أتنين وتلاتين

أنفض عنى أفكارى

أتعرى من أحزانى
أبلل قدمى من جداول الأفراح
ألقى برأسى على صدرك
أتـساءل هل تحررت

من العلم والايمان للجهل والتوهان ياما هنشوف كمان... وكمان

وأنا أتصفح احدى المواقع الأجتماعيه الشهيرة على شبكة الأنترنت اصطدمت بخبر وفاة الدكتور مصطفى محمود المفكر والعالم اوالكاتب والأديب , مصطفى محمود اللذى ولد عام 1921 فى محافظة المنوفيه , تخرج من كلية الطب ولكنه ترك الطب وتفرغ للبحث والكتابة , مصطفى محمود اللذى أتحفنا ووضع الكثير من لبنة عقولنا أن وجيل كامل تربى على برنامجه الشهير العلم والايمان البرنامج العلمى الأقوى والأشهر بل ويمككننى أن أقول الوحيد بلا منافس بين البرامج العربيه كافة , أتذكر أسرتى كاملة وهى تجلس أمام التلفاز يوم الأثنين من كل أسبوع فى حوالى الساعه التاسعه والنصف مساءا أمام شاشة القناة الأولى يملأهم الترقب والفرح والحماس لمشاهدة حلقة جديده من برنامج العلم والأيمان اللذى يقدمه الدكتور مصطفى محمود , من أول مقدمة البرنامج تأتيك مقطوعه الناى العبقريه اللتى تتناغم مع الصور المعروضه اللتى تعبر عن عظمة الله فى مخلوقاته وكم هذا الكون معقد , الناى مع الصور يصنعان مزيجا يجعل جسدك يقشعر ويجعلنى وأنا مازلت فى الثامنه من عمرى أجلس قريب من التلفاز قدر ما أستطيع أفتح عيناى بملأهما لكى لا أفوت أى مشهد عابر , ثم تأتى صورة الدكتور مصطفى محمود أمام خلفية زراقاء هادئه متأملا يتنحنح ثم يأتى صوته عميقا بدرجه لا تتخيلها أهلا بكم , ثم يمضى فى الحديث عن الجينات و الصفات الوراثيه والتطور والهرموناته ونشأة الكون والذره والكواكب والنجوم والغرائب الكونيه وعجائب الطبيعه وأحدث المكتشفات العلميه والأختراعات يتحدث عن التاريخ الأنسانى وعن السلوك البشرى عن الطب والهندسه عن كل شئ يحدثك عن كل هذا بنفس البساطه اللتى تحكى بها والدتك قصة عن جحا أو الأميره النائمه , يتحدث بأسلوب يمكن لأى كان من يشاهد ويستمع أن يفهم ويستمتع اذا كنت جاهلا أو تحمل من الدرجات العلميه ما تحمل , طفلا كنت أو ناضج فلا يمكنك الا أن تجلس لتشاهد وتسمع وأنت منبهر ومستمتع بما يشرحه ويحكيه وكيف يعلق على الأفلام التسجيليه بطريقه غير مسبوقه يضحكك أحيانا ويتركك مع كلماته لتتفكر فى الكو ن أحيانا , قدم تقريبا 400 حلقة من هذا البرنامج , البرنامج الوحيد اللذى ألتف حوله شعب مصر بأكمله بلا أستثناء , هذا البرنامج اللذى جعل الأسره كلها تلتف حول التلفاز لتشاهد برنامج علمى ليس أمام مسلسلا تليفزيونيا ممل أحداثه متوقعه ومع ذلك تم أيقاف البرنامج مع العلم انه كان من اللمكن أن يستمر لسنوات وسنوات , أوقفنا برنامج العلم والأيمان لنبث العشرات من البرامج اللتى بالتأكيد لا تحتوى على علم ولا ايمان , كتب مصطفى محمود فى كل شئ عن الدين والمجتمع والعلم والفلسفه والسياسه كتب أيضا قصص ومسرحيات وكتب فى أدب الرحلات , تناولت كتبه كل شئ وتطرقت لموضوعات شائكه لم يناقشها أحد قبله مثلما ناقشها , كانت كتاباته مصدر لجدل دائم , وصلت الى حد أتهامه بالألحاد ,ولكنه لم يكن يوما , وهو اللى كانت كتاباته هى بحث دائم عن الله فى الكون وفى النفس البشريه وفى كل شئ , ألف كتاب ( حوار مع صديق ملحد ) وهو الكتاب العبقرى اللذى أجاب فيه عن كل ما يشكك فى وجود الله وأيضا كتابه (رحلتى من الشك الى الأيمان ) , مصطفى محمود اللذى قضى حياته بأكملها فى البحث والتفكير ولم يكتفى فأنشأ مسجد و جمعية تقدم خدمات للمجتمع بما يتبعها من مراكز طبيه ومراكز علميه تحتوى على مراصد فلكيه ومتحف جولوجى , ورغم كل هذا تعرض مصطفى محمود لحالة من الجحود والأنكار تدعو فعلا للتعجب حتى أ صيب بجلطة فى العام 2003 جعلته ملازما لمنزله منعزلا , حتى أيامه الأخيره شهدت صراعا من أعضاء جمعيته مع أبنائه حول بعض مقتنيات الجمعيه اللمملوكه فى الأصل للدكتور مصطفى محمود , فى يوم 31 أكنوبر رحل الدكتور مصطفى محمود فى صمت , رحلت عقليه يمكن أن تغير فكر أجيال بكاملها رحل بدون أى تقدير من الدوله ربما سيتذكرونه بعد موته الأن كما هى عادتنا دائما تنرك العقول اللامعه بيننا تموت وهى على قيد الحياه وعندما تمت فعليا نبدأ فى كتابة شهادات التقدير ورصد الجوائز , دكتور مصطفى محمود واحد من ألاف العقول المصريه النابغه اللتى ضيعت عمدا ولم نستطع الأستفاده منها , عندما أنظر وأجد لدينا عقل مثل الدكتور فاروق الباز اللذى أستفاد العالم بأكمله من علمه عدا مصر والدول العربيه الأحق بهذا العلم هذا الرجل اللذى يحمل أفكار يمكنها ان تذهب بنا للا حدود , والدكتور أحمد زويل على نفس الشاكله رجل من الطراز الاول فى مجاله أراد ان تستفيد مصر من هذا العلم ولكن وكأننا نأبى أن نخطو للأمام لم نستغل الدكتور زويل فى أى مشروع مصرى ماعدا بعض الندوات اللتى تنظم على شرفه وتوجه فيها اليه أسئله مثل ما رأيك فى مسلسلات رمضان , وأخيرا تم وضع أسم أحمد زويل على قوائم الأشخاص اللذى من اللمكن أن يكونوا مرشحين لرئاسة الجمهورية فى الدورة المقبله , ما هذا الكلام اللذى لا طعم له رجل عالم بارز فى مجاله حاصل على جائزة نوبل نطلب منه أن يترشح لرئاسة الجمهوريه لماذا ألأنه حاص ل على نوبل لا أفهم حقيقة رجل كهذا اذا اردنا ان يفيدنا يكن هذا عن طريق أن ييفيدنا بعلمه وهذا مالم نفعله على الأساس وهوما أنتبهت اليه بعض الدول العربيه فبدأت فى التعاون معه , لا ان نطلب منه التر شح لرئاسة الجمهوريه , لن يمكننا أن نصل لأى تقدم حقيقى أذا كنا غير قادرين على حماية عقولنا والأستفاده منها , أن اسهل ما نقوم به هو تركها للغرب , ليساعدوهم على النهوض ببلادهم ثم لا نفعل شيئا غير التصفيق وأعطاء الأوسمه وشهادات التقدير هذا هوه ما نستحق نوبل فيه حقا التصفيق فقط , أين نحن من ألاف العقول المصريه فى أوروبا وأمريكا واللتى تحقق أنجازات غير مسبوقه فى مجالاتها , الى أن نتوقف عن أداء دور المتفرج , الى أن نتوقف عن التصفيق ونجلس لنفكر , لا يمكننا الا أن نبكى يوم بيوم رثاء للعقول اللتى سرقت واللتى رحلت وأن نطلب من الله أن يرحم العقول اللتى ماتت وهى مازالت تتنفس .

واحد وتلاتين

ناسياك وأنت بتجرى وراها
وبتبصبص للى ينساها
لفيت ودورت وعرفت مغزاها
بس برضه لساك واقع فى هواها

ممنوع التصوير والتفكير كمان من فضلك

شوف اللى حصل سهل خاااااااااالص وبسيييييييط خالص وبيحصل فى اليوم الواحد بدل المره ميه فى مصر بس , ايه بقه هوه اللى حصل , جروب على الفيس بوك اسمه in focus عادى خالص ناس حلوه كده وزى الفل عاملين جروب للتصوير بيتبادلوا الخبرات فى طرق التصوير وتقنياته واحلى حاجه بيعملوا ورش للتصوير فى أماكن كتيره أوى فى بلدنا بيطلعوا منها بصور تجنن وليهم مساهمات بالصور دى مع وزارة الثقافه زى معرض بيت السحيمى واهداء صور لمركز الحفاظ على التراث , ومع انهم تعرضوا قبل كده لكذا مضايقه من رجال الأمن وخلافه فى بعض الأماكن الأثريه بس عادى يعنى ومين ما بيشوفش الناس ما بطلتش تصوير , بس الجديد بقه ان الناس المنظمه للجروب غلطوا اكبر غلطه فى عمرهم , قرروا انهم يعملوا ورشه تصوير فى السيرك القومى واخدلى بالك من القومى دى مش سيرك الست أم باتعه يعنى لا السيرك القومى على سن ورمح وسيف كمان لو عايز , الناس منظمين جدا وعملوا زى أى جروب محترم أعلنوا عن الورشه قبليها بمده ووضحوا ازاى الدنيا ها تمشى هناك وايه الضوابط اللى المفروض نتبعها فى السيرك عشان ما يبقاش فيه مشاكل بلاش نستعمل الفلاش عشان ما نضايقش الحيوانات وكده مثلا بلاش الترايبود مع انه عادى بس ادارة السيرك مانعاه فعادى يعنى نلتزم بتعليمات المكان عشان الحياه تبقى لذيذه بلاش التصوير فيديو والتعليمات ده عرفها كريم نبيل مؤسس الجروب لأنه قام بالتصوير فى السيرك القومى تلات عروض قبل كده من غير مشاكل , يعنى الناس منظمه العمليه وأخر حلاوه , اللى حصل بعد كده بقه ان يوم 1 أكتوبر اللى هوه يوم الورشه و حسب شهادة كريم نبيل مؤسس الجروب حصل الأتى :

في زيارة الجروب للسيرك فقد فوجىء الجميع برجال الأمن و بائعي اللب و السوداني و كل من هب و دب قد تدخلوا لمنع المصوريين من التصوير و اجبارهم على انزال الكاميرات و عندها تدخلنا أنا و زميلي محمد الناصري و طلبنا مقابلة مدير السيرك و دار الحوار التالي

:نحن : عايزين نقابل مدير السيرك

الأمن : المدير مش موجود .. و التصوير ممنوع ( مع العلم ان المدير كان في مكتبه)

كريم : التصوير الفوتوغرافي مش ممنوع و أنا صورت العرض ده 3 مرات قبل كده و معايا الصور

الأمن: التصوير الفوتوغرافي مش ممنوع بس اتمنع النهارده بتعليمات خاصة

محمد: فين التعليمات دي؟ عايزيين نشوفها.. عايزيين أي جواب رسمي ان التصوير ممنوع

الأمن : مفيش جواب و احنا الأمن و بنقولك ممنوع ثم تدخل أحد لاعبين السيرك

اللاعب: في ايه يا عم انت و هوا .. التصوير ممنوع و خلاص و لو مسكتوش هنطلب البوليس

محمد: طيب اطلب البوليس .. احنا عايزيين البوليس

اللاعب: أنا هاطلبلكم البوليس .. أنا هاطلبلكم البوليس ..

كريم : بقلك ايه بلاش كلام كتير هتطلب البوليس و لا نطلبه احنا ....

اللاعب : طيب ايه رأيك بقه مفيش بوليس هوا انتم مش هتصوروا و خلاص .. مفيش تصوير .. خش يا ابني انت و هوا لموا الكميرات اللي جوا و هاتوها ..

كريم : لو لمستم حد من الناس اللي جوا أنا مش هأسكت .. اياك حد يمد ايده على حد

و كأن هذه الكلمة كانت بمثابة الفتيلةتجمعوا حولي الموظفين و الأمن و قاموا بدفعي باتجاه الحائط و فوجئت بسيل من الصفعات و الضرب المبرح ثم قاموا بالقائي على الأرض و توالت الكراسي و الصفع المستمر على رأسي و الضرب بالأرجل و الكراسي تطير في الهواء كالمطر الناس: يا ابن ....هنطلعن تيييت ...... أمك ... أبوك كم من الشتائم و القذف كانت تغلف حالة الضرب المستمر و النشيط و كأنني حرامي غسيل بالضبط و فوجئت بمحمد داخل دوامة من الضرب المبرح الهمجي الغير آدمي بكل بمعنى الكلمة .. حيث قاموا بجذبه من ظهره و انهالوا عليه بالضرب و العض حتى سالت دماءه و أخذ يطلب منهم الوقوف عن الضرب محمد : سيبوني ... انتم عايزيين ايه .. مش شايفيين دمي سايح .. عايزيين ايه تانيو قام أحدهم بعض محمد من اصبعه و قطع جزء من جلده ... تماما كأننا داخل قفص الأسودالحمد لله نجحنا بأعجوبة في الخروج من المكان و قمنا بالاتصال بالشرطة و أتت سيارة أتاري و بوكس به ملازم أول دخلنا الى السيرك و جلسنا مع الملازم أول و طبعا ظهر مدير السيرك (اللي قالوا انه مش موجود) و أنكر الجميع معرفتهم بأسماء الذين تعدوا علينا بالضرب .. حتى تمكنا أنا و محمد من التعرف عليهم و تم سحبهم على القسم .في القسم قمت بالاتصال بمحامي و أحد وكلاء النيابة و استفهمت منهم المتوقع حدوثه في مثل هذه الحالة1- سوف ينتهي الموضوع بمحضر يقتصر على الشخص الذي تعدى عليك بالضرب و سوف يحرر هو الآخر محضر بتعديك عليه بالضرب و بكسر قوانين السيرك.طبعا المشكلة ليست في موقف هذا الانسان الهمجي لكن المشكلة كانت مع ادارة المكان باكمله سواء موظفين وزارة الثقافة أو (رجال) الامن و لن نحصر المشكلة في عراك دار بين طرفين مصيره البيات في الحجز و العرض على النيابة و قضية قد يحكم في بعد شهور و قد لا يحكم .اتفقنا على اجراء محضر صلح و طلبت رقم المحضر و توجهت مع كل من : محمد الناصري , أحمد فوزي , ضياء سامح , علاء عواد ... إلى مكتب وكيل وزارة الثقافة و مدير البيت الفني للمسرح أ. شريف عبد اللطيف.لا أنكر انه استقبلنا بشكل حسن و استمع الى القصة بالكامل و توعد بمعاقبة كل من شارك في هذا الحدث الغشيم و قام باعطائي 25 دعوة مجانية شاملة تصريح بالتصوير يوم الخميس القادم و وجه العديد من التحذيرات الى مدير السيرك أعادل الحلو و طلب أسماء كل من شارك في هذا الاعتادء و جزاه الله خيرا على حسن معاملته .لكن السؤال هل هذا هو الرد المناسب لكم المهانة و الضرب التي تلقيناها !!هل هذا هوا الرد على فتح رأس محمد الناصري وتلقيه عدة غرز بالمستشفى !!هل هذا هو الرد على كم الكدمات التي تملأ جسمي

ده كان جزء منقول من الموضوع اللى كتبه كريم على جروب in focus تحت عنوان ملخص الأحداث الموسفه لورشة السيرك القومى , بالتأكيد ال25 دعوه دول مش همه الرد على اللى حصل لك انت والناس اللى معاك , الموضوع مش بسيط خالص فعلا بس الكويس انه جه بصورته المقرفه دى مع ناس قدرت تشوف وتحكى وده جزء مهم أوى من حقك وحقك الناس اللى معاك يا كريم انك وصلتنا صورة حقيقيه حصلت فعلا , لأن المشكله مش مشكلة جرو in focus المشكله مشكلة بلد بحالها مشكلة المصرى اللى بقى يستعر من جنسينه مش وهوه بره بلده لأه وهوه فى قلب بلده , كمية المشاكل والقرف والتمييز فى المعامله اللى بيقابلها المصرى فى كتير من الأماكن التاريخه والسياحيه والأثريه حاجه تخلى المصرى يسب ويلعن ميت تيييييييييييييت وهوه شايف انه بمصريته مش جدير انه يتعامل معاملة نضيفه على عكس الأجانب دى مش دعوه لأن احنا نعامل الأجانب معامله وحشه أظن الناس فاهمانى طبعا والناس هنا بطبعها مش بتعرف تعامل الغريب غير بطريقه كويسه المشكله مش فى الأجانب الناس أخدت تأشيره ودخلت البلد عشان تستمتع ومن حقها طبعا ومن حق مصر علينا احنا كمان اننا نوريهم بلدنا فى احسن صوره , المشكله فى العناصر الغبيه المتخلفه فى البشر اللى مش عايزين ينضفوا ومش عايزين يبقوا أدميين من أمن لناس شغاله فى مجال الخدمات عموما منظومه كامله , ازاى الواحد يبقى مصرى ومش قادر يستمتع ببلده واذا كنت مش قادر أبقى محترم فى بلدى وسط المصريين اللى زى الطبيعى جدا ان مافيش أى بنى أدم فى اى حته فى العالم ها يحترمنى , لما تبقى مثلا شاب زى الفل كده وماشى فى منطقة الهرم زيك زى ألاف السياح مع اصحابك وتلاقى اللى بيوقفك ويقولك بطاقتك , أو فى مكان تانى تلاقى مخبر جاى يقولك انت واصحابك تعالوا كلموا الباشا , أو تبقى فى متحف مثلا وبتصور عادى بالكاميرا بتاعتك وتلاقى الظابط سايب كل الأجانب اللى فى المكان اللى مع ان كل واحد منهم تلات كاميرات وييجى يسألك انت عن تصريح دخول الكاميرا , يا أخى أحيه على البنى ادمين أحيه على ده احساس لما تحس ان فيه تمييز بيمارس عليك وانت فى بلدك , حريق قصر ثقافة بنى سويف ده نوع من التمييز على أساس ان الناس دى مالهاش ديه فا مش مهم نعملهم اجراءات حمايه , ألف حريق وألف مصيبه حصلت والف موقف تقابله كل يوم وها تقالبه لسه , الناس اللى رايحه مكان يتبع وزارة الثقافه ورايحيين يمارسوا نشاط محترم وبطريقه محترمه ومنظمه لا تتداخل مع نشاط المكان يطلع لهم شوية موظفين المفروض انهم برضه موظفين فى وزارة الثقافه وأمن وناس تانيه مش عارف نصنفهم تبع ايه ويمنعوهم ويهينوهم ويضربوهم يلا ماهى بلطجه بقه وهوه عارف انه حتى لو اتعمله محضر فى القسم ها يعمل هوه كمان واحد زيه ويبقى الحل ان الضارب والمضروب يدخلوا التخشيبه وعرض على النيابه وبما ان الراجل التانى ده محترم ومالوش فى وجع الدماغ فاها يعمل صلح ويتفرق دمه بين القبائل , مش فاهم ايه الجهل اللى وصلناله ده رحمتك يا رب بعبادك ده زى مايكون مثلا الناس اللى جايه تصور دى جايه تعمل سبوبه مثلا على قفا السيرك وها يقفوا يصوروا الناس مع الأسد والتعبان ويبيعوا الصوره بخمسبن جنيه قدام السيرك حاجه غريبه ولا يمكن خايفين لا يصوروا مناظر فى السيرك مش عايزيين حد يشوفها بالعكس يا أغبيا دى ناس بتصور كويس وكانوا ها يطلعوا السيرك شكله حلو كان ممكن يعملوا من الفسيخ شربات , فلسفة البشر المتخلفه هيه هيه من بتوع السيرك دول للعسكرى اللى واقف فى متحف ممنوع فيه التصوير بس لو اديتله خمسه جنيه فى جيبه يخليك تصور فيلم اباحى لو عايز , نفس العسكرى اللى واقف فى مكان أثرى تانى جواه حته مقفوله ممنوع الزوار يدخلوها بس لو اديتله نفس الخمسه جنيه ممكن يفتحلك المكان ده وتبات فيه لو تحب , نفس الخمسه جنيه اللى بتديها لعسكرى مرور واقف بيستهبل وعامل نفسه بيكتبلك مخالفه بس دلوقتى المخالفات غليت والخمسه جنيه ما بقتش تنفع , كلها سلسله ملضومه فى بعضها , ناس بايعه دماغها لغيرها وناس مكبراها وناس بتستبهل وخلاص المحصله انهم كلهم جماجمهم مجوفه , المسؤولية على كتير اوى وزراة الثقافه ووزارة الداخليه ووزارة السياحه وداخل معاهم هيئات كتير أوى وقبل كل دول المسئووليه على المصريين على الناس اللى خلاص حتى مجهود أنها تفكر ما بقتش قادره عليه , ربنا لا تأخذنا بما فعل السفهاء منا .

نورت كارفور يا باشا

طبعا كلنا سمعنا عن زيارة الرئيس التاريخيه لكارفور مش عارف هيه ليه تاريخيه بس هيه كل زيارات الريس عموما تاريخيه , مادام الريس طلع من القصر الجمهورى وراح اى حته يبقى بالتأكيد الحنه اللى راحها دى ها تدخل التاريخ , بس ازاى بقه زيارة الريس لكارفور تاريخيه وايه موقعها من التاريخ بالظيط تعالوا نشوف ازاى ممكن نأرخها , اول حاجه نلاحظها هيه اختيار الحكومه الموفق لمكان الزياره كارفور المعادى مكان ممتاز وخصوصا اذا كان فى وقت زى اللى الزياره كانت فيه وقت الضهر فى رمضان الوقت اللى بيكون زوار كارفور فيه عباره عن أغلبيه من الأجانب سكان المعادى وبقية من المصريين سكان القطاميه هايتس اللى مش بيمثلوا غير شريحه ضيقه جدا جدا جدا من المصريين واللى مالهومش علاقه بأى حال من الاحوال بالمواطن المصرى الحقيقى اللى ما يعرفش عن كافور ده غير انه محل بقاله كبير حبتين وبيبيع طماطم أورجانك الكيلو ب 12 جنيه , قبل الزياره بساعه يمكن بدات الترتيبات المرئيه ودى غير التوقعات المرئيه داخل المول طبعا كل ادارة كارفور على سنجة عشرة أمن كارفور اتجمع على البوابات وبعديها بشويه ظهر اصحاب البدل المنفوخه عارفينهم طبعا وبعدين الحرس الجمهورى ناس اتلمت عشان تتفرج من المصريين العاديين طبعا اللى بيتلموا على اى حاجه ودول فى الغالب من اللى شغالين فى المول التجارى , أما المصريين السوبر سكان القطاميه هايتس فقرروا بعديها وعلى مضض انهم يقعدوا يتفرجوا على تشريف الحكومه وهمه قاعدين على starbucks , وصل الريس والحكومه لكارفور بسلام والحمد لله ,وتضاربت الأقوال فور رؤيتهم حول سبب هذه الزياره المباركه , بعض المغرضين قالك يمكن الحكومه جايه تجيب كحك العيد من كارفور عشان عليه عرض , فى حين قال مغرض اخر انهم جايين يشتروا شنط المدارس , فين حين قال مغرض أخير أن الحكومه الألكتروينه جايه عشان تشترى كام لاب توب من اللى عليهم عرض , فى حين قالت أحدى الأراء العاقله أوى انهم جايين يتفقدوا حالة الأسواق المصريه كتر خيرهم , ولكن سرعان ما تراجع هذا الرأى عندما وجد أن الزياره من وقت دخولها من بوابة كارفور حتى الخروج من نفس البوابه مره أخرى لم تستغرق أكثر من أربعة دقائق , نعم لم تستغرق الزياره أكثر من أربع دقائق , تفقدت فيها الحكومه الرشيده حالت الأسواق المصريه وأسعار الزيت والسكر والكحك والرز والسمنه والمكرونه الأندومى والشوكولاته السنيكرز والزبادو والفراخ المجمده والجمبرى الهندى المجمد والكولاوالبيبس وشنط المدراس والكشاكيل ال 40 ورقه وال 80 كمان , بجد لازم نهنئ أنفسنا اننا عندنا الحكومه الجباره دى اللى اللى أختصرت السوق المصرى كله من العتبه لسوق الجمعه لسوق التوفيقيه لسوق العبور للمنشيه وزنانيرى فى اسكندريه وجميع اسواقك يا بلد فى كارفور المعادى وأختصر كارفور المعادى فى دقيقتين لأ وطلعت كمان برأى ان الأسواق ميه ميه والمواطن مبسوط وأخر انشكاح , ايه الحكومه الجباره دى اللى بتعمل كل الشغل ده فى فيمتو ثانيه مصريين بقه بجد نهنأ أنفسنا ان عندنا أطول رئيس وزرا فى العالم مما يتيح له هذه الرؤيه الجباره لما لا يستطيع الاخرين ادراكه واذكى حكومه على الأطلاق اه وعلى الطلاق .

تلاتين

فى الأصل مقلوبه بس مرسومه على عدلتها
لابسه حجاب بس فستانها فوق ركبتها
يا هناك برضاها ويا ويلك من قلبتها
تلف وتدوروترجع عطشان نفسك فى شربة ميه من ايدها

ا

العيد مش فرحه بس ده كحك وفسيخ كمان

وأنا ممدد على سريرى بعد ما أتسحرت وبسمع أغنية أوتم ان نيويورك بتاعت الحاج فرانك سيناترا وبفكر فى العيد اللى بعد بكره خلاص , اذ فجأه رمتنى المزيكا بتاعت الأغنيه على شتا قديم اوى وأيام بعيده أيام العيد وأنا عندى سبع سنين كده , افتكرت نزولة قبل العيد مع ماما عشان نشترى لبس العيد الواجب الوطنى المقدس , وازاى كنا نقعد نلف بالساعات وأعيط بقه ماليش دعوه عايز الكوتشى اللى بالأتوو والأتوو ده للى ما يعرفش ده بقى كان قمة التكنولوجيا فى صناعة الكاوتشى فى هذا الوقت وهوه عباره عن كوره كده بتركب فى وش الكاوتشى وبتنور , بس ماما ما كانتش بترضى كانت بتقولى ها يقع وها تبوظه بس كنت بفضل اعيط لغاية ما بتوافق فى الأخر انها تشتريلى كوتشى أميجو بينور وده كان أختراع برضه فى وقتها وكان مع الكاوتشى ده هديه سلسلة مفاتيح حديد تقيله كده كنا بنفرح بيها أوى مش عشان ها نحط فيها المفاتيح اللى معانا , ساعتها ما كانش معايا غير مفتاح السخان اللى كسرته من السخان بمجهوداتى الذاتيه كنت بفرح عشان السلسله تقيله ممكن تخرشم بيها اصحابك فى الفصل , كنت أقعد أن وأخويا الصغير ليلة العيد قدام التليفزيون متنحين قدام القناه الاولى التانيه بنتفرج على أعلانات الأفلام والمسرحيات والبرامج اللى ها تيجى فى العيد حاجات جامده بقه مسرحية ريه وسكينه بموت فيها وتانى يوم مسرحية عش المجانين قشطه وتالت يوم بقه ولأول مره على شاشات التليفزيون والراديو مسرحية الواد سيد الشغال هيييييييييه العيد ده ها يبقى جامد أوى ده غير أفلام السهره على القناه التانيه فيلم رامبو الجزء التانى وفيلم السلاح القاتل الجزء الأول بتاع ميل جيبسون وأجمد حاجه بقه فيلم الحلقه المدمره بتاع فاندام , أفتكر ليلة العيد لما بابا بيجيب علب الكحك والبسكوت والبيتيفور والغريبه وساعات كان بيجيب شكلمه بس ما حدش عندنا بيحبهاوساعات كنت انزل مع بابا وهوه رايح للحلوانى وأشيل علبه معاه وادخل البيت كده وأنا شايلها كأنى فاتح عكه , ولما كان كله فى البيت ينام كنت أفتح العلب وأقعد أكل تحت السرير أكتر حاجه كنت بحبها البيتيفور اللى عليه شيكولاته , يوم العيد الصبح بقه بابا يصحينى من النوم بطلوع الروح عشان ننزل نصلى العيد مع بعض أنا وبابا وأخويا أصحى من النوم على أحلى صباح فى السنه كلها سامع صوت التكبير جاى من كل حته من الجوامع الكتير اللى جمب بيتنا صوت يجنن يخليك فى حاله غريبه من الفرح والرهبه والسكينه , نتوضأ ونلبس لبس عادى مش لبس العيد ونخرج للصلاه مش فى اى جامع من اللى جمب البيت لأه الصلاه لازم تبقى فى الخلا نقعد وسط الزحمه كده ونكبر مع الناس وهوا الصبح يلفحك يخليك تتطوح كده من اللذاذه والشمس لسه بتطلع من جحرها لا واحنا كمان بنصلى فين على كورنيش النيل على طول يعنى لوحه مش بتترسم غير مره فى السنه يمكن صلاة العيد هيه اختصار العيد كله بجد , اول ما الصلاه تخلص كله يبدأ يدور على جزمته أو شبشبه عادى يعنى انك ما تلاقيهوش لاى سبب , الناس كلها تقوم بقه وندخل فى معركه من السلامات والأحضان والبوس وأيامها كان الأخوان المسلمين بيوزعوا كيس كده على الأطفال بيبقى فيه لعبه عبيطه كده وتمرتين تقريبا وستيكر عليه صورة للجامع الأقصى وحواليه تعبان مرسوم عليه نجمة داوود كنت بفرح أوى بالهديه دى , ساعتها بالتأكيد ما كنتش اعرف مين الاخوان المسلمين بس كنت مبسوط لانهم بيدونى هديه , بعد السلامات والأحضان ييجى بقه ميعاد لعب الكوره مع عيال الجيران قدام البيت احلى لعب بقه فى الساعتين بتوع بعد الصلاه دول واحنا بنلع يعدى علينا ناس كتير من اصحابنا ويدخلوا معنا فى اللعب برضه وكله يبقى مبسوط وأخر حلاوه , بعد ما نموت من التعب كل واحد يروح بيته ادخل انا وأخويا البيت طبعا متبهدلين وماما تزعق لنا ده اساسى بس قشطه , نغير هدونا وندخل ننام بقه لحد الضهر كده , ماما تصحينا عشان نفطر واحلى فطار بقه القرص اليبتى اللى ماما بتعملها الترمس اللى ماما بتعمله برضه والكحك بقه والشيكولاته اللى مش ببطل اكل فيها , بابا يدينا العيديه 10 جنيه بحاله مبلغ ابن كلب ساعتها مع العلم ان قزازة الكولا كانت ب30 قرش واللبان السحرى كان ب5 صاغ والشيكولاته الجيرسى اللى قد الكف ب 15 قرش وكيس الشيبسى الأحمر اللى مرسوم عليه فيل واللى اكبر من كيس الشيبسى اللى بجنيه دلوقتى كان بريال , على الساعه 1 كده نستقبل قرايبنا للى جايين يعيدوا علينا أول واحد بييجى خالى , بعد الضهر نطلع كلنا على البلد عشان نعيد على جدتى لما نوصل بيت العيله فى البلد نقابل اعمامى وهاتك يا بوس ندخل نسلم على جدتى اللى دايما قاعده فى اوضتها من يوم ما قالولى دى جدتك وهيه قاعده فى اوضتها دايما لابسه اسود ساعات كنت بخاف منها بس بالتأكيد كنت بحبها كانت تفتح ايدها وتقولى هات بوسه ياواد اروحلها واديها حضن كبير وبعدين تفتح شنطتها اللى عمرها من عمر جدتى تقريبا وتمد ايدها اللى بتترعش وتقولى خد يا ولد ما تتكسفش ابص لبابا قال يعنى مكسوف وبعدين امد ايديا وأخد منها العيديه ننقعد شويه معاها وبعدين بابا ياخدنى انا واخويا وننزل نلف فى البلد فى البلد بقه تقابل ناس كتير اوى ما تعرفهمش ولا عمرك شفتهم بس كلهم عارفينك ودايما أسال بابا مين ده يقولى ده ابن خال جدتك وطب ده مين يا بابا يقولى ما تعرفش ده ده بقه يبقى أبن خالك عم أبويا لزم , وده يعنى يبقى قريبنا يا بابا , اه يا حبيبى قريبا لزم طبعا , دايما كنت احاول اجمع صلة قرابتم بيا مش بعرف , بس كنت بحبهم أوى كلهم كانوا بيفرحوا بيا اوى يقعدوا يشربونى بيبسى ويأكلونى شيكولاته وبعد ما نلف على كام بيت تكون بطنى الصغنونه باظت , يااااااااااااااه يا سلام بقه على أكلة الفسيخ المظبوطه يوم العيد من اجمد فسخانى فيكى يا مصر طبعا فى كفر الشيخ لو حد يعرفه , فسيخ بقه وبصل وحركات طول عمرى بموت فيه من وأنا قد كده , مين فاكر بقه الأفلام الهندى اللى بكانت بتيجى فى العيد على القناه التانيه يا سلام خيال والله الفيلم يبدأ من بعد العصر تجيب اكلك وشربك وأهم حاجه الترمس وتقعد جمبه وهوه مش بيطول 5 او 6 ساعات بس يعنى يخلص بعد العشا ان شاء الله , يااااااااااااااااااااه كل ما افتكر حاجه تفكرنى بحاجات تانيه كتير اوى بس كده الموضوع ها يبهوق بصوا بقى انا اكملكم فى العيد الكبير ماشى , كل سنه وانتم طيبين صلوا العيد أهم حاجه وكلوا فسيخ ولا يهمكم بس اعصروا لمون كتير واضرب كام بصله كده وها تبقى تمام وكلوا كحك ولا يهمكم مش الكام كيلو كحك اللى ها تاكلهم همه اللى هايجيبولك القلب يعنى , بلاش سينما فى العيد ما حبكتش يعنى خلاص , اللى ها يحشش ليلة العيد ياخد باله كويس ده موسم والحشيش المضروب ها تلاقيه مالى السوق أستنضف وبلاش طفاصه وخد بطاقتك معاك وعلى المحششين اخذ الأحتياط فى الأماكن التاليه حسب تعليمات وزارة الداخليه مفارق المقطم وشارع الهرم ومزلقان زينهم وعين الصيره وأخيرا أرض الجولف وبالأسكندريه منطقه كوبرى الناموس ودنه وكورنيش الشاطبى وغيط العنب والقلعه وشاطئ النخيل بالعجمى , والبنت اللى ها تنزل وسط البلد فى العيد ننصح بتوخى الحذر والألتزام بوجود جهاز مانع التحرشات او السيلف ديفينس ويفضل صاعق الكهربا 120 ألف فولت وكل سنه وأنتم طيبين وأبقوا ادعولى , العيد فرحه .

تسعه وعشرين

مره واحده لقيتنى بقول كلام موزون

ماأعرف أنا أتغيرت وعقلت ولا ده مش نفس الكون
بس ازاى أعقل وانا اللى فى الأصل مجنون
ولا جايز الهلوسه بقت عقل والحق بقى هوه الجنون

فوزيه أم رجلين حلوه (مع الأعتذار للاستاذ رأفت الميهى)

تحذير : أى تشابه بين فوزيه وأى فوزيه تانيه هو تشابه غير مقصود ... فكوكم منى

أحكى عن ايه ولا ايه ولاايه عن شعرها الكاريه اللى أحلى من كاريه ميج رايان ولا عينيها السود اللى أسود من صامويل أيتو , ولا أحكى عن أبتسامتها اللى أحلى من ابتسامة نيكول كيدمان , ولا ضحكتها اللتى كادت أن تقارب سعاد حسنى , ولا عن القوام اللى فاق قوام الأخت شاكيرا وهند رستم مضروبين فى الخلاط مع بعض مش القوام اللى عايزه بردعه ولجام على رأى عبد الفتاح القصرى , ولا المناخير والشفايف اللى أحلى من كاترين زيتا جونز مع الأعتذار وكل الأسف للأخ الرفيق مايكل دوجلاس , مش ها أتكلم عن كل ده يا جدعان ها أكلمكم عن الجديد بقه , رجليها اللى ما ينفعش أقول زى رجلين اى حد لا العكس هوه اللى ممكن يمشى أنك تشبه رجلين جوليا روبرتس مثلا او جينيفر لوبيز بأنهم يشبهوا رجل فوزيه فأنت كده بتهلوس وما شفتش رجل فوزيه كويس , أول مره شفتها كانت لابسه البدى الأبيض اللى يهوس أصلا على المينى جيب الروز على الكاوتشى الصغنون اوى اوى اللى يادوب محتوى رجلها المنمنه اللى تقريبان مقاسها 22 , شكلها حسسنى أنها جايه تلعب ماتش تنس بس ماتش حامى أوى , فوزيه كانت جميله بطريقه تخوف الواحد أنه يقرب منها أصلا , اللى حصل فعلا انها عملت موجه من السخط فى الكليه مش من الرجاله طبعا لاه من البنات , لأن البنات فى الكليه بقوا مهما الواحده منهم عملت برضه الولاد ما بقالهمش شغله غير أنهم يقعدوا يتنحوا فى الرايحه والجايه ده غير طبعا الكلام اللى بيسموا بيه بدن البنات , شايفه البنات يا ماما , دا أنا ماشى مع شبشب , ده انا ليا الجنه انى لسه مكمل معاكى , ده غير انها ما اكتفتش بكده لأه أصبحت هيه رائدة ومجددة المينى جيب أز فجأه كده أتنين من بعد شهرين يمكن من بداية الدراسه لقينا بنتين من صحابها اللى كانوا بيلبسوا عاد يعنى لقيناهم ضربوا المينى جيب همه كمان البت ماريان والبت سمر,وبقى عرض مستمر كل يوم نصبح الصبح على طقم المينى جيب دول وهمه ماشيين مع بعض مما زاد من العته لدى الرجال والسخط لدى الفتيات , الواحد بقى لما يقعد مع البنات بقى يسمع كلام غريب , شفتى فوزيه لابسه ايه النهارده , شفتى الجيبه شفتى البدى , الحياه فى الكليه كلها بقت صعبه ما بقاش فيه بنى أدم فى الكليه ما يعرفهاش , وأنا ما أخبيش عليكم الحياه فى كليتنا ناشفه على الأخر والعيال مش متعوده على كده , مش عايز أقولكم بقه كمية العيال اللى بقت بتحاول تتكلم معاها لدرجة أن بقه فيه ناس بتجيلها من بره كليتنا أصلا , أنا صراحه فى الفتره دى ألتزمت الصمت تماما الموضوع بقى أوفر أوى , الحكاية بقى عايزه دخلت متسستمه كده مش أى هرتله والسلام , قبل امتحانات الترم الأول كده بكام أسبوع كنت قاعد فى وسط الكليه مع واحد من الدفعه الجديده بتاعت السنه دى كان معانا فى الجواله أسمه محمد , طبعا فوزيه كانت قاعده فى مكانها هيه وشلتها ورا الكشك بتاع مكتبة تصوير الورق , كنت بتكلم مع الواد محمد اللى معايا ده عن الكليه والبنات وبتاع وطبعا أخدنا الكلام لفوزيه ولقيت الواد بيقولى على فكره البت دى أنا أعرفها من الثانوى , نعم تعرفها ازاى يعنى , أعرفها كانت معايا فى درس الكيميا , يا سلام بتتكلم جد , أه والله , طب وهيه جامده كده من أيام الثانوى , ياااااااااه يا ابنى ده أستاذ الكيميا كان ها يبطل تدريس بسببها , ده كانت بتيجى بمينى جيب أقصر من كده والعيال بقه تقعد توقع الأقلام والكتب تحت الترابيزه بتاعت الدرس وينزلوا يجيبوها واللى بينزل ما بيطلعش يا معلم ده الأستاذ نفسه كان بيوقع الطباشير وينزل برضه يا عينى ساعات ما كانش بيعرف هوه بيدرسلنا كيميا ولا أحياء , طب يا ابنى مادام انت تعرفها طب ما تقوم كده تعمل اى حركه , يا عم فكك أنا لو عايز أكلمها بيس يعنى بس أنا ماليش فى الحوارات دى , تصدق انك عيل أبن تييييت يا عم انتعبيط هوه انا بقولك قوم أتجوزها ده كده يعنى قوم أرغى اعمل اى حاجه , يا عم فكك منى مش طالبه , دا انت سيس يا جدع خليك قاعد كده جبب أخواتك , الصراحه الواد كان بيتكسف من خياله اصلا وما بيتكلمش مع اى بنت معانا فى الكليه بس انا مات سيبتوش قعدت ألعبله فى دماغه ليل ونهار ولا الشيطان بس مافيش فايده برضه عيل فقرى فقرى يعنى , أنا بقه لقيت أن ما بدهاش لازم أتصرف , مره كنا معديين أنا ومحمد من قدام فوزيه كده وهوه طبعا مدور وشه الناحيه التانيه زى ما يكون البت ها تأكله , البت نسمه اللى معايا فى السكشن كانت قاعده جمب فوزيه ساعتها وبالصدفه كانت بتنادى على الواد محمد بتاع سكشن 4 , محمد محمد , أنا ما صدقت , يا ابنى كلم فوزيه بتناديلك شوف يا ابنى عايزه ايه ما تبقاش قليل الذوق , هيه ندهتلى بجد , ايوه يا ابنى انت ما سمعتش أنت عا تستعبط بطل تقل بقه , ورحت شاده من ايديه ولافف ناحية فوزيه وهيه بالصدفه كانت بتبص ناحيتنا فعلا , بس كده الحلو أتدبس لقى وشه فى وشها ما عرفش يعمل حاجه أتضر يتكلم , أزيك أخبارك ايه , أنا تمام الحمد لله , لسه فاكرانى , أه انت محمد كنت معايا فى درس الكيميا صح , أه تمام وأنتى فوزيه , صح أنت فاكر أهوه انت معانا فى الكليه هنا , أه أنا فى الكليه هنا , طب ما حدش بيشوفك ليه طيب دا الترم فى أخر خلاص ايه كنت فين كل ده , عادى يعنى ما بقعدش فى الكليه كتير , الواد سرح فى الكلام ونسى انى جمبه أصلا رحت ناغزه فى جمبه , أه نسيت أعرفك ---- زميلنا فى سنه تانيه , أهلا ازيك أخبارك ايه , تمام الحمد لله أنتى لسه أعدادى السنه دى , اه أول سنه , ربنا يوفقك بس أول مره أشوفك يعنى مع انى أعرف ناس كتير أوى فى دفعة السنه دى , حست أنها عايزه تطلع صوت من بقها كده وتقولى نعم يا أخويا أنت مش قاعد تبحلقلى طول النهار بقالك 3 شهور بس كانت مؤدبه قالتلى : معلش ماليش حظ تتعوض ان شاء الله , اه بأذن الله على فكره أنا عضو أتحاد الطلبه والجواله لو محتاجه أى ورق أو اى مساعده فى أى مادة أو اى حاجه فى الكليه أأمرى يعنى , يا سلام بجد ربنا يخليك , طبعا قعدنا احنا نرغى والواد محمد بقى واقف جمبى بيتفرج علينا بعد كده محمد ما جتلوش الجرأه ان يكلمها تانى بس أنا وفوزيه بقينا أصحاب مش جامدين أوى يعنى بس قشطه وعرفتنى بعد كده على ماريان وسمر والقعده بقت انس طبعا هيه واضح جدا أنها كانت عارفانى مصلحة بس قشطه يعنى ما انا برضه عارفها مصلحه ومش مصلحه واحده لا مصالح وحياتكم , بس قشطه يعنى الحياه كانت لذيذه فاكر مره أنها كانت داخله الكليه شافتنى وانا بأكل فول عند عربية الواد طاعون اللى قدام الكليه ولما قابلتنى بعد كده صممت أنى أخدها تاكل فول على العربيه قعدت أقنعها يا ماما ما ينفعش يا ستى والله ما ينفع يا بنتى عشان الامن القومى طب عشان خاطر معدتك مش ها تستحملى الكلام ده مافيش فايده أضطريت أوديها بدل ما حد تانى يوديها , المصيبه ان العربيه دى بياكل عليها كل سواقين التاكس فى اسكندريه مصيبه سوده وهيه كانت لابسه النهارده المينى جيب الروز اللى بتقلوظ رجليها أكتر ما هيه مقلوظه أخدنها وأستعديت للمعركه وطلعنا على عربيه الفول الحمد لله العربيه كانت فاضيه ده اول ما وقفنا وده اللى ما أسنمرش كتير بعد خمس دقايق بس لقيت كل عربيات التاكس فى اسكندريه ركنت جمبينا ونزل منها السواقين نصهم قعدوا جمبنا على الرصيف مش عشان ياكلوا طبعا واللى بياكلو برضه جمبنا نزلوا يأكلوا على الأرض مش زوق منهم مثلا لا ده عشان الفيو من تحت أحلى طبعا يومها بجد بجد الشارع أتقفل من كتر عربيات التاكسى اللى ركنت , الواد طاعون بقى مش عارف يعمل ايه العربية بتاعته ها تتكسر أنا رحت رامى طبق الفول من ايديها وأخدتها فى ايدى وحرب بقه لغاية ما عرفت أطلع من المعمعه قلتلها بلاش من الأول المصيبه انهاانبسطت اوى وقالتلى عايزه اروح تانى , ما علينا السنه كلها خلصت ما حصلش صراحه بينا تطورات من النوع اللى يؤدى للحب أو أى حاجه من الكلام ده وأنا لأول مره ما أدوسش فى الموضوع ده مش عارف ليه متهيألى لأن الولاد اللى هيه تعرفهم عددهم فى اللمون وأنا ما كانش عندى أستعداد أضحى بسمعتى الجباره فى الكليه بعد ما شعرى شاب فى الشغلانه بس والله البنت كانت طيبه جدا ساعت كنت بحس انها هبله بزياده , خلصت امتحاناتى بس كنت رايح الكليه بعد أخر ماده عندى بيومين عشان بحث لازم أسلمه عشان ما أتسوحش ,سلمت البحث وخارج من الكليه أذ أفاجأ بفوزيه قاعده لوحدها ولابسه المينى جيب الزرقا مش ممكن تحفه مش عارف البت دى بتجيب الجيب دى منين مع انها فى الأيام دى ما كانتش موضه خالص رفعت ايديهاونادت عليا , أفتكرت ان اخر يوم فى الأمتحانات بتاعتها النهارده , ازيك يا فوزيه ايه اللى مقعدك لوحدك كده , مافيش لسه مخلصه ومستنيه البنات , عملتى ايه فى الأمتحانات ورق الكورسات اللى جبتهالك نفعت , أه الحمد لله متشكره اوى على الورق بجد , يا بنتى متشكره على ايه بس عادى يعنى , ربنا يخليك , ايه مروحه ولا ايه , اه بس ها استنى البنات بس أنت رايح فين , أنا مروح برضه بس يمكن أقابل واحد صاحبى وندخل سينما الفيلم بتاع عادل امام الجديد نزل (السفاره فى العماره ) , بجد لازم أدخله مالوش حل الراجل ده , طب أقولك تعالى ندخله سوا دلوقتى انتى وراكى حاجه , لا عادى فاضيه يلا بينا , الصراحه انبسطت أوى الواحد مخلص امتحانت ورايق واليوم ليه طويل وأوله سينما واحنا لوحدنا والشيطان معانا طبعا , قطعت أفكارى وهيه بتقول : بس نستنى ماريان وسمر ممكن ييجوا معانا , كنت عايز أقولها --- بس أحترمت نفسى وقولتلها : اه طبعا نروح سوا كلنا ها تبقى لذيذه خالص , دقيقتين وجات سمر وماريان وهمه لابسين بقيت طقم المينى جيب صراحه لحظتها قلت يا رب ييجوا معانا أنا لوحدى والطقم ده ها تبقى جامده ولا جيمس بوند , وهمه ما كدبوش خبر وافقوا أنهم ييجوا معانا , ما كنتش عرف بقه هوه اليوم باظ كده ولا ايه بس قلت ممكن نطرقهم بعدين , طلعنا من الكليه كانت لسه الساعه 12 ونص قلنا ناخد الترام لحد محطة الرمل عشان نوصل على أول الحفله بالزبط طبعا فى الترام لاحظت نظرة الكمسرى وهيه بيقطع التذاكر بص لى بصه فيها كره العالم كله وكأنه بيقولى ايه ياأخى تلات مزز مره واحده لا وايه من الاخر والواحد مش لاقى سحلية حنى , أتشائمت صراحه مادام حد بصلنا فى المصلخه يبقى ربنا يستر على اليوم ده , وصلنا سينما أمير حبيبتى طبعا , ها ندخل السفاره فى العماره كلنا حد عنده أعتراض , سمر كانت عايزه تدخل هارى بوتر وأنا كنت عايزها تاخد ماريان معاها ويعيشوا بقه فى الخيال العلمى بتاعهم ويسيبونا انا وفوزيه فى الحقائق العلميه , بس فوزيه أقنعتهم بالسفاره فى العماره , رحت أقطع التذاكر وأنا بقطع التذاكر أخدت بالى من حاجه مهمه اوى انى الظاهر والله أعلم اتدبست فى عزومة سينما وانا مش واخد بالى خازوق صح يعنى عالبركه قطعت التذاكر وأنا يومها اصلا ما كنتش عامل حسابى على خروج ولا نيله أنا كنت رايح الكليه صد رد ما كنتش عامل حسابى فى الفلوس و المصيبه لو حبينا نعمل حاجه بعد السينما كده ها اتسوح , المهم دخلنا قاعة السنما فوزيه قعدت على شمالى وجمبها ماريان وبعدين سمر , الفيلم كان ابن لذين والمشهد بتاع عادل امام وهوه بيطلع الأندر وير الحريمى من جيبه فى أول الفيلم كانت بداية موفقه صراحه فوزية كانت ميته من الضحك جمبى وكام تعليق منى كانوا كفيلين بأنها تتقلب درمغه أبتديت أتفاءل ان اليوم ها يكمل كويس , الفيلم وقف فى الأستراحه البنات قاموا يروحوا التواليت , مش عارف بيحبوا يروحوا التواليت عمال على بطال ليه , الأستراحه خلصت والبنات رجعت كله رجع مكانه ماعدا سمر كسلت تعدى وتدخل مكانها راحت قاعده على يمينى , الفيلم أشتغل أجمد مشهد بقه كان بتاع عادل أمام وميسره وصاروخ والضحك كان للركب يا معلم دا يمكن كان فوق الركب بشويه كمان , أكتشفت ان البت سمر لذيذه فحت ولا تقولى فوزيه ولا بتاع البت كان عليها تعليقات فظيعه بجد,لما ميسره بقت وطنيه مره واحده وراحت مرجعه لعادل أمام الفلوس بتاعته قالتلى تعليق كارثه مش عارف كانت قاصده معناه اللى أنا فهمته ولا ايه ما علينا , خلصنا السينما كله طلع مبسوط البنات كانوا عايزن يتغدوا ده بقه الخازوق اللى ها يطلع من نافوخى أخدتهم للأستراحه بتاعتى كشرى الطيب , البنات طلبوا 3 كشرى وحاجه ساقعه أنا عملت نفسى مش ها اقدر اكل وطلبت حاجه ساقعه بس , بس ولاد الياه طلعوا أكيلة كشرى مسحوا الأطباق مع ان ما يبانش عليهم , طبعا نزلت لقيت نفسى متدبس فى دفع حساب الأكل برضه ميه ميه الله يحرقك يا فوزيه , الصراحه أنا بقه اللى كنت عايز أروح عشان كده حلاص أنا فعلا أتسوحت , همه كمان قصروا الشر ولقيتهم عايزين يروحوا عشان ما يتأخروش , اه خلاص بعد ما أخدوا أغراضهم الدنيئه منى , روحوا همه وانا بقه بقيت عايز أروح بس ازاى كل اللى فاضل فى جيبى نص جنيه والموبايل بتاعى فاصل شحن لحسن الحظ مش ها أعرف اكلم أى حد من صحابى عشان ما اتفضحش برضه أنا عارف اول ما يعرفوا اللى حصل ما ها يصدقو يشمتوا , المشكله انى ساكن فى العجمى ما ينفعش أخدها مشى أبدا وأقل مواصله بجنيه مع انى متعود أركب الأوتوبيس المكيف بأتنين جنيه عشان السكه طويله , الصراحه الواحد نفسه عزيزه وكريمه وفهيمه ومش ممكن يركب ويستهبل والحركات دى , أخدت القرار المستحيل انى امشى , وتوكلت على الله وشديت الرحال وطلعت من محطة الرمل للمنشيه للقبارى للورديان لوادى القمر للمكس أكتر من ساعتين ونص مشى بتاع 10 كيلو لغاية ما بظت والدنيا صيف والقميص اللى انا لابسه بقى عامل زى قميص كاظم الساهرفى أغنية حبيبتى والمطر الهى وانت جاهى يبتليكى بجرب فى رجليكى الحلوه يا فوزيه عشان تبطلى تلبسى مينى جيب خالص , خلاص قررت انى اركب اى مواصله بأى صوره متهيألى المسافه اللى فاضله دى ممكن تكون بنص جنيه بس , وقفت جمب شوية ناس كده على محطة أوتوبيس لقيت أوتوبيس من أعفن تلات أوتبيسات فيكى يا مصر ومليان ناس وعلى أخره رحت ناطط فيه بالتأكيد مش ها يكون اجرته فى الشويه الفاضلين دول أكتر من نص جنيه , ركبت من الباب اللى جمب السواق والكمسرى كان فى أخر الأوتوبيس عند الباب التانى أديت النص جنيه للراجل اللى قدامى وقلت له وصل واحد , طبعا النص جنيه عدى على 10 بنى ادمين قبل ما يوصل للكمسرى أستنيت شويه لقيت النص جنيه راجعلى تانى وواحد بيقولى أبعت ربع جنيه كمان , خلاص ما بقاش فيه مفر من الفضايح بصيت ناخية الكمسرى وأستنيت لما بص ناحيتى بص ماعاييش غيره قالى انت نازل فين قلتله 21 ان شاء الله ورحت باعتله النص جنيه وهوه أخده وبعتلى تذكره , سبحان الله من غير كلام والله هوه شكله حس يعنى أنا شكلى ابن ناس برضه يا جدعان ,واااااااااااااااء , منظرى فى الأوتوبيس بقى زباله بس فكك بقه مين يدق , وصلت بيتنا وصليت لربنا ركعتين شكر و قررت انى ما اشوفش فوزيه تانى أخر مره شفتها كان بعد كده بسنه ونص كانت هيه ومعاها سمر بس ماكانتش لابسه مينى جيب الظاهر ان ربنا استجاب دعايا وماكانتش حلوه صراحه زى ما كانت بس البت سمر بقه اللى ايه بقت طلقه طالعه من عينى البت دى , بس يلا بقه تغور هيه وفوزيه الهى ربنا يفضحك زى ما فضحتينى ألهى ربنا يبتليكى بأتوبيس زحمه كده زى اللى ان جيت فيه وتكونى لابسه المينى جيب البيضه , ولا بلاش بلاش حرام برضه , أنا عندى أخوات بلاستيك,هوه كان لازم يعنى مينى جيب وهباب ما احنا كنا حلوين الله يخرب بيته اللى أخترع المينى جيب والله يخرب بيت رجليكى الحلوه يا فوزيه.

تمانيه وعشرين

عايزه منى ايه يا بنت الأيه

شد وصد وبهدله وكل ده ليه
عمرك ما أديتينى حاجه يبقى ليكى عندى أيه
أنزل أطلع براحتى معايا أبونيه

ألف ألف مبروك

فيلم جديد فعلا , مش جديد لأنه جديد وخلاص لأه جديد بجد الحقيقه ان شكل الفيلم ده شفناه قبل كده فى أكتر من فيلم أمريكى على أكتر من شكل مره خيال علمى مره رومانسى مره أجتماعى , بس فكرة الفيلم ومحتواه ده هوه اللى الجديد بجد , الفيلم هنا بيتكلم عن مغزى الحياه وقيمتها , بيتكلم عن خياراتنا فى الدنيا والطريقه اللى بنبص بيها على كل حاجه حوالينا وبيوصلنا لكذا حقيقه مهمه جدا , أول حاجه هيه حاجه انا مؤمت بيها شحصيا من زمان اوى وهيه أن احنا فى الأساس جينا الدنيا عشان نختار يمكن قدرنا محتوم ومش ها نغيره بس الطريق اللى ها نختاره عشان نوصله لقدرنا دى شغلتنا فى الدنيا تاخد طريق الخير ولا الشر طريق الأستسلام والأستكانه أو طريق القتال مع الدنيا عشان توصل للى انت عايزه ها أقولكم حاجه من قناعاتى انا الشخصيه كل أحتيار بتعمله فى حياتك بيخضع لأحتمالين الأول انه يكون أختيار جيد والتانى أنه يكون أختيار سئ بس لأن مافيش جيد فى المطلق او سئ فى المطلق ولأنك لو حبيت تبص فى كتاب حياتك قبل ما تموت ووتلاقى فيه حاجه تستحق انك تحكيها يبقى لازم تفتح نفسك للأحتمالات أيا كانت والا عمرك ما ها تعرف الدنيا كانت مخبيالك ايه , القناعه التانيه اللى أنا مؤمن بيها برضه مش معنى انك شايف حاجه معينه بعينيك يبقى ده معناه انها حقيقه لأه طبعا الحقيقه ان حتى الحواس بتاعتنا بتخدعنا , الفيلم تجربه بجد حلوه أوى أحمد حلمى عامل حاله جديده فعلا وكل الممثلين فى الفيلم كمان عاملين أدوارهم كويس أوى من الحاجات المختلفه برضه ان الفيلم مالوش بطله ,يمكن طول الفيلم بندور يمكن يطلع بطله من هنا ولا هنا بس ده كان لذيذ , بداية الفيلم عاديه يمكن الأحداث بعد كده بتمشى بتسلسل بطئ يمكن بس يشدك وده لفكره معينه ها تعرفها فى أخر الفيلم فى نص الفيلم ها تحس بملل صراحه ويمكن تحس ان الفيلم بدا يفقد التسلسل بتاعه , بس لما ترجع من الأستراحه لاوم تحبس نفسك وتركز عشان تلحق الأحداث والمفاجأت المتتاليه الغير متوقعه قبل النهايه ها تاخد راحه كده تراجع فيها أفكارك وتيجى النهايه الطبيعيه متهيألى والمفاجأة بالنسبه لناس كتير بس فى المجمل صدقنى ها تطلع بكتير من الأفكار والحاجات اللى محتاج تراجع نفسك فيها وها نطلع بكتير من الطاقه الأيجابيه ده غير أحساس ها يلازمك انك عايز تشوف الفيلم تانى, الفيلم بيدور عن شاب من أسره مظهرها المادى كويس والشاب ده يمكن حتى وهوه عايش مع اسرته فى بيت واحد مش قادر يشوف الوش الخقيقى لأسرته ولا قادر يتفاعل معاها نفس الفكره للمجتمع حواليه لأصخابه فى الشغل رحلته فى الفيلم ها تكون هيه أستكشافه للعالم الخقيقى اللى حواليه اللى عمره ما أخد باله منه ولا حتى حاول أنه يفهمه , المونتاج جيد جدا واللى قام بيه معتز الكاتب , محمد دياب وخالد دياب عاملين سيناريو جيد معمول فيه مجهود يستحق التقدير , مدير التصوير أحمد يوسف شكرا ليه على المجهود الواضح , الموسيقى كمان عجبتنى وعملها عمرو أسماعيل , الديكور كان كويس بس فكرنى كتير بفيلم أسف على الأزعاج كان ممكن يكون أحسن من كده , أحب أقول ألف مبروك برضه على اتنين من الوجوه الجديده بلدياتنا من اسكندريه ومتأسف أوى انى مش عارف أساميهم , الشاب اللى قام بدور صاحب العربيه اللانسر اللى بتخبط الراجل وبتهرب ده كان أحد أعضاء فرقة مسرح كلية طب أسنان الأسكندريه , والتانى الشاب اللى قام بدور اللى كان واقف بيصطاد العصافير تحت شباك بطل الفيلم وده كان أحد أعضاء فرقة مسرح كلية زراعة الشاطبى , نادر جلال طب صقفه جامده أوى ليه قدر يطلع الفيلم بكل العناصر اللى فيه بالصوره الحلوه دى , أحب بجد أشكر أحمد حلمى تانى جدا جدا جدا بجد باشا كبير أوى وممثل فعلا , يا ريت نشوف منك الجديد دايما .

سبعه وعشرين

الكلمه دى كلمتى ولا جمله وأترددت
اللقمه دى لقمتى ولا لقمه فى الطبق بقت
الصوت ده صوتى ولا صوتى خلاص سكت
قلبى لسه قلبى ولا خلاص قعدت فيه ومددت

دليل العاطل العصرى : 3 (اتخرجتى يا بيضه )

الأمتحانات خلصت وسيادتك خلاص مستنى النتيجه نتيجه أخر سنه ليك فى الكليه , مش فاهم اى حاجه حواليك وأصحابك اللى بيدعوا ربنا انهم ما ينجحوش السنه دى ويقعدوا كمان سنه ولا سنتين فى نعيم الكليه والعيال اللى بتقابلهم من دفعات قديمه ولسه مش لاقييين شغل , حاجات كتيره مخلياك مقلق من يوم النتيجه ده وانك لو نجحت السنه دى مش ها تبقى زى كل سنه فيه خازوزق فى الموضوع , نتجتك طلعت ونجحت يا حلو وبتقدير كمان يلا بس مع ذلك حاسس انك مش سعيد وعندك أحاسيس اول مره تحسها , احساس انك رسمى كده خلاص طلعت من ذمه الحكومه وانت اللى بقالك على ذمتها فى التعليم بتاع 16 سنه وأكتر والمفروض انك طلعت من ذمة ابوك كمان ده عشان احنا فى مصر بس , انما لو كنا فى دوله أوربيه مش معقول اب يكون بيصرف على شحط زيك , المفروض بقى ان سيادتك تلاقى شغل وتصرف على نفسك وتحوش وتتجوز وحاجات كتير أوى كده ما تعرفش طلعتلك منين , كل ده خلاك تحسد اصحابك اللى دبلروا ولسه قاعدين فى الكليه شويه , بص أنا مش عايزك تقلق أنا ها افهمك اليله ها تمشى ازاى , مافيش قلق ولا اى حاجه ما تخافش ولا انت طلعت خلاص من ذمة الحكومه ولا أبوك ها يسيبك , الحكومه لسه عندها معاك مشوار بسيط كده وأبوك مجبر يا ابنى يصرف عليك ده قدره ربنا يعينه على ما بلاه وأوعى تفتكر انك حتى لو أشتغلت وبمرتب كويس ها تعرف تستغنى عن أبوك وتتحمل مصاريف الجواز واللذى منه لوحدك أنسى , بص يا ابنى البلد عاملالك برامج تدرييبه ممتازه بعد الكليه ها تخليك كائن زى الفل ان شاء الله قادر على مجاراة سوق العمل وسوق البهايم وسوق الخضار وسوق الجمعه وكل الأسواق , سيادتك اتخرجت يبقى لازم يا حلو تخلص بقه ورق جيشك وعمليه تخليص الأوراق اللى انت محتاجها عشان الجيش دى لوحدها عمليه صدقنى ها تنمى فيك كثير اوى من المهارات اللى انت نفسك ما كنتش نعرف انها موجوده فيك , بداية من الأماكن اللى والمفروض تخلص منها الورق ودى ها تقابل فيها شخصيات ها تعلمك كتير اوى عن مهارات الحياه فى مصر المعاصره , ده غير ان الأماكن دى منها اللى موجود قريب من المناطق الصناعيه الجديده وده ها يعرفك على الأماكن اللى المفروض تنزل تدور على شغل فيها واللى ها تتسحل فيها ان شاء الله ومش ها تلاقى شغل برضه ده طبعا غير الوقفه فى الطوابير اللى هيه بقه ولا تقولى طوابير العيش ولا الكلام ده , الطوابير اللى ها تقابلها هنا احلى بمراحل عندك على سبيل المثال لا الحصر عشان تطلع الفيش , ها تحاول تعمل ناصح وتيجى من سته الصبح ها تلاقى ان فيه ناس بايته هنا من امبارح يا عم الحدق , وها تقعد من سته الصبح لحد الساعه تلاته ومش ها تخلص برضه الورقه اللى انت جاى عشانها ها تقعد على كده بتاع اسبوع ها تتعود طبعا انك تجيب أكلك وشربك معاك عشان ما تجوعش أو تعطش فتتنازل عن مكانك التاريخى فى الطابور عشان تجيب ازازة بيبس وكل يوم ها تكتشف ان الطابور بيزيد ما بيقلش ومش عارف ايه اللى بيحصل بس لو كنت ناصح شويه ها تعرف انك لو كنت طلعت من الطابور ودخلت من الشباك اللى ورا كتت ها تلاقى طابور تانى اصغر شويه ده بقه اللى بيلموا فيه القتاوه او رسوم تسليك المسائل عشان عم عبده ما يزعلش والغريب انك ها تلاقى الناس بتتعامل مع الرشوه بطريقه واقعيه اوى ومنظمه كمان ها تدفع وتدخل ومع انك دفعت لسه من دقيقه ها يسألك انت عايزه مستعجل ولا عادى تساله عادى ده يبقى ايه يقولك ان العادى ده ياخده له اسبوعين كده او اكتر طبعا تضطر تقوله مستعجل يقولك ان ده ها يكلفك كمان وتدفع تانى يقولك تمام كده تيجى تاخده بكره ان شاء الله , تكتم الصوت الأبيح اللى بيجاهد عشان يخرج من بقك والكلمه اللى من تلات حروف , بقى من اسبوعين او أكتر لبكره شوف ازاى , دى عينه بس كده على الماشى , لو ربنا أكرمك ودخلت الجيش ها تعيش تجربه ممتازه تتعلم فيها مهارات عن كيفية النجاه تحت كل الظروف وده ها ينفعك طبعا فى حياتك كعاطل بعض الجيش عشان تنجو وانت مفلس بأذن الله ما تقاطعش,لو حظك وحش ويا عينى يا ابنى ما دخلتش الجيش ما تحافش الحكومه مش ناسياك عندك كام دوره معتبرين ها ينسوك أسمك , أول حاجه خد عندك كورس I C D L ده يا برنس لو ما تعرفوش كورس الرخصه الدوليه للكمبيوتر ده بيبقى فيه ويندوز وأوفيس وحاجات كده وده مدعم من الحكومه ها يقولولك ادفع متين جنيه وبعد الكورس ها تاخدهم تانى أدفع ولا يهمك بس عايز أقولك اللى عند الحكومه أنساه ولو عرفت تاخد المتين جنيه بعد الكورس ابقى قولى أخدتهم ازاى عشان انا بقالى سنه ونص ومش عارف أخدهم ,الكورس ده مدته حوالى 3 شهورو طبعا ها تتعلم فيه حاجات مهمه أوى , مثلا ازاى تمسك الماوس وازاى تغير الخلفيه بتاعت الديسك توب ده غير انك ها تعرف يعنى ايه ديسك توب اصلا ده غير انك ها تعرف الفرق بين الفولدر والفايل ابسط يا عم, من اهم الحاجات كمان انك ها تعرف ان فيه استخدام تانى لحامل الأكواب اللى موجود فى وش الكمبيوتر بتاعك وهوه انك ممكن تشغل فيه حاجه أسمها سيديز أو سيديهات أو أسطوانات يعنى وده قرص مدور كده المدرس ها يوريهولك فى الحصه , تمام كده ها تطلع من الكورس مبسوط من نفسك وفله بس أوعى الأمل يخدعك وتتخيل انك كده حد ها يعبرك ويشغلك لأنك ها تكتشف ان مصر كلها اخدت الكورس ده وبقى زى شهادة التطعيم , ما تخافش الحكومه عامله كورس تانى تحفه بقه عاملاه وزراة الأتصالات عشان تنسى شهادة الليسانس أو البكالوريوس بتاعتك وتحطها فى صفيحة الزباله وتغير مجال شغلك للكمبيوتر , الكورس ده ها تتعلم فيه برمجه وشبكات وكام حاجه كده ها ياخد وقت حوالى 9 شهور ها تقولى ليه 9 شهور بحالهم أقولك عشان بعد الكورس ده ها تتولد من جديد ده غير انهم بيدولك بتاع 600 أو 1000 جنيه كل شهر فيه تضارب اقوال فى الموضوع ده , يعنى ها تتعلم وتاخد فلوس كمان تصدق دى , ها تدخل الكورس ده من ناحية التعليم ها تتعلم بأذن الله من ناحية الفلوس ما اوعدكش لأن الفلوس دى ها تلاقيها طلعت مصاريف معمل وتسديد ديون مصر ومعونة شتا ومصاريف مش عارف ايه وحاجات غريبه كده بس ممكن ربنا يكرمك وتتحصل على 150 جنيه أخر الكورس ان شاء الله , ها تخلص مشروع التخرج بتقدير جيد جدا و تطلع من الكورس باشا بقه مستنى عروض الشغل من ميكروسوفت وجوجل وأبل , بس للأسف ها تكتشف ان البلد فيها اصلا خريجين معاهد كمبيوتر خاصه وحكوميه بالعبيط ده غير معاهد التكنولوجيا وكليات الهندسه ونظم المعلومات ده غير الألاف اللى أخدوا نفس الكورس اللى انت أخدته وكل ده غير الحقيقه اللى خبوها عليك ان مصر مافيهاش صناعة برمجيات أصلا , كده يبقى فات أكتر من سنه على تخرجك تقريبا ها يكون صاحبك اللى فى الجيش خلص مدته هوه كمان ودى حاجه تخليك ما تيأسش أهوه صاحبك برضه لسه ها يبدأ يدور على شغل خد بعضك بقه وشجعه كده وأنزلوا دوروا مع بعض , ها تدوروا ازاى بقه وفين ها أقولك أنا بس اسيبك دلوقتى عشان عندى انترفيو , ادعيلى انهم يقبلونى المره دى .

سته وعشرين

يطبق الكون بهمومه على صدرى نفسى يضيق
روحى تتخنق زياده مع كل بلعة ريق
أذان الفجر الله أكبر يطفى فى قلبى حريق
أقول يا رب توبه دى رحمتك أوسع طريق

30 سؤال كان نفسك تلاقيلهم أجابه : ليه البرجر مدور مش مربع؟

1-ليه الرجاله بتاخد حقن ؟
عشان ينفخوا دراعاتهم

2- طب ليه الستات بتاخد حقن ؟
عشان ينفخوا شفايفهم

3- طب ليه الست بتنفخ شفايفها ؟
عشان ما تنامش منها فى وسط الكلام

4- ليه الأرض بتتكلم عربى ؟
ماعهاش فلوش تاخد كورسات انجليزى

5- ليه الكوره أجوان ؟
عشان مش نقط زى الكراتيه

6- ليه كلام الليل مدهون بزبده يطلع عليه النهار يسيح ؟
عشان بتسيبه بره التلاجه

7- ليه البلد مش مستقره ؟
عشان مصر بتتقدم بينا

8- ليه مصر ام الدنيا مش الصين؟
عشان الأم اللى بتربى مش اللى بتخلف

9- ليه الستات بتلبس برا ؟
عشان حمالة قاسيه

10- ليه الرياسه فى أمريكا فترتين بس وفى الدول العربيه بتزيد عن كده؟
عشان الشرع محلل أربعه وما ملكت أيمانكم

11- ليه منيو الخمسه لسه بخمسه ؟
عشان الحسد

12- ليه الست بتروح لدكتور التجميل ؟
عشان تكبر صدرها

13- طب ليه الراجل بيوافق يدفع فلوس العمليه ؟
عشان يكبر دماغه

14- وليه الست بتكبر صدرها أصلا؟
عشان تملى عين الراجل

15- طب ليه بيصغروا صدرهم؟
عشان بيكتشفوا بعد العمليه انه كبر أوى

16- ليه الرجاله بتحب الكوره الأوربيه أكتر من المصريه ؟
عشان بيشجعوا الكوره الحلوه

17-هل المزز اللى بيبقوا فى مدرجات الملاعب الأوربيه سبب من أسباب حلاوة الكوره الأوربيه؟
أه طبعا لأن الكوره أحلى مع كوكاكولا

18- ليه سنة السجن ب 9 شهور بس ؟
التلات شهور الباقيين أخدوا أفراج

19- ليه الرجاله بيروحو الجيم ؟
عشان يبقوا شبه سيلفستر ستالون فى فيلم Spesialist

20- طب ليه الستات بتروح الجيم ؟
عشان يبقوا شبه شارون ستون فى نفس الفيلم

21- ليه الكدب مالوش رجيلين ؟
رجليه راحوا فى 67

22- ليه المصرى ها يفضل مصرى ؟
عشان ما حدش هايرضى يديله جنسيه تانيه

23- ليه الشيطان شاطر ؟
عشان ما بيذاكرش من كتب الوزاره

24- ليه الملابس الداخليه الحريمى غاليه ؟
عشان الغالى للغالى

25- طب ليه الرجاله بيوافقوا يدفعوا كل الفلوس دى فى ملابس داخليه ؟
عشان الغالى تمنه فيه

26- ليه الدور نصف النهائى فى كأس العالم فيه أربع فرق مع ان الدور النهائى فيه فرقتين مش تمانيه؟
عادى يعنى زى ماهوه اسمه كاس العالم مع ان اللى بيكسب بيدوله بتاعه كده مالهاش ملامح مش كاس

27-ليه العلم نور ؟
عشان المدارس كلها الصبح

28- ليه البرجر مدور مش مربع ؟
عشان العيش الكيزر مدور مش مربع

29- طب ليه السوسيس مش مدور زى البرجر ؟
عشان نعرف نفرقهم عن بعض

30- ليه الأهلى بطل القرن ؟
عشان الزمالك بطل القرنين

خمسه وعشرين

أهرب يا عقلى من محبسك

أتخفى غير توبك وملبسك
جهز رصاصك صباعك على زناد مسدسك
موت فى خندق أفكارك الحره بس أوعى الظلم ينجسك

على هامش مباراة مصر والبرازيل

تحرير رمسيس تحرير رمسيس تحرير رمسييييييييس
ركبت الأتوبيس وسألت السواق وأنا طالع تكرارا للعاده الغلسه فى المصريين تحرير يا أسطى , أيوه يا عسل أطلع , كام الأجره , جنيه , اديته جنيه ووقفت جمب الباب ماسكفى حاجه مش شايف هيه ايه من زحمة الأوتوبيس , على يمينى تلاته ملمومين على حاجه لما دققت النظر لقيته تليفزيون صينى من أبو 300 جنيه اللى فيه تليفزيون وراديو وسخان وغساله , العيال مركزه اوى وبتتفرج على ماتش مصر والبرازيل وفيه كام واحد طبعا بيحاولوا ينطوا من فوق قفاهم عشان يشوفوا اى حاجه , هوه كام كام يا كابتن , أتنين واحد , لمين , للبرازيل طبعا يا ريس انت ايه ما تركز ده كده مووز أوى دى البرازيل هوه اتحنا بنلاعب مركز شباب بنى عبيد , اه كويس طبعا ربنا يزيد , أنا سمعت أنهم ها يركبوا عداد على الجون بتاعنا عشان يلحق يعد الأجوان , الصراحه أنا متراهن مع العيال أصحابى على 10 ,وحسنى عبد ربه على راسه ويلا يلا يا خساره يا ابنى كان ممكن تفرح ال70 مليون كان ممكن تخلص يا ابنى , ما تلعب يقه يا أخى دا انت --- صحيح بقاله ساعه قاعد يلف ويدور بأم الكوره هوه فيه كده , وسع شويه يا كابتن فيه ايه , معلش عايز أتفرج , تتفرج طب هات جنيه , جنيه ليه يا عم , اعتبر نفسك قاعد على قهوه يا أخى مش الموبايل ده شغال بالبطاريه والبطاريه بتتشحن برضه وبتتشحن ايه مش كهربا والكهربا بفلوس ولا ايه , خلاص يا عم مش عايز أتفرج ها اسمع بس , ايوه هوه انتوا كده يا مصريين ساعة الفلوس , والكوره مرفوعععععععععه وجوان يستلم الكوره وايه ده ايه ده يا عينى يا ابنى جون جون جون , يا أخى -- أتفرج يا عم هوه الحضرى ده بينيل ايه بس , يا جدع ده عيل ---- راحت عليه خلاص بقه الحضرى هوه بقه نافع من يوم ما راح نادى صابون ولا سيون ده , والله انا خايف لا أحسن يقلشوا شحاته هوه ها يلاحقها منين ولا منين دا احنا لسه مفقوعين من الجزاير , يا ريس دى البرازيل يعنى لعيبه خيال دى ريال مدريد لسه شاريه كاكا ب 80 مليون يورو يعنى بتمن كل اللعيبه اللى بلدك , يطلعوا كام دول بالمصرى يا ريس ,شوف أنت أضرب فى 10 ولا حاجه , لا لا مش أوى كده أقل متهيألى , يا عم يعنى قول مليار جنيه برضه , مين كاكا ده يا حمدى , ده اللى جاب فينا الجون الأول , وأسمه كاكا يا حمدى , أيوه ياعم الخفيف , أتارى المدافعين قرفانين يمسكوه , أسكت ياد , ده تمنه يشترى العمرانيه كلها يا أهبل , يا عم صلى على النبى والله دا أنا لو جبتله أصغير عيل بيلعب كوره فى الشارع عندنا يشرده , بس ياد يا حشاش انت اسكت خالص انت شكلك ما تعرفش مين اللى بيلعب أصلا , بس هوه كده مصر ها تدخل كاس العالم , اه ان شاء الله عندنا أمل كبير أحنا بس نغلب كل ماتشتاتنا الجايه وساعتها يبقى فيها كلام , لا بسيطه يا ريس , وماشى أبو تريكه وماشى ماشى ماشى ماشى ويلال يا ابنى يلا يا تريكه لا لا لا وحشه وحشه , العب بقه يا عم ايه ال ----- دى العيال قاعدين يلفوا ويدوروا بالكوره ما تخلصوا , بص يا عم شوف والنبى بيعمل ايه بص _______________ البطاريه فارغه يرجى أعادة الشحن __________________ , الموبايل أبن ال --- ده كمان ده وقته , يلا ولا ها نسمع ولا ها نشوف , ياعم فكك كده كده ها نتغلب ها تسمع وتشوف ايه بس , أيون بس عايزيين نعرف ها نتغلب كام , والله الشعب ده غلبان وبيتلهى فى أى حاجه هبله والسلام يا ناس كورة ايه ونيلة ايه بس مش نشوف الأول البلاوى اللى احنا فيها , أه والله يا عم الحاج بس ها نعمل ايه بس أهوه بنفك عن نفسنا يمكن نفلح فى الكوره , يلا اللى مازل تحرييييييير , نازل يا أستاذ , لا أنا ها أكمل رمسيس , طب أطلع من على الباب نزل الناس لو سمحت , يلا رمسيس رمسيس رمسيييييييييس .

أربعه وعشرين

أبعد يا قلبى وطير وعيش
أخلق لنقسك جناحات وريش
لمره واحد أختار بجد ما تترميش
تستاهل صحيح ولا ها تنزل على مافيش

قلم حبر 3

- قال ايه بقى يا سيدى ناويين يعملوا معهد عالى للرقص الشرقى , بسم الله ماشاء الله هيه دى التنميه اللى أحنا محتاجنها فعلا , ها يبقى عندنا معهد محترم لتعليم الرقص الشرقى يتبع نكتب تنسيق الجامعات ووزارة التعليم العالى , العالى أوى , طبعا المعهد ها يتم انتداب مجموعه من أهم أساتذة الجامعات المصريه للتدريس به , دكاتره من كلية الطب لتدريس مادة التشريح , دكاتره من كلية قسم الجولوجيا بكلية العلوم لتدريس ماده الزلازل الهزات الأرضيه وكيفية قياسها, وطبعا دكاتره من كلية التربيه الرياضيه لتدريس الأيروبيكس والسويدى والسباحه كمان لتقوية عضلات الصدر والأكتاف وعشان الخريجات يبقوا فى ليونة السمكه فى الميه , دكاتره من كلية الأداب لتدريس علم النفس والأجتماع لأنه طبعا بيشكل جزء مهم جدا من عمل الراقصه , ودكاتره من المعهد العالى للموسيقى العربيه لتدريس أصول المزيكا وكيفية تذوقها وتطبيقها عمليا , وبكده يبقى المعهد صرح عالمى يخرج راقصات على مستوى العالميه بس لسه مش عارفين المعهد ها يقبل من علمى ولا من أدبى ولو أنه من المتوقع أنه ها يبقى من كليات القمه لان سوق العمل ها يبقى محتاج جدا لخريجى المعهد من الراقصات الحاصلات على بكالوريوس علوم الواحده ونص وده طبعا بعض القرار اللى هايصدر بعدم حصول اى راقصه على رخصة ممارسه الا لما تكون متخرجه من المعهد , ده غير طبعا ان المعهد ها يفتح أبوابه على البحرى للدراسات الحره والدراسات العليا مما سبؤدى لتحسين مستوى الرقص بصفه عامه , تخيل انك قاعد بتتفرج على رقاصه معاها دكتوراه لازم بعد كده تديلها النقوط فى ظرف مقفول او تحوله على حسابها فى البنك , ويمضى قطار التنميه أحلى قطار .

- بمناسبة القطارات صحيح , سمعت ان هيئة السكه الحديد أتفقت مع شركة جينرال أليكتريك على توريد 80 جرار للسكه الحديد 40 عشان قطارات البضائع و40 عشان قطارات الركاب , طبعا كان فيه كلام كتير اوى عن فساد فى الصفقه والمواصفات وحاجات كده , العادى بتاعنا يعنى , بس الغريب اننا ما فكرناش نغير الشركه اللى بنشنرى منها الجرارات بقالنا اكتر من 30 سنه مع ان الحوادث اللى خصلت عندنا مش شويه يعنى , صراحة أنا شفت صوره لجرار منهم و شكلها معفن برضه حاجه غريبه اوى يا اخى بس متهيألى ان ده مش غلط شركة جينرال اليكتريك ما احنا بنشوف القطارات فى امريكا شكلها بس الله ما شاء الله ولا الطياره هوه الظاهر الغلط فينا احنا ازاى مش عارف , وبعدين لغاية دلوقتى ما عرفتش هيه الجرارات طلعت تنفع يعنى ولا لاه فى الأخر بس سمعت انهم بدأوا يدربوا عليها السواقين والمهندسين , وأنا بقترح حاجه على هيئة السكه الحديد ان من الأفضل انكم تدربوا المواطنين على ركوب القطارات الجديده يمكن ده يحل المشكله .

- المشكله بدأت فى المكسيك او هوه ده اللى متداول يعنى ان اول حالة أصابة بأنفلوانزا الخنازير كانت فى المكسيك , دلوقتى وصلت حالات الأصابه فى العالم لحوالى 17 ألف حاله فى أكتر من 60 دوله فى العالم , طبعا الخنزير زى ما فهمنا تقريبا هوه الوسيط بين الطيور والبنى ادم ممكن يؤدى لتطور سلاله من فيروس انفلوانزا الطيور واللى ممكن يكون وباء عالمى جديد يؤدى لموت مليار بنى , الحكايه مش سهله ولا هينه الموضوع كبير اوى فعلا , بس مش عارف هل كان المفروض يحصل اللى خصل ده فعلا فى موضوع اعدام الخنازير , يعنى مش دى برضه تعتبر ثروة حيوانيه تقدر بملايين وفيه الاف الناس اللى التجاره دى هيه مصدر رزقهم ليه تعاملنا نع الموضوع بالصوره الغريبه دى مش فاهم , فى دول كتير فيها معدلات اصابه كبيره فعلا ما سمعناش عن حالات اعدام للخنازير زى اللى حصلت فى مصر , يمكن احنا طلعنا أنصح من كل دول العالم وده هوه السبب ان لحد دلوقتى ما أكتشفناش غير حالة اصابة واحده فى مصر , أتمنى ده ساعتها ها اشكر السيد وزير الصحه من كل قلبى , بس لحد دلوقتى مش قادر أقتنع .

- حجب المواقع الاباحيه فى مصر موضوع فيه كلام كتير اوى , هل حجب المواقع ها يحل مشكله معينه , انا شايف على الأقل انه ها يحل المشكله فى سن خطير جدا دلوقتى ادمن المواقع دى لعدم وجود رقابه من اى حد على اى حاجه , بقى عادى انك تدخل سايبر تلا قى عيال لسه ما كملتش 8 سنين وداخلين على مواقع وشغالين صور وأفلام وأخر حلاوه وخربانه الدنيا , لو حجب المواقع اتعمل ها يبقى الموضوع مش بالسهوله دى على الأقل ها يحتاج لولاد فى سن أكبر شويه عشان يقدروا يوصلوا لطرق كسر الحجب ده ودى حاجه ممكنه , بس كويس يبقى على الأقل سنهم كبيرشويه وكمان ها يخلى العيال يبقوا أشطر وأذكى فى أستعمال الكمبيوتر عشان يقدروا يوصلوا لطريقة كسر حجب المواقع , ولو عيال من اللى عندهم 8 سنين لسه قدر يكسر الحجب يبقى مصلحه برضه يمكن يطلع عيل عبقرى ولا حاجه يبقى عندنا جيل من العباقره حد يكره , طبعا هوه ده هايبقى تعدى على حرية الحصول على المعلومات ده غير انه ها يبقى الممنوع مرغوب وانتم عارفين بقه العيال فى سن المراهقه بيبقوا عاملين ازاى ها تبقى مسأله عند كمان , يمكن يكون الحل ان كل الشركات اللى بتقدم خدمه الأنترنت فى مصر تقدم خدمه حجب المواقع دى كخدمه أختياريه مجانيه بس السيبرات كلها يبقى الحجب فيها أجبارى عشان فيه سيبرات مشبوهه اصلا ما بتشتغلش غير على كده , الحكاية صعبه اوى فى الحقيقه بس حجب المواقع فى كتير من الدول العربيه ما حلش المشكله ده يمكن يكون زودها الموضوع فى الحقيقه أكبر من مجرد شويه مواقع بس يا ريت بس لو وزارة الأتصالات حجبت المواقع ما تاخدناش فى دوكه وتحجب المواقع اللى مش عاجباها بدل المواقع الاباحيه بس واخدلى بالك يا برعى .

تلاته وعشرين

أنا البدايه والنهايه أنا الصوره فى المرايه
أنا الحته اللى ناقصه وناقصه
أنا السور العالى اللى ماحد يعرف ايه وراه

أنا اللى ماشى ما أعرفش الطريق بس عارف منتهاه

الواد ---- أبن المعلم ------ أتخطف يا مينز

المكان : مدينة الشيخ زايد -محافظة أكتوبر , الزمان : امبارح حوالى الساعه واحده ونص بعد نص الليل , كنت قاعد بتفرج على قناة روتانا سينما مش ها تقدر تبيض عليك كان فيه فيلم أحلام عمرنا بتاع مصطفى شعبان طبعا بشوفه للمره ال30 حاجه زى كده , مش من حلاوته يعنى بس اهو هلوسة اخر الليل بتفرج على اى حاجه وخلاص وقاعد بسقط أصلا بس مش جايلى قلب أدخل أنام , هوه الفيلم كيفما اتفق يعنى المفروض فيه مشاهد أكشن وأثارة وكده اللى هيه طبعا كانت فى قمة الملل , ماكنتش عارف ان الليله دى مش ها تنتهى غير بكمية من الأثاره تكفى لضخ الأدرنالين فى جسمى يخلونى أصحى أفكر طول الليل , وأنا قاعد فى أمان الله كده يا أخوانا ومنه شلبى بتعترف بحبها للواد رامز جلال فبتقوله عايزاك تشتريلى بوتجاز , أنا اصلا مش معاهم ومش عارف ايه دخل البوتاجاز فى الحب , أذ بصوت جاى من الشارع بره , فرملة عربيه بس جامده ايه تدل على تخميسه من اللى هيه وبعده على طول صوت فرمله أجمد من الأولانى , صراحه زى ما أكون ما صدقت حاجه تطلعنى من الملل قمت بسرعه أوى من الكرسى وفتحت الشباك اللى جمبى على طول وبصيت لقيت منظر لجزء من الثانيه ما فهمتوش , عربيه متسوبيشى لانسر قاطعه الشارع بالعرض ووراها أثار كاوتش واضح جدا ان هيه اللى عملت الصوت الأولانى نتيجة اللفه اللى عملتها عشان تقطع الطريق كده وعربيه تانيه كانت ماشه عكس اتجاه الطريق لونها اسود تقريبا ووراها خط أسود من الكاوتش اللى أتقطع فى الأسفلت من الفرمله اللى عملتها العربيه عشان ما يدخلش فى العربيه اللانسر اللى قطعت الطريق عليه , ورا العربيه السوده كان فيه عربية تانيه لونها أحمر قفلت عليها السكه من ورا , فى ثانيه أتفتح باب العربيه المتحاصره فى النص بين اللانسراللى قافله عليها السكه بالعرض والعربيه الحمرا اللى وراها ونزل منها شاب كده أظن حوالى 20 سنه وطلع يجرى ناحيه باب العماره اللى جمبى تابعته بعينيا لحد ما أختفى فى مدخل العماره ورجعت بعينى على العربيات لقيت نزل منها حوالى 5 شباب فى نفس سنه تقريبا وطلعوا يجروا وراه ودخلوا العماره وراه فعلا لثانيه أختفوا جوه وبعدين طلع صوت بيصرخ ألحقونى عايزيين يخطفونى وصوت زى ضرب وعركه وكده رجعت بعينى على العربيات لقيت بنت لابسه بدى وبنطلون جينز وشعرها اسود مش عارف طلعت من أى عربيه بالظبط كل ده والزعيق مستمر صوت الواد وهوه شكله بيقاوم ألحقونى ألحقونى , ثانيتن وطلع الشباب دول من باب العماره وهمه شايليلن الواد الأولانى ده من ايديه ورجليه والتى شيرت بتاعه مخلوع من على جسمه وهوه لسه بيزعق ألحقونى ألحقونى وبيحاول يتحرر منهم بس همه كانوا كتير حوالى 5 , واحد منهم فتح باب العربيه اللانسر الورانى وقعدوا كلهم يزقوا فى الواد عشان يدخلوه العربيه بالعافيه والواد بيقاوم عشان ما يدخلش بس ضربوه ودخلوه بالعافيه وزى الأفلام واحد لف فتح باب اللانسر من الناحيه التانيه وواحد من الناحيه اللى دخل منها الواد وزنقوا الواد فى النص والواد اللى فضل رجع للعربيه الحمرا , كل ده شافه من قريب جدا واحد كان بيركن عربيته فى اللحظه دى قدام عمارتنا وكان بينه وبين العربيه اللانسر حوالى 3 متر ومع ان الشباب شافوه وهوه بياخد نمرة عربيتهم ما حدش فيهم أهتم ساعتها كانت العربيه السوده تقريبا أتحركت وطلعت على الطريق والعربيه اللانسر كملت لفتها وطلعت ووراها العربيه الحمرا كل اللى حصل ده ما أخدش بتاع 15 ثانيه , كان معايا واحد صاحبى كان بيبص من الشباك برضه قدر يلمح تلات أرقام من العربيه اللانسر , أتصلنا بالنجده فرد علينا واحد حكيناله بسرعه اللى حصل , فعطانا رقم قسم الشرطه بتاع زايد تقريبا كلمناه وحكينا وأديناله الأوصاف والأرقام اللى شفناه ونزلنا من الشقه بسرعه عشان نتأكد من أرقام العربيه من الراجل اللى كان بيركن عربيته تحت لقيناه بيكلم النجده برضه وفعلا قدر يلقط رقم لوحة العربيه اللانسر , فى الثوانى دى كان الناس اللى فى الشارع كله طلعت من البلكونات والشبابيك وصوت واحد بتزعق من شباك خطفوه خطفوه , وبتاع 10 بنى أدمين أتلموا جمبنا وكله عمال يقول اللى لحق يشوفه واللى لسه بيسأل ايه اللى حصل واللى لسه بيفرك عينيه من أثار النوم , تقريبا كلنا أتقنا على أنها عربية لانسر فضى أو رمادى , وأنهم كلهم شباب وكانوا جاييين بالعربيات ورا بعض , يعنى الواد اللى أتخطف ده يعرف العيال دول وهمه يعرفوه تقريبا , وكعادة الشعب المصرى بقه كله قعد يحلل الموقف حسب دماغه اللى قالك دول شكلهم بينهم حاجه بيخلصوها بين بعض واللى يقول مادام كان فيه بنت يبقى هيه دى سبب الليله دى كلها , 5 دقايق كده وجات عربيه تبع قسم شرطة زايد نزل منها شخصين لابسين مدنى مخبرين او امناء شرطه تقريبا , سألونا عن اللى حصل حكينالهم وبعدين واحد منهم قالنا ممكن ما نقدرش نعمل حاجه لو ماجلناش بلاغ من أهل الولد ده , أنا صراحه قلت هيه كد ه قفلت واحنا عملنا اللى علينا , أخدت بعضى وطلعت شقتى , عشر دقايق كده ووصلت عربيه النجده بصوتها المميز ونورها الأزرق شفتها من الشباك كان لسه فيه بتاع 4 أشخاص لسه تحت , نزل واحد من عربية النجده ظابط تقريبا وسأل الراجل اللى كان بيركن عربيته وشاف الموضوع من قريب عن اللى حصل حكاله الموضوع برضه وبعدين أنفضت الليله , عربية النجده أستنت شويه , وبعدين مشيت , مش ناوى أقعد أحلل حالة الشارع المصرى مؤخرا والقتل والخطف والأغتصاب وأسبابه ومبرراته , أنتم أدرى بالحاجات دى , أنا حبيت أنقل حاجه أنا شفتها بعينى بس وخلاص مش عارف ايه الهدف بس كنت عايز أحكى , يمكن عشان أخلص زمتى من ربنا , من ايه مش عارف برضه , أسيبكم مع أفكاركم , سلام ...

فوزيه لا تكذب ولكنها تتجمل

تحذير : أى تشابه بين فوزيه وأى فوزيه تانيه هو تشابه غير مقصود ... مش عايزين تلاكيك بقه

الترم التانى بدأ عادى يعنى مافيش جديد نفس الخلق والوشوش اللى ما بتتغيرش من يوم ما دخلنا الكليه قاعدين فى نفس الاماكن بيعملوا نفس الحاجات , كلية شلل بت ستين تيييييييت , طلعت السلم اللى بيودى على مدرج واحد قلت اروح أشوف ربنا ابتلانا بأيه الترم ده , وبالمره أطلع اكمل نوم فى المدرج , وأنا فى اول الممر بتاع المدرج لمحت بنت فى اخر الممر شاورتلى شاورتلها من بعيد كده افتكرتها بنت صاحبة فوزيه كنت بحبها فى فترة مظلمة من تاريخ العالم ,بس لسه أصدقاء بييس يعنى , قربت منى وقربت انا عليها اتقابلنا فى نص الممر,اذلقيتها مش هيه البنت اللى فى دماغى لقيتها فوزيه,البت اتغيرت خالص لابسه بنطلون من اللى بيقلوظ المسائل مش ماركه البنطلون شكله من المنشيه برضه بس شيك الصراحه,ولابسه بدى حركات كده فوقه حاجه كده مش عارف البنات بيسموها ايه بالظبط ولافه على راسها بتاع تلات طرح ملفوفين على بعض بطريق أسطوريه كده بالتأكيد أخدت منها مش أقل من أسبوعين ,الكبيره بقه كانت حاجه فى وشها , ما تخافوش ما نفختش شفايفها ولا عملت عملية فى مناخيرها هيه حاجه بسيطه بس غيرت ملامح وشها تماما , بصيتلها كده وحواجبى مرفوعه فوزيه ازيك ايه فينك يا بنتى ,انت ازيك يا حماده كويس واحشنى مووت , انا الحمد لله يا فوزيه انتى اللى واحشانى اكتر والله بس ايه يا بت ايه الشياكه دى , بصوت محرج كده قال يعنى البت بتتكسف شياكة ايه بس يا حماده ده العادى يعنى , ركزت جامد على وشها كده وقلتلها بس ايه الحركات الجامده دى أحلويتى خالص انتى عملتى ايه , يا واد بلاش رزاله بقه عيب كده , أقولك أنا عملتى ايه طيب , عملت حواجبى أستريحت يا حماده , كنت عايز أقولها وحلقتى شنبك كمان يا فوزيه , قلتلها صح كده يا فوزيه بس ايه بقيتى مزه , يا واد بس بقه بلاش قلة أدب يلا نلحق المحاضره نشوف الراجل ده ها يقول ايه , ماشى يا فوزيه يلا , دخلنا المحاضره قعدت هيه جمب كام بنت من اصحابها قدام وأنا قصرت الشر وقعدت ورا فى البنش قبل الأخير عشان اعرف انام انا ايه اللى يقعدنى فى الجبهة , الحقيقه ما اعرفتش أنام مش عشان الدكتور كان بيقول كلام مهم لأه بس كنت بفكر فى فوزيه البنطلون والبدى دول خلونى أشوف حاجات فى فوزيه ما كنتش واخد بالى انها موجوده خالص مع انى اعرفها من سنتين , الشيطان لعب فى دماغى الصراحه مالها فوزيه كويسه برضه أهيه ما تعمل معاها حوار وحركات أهى أولى من الغريب برضه , أخدتنى الأفكار بس الصراحه ما قدرتش أستحمل صوت الدكتور ماشاء الله ولا أجدعها منوم مغناطيسى بالأيحاء نمت وصحيت على صوت الواد ديشه صاحبى أصحى يا ابنى قوم روح نام فى بيتكم , ايه يا ديشه ولما أنام فى بيتنا نعمل أيه فى المحاضرات طيب أسكت يا ابنى خلى الدكاتره ياكلوا عيش , طلعت من المحاضره ولا الهوا فكتنى من كلام الشيطان المره دى خلينا انا وفوزيه أصحاب أحسن هيه ها تروح فين يعنى ماهى قاعده فى بوزى بقالها سنتين لما تقفل خالص معايا وتطلب تزبيط نبقى نشوف ايه الكلام ساعتها , ومرت الأيامى وأحنا اصحاب عادى وفل الكلام , لغاية ما جينا فى يوم وبدأت تندع , لقيت فوزيه جايالى وعلى عينيها بصه عمرى ما تخيلت انها ممكن تيجى على فوزيه , فوزيه قالتلى عايزه أقولك حاجه حصلت , بصيتلها كده وقلتلها عارف , قالتلى هوه ايه اللى عارفه , قلتلها أنتى زبطتى صح ( أه والله على طول كده دا احنا خبره برضه ) , البت شهقت قالتلى عرفت ازاى أنا ماقلتش لحد , قلتها ومممكن أقولك مين كمان , قالتلى أمشى يالا , الواد شفيق يا فوزيه صح , يخرب بيتك ودى عرفتها ازاى كمان , بصى الواد ده قابلنى الصبح وكان فى عينيه نفس النظره اللى فى عينيكى دى بالظبط لا والأدهى من كده ان الواد شفيق البائس ابن الكئيبه ده لقيته بيضحك وبيقولى أنا فكها كده وفرفش ,أنسى يا بنتى واضحه زى الشمس , لا فالح أمال مادام ما انت شاطر كده مش باينلك أى كرامات ليه , بصى يا فوزيه أنا زى دكتور فى معهد التمثيل بيدرس التمثيل صحيح بس عمره ما مثل , أهو أنا ما اخدش منك غير فلسفه طب رأيك أعمل ايه معاه , هوه قالك ايه , قالى انى عاجباه وعايز يرتبط بيا , (قال يعنى خلاص يا ابن ال ماهى كانت مرميه بقالها سنين ولا لمالبست المنطلون أبوصابونه بقت حلوه ) , طب وقلتليه ايه يا فوزيه , قلت له ها أفكر , على بركة الله يا فوزيه عيشى يا بنتى , يعنى ايه أوافق يعنى كده , أه يا بنتى عادى يعنى خليكى معاه شوفى هوه عايز يوصل لفين مش ها تخسرى حاجه الواد أصلا حالته صعبه مافيش خوف منه , ماشى يا حماده لما نشوف , قال يعنى يا فوزيه مستنيه رأيى بجد دا انت تلاقيكى ما صدقتى , يا بارد , هههههههه مشكله انت يا فوزيه يتمنعن وهن الراغبات على رأيك يا فنان , بعديها بكتير لأ بعديها بأسبوع جاتلى فوزيه عادى يعنى وهيه مكشره كده , مالك يا بت , أنا فشكلت , فشكلتى مع مين . فشكلت مع شفيق , يا بت انتى ها تجنينى هوه انتوا كنتوا لحقتوا تنيلوا حاجه أصلا عشان تفشكلوا ايه اللى حصل , من يومين شفته برا الكليه ومعاه عربيه دايو وقالى دى بتاعتى وقالى انه عند شقته فى سموحه وها ييجى يخطبنى فى الأجازه وكلام كده وبعدين سألت عرفت ان دى مش عربتيه اصلا ولا عنده شقه ولا نيله وهوه اصلا ساكن فى الحضره مش فى رشدى زى ما كان بيقولى , هه وبعدين عملتى ايه , قلت له فكك منى وما تكلمنيش تانى , هههههههههههه , بتضحك على ايه دلوقتى يعنى بذمتك , أصل انتى تضحكى بجد يعنى بذمتك شفيق ده ها يكون عنده عربيه منين يعنى ده بييجى الكليه شعبطه فى الترام , أهوه بقه اللى حصل , بعد كده بقيت الترم الحوار ده أتكرر بتاع 3 مرات وكل مره أنصحها وما فيش فايده المشكله أن اذ فأجه ظهرت مزه كده فى وسط دفعتنا وأحنا كليتنا كلها ماشا ء الله فى حكاية البنات دى حالها يصعب على الكافر , الحقيقه أنا بقت قاعد أضرب أخماس فى أسداس ايه اللى حصل يا جدعان خلاص مره واحده العيال كلها عايز تظبط مع فوزيه ماهى كانت متلقحه سبحانك يا رب تحى العظام وهى رميم , الحكاية بقه كبيرت فى دماغى ماهو اذا كان كده انا بقه أولى بالليله دى ولا أنت مش معايا , المهم قررت أنى ازبط الكلام معاها مش عارف ازاى صراحه أنا اعرفها من زمن وهيه زى أخويا الكبير بالظبط ها ازبطها ازاى دى يا اخواتى بس طفاسه بقه هيه كده , المهم قربنا من بعض فى الفتره دى على مستويات جديده خالص وفى يوم من أيام تشرين البارده مش فاكر بارده ولا حاره صراحه هوه تشرين ده أصلا شهر كام بالميلادى , ماعلينا يومها مخلصين المحاضرات وقاعدين زى الفل فى قعده صفا كده بس صفا بجد مش زى قعدات البيض بتاعت صفاء ابو السعود , كنت خلاص بقه ناوى أدخل فيها شمال وأقولها نرتبط ونتيل والطقم ده كله , لقيت بتقولى حماده تعرف سيد , سيد مين يا فوزيه , سيد اللى معانا فى الدفعه هوه فيه غيره , أه أعرفه ده حبيبى , ايه رأيك فيه , شميت فى السؤال ريحه مش حلوه الصراحه بس قلتلها الحق الواد ده جدع اوى يعنى ومحترم هوه ايه الموضوع بالظبط , عادى يعنى ,يعنى ازاى يا فوزيه أعترفى , يعنى عادى يا ابنى , انت تعرفيه يا فوزيه , أه اتعرفت عليه من الشله بتاعه دى , ممممممم فل يا فوزيه وبعدين , ولا قبلين يا حماده عادى , لا مش عادى خالص ايه هوه كمان قالك نرتبط ولا ايه , لا ما حصلش ده محترم خالص بس حاسه كده يعنى , (لله ينور يا فوزيه خلصتى على شباب الكليه كلهم ), بس انت شكلك المره دى كده مختلفه ايه الكلام , يعنى اصل المره دى حاسه حاجه بجد كده وهوه محترم اوى كمان وحاسه انه بيخاف عليا وكده ,(بيخاف عليكى يا فوزيه اللى يرحم أيام ماكنوا بيخافوا منك ماشى يا فوزيه ) , الصراحه الواد محترم بجد وأنا أصلى كنت داخل على لعب تقريبا كده فقررت أنه من الأفضل أن أضع قلبى تحت جزمتى وأصمت , اما فوزيه وسيد فالموضوع أتطور المره دى بجد والحكايه شكلها ها تكمل يعنى , بس فجأة كده حسيت أنى كنت بحبها بجد تصدقوا مش عارف الظاهر عشان كانت معايا كل ده ما كنتش حاسس ولا هوه العند برضه ولا ايه , الله يحرقك يا فوزيه , والله يحرق اللى أخترع البناطيل اللى بتتلبس بصابونه والباديهات الرش واالله يخرب بيته اللى أخترع عمل الحواجب ده ما أحنا كنا حلوين ,يعنى لازم يعنى الحركات دى , الله يخرب بيت أيامك يا فوزيه .

أتنين وعشرين

أنا لما بفرح فرحى يصير دراعين يحضنوا كل البشر
ولما بحزن حزنى يحوط الأرض غيمه لا يبان شمس ولا قمر
ولما بحب قلبى يصول يجول يقول كلام يهز الحجر
ولما بتغرب حنينى يرفرف فى السما يوصل بلادى ينزل مطر

محادثة مع صديقتى اللى ما بتعرفش تطبخ

أنا المصرى:
صباح الفل
صديقتى اللى ما بتعرفش تطبخ :
صباح الياسمين
أنا المصرى:
منير فى اسكندريه النهارده
صديقتى اللى ما بتعرفش تطبخ :
خلاص سلم لى عليه بقى
أنا المصرى:
أسلم لك عليه ايه بس انا فى القاهرة
صديقتى اللى ما بتعرفش تطبخ :
وأنا فى قمقم
أنا المصرى:
مين اللى حبسك
صديقتى اللى ما بتعرفش تطبخ :
لأ مش الفكرة
بس ماينفعش اروح الحفلة يعنى
أنا المصرى:
ههههههههههه
صديقتى اللى ما بتعرفش تطبخ :
وأنت بقى مش رايح ؟
أنا المصرى:
انا فى القاهرة يا بنتى
صديقتى اللى ما بتعرفش تطبخ :
اه مانا عارفة
صديقتى اللى ما بتعرفش تطبخ :
فى القاهرة ماينفعش تروح الحفلة وترجع ؟
أنا المصرى:
مممممممممممممممممممم
أنا المصرى:
ده لو معايا الهليكوبتر ممكن
صديقتى اللى ما بتعرفش تطبخ :
وأنت وديتها فين ؟
صديقتى اللى ما بتعرفش تطبخ :
أنت لسه مهمل زى زمان وبتضيع حاجتك
أنا المصرى:
ماهى متكلبشه يا ستى عشان ركنتها دقيقه على سطوح الخارجيه
صديقتى اللى ما بتعرفش تطبخ :
وأنت ضاقت بك الأماكن مالاقيتش غير هناك يعنى
أنا المصرى:
السطوح بتاعهم واسع امال عايزانى اركن على سطوح التليفزيون
صديقتى اللى ما بتعرفش تطبخ :
وماله سطوح التليفزيون ؟
أنا المصرى:
ضيق يا ماما وكله أرايل ما يكفيش , انا الهليكوبتر بتاعتى سبعه راكب
صديقتى اللى ما بتعرفش تطبخ :
هو أنت يعنى لازم تتمشى بالهليكوبتر ؟
أنا المصرى:
امال امشى ازاى , البى ام مش بتقضى معايا , المحور واقف والدائرى واقف حتى الكورنيش واقف مافيش حاجه ماشيه
صديقتى اللى ما بتعرفش تطبخ :
زقهم يا عمنا
أنا المصرى:
الصحه خلاص بقه مافيش حيل للزق دلوقتى
صديقتى اللى ما بتعرفش تطبخ :
اشخط فيهم هايطلعوا يجروا
أنا المصرى:
لا زمان الشخط راح خلاص الناس ما بتحسش دلوقتى
أنا المصرى:
انا ممكن انزل بالتكتك الجديد بتاعى لعلمك بس لسه مارخصتهوش
أنا المصرى:
مش عايزين يرخصوه
صديقتى اللى ما بتعرفش تطبخ :
ليه مش عايزين يرخصوه
أنا المصرى:
بيقولوا لسه ما حددوش جنسه
صديقتى اللى ما بتعرفش تطبخ :
جنسه ازاى يعنى هوه فيه تكتك راجل وتكتك ست
أنا المصرى:
لا مش كده همه ماكانوش عارفين يحددوا هوه سياره ولا دراجه بخاريه
صديقتى اللى ما بتعرفش تطبخ :
وعملت ايه
أنا المصرى:
أنا أصريت على أنه مش دراجه بخاريه لأنه بتلات عجلات مش أتنين
صديقتى اللى ما بتعرفش تطبخ :
وهمه قالولك ايه
أنا المصرى:
همه أصروا على أنه مش سيارة لأنه بجادون مش دركسيون
صديقتى اللى ما بتعرفش تطبخ :
ووصلتوا لأيه فى الأخر
أنا المصرى:
عملوا لجنه من 30 عضو قعدت شهرين وفى الأخر قالواهايكتبوا فى الرخصه ( مركبه )
صديقتى اللى ما بتعرفش تطبخ :
طب ويعنى ايه مركبه دى
أنا المصرى:
مش عارف بس المهم أنها مش دراجه بخاريه
صديقتى اللى ما بتعرفش تطبخ :
هه وبعدين رخصهولك
أنا المصرى:
لأه عشان ما جبتش المثلث
صديقتى اللى ما بتعرفش تطبخ :
يا خبر يعنى كل العطله دى عشان المثلث
صديقتى اللى ما بتعرفش تطبخ :
وهم مش عاجبهم متوازى المستطيلات اللى جبته ولا إيه ؟
أنا المصرى:
لا أنا جبتلهم دايره لزوم اللف والدوران قالولى ما تنفعش يا سيد
صديقتى اللى ما بتعرفش تطبخ :
وأنت ليه مش قلت لهم أنا أحمد مش سيد ؟
أنا المصرى:
ما هوه ده اللى حصل بالظبط قلتلهم انا أحمد سيد مين , والدايره ماتنفعش ليه
أنا المصرى:
قالولى عشان الدايره ها تخلى السواق اللى جاى وراك يتنوم تنويم طغطاطسيى فيرشق في عربيتك
صديقتى اللى ما بتعرفش تطبخ :
قل لهم عربيتى وأنا حر فيها عايزها تتخبط
أنا المصرى:
قالولى وعربيات الناس يا سيد
صديقتى اللى ما بتعرفش تطبخ :
سيد تانى ماسألتهمش مين سيد ده
أنا المصرى:
قلتلهم انا مش سيد يا جدعان
أنا المصرى:
مين سيد ده
أنا المصرى:
طلع بقه انهم عدلوا القانون
صديقتى اللى ما بتعرفش تطبخ :
تانى همه مش لسه بينفذوا فى التعديل الأولانى
أنا المصرى:
ما أعرفش قالولى لازم تجيب المثلث وشنطة الاسعافات وسيد
صديقتى اللى ما بتعرفش تطبخ :
وسيد ده لازم تجيبه عشان يزق الناس اللى واقفة ولا ايه ؟
أنا المصرى:
سألتهم برضه طب سيد أجيبه معايا ليه
أنا المصرى:
قالولى عشان لما عربيتك تعطل سيد ينزل يمسك المثلث يا سيد
صديقتى اللى ما بتعرفش تطبخ :
فكرة برضه
أنا المصرى:
اصل قالك سيد يمسك المثلث ويتخبط هوه انما العربيه لاه
صديقتى اللى ما بتعرفش تطبخ :
ليه بقه أشمعنى
أنا المصرى:
بيقولك أصل الداخليه ها تأمن على سيد وهايبقى عهده مع كل سواق لأنهم مش ضامنين أن كل الناس ها تأمن على عربياتها
صديقتى اللى ما بتعرفش تطبخ :
كلام معقول برضه الداخليه عايزه مصلة الشعب
أنا المصرى:
يا بنتى بس التوك توك صغير قلتلهم مش ها يكفينى أنا والمدام والعيال وسيد
صديقتى اللى ما بتعرفش تطبخ :
أيوه صحيح عدت عليا دى
أنا المصرى:
قالولى ما لناش دعوه ده عشان مصلحتك يا سيد
صديقتى اللى ما بتعرفش تطبخ :
طب مش يمكن الداخليه قصدها ان سيد ده يراقب الناس
أنا المصرى:
يا بنتى حرام عليكى ايه الظن المنيل ده , عموما أنا سألتهم عن الموضوع ده برضه , قالولى ان سيد ده هندى مستورد لا يسمع لا يرى لا يتكلم يا سيد
صديقتى اللى ما بتعرفش تطبخ :
طب ماكانوا جابوا مصرى أحسن على الأقل المصرى متدرب , المهم وسيد ده نشتريه منين
أنا المصرى:
قالولى المرور ها يوزعه مع المثلث من أول شهر تمانيه الجاى يا سيد , قلت كويس أركن التوك توك دلوقتى بقه لحد شهر 8
صديقتى اللى ما بتعرفش تطبخ :
بس فيه حاجه مش فاهماها برضه , همه ليه بيقولولك يا سيد
أنا المصرى:
مش عارف , يمكن شكلى هندى !!!