طلب زواج

تهييسات الجواز وتوابعه

طبعا بصفتك راجل ملو هدومك , وبدأ يظهر عندك ما يسمى مبادئ الكرش , وسنك فوق الخمسه وعشرين , مرتبك يادوب بيكفيك , بس بمقاييس المجتمع المصرى الخرافى بيقولولك انه ممكن يفتح بيت , ويفتح بيت دى مش اكتر من انه يفتحه دايما فى وش طالبى الاقساط من العفش للشقه للأجهزة الكهربائية لطقم الصينى اللى مش بتاكل فيه لحد النيش اللى بتجيبه عشان تحط فيه طقم الصينى اللى مش بتاكل فيه , طبعا حضرتك بتفكر فى الموضوع من ناحية المرتب والورقه والقلم وكل الناس بتقولك يا عم ما تحسبهاش هى بتيجى برزقها , ونعم بالله يا جدعان بس اهو واحد زائد واحد يساوى 11 , وانت طبعا مشاعرك مصديه يا عبنى خلاص والبارومه اكلتها ونفسك فى اى كائن مؤنث ييجى يكشط الصدا , ده طبعا غير الهرمونات اللى مبهدلاك , الله يسامحها , ويتداخل مع هذا الأنفجار النسوانى , واللبس اللى النسوان بتلبسه والله يدعقه اللى اخترع اللبس ده واللى اخترع الكارينا بالذات , تتداخل كل هذه العوامل فى مسلسل تأمرى عليك , وهكذا تصبح كما اصطلح المجتمع مشروع عريس مش بطال , ويبدأ بقى الشغل , طبعا لما تلاقى نظرة زميلة ليك فى الشغل اتغيرت وبدأت كورسين حنان معاك مع كورسين اهتمام مبالغ فيه مع واحده ازيك يا استاذ محمود كل يوم الصبح بتبعها غمزه وضحكه صاخبه لكن قصيره , هههههههههههههه قديم أوى الفيلم ده معلش خلينا فى سيناريوهات تانيه , مره تلاقى زميلتك فى الشغل بتأخرك شويه بعد مواعيد الشغل بحجة انها مش عارفه تعمل ريستارت للكمبيوتر , ما تفهموهاش غلط البنت مش قصدها حاجه غلط من اللى دماغطو راحتلها هى بس بتأخرك عشان تشوف اختها الحلوه اللذيذه اللى على وش جواز برضه واللى المفروض جايالها دلوقتى بس اتاخرت عشان حضرتك تشوفها ويمكن يحصل كيمياء تؤدى لفيزيا والعمليه تتزبط ويحصل أحياء , أو تلاقى زميلك اللى انت ما تعرفش أسمه اصلا بيعزمك على عيد ميلاد أخته اللى انتى بالتالى برضه ما تسمعش عنها أصلا , أو تلاقى أمك أو خالتك مرتبينلك ما يسمى بالصدفه المترتبه فتلاقى نفسك مزنوق فى قعده من بتاعت راسين فى الحلال ومفروض منك انك تعمل ايه ربنا وحده اللى يعلم , طبعا الموضوع ده بياخد منك وقت كبير وتجارب لحد ما تبقى متمرس فى الحاجات دى , يعنى ما تخافش لو أول 10 مواعيد من النوع ده ما نجحوش , ان شاء الله التلاتين الجايين ها ينفعوا , ده بالتأكيد ها يوصلنا ده ان وصلنا يعنى لأهم مرحلة مرحلة الزيارات المنزليه ودى طبعا مكلفه زى الزياره المنزليه للدكتور بالزبط , ليه بقى لأن الموضوع بيتم كالتالى , والدك أو والدتك أو أختك بيشوفوا بنت كويسه تنفع مشروع زوجه ده كمان ينطبق على أو خالتك او عمتك أو اى حد كان معدى فى الشارع بما انك مفضوح يعنى والناس كلها عارفه انك عايز تتجوز على نفسك , طبعا كما تقول البروتوكولات فى الحاله دى والدتك بتتصل بأم البنت وتاخد ميعاد . طبعا حضرتك بتتشيك وتشترى علبة شوكالاته أو دستة الجاتوه المتعارف عليها دوليا ودى تكلفه , وبتاخد تاكس انت والحاجه ودى برضه تكلفه , طبعا ممكن تكون معفن وما تشتريش حاجه وتخش بايدك فاضيه عليهم وتاخد الحاجه امك فى ميكروباص , ومش مهم الميعاد ومش مهم الحاجه , ما علينا , المهم ان السيناريو ده مكلف بقى وخصوصا بقى لو البنت عجبتك مبدأيا وانت لمست معاها فقررت تعمل زياره تانيه فها تتكلف تانى طبعا لازم تبان كريم يا ابنى , طبعا مش عايز اخدعكم واقولكم ان السيناريو ده هو اللى ها يجيب من الاخر وها يجوزك , عندك ابن عمى مثلا بيشتغل فى السعوديه عقبال املتك وطبعا بيرجع اجازه حوالى شهر فى الصيف , أمه طبعا بتقضى ماقبل اجازته بشهور عشان ترتب زيارته التاريخيه لمصر وترتبله 30 ميعاد فى تلاتين بيت مع تلاتين مشروع عروسه فى التلاتين يوم اللى بينزلهم أجازه و أقولكم ان ابن عمى بقاله بينزل أجازات من 5 سنين , وللأسف لسه سينجل حتى هذه اللحظه

يتبع......

تخاريف صيام

حد شاف فيلم البحر بيضحك ليه بتاع محمود عبد العزيز ونجاح الموجى , فيلم كده لما تشوف مشهد منه هاتصنفه كفيلم مقاولات ونفسك مش ها تطاوعك تشوفه , بس مره وانا بدور فى ال500 قناة بتوع النايل سات على اى حاجه اشوفها لقيت الفيلم ده عند مشهد معين , محمود عبد العزيز أتخنق من حياته وعيشته فصحا فى يوم الصبح , لقى مراته راح ضاربها حتت قلم من غير ما يتكلم ولا كلمه وراح نازل رايح الشغل , دخل على الموظفين زمايله راح ضارب كل واحد منهم قلم وبعدين دخل مكتب المدير وراح مديله قلم برضه محترم , وراح نازل رايح لأصحابه فى المكان اللى بيقعدوا فيه وراح ضارب كل واحد فييهم قلم برضه , بعد ما فش غله من كل الناس اللى خانقينه , طلق مراته وساب شغله ودار فى الشوارع يشتغل حاوى , بذمتك مش نفسك تعمل زيه مش قصدى تشتغل حاوى يعنى , بس ما فيش يوم كده حسيت انك نفسك تصحى الصبح تخبط على جاركم اللى بيرمى الزباله فى مدخل العماره وتديله قلم , وتنزل للميكانيكى اللى جمبك اللى نازل ضرب فى الواد اللى شغال معاه طول النهار اشى شلاليت وبونيات وتضربه قلم , وتكمل بقى على سواق الميركوباص اللى بيغلى الأجره كل يوم على مزاجه , ومديرك فى الشغل اللى مؤهلاته أصلا ما تخليهوش يدير عربية كبده ده لو عربية الكبده ليها مدير يعنى , وزميلك ابن التييييييييت اللى ما بيعملش حاجه طول النهار غير نقل الكلام وتدبير الأسافين المحترمه , والراجل اللى بيدخل فى وسط طابور العيش ما تعرفش بيجى منين وتلاقيه طلع بطاوله عيش بحالها وانت مش عارف تجيب بنص حنيه , والموظف اللى بياخد الرشوه بوش مكشوف زى الأتاوه بتاعت بلطجيه نجيب محفوظ بس بلطجيه نجيب محفوظ ما كانوش موظفين حكومه , والواد والبت اللى قاعدين على كورنيش البحر حتى فى رمضان وعاملين فيلم للكبار فقط دول بقى باللذات عايزين ينضربوا بس على قفاهم كده عشان تدلقهم فى الميه , ما نفسكش تجيب الواد الرخم التكن اللى فى كل العبر اللى بيقدم برنامج ضحكنى شكرا وتحلقله زلبطه وتلبسه البوكسر بتاعه فى راسه , ما نفسكش تمسك ايناس الدغيدى و خالد يوسف ومعاهم غادة عبد الرازق وسميه الخشاب , وتشترى ب3 جنيه سبرتوا وسخ وتولع فيهم سوا , ما نفسكش تضرب ميلودى مان وعم أنور قلمين محترمين وتضرب بوبى بس مش على وشها , ما نفسكش تضرب اللى قتللوا خالد سعيد فى ميدان عام , ما نفسكش تضرب اللى سرقوا أراضى البلد عشان يبنوا عليها قصورهم , واللى سرقوا فلوسنا وسمموا أرضنا وميتنا , حتى الدوا بقى فاسد , ما نفسكش تدخل على رئيس الوزرا فى مكتبه وتديله قلم محترم كده تطلع فيه غل السنين , ووزير التعليم اللى كان السبب انك ما دخلتش الكليه اللى كان نفسك فيها عشان عشر درجه ولا دكتور الماده فى الكليه اللى بقالوا تلت سنين بيشيلك الماده عشان شفته فى وضع يحاسب عليه القانون مع زميلتكم فى سكشن 3 , ولا ولا ولا مش نفسك تنزل تصرخ كده فى الناس اللى ها تموت بعضها فى الطوابير والزحمه وسايبن ناس تانيه تبنى ملاعب جولف وما عندناش حد فى البلد بيعرف يلعبه أصلا , يلا أدينا بنفضفض , اهى دى باين اللى بيسموها تخاريف صيام

بروفة النهايه

ما حدث الجمعه الماضيه 18-6-2010 فى مصر تحديدا فى القاهرة والأسكندريه وأكثر تحديدا فى الأسكندريه , هى حاله جديده من الصحوه , تلك الوقفه الصامته التى حدثت الجمعه الماضيه هى من أكثر الأفكار الحضاريه فى التعبير عن الرأى , انطلقت من الفيس بوك عن طريق الشباب لتصل لجميع الفئات التى شاركت فى الوقفه من أباء وامهات وقفوا جنبا الى جنب بجوار ابناءهم من الشباب , رأينا أطفال رأينا عائلة بأكملها من أب وأم وأبنهم الصغير , يثبت الفيس بوك مرة أخرى انه أقوى من الأحزاب المصريه وأقوى من جرائد المعارضه , مايفعله الفيس بوك يخضع تحت فعل السحر , ولكن الأكثر سحرا هو التجاوب الشعبى والتجاوب هنا هو فى اساسه ليس فقط غضبا وأحتجاجا على موت خالد سعيد , بل هى وقفة فى وجه نظام كامل مشوه , ما حدث وما يحدث فى الحقيقه هو ما يمكننا تسميته بروفة النهاية , هو بداية ادراك للشعب أنه لو أتحد فلن يردعه اى قوى أمنيه غاشمه , فالأمر هنا أكبر من هذا بكثير هى اردادة شعب بأكمله , يظن الحمقى أن الأمر ليس أكثر من هوجة شوية عيال , الحق ان الله قد وضع غشاوة على عيونهم ليستمروا حتى النهاية فى ظلمهم حتى تفاجأهم النهايه القادمه لا محاله , خالد محمد سعيد ليس هو الضحيه الأولى لقضايا التعذيب سبقه ألاف ولكن ربما خالد سوف يكون هو القشه التى سوف تقصم ظهر البعير , هم يستمرون بالكذب ومع كل كذبه تكشف , يخرجون علينا بكدبة أكبر واكبر واكبر فى كل مره حتى اصبحوا مجرد أثواب مهلهلة أمام الناس يحتمون وراء الألاف من جنود الأمن المركزى الذى هم بالأساس أفراد من المفترض انهم جندوا لخدمة الدوله لا لخدمة أفراد وأحزاب , لن أطيل عليكم , ليس هناك أعظم مما قاله الله تعالى
بسم الله الرحمن الرحيم *( حَتَّى إِذَا فَرِحُوا بِمَا أُوتُوا أَخَذْنَاهُمْ بَغْتَةً فَإِذَا هُمْ مُبْلِسُونَ فَقُطِعَ دَابِرُ الْقَوْمِ الَّذِينَ ظَلَمُوا وَالْحَمْدُ لِلَّهِ رَبِّ الْعَالَمِينَ )* صدق الله العظيم الانعام 44 - 45

‏

نورت كارفور يا باشا

طبعا كلنا سمعنا عن زيارة الرئيس التاريخيه لكارفور مش عارف هيه ليه تاريخيه بس هيه كل زيارات الريس عموما تاريخيه , مادام الريس طلع من القصر الجمهورى وراح اى حته يبقى بالتأكيد الحنه اللى راحها دى ها تدخل التاريخ , بس ازاى بقه زيارة الريس لكارفور تاريخيه وايه موقعها من التاريخ بالظيط تعالوا نشوف ازاى ممكن نأرخها , اول حاجه نلاحظها هيه اختيار الحكومه الموفق لمكان الزياره كارفور المعادى مكان ممتاز وخصوصا اذا كان فى وقت زى اللى الزياره كانت فيه وقت الضهر فى رمضان الوقت اللى بيكون زوار كارفور فيه عباره عن أغلبيه من الأجانب سكان المعادى وبقية من المصريين سكان القطاميه هايتس اللى مش بيمثلوا غير شريحه ضيقه جدا جدا جدا من المصريين واللى مالهومش علاقه بأى حال من الاحوال بالمواطن المصرى الحقيقى اللى ما يعرفش عن كافور ده غير انه محل بقاله كبير حبتين وبيبيع طماطم أورجانك الكيلو ب 12 جنيه , قبل الزياره بساعه يمكن بدات الترتيبات المرئيه ودى غير التوقعات المرئيه داخل المول طبعا كل ادارة كارفور على سنجة عشرة أمن كارفور اتجمع على البوابات وبعديها بشويه ظهر اصحاب البدل المنفوخه عارفينهم طبعا وبعدين الحرس الجمهورى ناس اتلمت عشان تتفرج من المصريين العاديين طبعا اللى بيتلموا على اى حاجه ودول فى الغالب من اللى شغالين فى المول التجارى , أما المصريين السوبر سكان القطاميه هايتس فقرروا بعديها وعلى مضض انهم يقعدوا يتفرجوا على تشريف الحكومه وهمه قاعدين على starbucks , وصل الريس والحكومه لكارفور بسلام والحمد لله ,وتضاربت الأقوال فور رؤيتهم حول سبب هذه الزياره المباركه , بعض المغرضين قالك يمكن الحكومه جايه تجيب كحك العيد من كارفور عشان عليه عرض , فى حين قال مغرض اخر انهم جايين يشتروا شنط المدارس , فين حين قال مغرض أخير أن الحكومه الألكتروينه جايه عشان تشترى كام لاب توب من اللى عليهم عرض , فى حين قالت أحدى الأراء العاقله أوى انهم جايين يتفقدوا حالة الأسواق المصريه كتر خيرهم , ولكن سرعان ما تراجع هذا الرأى عندما وجد أن الزياره من وقت دخولها من بوابة كارفور حتى الخروج من نفس البوابه مره أخرى لم تستغرق أكثر من أربعة دقائق , نعم لم تستغرق الزياره أكثر من أربع دقائق , تفقدت فيها الحكومه الرشيده حالت الأسواق المصريه وأسعار الزيت والسكر والكحك والرز والسمنه والمكرونه الأندومى والشوكولاته السنيكرز والزبادو والفراخ المجمده والجمبرى الهندى المجمد والكولاوالبيبس وشنط المدراس والكشاكيل ال 40 ورقه وال 80 كمان , بجد لازم نهنئ أنفسنا اننا عندنا الحكومه الجباره دى اللى اللى أختصرت السوق المصرى كله من العتبه لسوق الجمعه لسوق التوفيقيه لسوق العبور للمنشيه وزنانيرى فى اسكندريه وجميع اسواقك يا بلد فى كارفور المعادى وأختصر كارفور المعادى فى دقيقتين لأ وطلعت كمان برأى ان الأسواق ميه ميه والمواطن مبسوط وأخر انشكاح , ايه الحكومه الجباره دى اللى بتعمل كل الشغل ده فى فيمتو ثانيه مصريين بقه بجد نهنأ أنفسنا ان عندنا أطول رئيس وزرا فى العالم مما يتيح له هذه الرؤيه الجباره لما لا يستطيع الاخرين ادراكه واذكى حكومه على الأطلاق اه وعلى الطلاق .

ها تقطعولى ايييييه

دى الجمله اللى كان عادل امام بيقولها فى فيلم المتسول اللى كان عامل فيه دور شحات وكانت العصابه لازم يقطعوا رجل او ايد للى يشتغل معاهم عشان الشحات يصعب على الناس ,لكن عادل امام فى الفيلم قالوله مش ها نقطعلك ولا رجل ولا ايد فبقى ها يتجن مش عارف ها يقعوله ايه , المهم ان هوه ده الموقف اللى جه فى دماغى لما سمعت التصريحات بتاعت موضوع صندوق الأجيال , بقيت مش عارف الحكومه قطعت للمواطن كل حاجه يا ترى هاتقطعولى ايه المره دى , يعنى دلوقتى نص شركات القطاع العام اتباعت برخص التراب والفلوس اللى طلعت منها ولا دخلت فى استثمارات تعوض اللى اتباع ولا مشاريع تنميه ولا حد شاف منهم مليم ,اللى سمسر سمسر واللى سرق سرق , ايه بقى الجديد ايه المصيبه اللى ها تتعمل فى الشعب اكتر من كده , طب الجيل ده وفلوسه راحت اوكى , كمان ها نضيع فلوس الاجيال اللى جايه , ايه يا ناس , 152 شركه مش لاقين طريقه اكثر افتكاسا عشان تخلصوا منهم أذكى من طريقه صندوق الاجيال , أجيال ايه يعنى ابنى ييجى فى المستقبل اديله ورقه ما تسواش حاجه اقوله ده حقك اللى ضيعناه يا ابنى , كنت راكب ميكروباص وواحد بيتكلم مع السواق فى الكلام اللى سمعه فى موضوع صندوق الاجيال , كانوا قاعدين بيضربوا كف على كف ,واحد كان قاعد جمبى عنده بتاع 60 سنه كده قالهم ازاى يا جدعان الكلام اللى بتقولوه ده , همه مش مجانين عشان يقولوا كلام زى ده يا جدعان كفاياكم اشاعات بقه , الناس قعدوا يحلفوله والله يا حج دى مش اشاعات ده احنا شفنا الكلام ده وسمعناه بنفسنا فى التليفزيون , الراجل يا عينى قال لا حول ولا قوة الا بالله وقعد يضرب كف على كف هوه كمان , تخيلوا الأسهم دى بقه تدخل البورصه اللى هيه أسهم القطاع العام المصرى , ومصر ترتفع فى البورصه ومؤشر البورصه ينزل ومصر تنزل , والناس كلها تبيع أسهمها فى القطاع العام ومين يتشرى ,ولما أموت بقه عيالى يقطعوا بعض عشان السهم وبعدين ها اعمل ايه بالسهم لما اتزنق أبيعه ازى يعنى ده انا حتى ماأبقاش وطنى ومين اللى ها يشترى أى حد امريكا مثلا أو أسرائيل , اقول ايه بس , حسبى الله ونعم الوكيل , لو بجد عايزين كل واحد يلخد خقه فى البلد وتحفظوا حق الأجيال اللى ها تيجى ولا ها تلاقى ولا أراضى ولا مصانع ولا شركات ولا اى حاجه كله ها يكون اتباع يبقى نطور اللى موجدود وننميه مش قاعدين نبيع وفلوس البيع نديها معاشات ومكافأة نهاية خدمه للعمال اللى ها نسرحهم والفلوس رايحه فى الهوا , ولو عايزين بجد مصلحة البلد دى وعايزين تنقذوا الشركات دى وتصلحوا الأقتصاد ,يبقوا تصلحوا أوضاع الشركات الموجوده ولو مافيش فلوس ومش عارفين تصلحوها خلاص اطرحوا جزء من الشركات دى للأكتتاب العام للمصريين وبالقلوس اللى تيجى نصلح الشركات دى , ولو مستغنيين يبقى الشعب يشترى شركاته هوه أولى واللى عايز يشترى يشترى بس يبقى من غير سمسره ولا تربيطات تحت الترابيزه أو فوقها , والناس تشترى شركاتها اللى هيه شركات القطاع العام , وتبقى شركات مساهمه بمجالس اداره جديده وفكر جديد بجد ,مش تقولى صندوق ,ما كفايه علينا صناديق الأنتخابات هيه ناقصه صناديق , قال صندوق صندوق ايه يا ابو صندوق , واحد صاحبى متفلئل قالى كويس انها المره دى هاتيجى على سهم بس ماهم كل مره بيدونا حاجات أكبر من كده بكتير !

وبحبك يا طابور

اوعوا حد يظن ظن السوء ويفتكر ان ده طابور عيش وان ده منفذ توزيع العيش المدعم اللى الحكومه قالت انه ها يحل المشكله , واوعوا تفتكروا ان دول ناس غلابه واقفين بالساعات مش عارفين يجيبوا كام رغيف من ابو شلن , لا لا اطلاقا , الكشك ده منفذ بيع تذاكر حفلة اليسيا فى مارينا , والناس دى كلها واقفه عشان يلحقوا تذكره فى الحفله , شفتوا بقه ظلمتوا الحكومه ازاى !!!

وقفه مخ - يه

- نحكم عقلنا نشتغل نفسنا -

ايه بقه حكاية وقفه مصريه دى مش عارف , مين الناس النضيفه اوى دول اللى فى البانارات اللى متعلقه فى الشوارع , مين الناس اللى فى الصور دول بالتأكيد دول مش المصريين تقريبا الحمله دى معموله لشعب تانى او حاجه كده ,وبعدين البانارات دى محطوطه على الطريق الصحراوى ده على أساس ان اللى ها ينظموا الأسره دول السحالى والأبراص مش الناس ,الحاجات دى تتحط فى العشوائيات فى الأماكن اللى بتعانى بجد , ويعنى ايه وقفه مصريه أصلا , الدكتور داخل يعمل عمليه وده يقوله وقفه يا دكتور, طب يعنى الدكتور يعمل ايه مايدخلش العمليه والراجل يموت وبكده يبقى بنقلل السكان ولا يمكن الدكتورداخل يولد واحده فا بلاش يدخل يولد الست ويسيبها تولع , وبعدين يقولك وقفه يا أنسه ! أما والله العظيم دى حاجه غريبه يا جدع ,يا راجل انت لما أنت عارف انها انسه وقفة ايه اللى عايزها منها يعنى تعمل ايه دى , الا بقى اذا كنت شايف حضرتك انها مش انسه ولا حاجه , يا أخى اتقى الله عيب كده , والراجل واقف بيزرع يقوله وقفه يا بلدينا يا عم احنا ما صدقنا الراجل قام من قدام التليفزيون والوصله عشان يراعى أرضه ما تسيبه يا عم وقفة ايه بس وبعدين هوه ناقص وقفه أكتر من كده ماهو متبهدل من المبيدات المنيله اللى بيرشها عمال على بطال , والمدرسه اللى بتشرح فى الفصل وقفة ايه اللى عايزها منها يا عن الحاج احنا ما صدقنا انها بتشرح والسبوره مليانه وعامله شغل والموجه جاى تفتيش تقريبا او حاجه كده , أنا مش فاهم ايه اللى الناسها تطلع بيه من الأعلانات دى عشان تنظم الأسره , فين أعلانات ماما كريمه يا سلام يا جدعان هيه دى الحاجات اللى تيجى مع المصريين أو ممكن يعملوا حمله زى بتاعت ادى ضهرك للترعه , ويخلوها ادى ضهرك لمراتك , بس ساعتها الخلع ها يبقى للصبح يا معلم , أو ممكن عشان الناس تفهم الأعلانات دى يجيبوا راجل ومراته على السرير وييجى عمك ده برخامته يقوله وقفه يا عم الحاج , بس ساعتها الراجل ها يقوله وقفة ايه بس يا ريت , ماألاقيش معاكى حباية زرقا !

حقا انك لا تضع قدمك فى النهر مرتين

يا سلام يا جدعان شفتوا بقه ما طلعش اى حد له دعوه بالعباره غلطان , العباره غرقت لوحدها سباحمك يارب, لأ ومين بقى اللى طلع غلطان قبطان عباره سانت كاترين , ايه ده يا أخواتى فعلا زمن المعجزات, انا فعلا اسف اننا ظلمنا الناس دى , فعلا الناس هيه اللى غلطانه , طب مش كنت المحكمه تدى كل واحد مات سنه سجن واللى ما ماتش 6 شهور .

الراجل ده ميه ميه وأنتخاباته ميه ميه

لما يبقى هوه ده حال انتخابات المحليات 2008 واللى ما يختلفش كتير عن اللى بيحصل فى اى انتخابات تانيه فى بلدنا.........يبقى انت أكيد أكيد أكييييييييييييد فى مصر

حى على الأضراب

أنا بكتب فى ليلة 6 ابريل ومتهيألى ده وقت متأخر أوى للدعوه للأضراب أو عدم الأضراب ,أنا بكتب عشان أقر واقع وأوصف حاله حقيقيه جدا ما أظنش انى شفتها فى البلد دى من يوم ما اتولدت , أنا حبيت أتكلم الليله دى بغض النظر عن اللى ها يحصل بكره لأن فى الحقيقه اللى حصل حصل خلاص ما فيش اتنين فى مصر اتقابلوا النهارده ما اتكلموش عن 6 أبريل ما فيش ميكروباص تركبه او مترو او ترام أو أى وسيلة مواصلات عامه الا وتلاقى الناس بتتكلم عن 6 أبريل وايه اللى ها يحصل بكره كل الأماكن العامه والخاصه فى الشارع وجوه البيوت فى كل حته فى بلادنا فى حاجه حصلت فعلا الناس فى مصر أخيرا عرفوا تقريبا همه عايزين ايه أتفقوا على حاجه , اللى ها يحصل بكره 6 أبريل مش ها يفرق لأن فى الحقيقه اللى حصل حصل فعلا البلد دى بتتغير فى حاجه بنحصل , وبتحصل غصب عن أى حد من اللى بيقولوا ان الشعب ده لسه ما نضجش وليه بيرضع من البزازه ومع ذلك بيستعملوا كل الطرق عشان يمنعوا اللى بيحصل , بأنصحهم يريحوا نفسهم لانهم مش ها يقدروا يمنعوا حاجه اللى حصل حصل خلاص والناس فى البلد عرفوا ايه الحاجه اللى كلهم عايزينها , خلاص الناس اتفطمت وبطلت ترضع من البزازه