسها 22 , شكلها حسسنى أنها جايه تلعب ماتش تنس بس ماتش حامى أوى , فوزيه كانت جميله بطريقه تخوف الواحد أنه يقرب منها أصلا , اللى حصل فعلا انها عملت موجه من السخط فى الكليه مش من الرجاله طبعا لاه من البنات , لأن البنات فى الكليه بقوا مهما الواحده منهم عملت برضه الولاد ما بقالهمش شغله غير أنهم يقعدوا يتنحوا فى الرايحه والجايه ده غير طبعا الكلام اللى بيسموا بيه بدن البنات , شايفه البنات يا ماما , دا أنا ماشى مع شبشب , ده انا ليا الجنه انى لسه مكمل معاكى , ده غير انها ما اكتفتش بكده لأه أصبحت هيه رائدة ومجددة المينى جيب أز فجأه كده أتنين من بعد شهرين يمكن من بداية الدراسه لقينا بنتين من صحابها اللى كانوا بيلبسوا عاد يعنى لقيناهم ضربوا المينى جيب همه كمان البت ماريان والبت سمر,وبقى عرض مستمر كل يوم نصبح الصبح على طقم المينى جيب دول وهمه ماشيين مع بعض مما زاد من العته لدى الرجال والسخط لدى الفتيات , الواحد بقى لما يقعد مع البنات بقى يسمع كلام غريب , شفتى فوزيه لابسه ايه النهارده , شفتى الجيبه شفتى البدى , الحياه فى الكليه كلها بقت صعبه ما بقاش فيه بنى أدم فى الكليه ما يعرفهاش , وأنا ما أخبيش عليكم الحياه فى كليتنا ناشفه على الأخر والعيال مش متعوده على كده , مش عايز أقولكم بقه كمية العيال اللى بقت بتحاول تتكلم معاها لدرجة أن بقه فيه ناس بتجيلها من بره كليتنا أصلا , أنا صراحه فى الفتره دى ألتزمت الصمت تماما الموضوع بقى أوفر أوى , الحكاية بقى عايزه دخلت متسستمه كده مش أى هرتله والسلام , قبل امتحانات الترم الأول كده بكام أسبوع كنت قاعد فى وسط الكليه مع واحد من الدفعه الجديده بتاعت السنه دى كان معانا فى الجواله أسمه محمد , طبعا فوزيه كانت قاعده فى مكانها هيه وشلتها ورا الكشك بتاع مكتبة تصوير الورق , كنت بتكلم مع الواد محمد اللى معايا ده عن الكليه والبنات وبتاع وطبعا أخدنا الكلام لفوزيه ولقيت الواد بيقولى على فكره البت دى أنا أعرفها من الثانوى , نعم تعرفها ازاى يعنى , أعرفها كانت معايا فى درس الكيميا , يا سلام بتتكلم جد , أه والله , طب وهيه جامده كده من أيام الثانوى , ياااااااااه يا ابنى ده أستاذ الكيميا كان ها يبطل تدريس بسببها , ده كانت بتيجى بمينى جيب أقصر من كده والعيال بقه تقعد توقع الأقلام والكتب تحت الترابيزه بتاعت الدرس وينزلوا يجيبوها واللى بينزل ما بيطلعش يا معلم ده الأستاذ نفسه كان بيوقع الطباشير وينزل برضه يا عينى ساعات ما كانش بيعرف هوه بيدرسلنا كيميا ولا أحياء , طب يا ابنى مادام انت تعرفها طب ما تقوم كده تعمل اى حركه , يا عم فكك أنا لو عايز أكلمها بيس يعنى بس أنا ماليش فى الحوارات دى , تصدق انك عيل أبن تييييت يا عم انتعبيط هوه انا بقولك قوم أتجوزها ده كده يعنى قوم أرغى اعمل اى حاجه , يا عم فكك منى مش طالبه , دا انت سيس يا جدع خليك قاعد كده جبب أخواتك , الصراحه الواد كان بيتكسف من خياله اصلا وما بيتكلمش مع اى بنت معانا فى الكليه بس انا مات سيبتوش قعدت ألعبله فى دماغه ليل ونهار ولا الشيطان بس مافيش فايده برضه عيل فقرى فقرى يعنى , أنا بقه لقيت أن ما بدهاش لازم أتصرف , مره كنا معديين أنا ومحمد من قدام فوزيه كده وهوه طبعا مدور وشه الناحيه التانيه زى ما يكون البت ها تأكله , البت نسمه اللى معايا فى السكشن كانت قاعده جمب فوزيه ساعتها وبالصدفه كانت بتنادى على الواد محمد بتاع سكشن 4 , محمد محمد , أنا ما صدقت , يا ابنى كلم فوزيه بتناديلك شوف يا ابنى عايزه ايه ما تبقاش قليل الذوق , هيه ندهتلى بجد , ايوه يا ابنى انت ما سمعتش أنت عا تستعبط بطل تقل بقه , ورحت شاده من ايديه ولافف ناحية فوزيه وهيه بالصدفه كانت بتبص ناحيتنا فعلا , بس كده الحلو أتدبس لقى وشه فى وشها ما عرفش يعمل حاجه أتضر يتكلم , أزيك أخبارك ايه , أنا تمام الحمد لله , لسه فاكرانى , أه انت محمد كنت معايا فى درس الكيميا صح , أه تمام وأنتى فوزيه , صح أنت فاكر أهوه انت معانا فى الكليه هنا , أه أنا فى الكليه هنا , طب ما حدش بيشوفك ليه طيب دا الترم فى أخر خلاص ايه كنت فين كل ده , عادى يعنى ما بقعدش فى الكليه كتير , الواد سرح فى الكلام ونسى انى جمبه أصلا رحت ناغزه فى جمبه , أه نسيت أعرفك ---- زميلنا فى سنه تانيه , أهلا ازيك أخبارك ايه , تمام الحمد لله أنتى لسه أعدادى السنه دى , اه أول سنه , ربنا يوفقك بس أول مره أشوفك يعنى مع انى أعرف ناس كتير أوى فى دفعة السنه دى , حست أنها عايزه تطلع صوت من بقها كده وتقولى نعم يا أخويا أنت مش قاعد تبحلقلى طول النهار بقالك 3 شهور بس كانت مؤدبه قالتلى : معلش ماليش حظ تتعوض ان شاء الله , اه بأذن الله على فكره أنا عضو أتحاد الطلبه والجواله لو محتاجه أى ورق أو اى مساعده فى أى مادة أو اى حاجه فى الكليه أأمرى يعنى , يا سلام بجد ربنا يخليك , طبعا قعدنا احنا نرغى والواد محمد بقى واقف جمبى بيتفرج علينا بعد كده محمد ما جتلوش الجرأه ان يكلمها تانى بس أنا وفوزيه بقينا أصحاب مش جامدين أوى يعنى بس قشطه وعرفتنى بعد كده على ماريان وسمر والقعده بقت انس طبعا هيه واضح جدا أنها كانت عارفانى مصلحة بس قشطه يعنى ما انا برضه عارفها مصلحه ومش مصلحه واحده لا مصالح وحياتكم , بس قشطه يعنى الحياه كانت لذيذه فاكر مره أنها كانت داخله الكليه شافتنى وانا بأكل فول عند عربية الواد طاعون اللى قدام الكليه ولما قابلتنى بعد كده صممت أنى أخدها تاكل فول على العربيه قعدت أقنعها يا ماما ما ينفعش يا ستى والله ما ينفع يا بنتى عشان الامن القومى طب عشان خاطر معدتك مش ها تستحملى الكلام ده مافيش فايده أضطريت أوديها بدل ما حد تانى يوديها , المصيبه ان العربيه دى بياكل عليها كل سواقين التاكس فى اسكندريه مصيبه سوده وهيه كانت لابسه النهارده المينى جيب الروز اللى بتقلوظ رجليها أكتر ما هيه مقلوظه أخدنها وأستعديت للمعركه وطلعنا على عربيه الفول الحمد لله العربيه كانت فاضيه ده اول ما وقفنا وده اللى ما أسنمرش كتير بعد خمس دقايق بس لقيت كل عربيات التاكس فى اسكندريه ركنت جمبينا ونزل منها السواقين نصهم قعدوا جمبنا على الرصيف مش عشان ياكلوا طبعا واللى بياكلو برضه جمبنا نزلوا يأكلوا على الأرض مش زوق منهم مثلا لا ده عشان الفيو من تحت أحلى طبعا يومها بجد بجد الشارع أتقفل من كتر عربيات التاكسى اللى ركنت , الواد طاعون بقى مش عارف يعمل ايه العربية بتاعته ها تتكسر أنا رحت رامى طبق الفول من ايديها وأخدتها فى ايدى وحرب بقه لغاية ما عرفت أطلع من المعمعه قلتلها بلاش من الأول المصيبه انهاانبسطت اوى وقالتلى عايزه اروح تانى , ما علينا السنه كلها خلصت ما حصلش صراحه بينا تطورات من النوع اللى يؤدى للحب أو أى حاجه من الكلام ده وأنا لأول مره ما أدوسش فى الموضوع ده مش عارف ليه متهيألى لأن الولاد اللى هيه تعرفهم عددهم فى اللمون وأنا ما كانش عندى أستعداد أضحى بسمعتى الجباره فى الكليه بعد ما شعرى شاب فى الشغلانه بس والله البنت كانت طيبه جدا ساعت كنت بحس انها هبله بزياده , خلصت امتحاناتى بس كنت رايح الكليه بعد أخر ماده عندى بيومين عشان بحث لازم أسلمه عشان ما أتسوحش ,سلمت البحث وخارج من الكليه أذ أفاجأ بفوزيه قاعده لوحدها ولابسه المينى جيب الزرقا مش ممكن تحفه مش عارف البت دى بتجيب الجيب دى منين مع انها فى الأيام دى ما كانتش موضه خالص رفعت ايديهاونادت عليا , أفتكرت ان اخر يوم فى الأمتحانات بتاعتها النهارده , ازيك يا فوزيه ايه اللى مقعدك لوحدك كده , مافيش لسه مخلصه ومستنيه البنات , عملتى ايه فى الأمتحانات ورق الكورسات اللى جبتهالك نفعت , أه الحمد لله متشكره اوى على الورق بجد , يا بنتى متشكره على ايه بس عادى يعنى , ربنا يخليك , ايه مروحه ولا ايه , اه بس ها استنى البنات بس أنت رايح فين , أنا مروح برضه بس يمكن أقابل واحد صاحبى وندخل سينما الفيلم بتاع عادل امام الجديد نزل (السفاره فى العماره ) , بجد لازم أدخله مالوش حل الراجل ده , طب أقولك تعالى ندخله سوا دلوقتى انتى وراكى حاجه , لا عادى فاضيه يلا بينا , الصراحه انبسطت أوى الواحد مخلص امتحانت ورايق واليوم ليه طويل وأوله سينما واحنا لوحدنا والشيطان معانا طبعا , قطعت أفكارى وهيه بتقول : بس نستنى ماريان وسمر ممكن ييجوا معانا , كنت عايز أقولها --- بس أحترمت نفسى وقولتلها : اه طبعا نروح سوا كلنا ها تبقى لذيذه خالص , دقيقتين وجات سمر وماريان وهمه لابسين بقيت طقم المينى جيب صراحه لحظتها قلت يا رب ييجوا معانا أنا لوحدى والطقم ده ها تبقى جامده ولا جيمس بوند , وهمه ما كدبوش خبر وافقوا أنهم ييجوا معانا , ما كنتش عرف بقه هوه اليوم باظ كده ولا ايه بس قلت ممكن نطرقهم بعدين , طلعنا من الكليه كانت لسه الساعه 12 ونص قلنا ناخد الترام لحد محطة الرمل عشان نوصل على أول الحفله بالزبط طبعا فى الترام لاحظت نظرة الكمسرى وهيه بيقطع التذاكر بص لى بصه فيها كره العالم كله وكأنه بيقولى ايه ياأخى تلات مزز مره واحده لا وايه من الاخر والواحد مش لاقى سحلية حنى , أتشائمت صراحه مادام حد بصلنا فى المصلخه يبقى ربنا يستر على اليوم ده , وصلنا سينما أمير حبيبتى طبعا , ها ندخل السفاره فى العماره كلنا حد عنده أعتراض , سمر كانت عايزه تدخل هارى بوتر وأنا كنت عايزها تاخد ماريان معاها ويعيشوا بقه فى الخيال العلمى بتاعهم ويسيبونا انا وفوزيه فى الحقائق العلميه , بس فوزيه أقنعتهم بالسفاره فى العماره , رحت أقطع التذاكر وأنا بقطع التذاكر أخدت بالى من حاجه مهمه اوى انى الظاهر والله أعلم اتدبست فى عزومة سينما وانا مش واخد بالى خازوق صح يعنى عالبركه قطعت التذاكر وأنا يومها اصلا ما كنتش عامل حسابى على خروج ولا نيله أنا كنت رايح الكليه صد رد ما كنتش عامل حسابى فى الفلوس و المصيبه لو حبينا نعمل حاجه بعد السينما كده ها اتسوح , المهم دخلنا قاعة السنما فوزيه قعدت على شمالى وجمبها ماريان وبعدين سمر , الفيلم كان ابن لذين والمشهد بتاع عادل امام وهوه بيطلع الأندر وير الحريمى من جيبه فى أول الفيلم كانت بداية موفقه صراحه فوزية كانت ميته من الضحك جمبى وكام تعليق منى كانوا كفيلين بأنها تتقلب درمغه أبتديت أتفاءل ان اليوم ها يكمل كويس , الفيلم وقف فى الأستراحه البنات قاموا يروحوا التواليت , مش عارف بيحبوا يروحوا التواليت عمال على بطال ليه , الأستراحه خلصت والبنات رجعت كله رجع مكانه ماعدا سمر كسلت تعدى وتدخل مكانها راحت قاعده على يمينى , الفيلم أشتغل أجمد مشهد بقه كان بتاع عادل أمام وميسره وصاروخ والضحك كان للركب يا معلم دا يمكن كان فوق الركب بشويه كمان , أكتشفت ان البت سمر لذيذه فحت ولا تقولى فوزيه ولا بتاع البت كان عليها تعليقات فظيعه بجد,لما ميسره بقت وطنيه مره واحده وراحت مرجعه لعادل أمام الفلوس بتاعته قالتلى تعليق كارثه مش عارف كانت قاصده معناه اللى أنا فهمته ولا ايه ما علينا , خلصنا السينما كله طلع مبسوط البنات كانوا عايزن يتغدوا ده بقه الخازوق اللى ها يطلع من نافوخى أخدتهم للأستراحه بتاعتى كشرى الطيب , البنات طلبوا 3 كشرى وحاجه ساقعه أنا عملت نفسى مش ها اقدر اكل وطلبت حاجه ساقعه بس , بس ولاد الياه طلعوا أكيلة كشرى مسحوا الأطباق مع ان ما يبانش عليهم , طبعا نزلت لقيت نفسى متدبس فى دفع حساب الأكل برضه ميه ميه الله يحرقك يا فوزيه , الصراحه أنا بقه اللى كنت عايز أروح عشان كده حلاص أنا فعلا أتسوحت , همه كمان قصروا الشر ولقيتهم عايزين يروحوا عشان ما يتأخروش , اه خلاص بعد ما أخدوا أغراضهم الدنيئه منى , روحوا همه وانا بقه بقيت عايز أروح بس ازاى كل اللى فاضل فى جيبى نص جنيه والموبايل بتاعى فاصل شحن لحسن الحظ مش ها أعرف اكلم أى حد من صحابى عشان ما اتفضحش برضه أنا عارف اول ما يعرفوا اللى حصل ما ها يصدقو يشمتوا , المشكله انى ساكن فى العجمى ما ينفعش أخدها مشى أبدا وأقل مواصله بجنيه مع انى متعود أركب الأوتوبيس المكيف بأتنين جنيه عشان السكه طويله , الصراحه الواحد نفسه عزيزه وكريمه وفهيمه ومش ممكن يركب ويستهبل والحركات دى , أخدت القرار المستحيل انى امشى , وتوكلت على الله وشديت الرحال وطلعت من محطة الرمل للمنشيه للقبارى للورديان لوادى القمر للمكس أكتر من ساعتين ونص مشى بتاع 10 كيلو لغاية ما بظت والدنيا صيف والقميص اللى انا لابسه بقى عامل زى قميص كاظم الساهرفى أغنية حبيبتى والمطر الهى وانت جاهى يبتليكى بجرب فى رجليكى الحلوه يا فوزيه عشان تبطلى تلبسى مينى جيب خالص , خلاص قررت انى اركب اى مواصله بأى صوره متهيألى المسافه اللى فاضله دى ممكن تكون بنص جنيه بس , وقفت جمب شوية ناس كده على محطة أوتوبيس لقيت أوتوبيس من أعفن تلات أوتبيسات فيكى يا مصر ومليان ناس وعلى أخره رحت ناطط فيه بالتأكيد مش ها يكون اجرته فى الشويه الفاضلين دول أكتر من نص جنيه , ركبت من الباب اللى جمب السواق والكمسرى كان فى أخر الأوتوبيس عند الباب التانى أديت النص جنيه للراجل اللى قدامى وقلت له وصل واحد , طبعا النص جنيه عدى على 10 بنى ادمين قبل ما يوصل للكمسرى أستنيت شويه لقيت النص جنيه راجعلى تانى وواحد بيقولى أبعت ربع جنيه كمان , خلاص ما بقاش فيه مفر من الفضايح بصيت ناخية الكمسرى وأستنيت لما بص ناحيتى بص ماعاييش غيره قالى انت نازل فين قلتله 21 ان شاء الله ورحت باعتله النص جنيه وهوه أخده وبعتلى تذكره , سبحان الله من غير كلام والله هوه شكله حس يعنى أنا شكلى ابن ناس برضه يا جدعان ,واااااااااااااااء , منظرى فى الأوتوبيس بقى زباله بس فكك بقه مين يدق , وصلت بيتنا وصليت لربنا ركعتين شكر و قررت انى ما اشوفش فوزيه تانى أخر مره شفتها كان بعد كده بسنه ونص كانت هيه ومعاها سمر بس ماكانتش لابسه مينى جيب الظاهر ان ربنا استجاب دعايا وماكانتش حلوه صراحه زى ما كانت بس البت سمر بقه اللى ايه بقت طلقه طالعه من عينى البت دى , بس يلا بقه تغور هيه وفوزيه الهى ربنا يفضحك زى ما فضحتينى ألهى ربنا يبتليكى بأتوبيس زحمه كده زى اللى ان جيت فيه وتكونى لابسه المينى جيب البيضه , ولا بلاش بلاش حرام برضه , أنا عندى أخوات بلاستيك,هوه كان لازم يعنى مينى جيب وهباب ما احنا كنا حلوين الله يخرب بيته اللى أخترع المينى جيب والله يخرب بيت رجليكى الحلوه يا فوزيه.

تمانيه وعشرين

عايزه منى ايه يا بنت الأيه
شد وصد وبهدله وكل ده ليه
عمرك ما أديتينى حاجه يبقى ليكى عندى أيه
أنزل أطلع براحتى م
عايا أبونيه

الاثنين، 24 أغسطس 2009

ألف ألف مبروك


فيلم جديد فعلا , مش جديد لأنه جديد وخلاص لأه جديد بجد الحقيقه ان شكل الفيلم ده شفناه قبل كده فى أكتر من فيلم أمريكى على أكتر من شكل مره خيال علمى مره رومانسى مره أجتماعى , بس فكرة الفيلم ومحتواه ده هوه اللى الجديد بجد , الفيلم هنا بيتكلم عن مغزى الحياه وقيمتها , بيتكلم عن خياراتنا فى الدنيا والطريقه اللى بنبص بيها على كل حاجه حوالينا وبيوصلنا لكذا حقيقه مهمه جدا , أول حاجه هيه حاجه انا مؤمت بيها شحصيا من زمان اوى وهيه أن احنا فى الأساس جينا الدنيا عشان نختار يمكن قدرنا محتوم ومش ها نغيره بس الطريق اللى ها نختاره عشان نوصله لقدرنا دى شغلتنا فى الدنيا تاخد طريق الخير ولا الشر طريق الأستسلام والأستكانه أو طريق القتال مع الدنيا عشان توصل للى انت عايزه ها أقولكم حاجه من قناعاتى انا الشخصيه كل أحتيار بتعمله فى حياتك بيخضع لأحتمالين الأول انه يكون أختيار جيد والتانى أنه يكون أختيار سئ بس لأن مافيش جيد فى المطلق او سئ فى المطلق ولأنك لو حبيت تبص فى كتاب حياتك قبل ما تموت ووتلاقى فيه حاجه تستحق انك تحكيها يبقى لازم تفتح نفسك للأحتمالات أيا كانت والا عمرك ما ها تعرف الدنيا كانت مخبيالك ايه , القناعه التانيه اللى أنا مؤمن بيها برضه مش معنى انك شايف حاجه معينه بعينيك يبقى ده معناه انها حقيقه لأه طبعا الحقيقه ان حتى الحواس بتاعتنا بتخدعنا , الفيلم تجربه بجد حلوه أوى أحمد حلمى عامل حاله جديده فعلا وكل الممثلين فى الفيلم كمان عاملين أدوارهم كويس أوى من الحاجات المختلفه برضه ان الفيلم مالوش بطله ,يمكن طول الفيلم بندور يمكن يطلع بطله من هنا ولا هنا بس ده كان لذيذ , بداية الفيلم عاديه يمكن الأحداث بعد كده بتمشى بتسلسل بطئ يمكن بس يشدك وده لفكره معينه ها تعرفها فى أخر الفيلم فى نص الفيلم ها تحس بملل صراحه ويمكن تحس ان الفيلم بدا يفقد التسلسل بتاعه , بس لما ترجع من الأستراحه لاوم تحبس نفسك وتركز عشان تلحق الأحداث والمفاجأت المتتاليه الغير متوقعه قبل النهايه ها تاخد راحه كده تراجع فيها أفكارك وتيجى النهايه الطبيعيه متهيألى والمفاجأة بالنسبه لناس كتير بس فى المجمل صدقنى ها تطلع بكتير من الأفكار والحاجات اللى محتاج تراجع نفسك فيها وها نطلع بكتير من الطاقه الأيجابيه ده غير أحساس ها يلازمك انك عايز تشوف الفيلم تانى, الفيلم بيدور عن شاب من أسره مظهرها المادى كويس والشاب ده يمكن حتى وهوه عايش مع اسرته فى بيت واحد مش قادر يشوف الوش الخقيقى لأسرته ولا قادر يتفاعل معاها نفس الفكره للمجتمع حواليه لأصخابه فى الشغل رحلته فى الفيلم ها تكون هيه أستكشافه للعالم الخقيقى اللى حواليه اللى عمره ما أخد باله منه ولا حتى حاول أنه يفهمه , المونتاج جيد جدا واللى قام بيه معتز الكاتب , محمد دياب وخالد دياب عاملين سيناريو جيد معمول فيه مجهود يستحق التقدير , مدير التصوير أحمد يوسف شكرا ليه على المجهود الواضح , الموسيقى كمان عجبتنى وعملها عمرو أسماعيل , الديكور كان كويس بس فكرنى كتير بفيلم أسف على الأزعاج كان ممكن يكون أحسن من كده , أحب أقول ألف مبروك برضه على اتنين من الوجوه الجديده بلدياتنا من اسكندريه ومتأسف أوى انى مش عارف أساميهم , الشاب اللى قام بدور صاحب العربيه اللانسر اللى بتخبط الراجل وبتهرب ده كان أحد أعضاء فرقة مسرح كلية طب أسنان الأسكندريه , والتانى الشاب اللى قام بدور اللى كان واقف بيصطاد العصافير تحت شباك بطل الفيلم وده كان أحد أعضاء فرقة مسرح كلية زراعة الشاطبى , نادر جلال طب صقفه جامده أوى ليه قدر يطلع الفيلم بكل العناصر اللى فيه بالصوره الحلوه دى , أحب بجد أشكر أحمد حلمى تانى جدا جدا جدا بجد باشا كبير أوى وممثل فعلا , يا ريت نشوف منك الجديد دايما .

الخميس، 20 أغسطس 2009

سبعه وعشرين

الكلمه دى كلمتى ولا جمله وأترددت
اللقمه دى لقمتى ولا لقمه فى الطبق بقت
الصوت ده صوتى ولا صوتى خلاص سكت
قلبى لسه قلبى ولا خلاص قعدت فيه ومددت

الجمعة، 14 أغسطس 2009

دليل العاطل العصرى : 3 (اتخرجتى يا بيضه )


الأمتحانات خلصت وسيادتك خلاص مستنى النتيجه نتيجه أخر سنه ليك فى الكليه , مش فاهم اى حاجه حواليك وأصحابك اللى بيدعوا ربنا انهم ما ينجحوش السنه دى ويقعدوا كمان سنه ولا سنتين فى نعيم الكليه والعيال اللى بتقابلهم من دفعات قديمه ولسه مش لاقييين شغل , حاجات كتيره مخلياك مقلق من يوم النتيجه ده وانك لو نجحت السنه دى مش ها تبقى زى كل سنه فيه خازوزق فى الموضوع , نتجتك طلعت ونجحت يا حلو وبتقدير كمان يلا بس مع ذلك حاسس انك مش سعيد وعندك أحاسيس اول مره تحسها , احساس انك رسمى كده خلاص طلعت من ذمه الحكومه وانت اللى بقالك على ذمتها فى التعليم بتاع 16 سنه وأكتر والمفروض انك طلعت من ذمة ابوك كمان ده عشان احنا فى مصر بس , انما لو كنا فى دوله أوربيه مش معقول اب يكون بيصرف على شحط زيك , المفروض بقى ان سيادتك تلاقى شغل وتصرف على نفسك وتحوش وتتجوز وحاجات كتير أوى كده ما تعرفش طلعتلك منين , كل ده خلاك تحسد اصحابك اللى دبلروا ولسه قاعدين فى الكليه شويه , بص أنا مش عايزك تقلق أنا ها افهمك اليله ها تمشى ازاى , مافيش قلق ولا اى حاجه ما تخافش ولا انت طلعت خلاص من ذمة الحكومه ولا أبوك ها يسيبك , الحكومه لسه عندها معاك مشوار بسيط كده وأبوك مجبر يا ابنى يصرف عليك ده قدره ربنا يعينه على ما بلاه وأوعى تفتكر انك حتى لو أشتغلت وبمرتب كويس ها تعرف تستغنى عن أبوك وتتحمل مصاريف الجواز واللذى منه لوحدك أنسى , بص يا ابنى البلد عاملالك برامج تدرييبه ممتازه بعد الكليه ها تخليك كائن زى الفل ان شاء الله قادر على مجاراة سوق العمل وسوق البهايم وسوق الخضار وسوق الجمعه وكل الأسواق , سيادتك اتخرجت يبقى لازم يا حلو تخلص بقه ورق جيشك وعمليه تخليص الأوراق اللى انت محتاجها عشان الجيش دى لوحدها عمليه صدقنى ها تنمى فيك كثير اوى من المهارات اللى انت نفسك ما كنتش نعرف انها موجوده فيك , بداية من الأماكن اللى والمفروض تخلص منها الورق ودى ها تقابل فيها شخصيات ها تعلمك كتير اوى عن مهارات الحياه فى مصر المعاصره , ده غير ان الأماكن دى منها اللى موجود قريب من المناطق الصناعيه الجديده وده ها يعرفك على الأماكن اللى المفروض تنزل تدور على شغل فيها واللى ها تتسحل فيها ان شاء الله ومش ها تلاقى شغل برضه ده طبعا غير الوقفه فى الطوابير اللى هيه بقه ولا تقولى طوابير العيش ولا الكلام ده , الطوابير اللى ها تقابلها هنا احلى بمراحل عندك على سبيل المثال لا الحصر عشان تطلع الفيش , ها تحاول تعمل ناصح وتيجى من سته الصبح ها تلاقى ان فيه ناس بايته هنا من امبارح يا عم الحدق , وها تقعد من سته الصبح لحد الساعه تلاته ومش ها تخلص برضه الورقه اللى انت جاى عشانها ها تقعد على كده بتاع اسبوع ها تتعود طبعا انك تجيب أكلك وشربك معاك عشان ما تجوعش أو تعطش فتتنازل عن مكانك التاريخى فى الطابور عشان تجيب ازازة بيبس وكل يوم ها تكتشف ان الطابور بيزيد ما بيقلش ومش عارف ايه اللى بيحصل بس لو كنت ناصح شويه ها تعرف انك لو كنت طلعت من الطابور ودخلت من الشباك اللى ورا كتت ها تلاقى طابور تانى اصغر شويه ده بقه اللى بيلموا فيه القتاوه او رسوم تسليك المسائل عشان عم عبده ما يزعلش والغريب انك ها تلاقى الناس بتتعامل مع الرشوه بطريقه واقعيه اوى ومنظمه كمان ها تدفع وتدخل ومع انك دفعت لسه من دقيقه ها يسألك انت عايزه مستعجل ولا عادى تساله عادى ده يبقى ايه يقولك ان العادى ده ياخده له اسبوعين كده او اكتر طبعا تضطر تقوله مستعجل يقولك ان ده ها يكلفك كمان وتدفع تانى يقولك تمام كده تيجى تاخده بكره ان شاء الله , تكتم الصوت الأبيح اللى بيجاهد عشان يخرج من بقك والكلمه اللى من تلات حروف , بقى من اسبوعين او أكتر لبكره شوف ازاى , دى عينه بس كده على الماشى , لو ربنا أكرمك ودخلت الجيش ها تعيش تجربه ممتازه تتعلم فيها مهارات عن كيفية النجاه تحت كل الظروف وده ها ينفعك طبعا فى حياتك كعاطل بعض الجيش عشان تنجو وانت مفلس بأذن الله ما تقاطعش,لو حظك وحش ويا عينى يا ابنى ما دخلتش الجيش ما تحافش الحكومه مش ناسياك عندك كام دوره معتبرين ها ينسوك أسمك , أول حاجه خد عندك كورس I C D L ده يا برنس لو ما تعرفوش كورس الرخصه الدوليه للكمبيوتر ده بيبقى فيه ويندوز وأوفيس وحاجات كده وده مدعم من الحكومه ها يقولولك ادفع متين جنيه وبعد الكورس ها تاخدهم تانى أدفع ولا يهمك بس عايز أقولك اللى عند الحكومه أنساه ولو عرفت تاخد المتين جنيه بعد الكورس ابقى قولى أخدتهم ازاى عشان انا بقالى سنه ونص ومش عارف أخدهم ,الكورس ده مدته حوالى 3 شهورو طبعا ها تتعلم فيه حاجات مهمه أوى , مثلا ازاى تمسك الماوس وازاى تغير الخلفيه بتاعت الديسك توب ده غير انك ها تعرف يعنى ايه ديسك توب اصلا ده غير انك ها تعرف الفرق بين الفولدر والفايل ابسط يا عم, من اهم الحاجات كمان انك ها تعرف ان فيه استخدام تانى لحامل الأكواب اللى موجود فى وش الكمبيوتر بتاعك وهوه انك ممكن تشغل فيه حاجه أسمها سيديز أو سيديهات أو أسطوانات يعنى وده قرص مدور كده المدرس ها يوريهولك فى الحصه , تمام كده ها تطلع من الكورس مبسوط من نفسك وفله بس أوعى الأمل يخدعك وتتخيل انك كده حد ها يعبرك ويشغلك لأنك ها تكتشف ان مصر كلها اخدت الكورس ده وبقى زى شهادة التطعيم , ما تخافش الحكومه عامله كورس تانى تحفه بقه عاملاه وزراة الأتصالات عشان تنسى شهادة الليسانس أو البكالوريوس بتاعتك وتحطها فى صفيحة الزباله وتغير مجال شغلك للكمبيوتر , الكورس ده ها تتعلم فيه برمجه وشبكات وكام حاجه كده ها ياخد وقت حوالى 9 شهور ها تقولى ليه 9 شهور بحالهم أقولك عشان بعد الكورس ده ها تتولد من جديد ده غير انهم بيدولك بتاع 600 أو 1000 جنيه كل شهر فيه تضارب اقوال فى الموضوع ده , يعنى ها تتعلم وتاخد فلوس كمان تصدق دى , ها تدخل الكورس ده من ناحية التعليم ها تتعلم بأذن الله من ناحية الفلوس ما اوعدكش لأن الفلوس دى ها تلاقيها طلعت مصاريف معمل وتسديد ديون مصر ومعونة شتا ومصاريف مش عارف ايه وحاجات غريبه كده بس ممكن ربنا يكرمك وتتحصل على 150 جنيه أخر الكورس ان شاء الله , ها تخلص مشروع التخرج بتقدير جيد جدا و تطلع من الكورس باشا بقه مستنى عروض الشغل من ميكروسوفت وجوجل وأبل , بس للأسف ها تكتشف ان البلد فيها اصلا خريجين معاهد كمبيوتر خاصه وحكوميه بالعبيط ده غير معاهد التكنولوجيا وكليات الهندسه ونظم المعلومات ده غير الألاف اللى أخدوا نفس الكورس اللى انت أخدته وكل ده غير الحقيقه اللى خبوها عليك ان مصر مافيهاش صناعة برمجيات أصلا , كده يبقى فات أكتر من سنه على تخرجك تقريبا ها يكون صاحبك اللى فى الجيش خلص مدته هوه كمان ودى حاجه تخليك ما تيأسش أهوه صاحبك برضه لسه ها يبدأ يدور على شغل خد بعضك بقه وشجعه كده وأنزلوا دوروا مع بعض , ها تدوروا ازاى بقه وفين ها أقولك أنا بس اسيبك دلوقتى عشان عندى انترفيو , ادعيلى انهم يقبلونى المره دى .

الخميس، 13 أغسطس 2009

سته وعشرين

يطبق الكون بهمومه على صدرى نفسى يضيق
روحى تتخنق زياده مع كل بلعة ريق
أذان الفجر الله أكبر يطفى فى قلبى حريق
أقول يا رب توبه دى رحمتك أوسع طريق