الجمعة، 28 مارس 2008

المستثمر الصغير


بص يا ابنى أنا عارف انك قاعد على القهوه بقالك أكتر من سنه من يوم ما أتخرجت وعارف كمان انك بطلت تقعد على القهوه عشان ما بقاش معاك فلوس تقعد على القهوة , طبعا انت من يوم ما اتخرجت لفيت على خمسين شركة بشهادة البكالوريوس بتاعك ومع ذلك مالقيتش تى شغلانه بمرتب يكفى حتى تمن المواصلات والسجاير, ولا يهمك خلاص كل مشاكلك ها تتحل أنا نويت أتبناك ها أخليك واحد من اللى بيركبوا المرسيدس S500 وبيصيفوا فى أسبانيا ويشتوا فى سويسرا, بتضحك عندك حق انت من زمان بطلت تصدق اى حد بس المره دى صدقنى انا ها أدخلك فى اللعبه .
الخطوه ألأولى : بص يا سيدى فى الاول أنت معاك اى مبلغ ممكن نبدأ بيه طبعا لأه ولا يهمك ما تخافش مش ها اقولك قدم على قرض بتاع وزراة التنميه لأن ده أقرب طريق للسجن وأحنا ناويين نشتغل فى السليم , عندك اى عم او عمه او خال او خاله معديين ال99 سنه وماعنديهومش عيال وممكن تورث منهم حاجه ,ماعندكش برضه ولايهمك فى الأول عايزيين نجيب كام باكو كده اللى ها نبدأ بيهم الشغل ودى سهله اوى ,ازاى يا عم أصبر بس,اول حاجه تنزل تبيع الموبايل المعفن بتاعك مش ها نحتاجه , وبعدين تاخد الكمبيوتر وتقولهم فى البيت انه بايظ وها تصلحه وتبيعه ما تخافش , وبعدين تسحب الفلوس بتاعت الدبلومه اللى انت بتاخدها فى الكليه انت كده كده أصلا كنت ها تسقط خسارة الفلوس , المبلغ ده على المبلغ اللى فى دفتر التوفير بتاعك اللى أبوك كان فاتحهولك من وأنت عندك سنتين كده يبقى معاك بتاع 10 بواكى قشطه .
الخطوه التانيه : تنزل تأجر شقه مفروشه فىوسط البلد تنفع مكتب لشهرين بس فى حدود تلات بواكى وبعدين تعمل أعلان فى اى جريده من بتوع الوظايف اللى بيتوزعوا مجانا " لشركه كبرى مطلوب سكرتيره مؤهل عالى حسنة المظهر تجيد الكمبيوتر والأنجليزيه" وده اعلان رخيص مش ها يتكلف كويس المهم هايتقدم بنات للوظيفه تنقى 3 منهم يكونوا شيك وتعينهم بمرتب 400 جنيه ولا حاجه وبعدين نخلى بواب العماره يشوفلك واحد يشتغل فراش فى الشركه وتعمل يافطه حلوه كده تعلقها على باب الشركه اللى هيه الشقه المفروشه اللى مأجرينها وتكتب شركة أى حاجه للأنتاج الفنى, كده ها يفضل معانا 6 بواكى ها نعمل بيهم كام أعلان فى جرايد رسميه " شركة أنتاج فنى تعلن عن مسابقه كبرى لأختيار أصوات جديده والفائزين ستقوم الشركه بالتعاقد معهم وأنتاج ألبومات غنائيه لهم " وبعدين تكتب التقديم بعنوان الشركه وتكتب عنوان الشقه, كده الشغل بدأ , طبعا الشباب كله دماغه ضاربه وعايز يغنى ها تلاقى أعداد فى اللمون جايين يقدموا, البنات اللى أنت معينهم ها يستقبلوا المتقدمين وهايأخدوا رسوم أستمارة التقديم 30 جنيه مصرى فقط لا غير اللى هيه أصلا ورقه متصوره ب5 صاغ يا بلاش, وبعدين تلم شوية عيال أصحابك من على القهوة وتلبسهم كويس وتعملوا لجنة استماع معلش ها يجيلك صداع مزمن بس مش مهم أبقى حط سماعه وبعدين تقول للمتقدمين ان شاء الله المرحله التانيه من المسابقه كمان شهر ونص ها نبقى نتصل بيكم , طبعا مش تتصل بحد وكل الولاد هايفتكروا انهم ما نجحوش عشان كده ما دخلوش المرحله التانيه , المهم قبل ما الشهرين يخلصوا ها نكون بعنا كام ألف استماره , البنات تديلهم مرتباتهم وعليهم الحوافز اللى هيه قد المرتب عشان يسيبوا الشركه وهمه مبسوطين وتقولهم معلش أصل مكتب الشركه ده كان مفتوح عشان المسابقه بس ان شاء الله ها تبقى تكلمهم عشان الشركه ها تفتح فرع جديد ,ما تنساش تزبط الفراش كمان والبواب لازم نديله مبلغ حلو فى جيبه وتفهمه ان المسابقه خلصت وفيه 5 فعلا نجحوا خلاص وأتعملهم كليبات عشان بس لو فيه عيل رزل جه سأل على الشركه بعد كده ولا حاجه وتشيل اليافطه من على باب الشركه وتسيب الشقه قبل أسبوع أو أسبوعين من الشهرين اللى انت مأجرهم .
كده مووووز فيه حوالى 10 ألاف واحد أتقدموا وكل واحد 30 جنيه أحنا كده عملنا 300 ألف جنيه فى شهرين.متهيألى انت كده صدقت , الحلقه الجايه بقه هاأقولك ازاى تعد الملايين , أصبر على رزقك .

الثلاثاء، 25 مارس 2008

دليل العاطل العصرى :2 ( أنت لسه قاعد ! )


الغريب بقه ان الشباب طالع بوزهم وبوز اللى خلفوهم وقرفانين من حياتهم وكارهين نفسهم وكل ده وراضيين وساكتين وقاعدين ييجى بقه الناصح فى الاعلان العبقرى اللى عملاه ال حكومه ويقوله ايه ده انت لسه قاعد !!!
يا خبر أبيض هوه فيه كده يا جدعان هوه مين اللى بيسأل مين المفروض الشباب همه اللى يسألوا احنا لسه قاعدين ليه لكن سبحان الله همه اللى بيقوللنا انتم قاعدين ليه , لاه وشوف البجاحه بقه بيقولوا قوم اشتغل عامل!!!
يقوله أنا خريج جامعه يقوله صوت الحكومه وماله فيها ايه يا أخى , طبعا احنا بجد بنحترم كل عمال مصر بجد وبقدرهم فعلا على اللى همه مستحملينه , بس ده خريج جامعه يعنى خلص 5 أو ست سنين أبتدائى وبعدين 3 أعدادى وتلاته سنوى وقول اربعه كليه وبعدين بتقولى قوم أشتغل عامل وماله ده ايه البجاحه دى يعنى كمان بيعترفوا بكل بساطه بفشل نظام التعليم كله , نظام التعليم اللى بيشغل واحد معاه بكالوريوس او ليسانس عامل !!!
طيب مادام هيه كده من الأول فاتحين الجامعات ليه ما تقفلوها طيب وكفايه الواحد ياخد الأبتدائيه وخلاص أو يبقى عامل ناصح شويه وياخد الأعداديه وكده يبقى حلو اوى ايه بقى لزوم الثانوى وقرفه والجامعه اللى بتقولوا انكم بتدعمواكل طالب جامعى فى الكليات العمليه ب25 ألف جنيه فى السنه يعنى 100 ألف جنيه فى الأربع سنين ده لو همه أربع سنين بس يعنى طيب بلاش وفروهم وزودوا أجور العمال أو كل واحد ياخد حقه ناشف يأخد فلوسه فى ايده ويعيش بقه كده حرام , ومش ها أحاسب الحكومه على الست سنين اللى قعدتهم فى التعليم العالى أنا برضه أحيسن منكم ها أحاسبكم على أربع سنين بس يعنى 100 ألف جنيه , ادونى يا عم 100 ألف جنيه وخدوا الشهادة بتاعتكم ما تخافوش ها تلاقوا ناس تانيه تشتريها برضه دى حلوه والله وبتقدير كويس كمان مش مقبول على فكره وده من غير فلوس زياده ما تخافوش , ساعتها بقه ما حدش يزعل من حد أنا أخد فلوسى بقه وأعمل مشروع أو أجيب بيهم كتاكيت وأقعد ألونهم , أو أدخل بيهم جامعة الخرطوم بتدى شهاده حلوه برضه وأرخص من كده , ويبقى كفى الله المؤمنين شر القتال عشان ما يجيش أى عيل سيس لا مؤاخذه ويقولك الحكومه علمتنى وأديتنى شهادة وبعدين قالولى بلها وأشرب ميتها لا سمح الله , صدقونى يا حكومه أنا عامل عليكم ونيتى خالصه لوجه الله والله من غير مصالح زى ناس .
أنما كده مش ها ينفع يا جدعان لا وبعدين رجعوا بحملة اعلانات تانيه يكملوا الحمله الأولانيه ويقولوا ايه ده انت برضه لسه قاعد شوف يا أخى البجاحه وبيقولوها تانى لا ويقولك ايه صاحبك راح اشتغل وأترقى وانت لسه قاعد قوم بقه , لا فعلا عيب بجد اللى بتعمله ده لازم تقوم ايه يعنى تشتغل عامل بالبكالوريوس بكره تترقى زى صاحبك سنه سنتين وتبقى ملاحظ عمال ومرتبك يزيد 35 جنيه وربع وكمان خمس سنين ولا حاجه وتبقى رئيس ورديه قد الدنيا ودى فيها بتاع 52 جنيه مره واحده زياده فى المرتب عايز ايه بعد كده بطل قلة أدب بقه وقوم يا أخى بلاش تتبطروا على النعمه لا تزول , بس هيه المشكله أنك حتى لو عصرت على نفسك لمونه وقولت انزل أجرب وماله عامل عامل ايه يعنى بكالوريوس العلوم اللى معايا وأتخذت قرار مصيرى وسبت مكانك على القهوة مكانك ده اللى حاربت عشان تأخده اللى تعبت فيه واللى فيه بتاع 800 عيل فى شارعكم نفسهم بس تقوم كده عشان يلحقولهم مكان على القهوه , ايه اللى ها يحصل ها تقوم سيادتك تدور على القطر عشان تركبه ها تقف قدام المحطه كتير اوى صدقنى دى اول حاجه ولما القطر ييجى ها يبقى مليان على فمة عينه ومش ها تلاقى مكان تركب ولو سطحت على القطر هايجيلك الكمسرى ويقولك تذاكر برضه مع أن القطر ده من غير تذاكر بس برضه الكمسرى ها ينزلك من القطر فى الأخر لأن القطر ده اللى مش عاجبك حتى التسطيح عليه محتاج واسطه , لا وبعدين فى الأخر يقولك قوم يسرعه ألحق القطر , قطر ايه هوه فين القطر دى عربيه كارو من غير حمار ولا سواق (مع الأعتذار للعربجيه ) بجد بقه عيب عيب عييييييييب , ما تقوم تشتغل ياد يا أبن ال --- !!!

الأربعاء، 19 مارس 2008

أربعه


من كتر ضعفنا ووحدة قلبنا نحب حب عمرنا ما حبناه ولا عمره حبنا , ولما ينقضى يبكى قلبى الرقيق الصغير ويقولى لما أنت عارف من البدايه كان ليه تسيبه يذلنا.

الثلاثاء، 18 مارس 2008

لسه فيه ناس دماغها عاليه





الصور دى من محل جزم فى جرين بلازا فى اسكندريه متهيالى اى حد من اسكندريه بيروح جرين بلازا شاف المحل ده , صاحب المحل عامل حاجات غريبه جدا فى واجهة المحل ,انا قلت برضه أخلى اللى ما شافش يشوف (أضغط على الصوره عشان تشوفها بحجم أكبر)

الأحد، 16 مارس 2008

تلاته

من توب الحزن والفرح عاييزين نفصل على قدنا وزماننا عارف مقاسنا مش زينا , من توبه يفصل على مقاسنا فى أفراحتا وأحزاننا يلبسنا.


السبت، 15 مارس 2008

يا أبو شلن يا مفقع


المذيعه : النهارده بنرحب بسيادة مسؤول رغيف العيش فى برنامج كلام فى الهوا أهلا بسيادتك , اول حاجه عايزين نعرف رأى حضرتك فى أزمة رغيف العيش

المسئول : بصراحة أنا مش عارف انتى جبتى الكلام ده منين صدقينى ما فيش اى أزمه فى رغيف العيش الرغيف كبير وأبيض وجودته ممتازه واى مواطن يقدر يحصل على اى كمية بسهوله , دى كلها اشاعات مغرضه

المذيعه : بس سيادتك ازاى ده فيه شكاوى كتير جدا عن سوء جودة الرغيف وقلة حجمه وعدم صلاحيته للأستخدام الأدمى

المسئول : طب بزمتك ده كلام دى كلها افتراءات وعشان أثبتلك أنا نفسى كل يوم لازم أجيب بجنيه عيش بلدى وما باكلش غيره

المذيعه : :يعنى سيادتك بتأكل من العيش البلدى ابو شلن ده

المسئول : أه طبعا أمال انتى فاكره ايه , ده حتى المدام عندى لازم تعمل منه ستدويتشات للواد حماده ابنى وهوه رايح مدرسته الصبح.

المذيعه : سبحان الله وكمان المدام بتاعتك بتعمل منه ساندوتشات,طيب يا سيادة المسئول ايه رأيك فى مشكلة الزحام الغير معقول فى طوابير العيش قدام أفران العيش البلدى.

المسئول : زحام ايه يا مدام مافيش اى زحام على أفران العيش ده الأفران كلها فاضيه والعيش مش لاقى اللى يشتريه صدقينى يا مدام أنا نفسى بنزل أجيب العيش بنفسى من الطابونه اللى على أول الشارع اللى أنا ساكن فيه وعمرى ما لاحطت اى زحام

المذيعه : يعنى سيادتك ساكن في شارع أوله فرن بلدى وبتنزل تجيب العيش بنفسك يا سلام على التواضع يا أفندم

المسئول : أه طبعا أمال انتى فاكره ايه لازم الواحد يلتحم بطبقات الشعب الكادحه وأنا أتحدى اى حد يقول ان فيه زحام على أفران العيش البلدى.

المذيعه : بس سيادتك احنا عندنا فيلم مصورينه من الشارع بيصور ازاى المواطن بيعانى عشان يشترى العيش ممكن نتفرج عليه مع سعادتك

المسئول : اه طبعا وماله احنا يهمنا ولا ايه

<<<<<<<<<<<<<<<<<<<<<<<<<<<<<<<<<<<<<<<<<<

المذيعه : وبعد عرض الفيلم اللى بيوضح معاناة المواطن المصرى العادى للحصول على رغيف العيش,عايزيين نسأل سيادتك عن رأيك فى الفيلم اللى شفناه

المسئول : فيلم مش بطال بس قوليلى ها ينزل فى السينما امتى عشان أخد مراتى والواد حماده ونروح نتفرج عليه فى السينما.

المذيعه : سينما ايه سيادتك, ده مش فيلم سينما ده فيلم القناة بتاعتنا مصوراه من الشارع المصرى [يصور مشكلة العيش.

المسئول : مشكلة ايه يا مدام احنا الحمد لله ماعندناش اى مشاكل ,والشريط ده باين اوى انه متفبرك وده ومش متصور فى مصر أصلا دى كلها مكائد من الناس الحاقدين على البلد.

المذيعه : يا سيادة المسئول بس الناس كلها بتقول ان فى مشكله ده حتى فيه ظاهره سمعنا انها بدأت تنتشر ان الموظف بياخد يوم أجازه فى كل أسبوع عشان يتفرغ للوقوف فى طابور العيش.

المسئول : ده كلام غير مسؤةل بالمره يعنى ايه يعنى الموظف بياخد اجازه كل اسبوع يا مدام صدقينى الموظف بتاعنا زى الفل وأخر ألتزام.

المذيعه : طيب يا أفندم لو فرضنا ان الظاهره دى حقيقيه الحكومه ها تعمل ايه عشان تحل المشكله دى

المسئول : والله احنا ها نشكل لجنه لدراسه هذا الموضوع ولو ثبت صحة هذا الموضوع ها نشكل لجنه تانيه لدراسه الحلول المنطقيه لهذه المشكله وبعدين ها نشكل لجنه لعرض هذه المشكله علىمجلس الشعب وساعتها بقه ممكن نعمل قانون عشان يبقى فيه يوم أجازه جديد للموظفين غير مدفوع الأجر ويبقى أسمه أجازه طابور, لكن صدقينى أنا بكلمك بصراحه من مكانى هذا بقولك ان مافيش مشكله.

المذيعه : طيب سيادتك ممكن ناخد مداخله تليفونيه

المسئول : اه طبعا أتفضلى لازم نسمع مشاكل مواطنينا

المذيعه : ألو معانا مظلوم من القاهرة ,اتفضل يا استاذ مضلوم احنا سامعينك

مظلوم : أنا عايز أقول للسيد المسئول ان احنا تعبنا خلاص أنا كل يوم مش بأنام فى بيتنا أنا بروح أنام قدام فرن العيش عشان ألحق مكان فى الطابور اول ما الفرن يفتح وتعبنا والله يا مدام مش عارفين نعمل ايه عششان تجيبى بجنيه تقفى مش أقل من تلات ساعات فى الطابور عايزين حل.

المذيعه : بنشكر أوى الأستاذ مظلوم على المداخله التليفونيه ,وبنسأل السيد المسئول بعد ما كلنا شفنا على الهوا قد ايه المشكله حقيقيه وكبيره ايه رأى سيادتك دلوقتى.

المسئول : بصراحه كل اللى أقدر أقوله أن أنا كمسئول مش مسئول عن المشكله دى.

المذيعه : انتهى وقت برنامجنا النهارده ونحب نشكر السيد المسئول لتصريحاته الواضحه والصريحه ,شكرا لسيادتك,ونتقابل معاكم فى حلقه تانيه من برنامج كلام فى الهوا.

الأربعاء، 12 مارس 2008

أتنين

يا دنيا ليه بتزعلى لما أكرهك , من طيبتى برجع أحنلك ومن تانى أحضنك ,ترجعى تانى وتجرحينى وأرجع أنا أكتر من الأول أكرهك .


الاثنين، 10 مارس 2008

الناس التانيين




يوم الأربعا اللى فات نشرت وكالة رويتر خبر عنوانه "بلدتان بولاية فيرمونت توافقان على مشروع قانون للقبض على بوش وتشينى" ملخص الخبر كان بيقول ان فيه بلدتين اسمهم براتلبورو ومارلبورو موجودين بولاية فيرمونت الأمريكيه وافق الناخبون فيهم على مشروع قانون يأمر الشرطة بالقبض على الرئيس جورج بوش ونائبه ديك تشيني عن "جرائم في حق دستورنا" ! تخيلوا الناس صوتوا على قانون للقبض على جورج بوش وديك تشينى عشان جرائم ارتكبوها فى حق الدستور الامريكى وخدلى بالك ويأمر المشروع الذي اقر في براتلبورو ومارلبورو في الولاية المعروفة باتخاذ مواقف ليبرالية من القضايا الوطنية الشرطة في البلدتين "بتسليمهما الي سلطات اخرى يمكنها لديها حجج معقولة لمقاضاتهما." يعنى جورج بوش لو اتهبل فى دماغه مثلا ونزل البلد دى ييجى راجل أمن عادى كده ويقولك انت مقبوض عليك لان فى مذكره عشان القبض عليك صادره من البلديه .لاه ولسه وأقر المشرعون في الولاية في وقت سابق قرارات غير ملزمة لانهاء الحرب في العراق ومحاكمة بوش وتشيني بغرض عزلهما وأقرت بضع بلدات ايضا قرارات لمحاكمتهما, ولم يزور بوش الولاية قط منذ ان تولى منصبه رغم انه قضى عطلات مع اسرته في مجمع عائلته في ولاية مين المجاورة. يعنى تخيلوا معايا رئيس الولايات المتحده الأمريكيه ما يقدرش يدخل بلدتين فى دولته وهوه رئيس الجمهوريه لا ومين الى عمل القانون ده بلدتين واحده منهم عدد سكانها حوالي 12 ألف شخص والتانيه عدد سكانهاحوالي 1000 نسمة.طيب الواحد يقول ايه أنا مش عارف انا بعلق ليه أصلا المفروض انى أقول "لا تعليق" هييييييييييييييييه دنيا

الخميس، 6 مارس 2008

يبقى أنت أكيد أكيد أكيد فى مصر




-لما تقف 3 ساعات فى طابور العيش ...يبقى انت أكيد فى مصر

-لما تبقى خريج كلية العلوم وبتشتغل كمسرى فى الترام ...يبقى انت أكيد فى مصر

-لما تشوف لوح أرقام عربيات عليها نسر وميزان وقبه ... يبقى انت اكيد فى مصر

-لما عسكرى المرور ياخد 5 جنيه عشان ما يكتبلكش مخالفه لما تكسر الأشاره ...يبقى انت أكيد فى مصر

-لما موظف حكومى دخله الوحيد مرتبه من الحكومه يركب عربيه مرسيدس اس500 يبقى انت أكيد فى مصر

-لما تحب تخلص ورقه من جهة حكوميه وتحتاج ورق من عشر جهات حكوميه تانيه يبقى انت أكيد فى مصر

-لما تبقى حاصل على بكالوريوس تجاره وواقف تبيع محافظ بلاستيك فى محة مصر... يبقى انت اكيد فى مصر

-لما تروح تعمل فيش وعم عبده يطلب منك 20 جنيه فى نموذج الفيش اللى تمنه 4 جنيه...يبقى انت أكيد فى مصر

-لما تملى ال52 رغبه فى أستمارة التنسيق وتجيلك الرغبه ال53 يبقى انت أكيد فى مصر

-لما الراجل بتاع البوسطه يجيبلك جواب التنسيق وفيه الرغبه ال53 المعهد المتوسط للخدمه الأجتماعيه بأسوان ويقولك الحلاوه يا باشا ... يبقى أنت أكيد فى مصر

--لما تلاقى الدكتور بتاعك فى الكليه ولاده الأتنين وبنته معيدين فى نفس الكليه ونفس القسم... يبقى أنت أكيد فى مصر

-لما تبقى فى دوله المفروض نظامها الأقتصادى رأس مالى وفيها مدعى عام أشتراكى... يبقى أنت أكيد فى مصر

-لما تجيب 98% فى الثانويه العامه وما تقدرش تدخل كلية الطب البشرى يبقى أنت أكيد فى مصر

-لمايبقى واحد واقف فى اول شارعكم بقاله شهرين وكل يوم لما تعدى عليه يقولك لو سمحت أنا مش من هنا وعايز 2 جنيه عشان أروح ...يبقى أنت أكيد فى مصر

-لما تدخل السينما والواد اللى بيمسك الكشاف ده يقولك كل سنه وانت طيب ياكابتن ويقف قدامك مش عايز يمشى...يبقى أنت أكيد فى مصر

يبقى أنت أكيد أكيد أكيييييييييييييييييد فى مصر


الثلاثاء، 4 مارس 2008

واحد

لو قلت بحبك تقوليلى وايه يعنى اخدنا ايه من الكلام
ولو ما قلتش تفتكريها قلة اهتمام
طيب أقول بحبك ولا اسكت والسلام


جزيرة المعلمين


فعلا لازم نقول ان دى جزيرة المعلمين كل اللى كانوا فى الفيلم معلمين من السقا لباسم سمره وخالد الصاوى وحتى محمود ياسين الناس كلهااللى شافوا الفيلم عجبهم دوره وكمان هند صبرى كانت صعيديه بجد , السقا فعلا أكتشف نفسه من جديد فى الفيلم ده خصوصا فى مشهد المواجهة بينه وبين عمه اللى هوه باسم السمره لما أحمد السقا قلد طريقة خالد الصاوى فى الكلام بجد كان يجنن فعلا لازم الواحد يرفعله القبعه ,طبعا كل ده طبعا تحت اسم المعلم و الأستاذ الكبير أوى شريف عرفه اللى بجد ماحدش يقدر فعلا يبهرك فى مصر بالطريقه دى غير شريف عرفه , لما تتفرج على الفيلم وفعلا تلاقى كل مشهد بيقول ان ده شريف عرفه , تحيه كبيره لشريف عرفه ورجعه جامده للأكشن , كمان لازم بجد ماننساش التصوير الرائع فى الفيلم والديكور اللى بجد عيشنا فى جو الفيلم.فعلا لازم نقول ان الجزيره فيلم كامل من جميع النواحى وتجربه جديده فعلا لأن لأول مره واحنا بنتفرج على الأكشن العالى ده و ما نقدرش نقول ان الفيلم بيبالغ او ان المشاهد أمريكانى لأننا عارفين بجد ان اللى فى الفيلم ده حصل فعلا على ارض مصر فى الصعيد, تجربه جديده وفيلم يستحق التقدير.

الاثنين، 3 مارس 2008

دليل العاطل العصرى : 1 ( حقيقه غير مريحه



ساعات بيبقى فيه حقيقه الواحد عارفها والناس كلها عارفينها بس مع ذلك بنبقى جوانا مش عايزين نصدقها , أنا بتكلم عن حقيقه الناس كلها عارفاها وأنا عارفها ومافيش شاب فى مصر مش عارفها ومع ذلك ما كنتش واخدها بجد الحقيقه ان( مافيش شغل), دايما وانا ففى الكليه كنت اسمع الناس تقول احنا متخرجين من 7 سنسن ومش لاقيين شغل وكنت أقابل ناس فى الكليه متخرجه من سنه او سنتين ومع ذلك كانوا بييجوا الكليه أكتر منى وكنت أسالهم انتم مش خلصتم ايه اللى بيجيبكم الكليه كل يوم كانوا دايما بيقولوا أهوه أحسن من القعده فى البيت وكنت أقولهم طيب وليه قاعدين فى البيت ما أشتغلتوش ليه انتم ما دورتوش على شغل ودايما كان ردهم عباره عن ابتسامه صفرا حزينه ونظره كده معناها الواد ده شكله كده غلبان مش عارف حاجه وكانوا يقولولى يا ابنى مافيش شغل ,كنت بستغرب اوى لما تسمع عن الحاجات دى غير لما تشوف واحد متخرج من نفس الكليه بتاعتك من سنتين وقاعد فى البيت وبيقولك أصل ما فيش شغل لأن كده بتبص لمستقبلك البمبى فى المرايه,وكانوا يقولولى احنا اشتغلنا كل حاجه ومش نافع وقفنا فى سيبر وسنترال وحاجات تانيه بلاش نقولها احسن ,كنت دايما بكدب نفسى أقول لاه يا جدع دول بالتأكيد عيال فرافير ما دوروش كويس بالتأكيد أنا لما أخلص انا شاءالله وأخد الشهاده ها يبقى وضع تانى خالص, وبسرعه عجيبه جدا الكليه خلصت وأتخرجت وبقيت حاصل على بكالوريوس الزراعه وفجأه اكتشفت الحقيقه اللى المفروض انى عارفها أساسا ,الورقه اللى ضيعنا 4 سنين من عمرنا عشان نأخدها (صراحه همه ما كانوش 4سنين بالظبط بس ما علينا) الورقه دى اللى أسمها شهادة البكالوريوس فى الحقيقه أكتشفت أن الكلينكس بتاع التواليت له أهميه أكبر منها لأنه بيؤدى وظيفه مهمه جدا كلنا عارفينها لكن الشهاده دى وبكل اسف مش بتؤدى اى وظيفه , دى حتى مش ممكن تقوم بوظيفة الكلينكس بتاع التواليت وطبعا الناس اللى دخلت كادر العاطلين وأخدت الشهاده عارفين ليه وان شاء الله الشباب اللى لسه ما اتخرجش ما يزعلش لازم يكون عندكم طموح وبكره ان شاء الله ها تبقوا عاطلين وتعرفوا ليه او يمكن تصعبوا عليا وأقولكم المره الجايه.

الأحد، 2 مارس 2008

وعجبى ...

ياما صادفت ناس وماصاحبتهمش وكاسات خمور وشراب وما شربتهمش أندم على الفرص اللى انا سيبتهم ولا على الفرص اللى ما سيبتهمش ... عجبى