الثلاثاء، 12 يناير، 2010

قلم حبر : 4

-فى صيف 2008 طلعت علينا الحكومه بالحمله الألمعيه اللوزعيه الميه ميه . حملة وقفة مصريه لتنظيم النسل وكعادة الحكومه فى خطواتها الجاده الموفقه المباركه , الحمله فشلت فشل زريع مالوش مثال , دلوقتى وبعد أكتر من سنه جاءت الحكومه من تانى عشان تثبت ان لا فيه لا فكر جديد ولا فكر قديم حتى , بعد أكتر من سنه بدأو نفس الحمله تانى بنفس الأسم ونفس الطريقه , وقفه مصريه , الحكومه اللى شايفه ان أكبر مشاكلها دلوقتى همه السكان ده مع التعداد الرسمى اللى بيقول ان سكان مصر وصل لحوالى 85 مليون نسمه , طب لو وصلنا بقه للتعدادات الغير رسمه اللى بتوصل الرقم ل 100 مليون نسمه يبقى الحكومه ها تعمل ايه , مشكله بالحجم ده ومع ذلك الحكومه ما كلفتش خاطرها عشان تجند عقولها العبقريه فى تنفيذ حمله تقدر تقنع الناس فعلا , لا أستسهلوا وبدأوا تانى نفس الحمله الفاشله بتاعة 2008 وبنفس الأسم وبنفس اللقكات القديمه المسجله فى الأعلانات , مع انى نصحتهم ايامها وقلتلهم على الأقل يغيروا اسم الحمله , مش قادرين يفهموا ان جملة وقفه مصريه دى مش ممكن تقلل الخلفه بالعكس , دى ليها مفعول السحر فى ان الشغل يبقى على ودنه والعدد يبقى فى اللمون , يعنى يسموها مثلا أنتخه مصريه , نومه مصريه , غفوه مصريه , أرتخائه مصريه واخدلى بالك انت أنما وقفه مصريه , وقفة ايه بس .

- ونحن على أعتاب سنه جديده , وكعادة حكومتنا المجيده كان فيه مفاجأة مستنيانا فى أول السنه توضح ايه خطه ونوايا وأسلوب الحكومه الجديد مع الشعب فى سنة 2010 , وما كانش فيه طبعا أحسن من يوسف بطرس غالى اللى بيتحفنا دايما بكل جديد عشان يوصل الأسلوب الجديد , وهو أسلوب ها أطلع تيت أهلكم , طبعا اللى حصل ان ناس كتير أوى أخدت الموضوع بحساسيه زايده أوى وطالبوا بأقالة الوزير ومحاكمته وحاجات تانيه كتير ما يصحش نتكلم فيهاهنا , أيه اللى حصل يعنى لما سيادة الوزير يستعمل جمله كجملة ها أطلع تيييت أهلهم , طبعا لو كان سبادة الوزير أستعمل كلمه زى دى مع أخوانا الصهاينه كان ها يتزبط قضايا أولها معاداةالساميه وأخرها ربنا لوحده اللى يعلمه ,انما لما يقول كده لناس مصريين عادى يعنى طب ما المصريين كلهم بيقولوا على الراجل أكتر من كده بكتييييييييييير , والراجل عمره ما فتح بقه يا جدعان وواخد المسأله بحب , يبقى يوم ما ييجى يهزر بجمله عابره كده فلتت منه الناس كلها تقفله على الواحده لا لا لا ماكنش العشم , بجد الراجل زعل يا جدعان ايه ده ما تراعوا العشره , سعادة الوزير قول كمان وأشجينا ما عادش خلاص يأثر فينا .



- فجأة طالعتنا كل الصحف المصريه ومواقع الأنترنت بقائمة الشخصيات المرشحه لخوض الأنتخابات الرئاسيه القادمه , وعلى رأسها الدكتور البرادعى والدكتور أحمد زويل , الحقيقه الناس أستغربت أوى هيه أيه العباره بالظبط , هوه الترشيح أتفتح للى معاه جايزة نوبل يعنى ولا ايه , ناس قالت يمكن عشان السادات كان واخد نوبل فنمشى على خطاه , ناس تانيه سألت طب ماكده نجيب محفوظ كمان يرشح نفسه بس ازاى نجيب محفوظ الله يرحمه , فى نفس الوقت كان نفس الجرايد برضه بتتطرح الخيار التانى وهوه جمال مبارك , الناس أستغربت بس ده ماعهوش نوبل , قالك لاه بقه ده معاه واسطه جامده أوى , الناس وصلها حاجتين بقه ان اللى ها يترشح يا يكون بالوراثه يا يكون معاه نوبل , فيه واحد ذكى قالك بقه طب ما يبقى ابن نجيب محفوظ يرشح نفسه أهوه وراثه ونوبل يعنى كفاءه , قالك لا بس نجيب محفوظ ما عندوش ولاد , واحد تانى قالى بقه انه سمع ان جمال مبارك ها يدفع عشان يأخد جايزة نوبل السنه دى فى السلام , قولتله ازاى يا عم ها تبقى مكشوفه اوى دى , قالى يعنى أشمعنى دى اللى ها تتكشف يا سلام .