واحد وخمسين

بين كل أهه وأهه فيه أهتين
والأهه طالعه ساكته والناس جمبى قايمين
متين بيقولوا لأه ومتين بيقولوا أمين
وألف هناك فى الركن البعيد ساكتين

خمسين

الحب ماله كده أصبح غريب
ييجى يومين وسنين يغيب
مش قادرين نلاقى الحب ليه
والأرض فيها سته مليار حبيب

تسعه وأربعين

أنا يوم خمسه وعشرين

كان عمرى سنه بالكتير سنتين

النهارده بعد أسبوعين ويومين

أنا عمرى أصبح واحد وعشرين

تمانيه وأربعين

وحياتنا ايه غير زمان ماشى فى المكان

وحاجات بتعدى وتخلص وحاجات بتعيش زمان

بس حتة البازل اللى ضاعت من سنين

دلوقتى لقيتها لكن خلاص مالهاش مكان

سبعه وأربعين

امى ياما حكتلى زمان عن السندباد

والزمن عدى لكن الحكايه لسه بتتعاد

بس الساحر العجوز أصبح ألف من الأسياد

ويا عينى لساه واقف لوحده السندباد

سته وأربعين

صناديق متقفله من قبل ما تتفتح

قول للى جاى يصوت صوتك اتمسح

والنعمه ما انتخبناك الناس صوتها اتنبح

ببلطجه الحكومه والناس المحكومه مجلسنا افتتح

خمسه وأربعين

تعيش تعيش تموت تموت مالكش ديه

أصل اللى زيك يا ابنى مش قضيه

تعيش خدام لللئام فى الوسيه

لحظة تفتكر انك عليت تموت فى اللحظه اللى جايه

تلاته وأربعين

يا تعيش أسد فى الكون تزيط

يا تكون تعبان ألعبان حويط

أو سلحفه تتفرج من بعيد عامل عبيط

بس ويلك لو تعيش انسان طيب بسيط

أتنين وأربعين

اوعى يا شاطر تفتكر انك عايش
مش ده حلمك اللى عالأرض ممدد وفارش
مش دى أفكارك اللى عملتها حلق وغوايش
دايبه فيك أيه بس دا انت اللى جواها بايش

واحد وأربعين

يا غربه يا أم عيون مغربه
سيرتك بتلمسنى ولا ألف سلك كهربا
لياليكى الطويله والفكره المتعبه
كل ما عنك أبتعد ألاقيكى منى مقربه

أربعين

رحال فيكى من يوم ما جيت
لا عرفتلى يوم عنوان ولا بيت
أسألك يا دنيا سؤال بسيط
أنا ابنك صحيح ولا أنا لقيط

تسعه وتلاتين

فى بلدى جلد تمساح وشرابات مهلهله
ناس عايشه الحلول وناس عايشه الأسئله
فيه فقر مدقع عايش فى فحش الغنا
حاكم بيوعد بعيد وهو البعيد أصل المشكله

تمانيه وتلاتين

كاسين غرور وعنطزه وشربتهم
من كأس الذل سنينى سقتنى مرهم
لا ها تطول الجبال يا ولدى ولا تبقى زيهم
أخرك مترين تراب وها ترقد تحتهم

سبعه وتلاتين

من تحت الترابيزه خيرها منباع والحمار عارف
مقلوع جذورها ومسلوبه دورها والحمار شايف
هالهليبه والنهيبه والسليكه الحمار موالف
ليبيع رفوفها ويجيب ضرفها الحمار حالف

سته وتلاتين

لعبه لأتنين مش واحد ولا تلاته

تلاته يبقى فيه واحد داخل غتاته

وواحد يبقى ها تمشى يا حبة عينى تاتا تاتا

يا تلعبها أتنين يا صاحبى يا ماتلعبهاش بتاتا

خمسه وتلاين

أصحى مالنوم أقوم أسعى

أشوف ألوان السما تسعه

سهرة مزاج بايته معايا ودماغى لاسعه

ولا حتى القوس الملون اتلون والسبعه بقوا تسعه

أربعه وتلاتين

أبص فى المرايه أشوف وش مرسوم

جبين عريض مكتوب عليه المقسوم

عيون مغمضه بس عمرها ما داقت نوم

شفايف مبرومه لو أتفتحت تطرش هموم

تلاته وتلاتين

أنا حضنى من هنا لحد القمر

ها تلاقى احساس وناس تلاقى صحرا وشجر

لحظة أمان لحظة جنان لحظة خطر

وناس ناسيه انها ناس لكن لسه بشر

أتنين وتلاتين

أنفض عنى أفكارى

أتعرى من أحزانى
أبلل قدمى من جداول الأفراح
ألقى برأسى على صدرك
أتـساءل هل تحررت

واحد وتلاتين

ناسياك وأنت بتجرى وراها
وبتبصبص للى ينساها
لفيت ودورت وعرفت مغزاها
بس برضه لساك واقع فى هواها