الاثنين، 29 نوفمبر 2010

سته وأربعين

صناديق متقفله من قبل ما تتفتح

قول للى جاى يصوت صوتك اتمسح

والنعمه ما انتخبناك الناس صوتها اتنبح

ببلطجه الحكومه والناس المحكومه مجلسنا افتتح



الأربعاء، 24 نوفمبر 2010

المحاكاه الافتراضيه للانتخابات المصرية


تعالوا نبص مع بعض على احلى لعبة محاكاه افتراضيه مزلت فى السزق السنه دى , لعبة انتخابات مجلس الشعب المصريه , اللعبه متوفره بمستويات لعب متعدده من الايزى للفرى هارد , مش محتاجه مساحه كبيره واى جهاز من غير بروسيسور اصلا ممكن يشغلها , تعالوا نتعرف اكتر على اللعبه وناخد جوله فيها
الليفل الاول ها تلاقى فيها التسجيل للأنتخابات وده متاح لأى مواطن طبعا زى ما بيقول الدستورومش محتاجين غير شويه شروط بسيطه كده ممكن همبكه بتاع البسبوسه يحققها , وفيه شروط مش مكتوبه زى الرش والرش هنا هو اختصار للرشوه , ودى ممكن تخليك تلحق رمز كويس شويه بعيد عن البسكلته وعنقود العنب , ممكن تلحق رمز ساعة الحائط ويا بخت لو لحقت رمز ساعة اليد وتمشى فى الحمله تشاور للناس على ساعتك مافيش اسهل من كده , انسى بقى الهلال والجمل دول طبعا رموز محفوظه لحد يوم الدين للحزب الوطنى حبيب الملايين , خد بالك كمان ها تلاقى حاجه اسمها فئات ما تسئلش يعنى ايه وحاجه اسمها عمال وفلاحين ودى حاجه ترجع لتقدريك انت الشخصى شوف انت عامل ولا فلاح ولا فئات اللى مش عارف يعنى ايه وعادى يعنى خد بالك ممكن الدوره دى تنزل عمال والدوره الجايه تنزل فلاحين لو زهقت ما حدش ها يقولك بتعمل ايه
يدخلنا للليفل التانى وده فيه أكتر من فريق ممكن تختار من بينهم
أولا :الحزب الوطنى الفريق اللى بيكسب فى كل سيناريوهات اللعبه ولو لعبت بيه يبقى متاح قدامك اكتر من سيناريو عشان تكسب بيه
1. سيناريو التزوير وده بتقفيل الصندوق بتاع مرشح الحزب الوطنى من قبل المخبرين وخلافهم يجيبوا الفين ورقه كده ويملوهم كلهم لصالح مرشح الحزب ودى طريقه ممتازه ومضمونه ده غير العب فى الجداول الانتخابيه واضافة اسماء ناس ماتوا وناس لسه فى بطن امها اصلا وكمان عندك خيار حلو انك ترمى صناديق الاصوات فى اى ترعه وتجيب صناديق جاهزه بالنتيجه اللى انت عايزها ,
2. سيناريو البلطجه وده عن طريق ترهيب المرشحين الاخرين قدام مرشح الحزب وترهيب مؤيديه كمان وده بتأجير بلطجيه والبلطجيه فى اللعبه من نوعين ممكن تختار النوع الحر أو النوع اللى شغال بتوصيه من الداخليه ده غير الامن المركزى وكل دى خيارات ترهيب لسحل وتأديب مؤيدى اى مرشح تسول له نفسه النزول قدام الحزب
3. سيناريو شراء أصوات الناخبين بكيلو لحمه أو ازازة زيت أو عشره جنيه تتقطع نصين نص وهو داخل اللجنه والنص التانى وهو خارج بعد ما يخلص مهمته أو الوعود بتشغيل شباب المنطقه أو تعملهم جمعيه تجيب لهم رمز كبير بيحبوه ممكن داعيه او لعيب كوره او هيفاء وهبى انت وشطارتك بقى
أحلى حاجه بقى ان لو اختارت الحزب الوطنى عشان تلعب بيه فعندك خيار انك تستخدم كل السناريوهات دى مع بعضها عشان تكسب التزوير والبلطجه وشرا الاصوات
ثانيا : عندك كمان الاخوان المسلمين ودول أحلى فريق افتراضى فى اللعبه لأن المفترض انهم جماعه محظوره اصلا ومع ذلك بينزلوا بأسمهم وده عادى لأن الحزب الوطنى بيسيبهم لغرض فلا نفس يعقوب , بس المشكله انهم بيتمادوا فى الغباء السياسى وينزلوا فى الانتخابات بشعار الاسلام هو الحل فى دواير ممكن يكون نصها مسيحيين , والأخوان عندهم سيناريوهاتهم برضه وهى بتلعب فى مجملها على وتر الحس الدينى للشعب المصرى , والراجل الطيب بتاع ربنا اللى بيخدم لوجه الله
ثالثا : عندك شوية أحزاب كده بتكح تراب كحال كل الأحزاب فى مصر لو نزلت بواحد فيهم أخرك ها ينجح منهم اتنين تلاته على مستوى الجمهوريه وده مش من شطارتهم يعنى بس ده عشان حرص الحزب الوطنى حبيب الكل على التمثيل الحر فى البرطمان قصدى البرلمان وايمانهم بمبدأ حرية المشاركه السياسيه فى احزاب منهم ممكن تكون مؤمنه باللى بتعمله أما الغالب فبيعمل سبوبه حزبيه وانتخابيه والباقى هو ولا معارض ولا منيل هو بينزل عشان يكمل اللعبه الافتراضيه جمب الحزب الوطنى عشان اما تضحك الصوره تطلع حلوه
رابعا : المرشحين المستقلين ودول بقى ايدك منهم والأرض ممكن ينجح بعيلته بقى وعزوته وفلوسه وحاجات كده بس اول ما بينجح بيتحول حزب وطنى وش , مع ان الناس انتخبته عشان هو مستقل بس طبعا هو من نفسه بيحول حزب وطنى عشان يضمن انه متبت فى كرسى الدايره ليوم الدين
فى حاجه تانيه نسيت اقولك عليها كمان الوزرا , كل الوزرا فى اللعبه بتاعتنا بيرشحوا نفسهم يمكن طفاسه باين يمكن استغلال لسلطته تقدر تقول , يمكن زيادة الخير خيرين , وطبعا ما فيش وزير بيخسر ها يكسب ها يكسب ايا كانت الوسائل , مش ممكن طبعا الوزير يخسر يبقى شكل الحكومه ايه ساعتها

ايا كانت طريقتك فى اللعب اللعبه بتقفل بسيناريو واحد وهو فوز الحزب الوطنى بأغلبيةمقاعد مجلس الشعب الساحقه الماحقه والحياه ها تبقى زى الفل وسيعم البلد الامان واللى مات فى الانتخابات مات واللى انصاب انصاب واللى اتخطف اتخطف واللى خسر كل فلسوه ماشى واللى كسب ملايين ماشى ويرجع البلطجيه الى قواعدهم سالمين امنين ويعم البلاد السلام وتقعد تتفرج على برنامج مصر النهارده وانت بتشرب كوباية الشاى مع مراتك وعيالك وانت بتتابع مسيرة الانجازات اللى بيكملها الحزب بقيادته الحكيمه , مسيرة الانجازات اللى مش بتشوفها لما تنزل الشارع تانى يوم الصبح , مش بتشوفها غير بالليل وانت بتتفرج على التليفزيون المصرى , اه طبعا مش كله حصرى على التليفزيون المصرى وكل انتخابات وانت طيب


الأحد، 14 نوفمبر 2010

بحبك يا ريس أكتر من النسوان





مدونى الصخور على كورنيش اسكندريه

الأربعاء، 10 نوفمبر 2010

التطور الطبيعى للربع جنيه المخروم


وأنا صغير عندى بتاع 8 سنين كده مش من زمان يعنى أول التسعينات كان كيلوا اللحمه ب 10 جنيه وبعدين بقى 11 ولما غلى اوى بقى ب 12 ولما خلاص خلاص يعنى بقى سعره قاتل بقى 16 جنيه , جرام الدهب عيار 18 كان 28 جنيه وعيار 21 كان 32 جنيه ونص , كنت باخد مصروف ربع جنيه فى اليوم ربع جنيه من الورق السليم ده مش المخروم , كان باكو البسكوت اللوكس ب 15 قرش والنايتى ببريزه وكيس الشيبسى الأحمر اللى مرسوم عليه فيل بريال 20 قرش يعنى , والحاجه الساقعه الكندا دراى والسبورت وما ادراكم ماهى السبورت ب30 قرش , واللبان السحرى بشلن اللى هو خمسه قروش ,كان الكراتيه ببريزه وبيطلع فيه بتوع كده كنا بنشترى الكاراتيه عشانها اصلا , كانت العسليه بشلن والعسليه الكبيره اوى ال30 سنتى تاكل فيها يومين بريزه , والدومه من عند عم موسى اللى بيقف قدام المدرسه ببريزه وبنفش البريزه تجيب كيس لب تأكل بيه الفصل كله ونفس الريزه تجيب كيس فشار تقعد تاكل فيه من الفسحه للحصه الخامسه والشوكولاته النوتيلا اللى كان معاها تماثيل بلاستيك كده كنت بحب اجمعها كانت بربع جنيه , الشوكلاته الجيرسى والماكسى اللى مافيش منها اصلا دلوقتى ب 15 قرش , كيلو الفراخ البلدى بسته جنيه ونص وكرتونة البيض برضه بسته جنيه ونص , كان الشلن أكبر من الجنيه بتاع دلوقتى , وكان الريال كبيييير قد كده وعليه نسر كده شادد حيله , أنا ليه مصدعكم بكل ده وبقلب عليكم الذكريات اللى تخلى الواحد يعيط , عشان انا عمرى ما تخيلت انى وانا عندى 26 سنه ها اقعد أحكى الكلام ده اللى كنت متوقع انى احكيه مثلا لأحفادى وأنا عندى 80 سنه ولا حاجه والعيال تقعد بقى تفتح بقها مش مصدقه , وانا عندى 8 سنين كنت بلعب فى حاجات بابا القديمه لقيت برطمان ازاز كبير اوى مليان لأخره عملات قديمه , طلعت العملات لقيت مكتوب 5 مليمات و 1 قرش ومليم وحاجات غريبه اوى كده قلت لبابا ايه العملات دى يا بابا قالى دى عملات قديمه من ايام ماكان مش عارف ايه بكام وايه بكام وقعد يحكيلى بقى عن وقية اللحمه اللى بجنيه ونص والسكر اللى مش عارف بكام قرش صاغ والزيت مش عارف بكام والشاى وحاجات غريبه كده وانا أضحك ومستمتع اوى وأقول ياااااااه ايه ده يا خبر دا الدنيا غاليه اوى دلوقتى يا جدعان دا انا بجيب المصاصه بشلن بحاله والشلن ده كان يجيب بلاوى زمان , السؤال اللى كان محيرنى وعمرى ما سألته لبابا ازاى هو جمع العملات دى , يعنى هو كان عارف ان العملات دى ها تتلغى فجمعها قبلها يعنى ولا ايه بس مش منطقى طبعا هو ازاى عرف قبلها انها ها تتلغى , بعد حوالى 20 سنه دلوقتى عرفت اجابة السؤال ده وعمليا بنفسى دلوقتى انا عندى برطمان مليان برايز وشلنات وريالات مع انهم لسه ما اتلغوش بس البرطمان بيكبر لان العمله بقت غير متداوله هيه موجوده صحيح بس ما حدش بيقبلها خلاص كل سنه وانتوا طيبين , الشلن دلوقتى بقى عايز ميكروسكوب عشان تشوفه والبريزه شرحه والربع جنيه خرموه يا عينى وراح النسر والصقر البقاء , دخلت العملات فى دورة التضخم الربع جنيه المخروم حل محل الشلن وبقى اصغر عمله متداوله دلوقتى زى ما حصل من سنين كتير اوى والشلن حل محل القرش صاغ والقرش صاغ قبلها حل محل المليم بس المره دى التضخم حصل بسرعه أكبر بكتير من المعتاد , كيلوا اللحمه بقى ب 60 جنيه والفراخ ب20 ومافيش حاجه اسمها فراخ بلدى اصلا , جرام الدهب بقى 136 جنيه , والباقى انتوا عارفينه مش ها اصدعكم بيه , وربنا يخلى البرازيل الراعى الرسمى للشعب المصرى اللى لولا اللحمه البرازيلى والفراخ البرازيلى كان المصريين فعليا نسيوا شكلهم , برطمان العملات بيكبر بيكبر وشكلى ها احتاج صفيحه بس الحمد لله عرفت ازاى يبقى عندى برطمان عملات لما ولادى يكبروا ويلعبوا فحاجاتى القديمه يلاقوه واقعد أحكيلهم عن الدنيا وانا صغير كانت رخيصه ازاى , وساعتها طبعا هايكون الجنيه حل محل الربع جنيه والخمسه جنيه حلت محل الجنيه وطبعا ها يخرموا الخمسه جنيه ساعتها ويكون كيلوا اللحمه بقى بألفين جنيه وأدى ولادى مصروف 100 جنيه فى اليوم ويبدأ ولادى يجمعوا الربع والنص جنيه وجنيه فى برطمناتهم بس كل ده لو قدرت اتجوز وأخلف اصلا , بذمتك امتى اخر مره شفت 20 قرش معدن , كل واحد يبقى يلحق يجمع البرطمان بتاعه .