الجمعة، 26 مارس 2010

لو بتفكر تكون راهب فى التبت خد بالك


ضغط ضغط ضغط , فى الشغل ضغط فى البيت ضغط فى الحب موجود مش موجود ضغط برضه , حتى الأجازه بقت تشكل عبأ فى حد ذاتها وضغط برضه , خلاص يا جدعان حرام هوه احنا ايه الكمبيوتر ده اجدع منى هوه بيعمل ستارت وسليب زىنا بس هوه بيعمل شت داون كمان أشمعنى , ليه مش لاقى زرار الشت داون من حقى اعمل شت داون شويه يعنى , عايز اخد أجازة من الدنيا كلها صعبه دى يعنى أجازه شهر حتة ولا موبايل ولا كمبيوتر ولا تليفزيون ولا اى حاجه الكترونيه اصلا واحلى حاجه بقه لو مافيش بنى ادمين كمان ماهواصل مادام البنى ادم اتوجد يبقى المشاكل ها تيجى جرى وراه لو كنت فين , فكرت اطلع سيوه مثلا فى الصحرا كده مع نفسى او اطلع مطروح فى الشتا أو رحلة سفارى فى الواحات نتهوه فيها سنتين ولا حاجه , بس فيه مشكله برضه مش هوه ده اللى ها يخلينى افصل انا محتاج حاجه جامده فعلا , وأنا بتأمل كده فى البحر عدى فى دماغى صوره كوميديه لرهبان التبت اللى بيتاملوا فى دايره دول وبيطيروا وبتاع الفكره وقفت شويه فى دماغى صراحه ليه ما اسافرش رحله التبت والسياحه بره مصر ارخص يا راجل دا انا لو طلعت رحلة سفارى هنا ها ابيع هدومى , الموضوع تضخم فى دماغى ليه ما اطلعش اجازه طويله سنه مثلا ولا 6 شهور وأروح اعيش فى معبد من معابد التبت مش ها ابقى بوذى يعنى لا بس ها اعيش معاهم عادى ولا تكنولوجيا بقه ولا مواصلات ولا اى منغصات البس العبايه بتاعتهم دى واحلق زلبطه واربى السكسوكه ما ربتهاش من زمان والله وأقعد على قمة الجبل أتامل بقه يا ريس انا والطبيعه الروعه فى وسط التبت جبال وبحيرات وخضره ده الواحد ممكن يتعلم الطيران وأحرك الحاجات من بعيد بقه وحركات


للصدفه بقه كان فيه فيلم عن راهب تبتى على قناة National Geographic طلع ان معابد الشاولين اللى بتطلع رهبان مقاتلين دى موجوده بجد أه والله والراهب فيها بيتعلم فنون القتال بس بطرق صعبه جدا عشان يكون راهب مقاتل تخيل بقه يا حلاوه اروح بقه لاقى راهب عنده 190 سنه يدربنى بقه فى الغابه والحركات دى واكسر الخشب بصباعى واهد الحيطان براسى واجمع ايديا مع بعض ارح مطلع كوره زرقا كده تطير الاعداء يا لهوى على الجمال و مش ها احتاج فلوس اصلا ها اعمل بيها ايه مافيش لبس غير العبايه الحمرا كفايه انى اوفر مشواير شرا الهدوم اللى مش بحبها , وها اوفر المبالغ الرهيبه اللى بصرفها على الجل ما فيش احلى من الزلبطه يا ريس , وها اوفر فلوس شحن الموبايل وموتى بغيظك يا فودا فون , وفلوس اشتراك النت والاكل عند أبو ربيع وجاد والمدهش والحاج أبو كنتاكى وهارديز ها افقتقد يمكن السوبيا بتاعت خروب أمال بس مش مهم الواحد يصفى نفسه كده وويتخلى عن الماديات اللى مخليانا عبيد ليها ها اعيش زى الرهبان كفايه ربع رغيف فى اليوم ونص كباية ميه فل أوى , مش ها احتاج مواصلات عشان مش ها اخرج من المعبد أصلا وحتى لو احتاجت حاجه من بره ها اطلبها دليفرى بالتخاطر العقلى , الغريب بقه ان الراهب ده ساب معبده فى التبت وسافر يعيش فى امريكا فى نيويورك أزحم مدن الدنيا غريبه اوى الموضوع ده خلانى ادخل على النت عشام افهم اكتر عن الموضوع , لقيت حاجات غريبه برضه لقيت ان المعابد برضه ما بقتش زى الاول والتبت نفسه ما بقاش هوه نفس التبت دلوقتى التبت بقى فيه شبكات محمول وطبعا فيه شبكات محمول يعنى فيه محمول مع الناس


حتى الرهبان , يعنى مش بعيد الراهب تلاقيه مزوغ من جلسة التأمل الصباحيه كده ومستخبى ورا سور المعبد وماسك موبايله اللى فيه خط ألو كل الناس الدقيقه ب 8 قروش وبيكلم الجو بتاعه اللى ساكنه فى القريه اللى تحت الجبل ولا حاجه وهات يا رغى بقه , ايه ده امال فين الأنفصال عن العالم ومافيش بنات ومافيش حاجات كده وكده , بصيت لقيت كمان ان المعابد بقى فيه قرى حواليها يعنى والقرى دى فيها سايبرات وكده يا معلم , تبص تلاقى العيال الصغيرن اللى لسه فى كى جى تو رهبه ينطوا من على سور المعبد يا معلم ولا الواد سيد كوله اللى فى سارعنا ويهربوا ويروحوا سايبر ويلعبوا كاونترسترايك ونيض فور صبيييد ومش بعيد يكونوا بيلعبوا جى تى ايه كمان


الكبيره بقه بجد يا جماعه موضوع الأحتلال الصينى للتبت , التبت ده مش حاجه صغيره ده مساحته 2.5 مليون كيلو متر مربع , ودلوه قديمه ترجع لألفين سنه الصين احتلتها 1949 , الموضوع كبير اوى بقه من التعصب الدينى والطائفى من الحكومه الصينيه لشعب التبت وخصوصا الرهبان واغلاق المعابد وقوانين لتحديد عدد الرهبان فى التبت ومحو لثقافة وتراث التبت حاجه زى فلسطين بالظبط كده الصين بتقضى على ملامح التبتوما اقولكش بقه يا معلم على المظاهرات اللى بيتصدر فيها باللذات رهبان التبت وضرب وسحل وبهدله ايه يا معلم ما أقولكش



, ونفس السياسات بتاعت اسرائيل الصين بتتبعها برضه من تهجير سكان التبت وبناءمستوطنات وتوطين مستوطنين , التبت فيها حوالى نص مليون جندى صينى صحتهم كويسه اوى ولا الأمن المركزى عندنا , واضح ان الموضوع بعد أوى عن اللى كان فى دماغى على الأقل انا بنضرب هنا لقضيه فاهمها ومدركها انما ها اروح انضرب هناك عشان قضيه ليها الناس اللى اولى انهم ينضربوا عشانها , مافيش فايده عموما شكلها ها ترسى على اربع ايام وتلات ليالى فى شرم الشيخ فى فندق 3 نجوم شامل الأفطار ب 650 جنيه بس يا رب بس نعرف ندخل شرم ما يرجعوناش , ولا احنا فى التبت ولا ايه .

الاثنين، 15 مارس 2010

أربعه وتلاتين


أبص فى المرايه أشوف وش مرسوم

جبين عريض مكتوب عليه المقسوم

عيون مغمضه بس عمرها ما داقت نوم

شفايف مبرومه لو أتفتحت تطرش هموم

الأحد، 14 مارس 2010

لقاء صحفى مع المصرى صاحب مدونة أحيه هية بقت كده


الصحفيه : أهلا بحضرتك


المصرى : أهلا بيكى يا أختى


الصحفيه : عرفنا ان الأيام دى عيد ميلاد أحيه الثانى كل سنه وأحيه طيبه


المصرى : وأنتى طيبه بس لما أنتى عارفه جايه بأيديك فاضيه ليه حتى ماجبتيش باكو بسكوت لوكس


الصحفيه : معلش يا فندم اصل الصحيفه اللى انا شغالها فيها على قد حالها وانت عارف بقه دا انا بدفعلهم فلوس مش بقبض منهم


المصرى : لا حول ولا قوة الا بالله , خلاص يا ماما انتى جايه تشحتى هنا لخصى


الصحفيه : اول حاجه انت ليه مخبى شخصيتك على المدونه مع ان الناس كلها عارفه انت مين ايه الأستعباط ده


المصرى : دى نقره ودى نقره أنا لما بكتب على أحيه ببقى المصرى لما بكتب على الفيس بوك ببقى واحد تانى لما بمشى فى الشارع ببقى واحد تالت فى البيت واحد رابع ومع اصحابى واحد خامس فى الشغل واحد سادس وكده يعنى فهمتى حاجه


الصحفيه : يعنى أقدر أفهم من كده ان حضرتك سيكو وعندك فصام وكدهون



المصرى : أيون صلاة النبى عليكى ابديتى تفهمى أهوه


الصحفيه : طب ليه أحيه مش شايف انها لفظ مش مؤدب شويه

المصرى : بصى يا قطه أحيه دى لفظه أعتراضيه توصف على أنها تعجب سماعى وبعدين فى اسكندريه دى عادى يعنى زى أيوووه كده


الصحفيه : طب مش شايف ان المدونه ساعات بيبقى فيها كلام خارج شويه

المصرى : بصى أنا فى الأول كنت مؤمن ميه فى الميه ان الواحد ما يقولش اى كلمه كده ولا كده بس بعد كده لقيتها أن هيه بقت كده أصلا وما ينفعش غير كده

الصحفيه : ممكن نعرف أنت بتشتغل ايه


المصرى : خليكى فى حالك


الصحيفه : هل لديك أى أنتماء سياسى تجاه أى حزب فى مصر

المصرى : يعنى ايه حزب


الصحفيه : طب مين هوه عبده

المصرى : ده عم عبده بتاع العسليه اللى بيفرش اول شارعنا بس بيقول كلام عنب


الصحفية : طب مين فوزية


المصرى : فوزيه دى تبقى بنت عم عبده بتاع العسليه وكنا بنلعب عريس وعروسه فى الشارع واحنا صغيرين


الصحفية : ايه رأيك فى النظام الحاكم فى مصر


المصرى : يعنى ايه رأى


الصحفيىة : مين أكتر مرشح عجبك فى انتخابات الرئاسه الأخيره


المصرى : الراجل أبو طربوش ده اللى أسمه الصباحى تقريبا


الصحفيه : يا سلام هوه ده اللى عجبك أسمعنى بقه


المصرى : عشان هوه الوحيد اللى كان صريح مع الشعب قال انه ها يلبس الناس الطرابيش , فيه مرشحين تانيين لبسوا الناس الطرابيش من غير ما يقولوا .


الصحفيه : مش فاهماك أوى بس شكلك كده ها تلبسنا فى الحيط يا عم أنا لسه صحفية صغنونه رئيس التحرير ها يسوحنى


المصرى : يا قطه مش قد السؤال ما تسأليش , ده ايه يا أخويا الصحفيين السيس دول


الصحفية : ما علينا ايه رأيك فى الغناء فى مصرحاليا وهل بيساهم فى الوعى القومى زى ماكنا بنسمع أغانى عبد الحليم حافظ الوطنيه زمان


المصرى : لا دلوقتى طبعا عندنا مغنيين كتير بتشارك فى الوعى القومى والحياه السياسيه بصوره واضحه جدا عندك سعد الصغير مثلا فى أغنيته وبحبك يا حمار وخدى عندك كملن أغنية أنا مش عارفنى بتاعت عبد الباسط حموده الأغنيتين دول فيهم أسقاطات سياسيه مهمه جدا


الصحفية :اللهم طولك يا روح , طب نتكلم عن الفن , ايه رأيك فى التنوع الدرامى الموجود حاليا فى القنوات العربيه


المصرى : ما أخدش بالى صراحه


الصحفيه : ليه مقالات المستثمر الصغير بقالها مده مختفيه


المصرى : معلش هوه الراجل بس عمل سبوبه حلوه فطلع يضرب يومين كده فى لندن وراجع قريب ان شاء الله وها يبدع تانى


الصحفيه : بمناسبة السفر ايه رأيك فى المواضيع المثاره حاليا حول سفر المسؤولين للعلاج فى الخارج من وزراء لأعضاء مجلس شعب للباقى بقه


المصرى : العلاج على نفقة الدوله


الصحفيه :مممم , مش فاهماك بالظبط بس ماعلينا , انت أهلاوى ولا زملكاوى


المصرى : متهيألى لو كنت أهلاوى المدونه دى ما كانش ها يبقالها وجود أو على الأقل ما كانش ها يبقى اسمها أحيه


الصحفية : الصورة اللى على البروفايل بتاعك على المدونه دى صورة مين


المصرى : دى صورة عم أدريس أول مواطن عادى كده صورته تنزل على الجنيه المصرى ,و بطلى رغى بقه خلينا نقوم نشوف مصالحنا


الصحفية : طب سؤال أخير هل أنت فعلا شايف أنها بقت كده


المصرى : يا خبر يعنى انتى مش شايفه كده , أحيه هيه بقت كده


الصحفيه : معلش سؤال سريع كده أنت خاطب او متجوز أو مرتبط





لا بس فيه بنت مدونه صينيه زميله متكلمه عليا بس ربنا يفك سجنها بقه أول ما تطلع ها نلبس دبل ان شاء الله



الصحفية : فى ختام الحوار نشكر المصرى صاحب مدونة أحيه هيه بقت كده على أستضافته


المصرى : ربنا يخليكى يا أختى مانجيلكيش فى حاجه وحشه


-----------------------------------------------

الصحفية : ايه يا عم مالك ما بالراحه علينا شويه


المصرى : انتى مش شربتى الشاى يا قطه طريقك زراعى بقه

الصحفيه : ماشى بس بقولك أنت فاضى النهارده فيه مسرحية حلوه أوى فى الساقيه عازماك


المصرى : لا ربنا يخليكى بطلت أ حضر مسرحيات فى الساقيه من بعد ما شفت مسرحية ( لا تنقذوا الغرقى ) لو فيه حفلة مزيكا ممكن تعزمينى براحتك


الصحفيه : طب ممكن نشرب حاجه سوا على البورصه مثلا



المصرى : لا لا لا لا بورصة ايه وبتاع ايه يا ماما , انا مش بقعد غير على ستار بقظ أو سيلانترو , ابقى عدى عليا هناك سلام يا قطه

----------------------------------------------

المصرى : ألو ازيك ياد يا حسنى عامل ايه يا ابن ال--- , اه تمام , انت فل المهم , طب قشطات ,هاته معاك , ماشى نتقابل 9 على البورصه تمام

الاثنين، 8 مارس 2010

تلاته وتلاتين

أنا حضنى من هنا لحد القمر

ها تلاقى احساس وناس تلاقى صحرا وشجر

لحظة أمان لحظة جنان لحظة خطر

وناس ناسيه انها ناس لكن لسه بشر