شوف اللى حصل سهل خاااااااااالص وبسيييييييط خالص وبيحصل فى اليوم الواحد بدل المره ميه فى مصر بس , ايه بقه هوه اللى حصل , جروب على الفيس بوك اسمه in focus عادى خالص ناس حلوه كده وزى الفل عاملين جروب للتصوير بيتبادلوا الخبرات فى طرق التصوير وتقنياته واحلى حاجه بيعملوا ورش للتصوير فى أماكن كتيره أوى فى بلدنا بيطلعوا منها بصور تجنن وليهم مساهمات بالصور دى مع وزارة الثقافه زى معرض بيت السحيمى واهداء صور لمركز الحفاظ على التراث , ومع انهم تعرضوا قبل كده لكذا مضايقه من رجال الأمن وخلافه فى بعض الأماكن الأثريه بس عادى يعنى ومين ما بيشوفش الناس ما بطلتش تصوير , بس الجديد بقه ان الناس المنظمه للجروب غلطوا اكبر غلطه فى عمرهم , قرروا انهم يعملوا ورشه تصوير فى السيرك القومى واخدلى بالك من القومى دى مش سيرك الست أم باتعه يعنى لا السيرك القومى على سن ورمح وسيف كمان لو عايز , الناس منظمين جدا وعملوا زى أى جروب محترم أعلنوا عن الورشه قبليها بمده ووضحوا ازاى الدنيا ها تمشى هناك وايه الضوابط اللى المفروض نتبعها فى السيرك عشان ما يبقاش فيه مشاكل بلاش نستعمل الفلاش عشان ما نضايقش الحيوانات وكده مثلا بلاش الترايبود مع انه عادى بس ادارة السيرك مانعاه فعادى يعنى نلتزم بتعليمات المكان عشان الحياه تبقى لذيذه بلاش التصوير فيديو والتعليمات ده عرفها كريم نبيل مؤسس الجروب لأنه قام بالتصوير فى السيرك القومى تلات عروض قبل كده من غير مشاكل , يعنى الناس منظمه العمليه وأخر حلاوه , اللى حصل بعد كده بقه ان يوم 1 أكتوبر اللى هوه يوم الورشه و حسب شهادة كريم نبيل مؤسس الجروب حصل الأتى :
في زيارة الجروب للسيرك فقد فوجىء الجميع برجال الأمن و بائعي اللب و السوداني و كل من هب و دب قد تدخلوا لمنع المصوريين من التصوير و اجبارهم على انزال الكاميرات و عندها تدخلنا أنا و زميلي محمد الناصري و طلبنا مقابلة مدير السيرك و دار الحوار التالي
:نحن : عايزين نقابل مدير السيرك
الأمن : المدير مش موجود .. و التصوير ممنوع ( مع العلم ان المدير كان في مكتبه)
كريم : التصوير الفوتوغرافي مش ممنوع و أنا صورت العرض ده 3 مرات قبل كده و معايا الصور
الأمن: التصوير الفوتوغرافي مش ممنوع بس اتمنع النهارده بتعليمات خاصة
محمد: فين التعليمات دي؟ عايزيين نشوفها.. عايزيين أي جواب رسمي ان التصوير ممنوع
الأمن : مفيش جواب و احنا الأمن و بنقولك ممنوع ثم تدخل أحد لاعبين السيرك
اللاعب: في ايه يا عم انت و هوا .. التصوير ممنوع و خلاص و لو مسكتوش هنطلب البوليس
محمد: طيب اطلب البوليس .. احنا عايزيين البوليس
اللاعب: أنا هاطلبلكم البوليس .. أنا هاطلبلكم البوليس ..
كريم : بقلك ايه بلاش كلام كتير هتطلب البوليس و لا نطلبه احنا ....
اللاعب : طيب ايه رأيك بقه مفيش بوليس هوا انتم مش هتصوروا و خلاص .. مفيش تصوير .. خش يا ابني انت و هوا لموا الكميرات اللي جوا و هاتوها ..
كريم : لو لمستم حد من الناس اللي جوا أنا مش هأسكت .. اياك حد يمد ايده على حد
و كأن هذه الكلمة كانت بمثابة الفتيلةتجمعوا حولي الموظفين و الأمن و قاموا بدفعي باتجاه الحائط و فوجئت بسيل من الصفعات و الضرب المبرح ثم قاموا بالقائي على الأرض و توالت الكراسي و الصفع المستمر على رأسي و الضرب بالأرجل و الكراسي تطير في الهواء كالمطر الناس: يا ابن ....هنطلعن تيييت ...... أمك ... أبوك كم من الشتائم و القذف كانت تغلف حالة الضرب المستمر و النشيط و كأنني حرامي غسيل بالضبط و فوجئت بمحمد داخل دوامة من الضرب المبرح الهمجي الغير آدمي بكل بمعنى الكلمة .. حيث قاموا بجذبه من ظهره و انهالوا عليه بالضرب و العض حتى سالت دماءه و أخذ يطلب منهم الوقوف عن الضرب محمد : سيبوني ... انتم عايزيين ايه .. مش شايفيين دمي سايح .. عايزيين ايه تانيو قام أحدهم بعض محمد من اصبعه و قطع جزء من جلده ... تماما كأننا داخل قفص الأسودالحمد لله نجحنا بأعجوبة في الخروج من المكان و قمنا بالاتصال بالشرطة و أتت سيارة أتاري و بوكس به ملازم أول دخلنا الى السيرك و جلسنا مع الملازم أول و طبعا ظهر مدير السيرك (اللي قالوا انه مش موجود) و أنكر الجميع معرفتهم بأسماء الذين تعدوا علينا بالضرب .. حتى تمكنا أنا و محمد من التعرف عليهم و تم سحبهم على القسم .في القسم قمت بالاتصال بمحامي و أحد وكلاء النيابة و استفهمت منهم المتوقع حدوثه في مثل هذه الحالة1- سوف ينتهي الموضوع بمحضر يقتصر على الشخص الذي تعدى عليك بالضرب و سوف يحرر هو الآخر محضر بتعديك عليه بالضرب و بكسر قوانين السيرك.طبعا المشكلة ليست في موقف هذا الانسان الهمجي لكن المشكلة كانت مع ادارة المكان باكمله سواء موظفين وزارة الثقافة أو (رجال) الامن و لن نحصر المشكلة في عراك دار بين طرفين مصيره البيات في الحجز و العرض على النيابة و قضية قد يحكم في بعد شهور و قد لا يحكم .اتفقنا على اجراء محضر صلح و طلبت رقم المحضر و توجهت مع كل من : محمد الناصري , أحمد فوزي , ضياء سامح , علاء عواد ... إلى مكتب وكيل وزارة الثقافة و مدير البيت الفني للمسرح أ. شريف عبد اللطيف.لا أنكر انه استقبلنا بشكل حسن و استمع الى القصة بالكامل و توعد بمعاقبة كل من شارك في هذا الحدث الغشيم و قام باعطائي 25 دعوة مجانية شاملة تصريح بالتصوير يوم الخميس القادم و وجه العديد من التحذيرات الى مدير السيرك أعادل الحلو و طلب أسماء كل من شارك في هذا الاعتادء و جزاه الله خيرا على حسن معاملته .لكن السؤال هل هذا هو الرد المناسب لكم المهانة و الضرب التي تلقيناها !!هل هذا هوا الرد على فتح رأس محمد الناصري وتلقيه عدة غرز بالمستشفى !!هل هذا هو الرد على كم الكدمات التي تملأ جسمي
ده كان جزء منقول من الموضوع اللى كتبه كريم على جروب in focus تحت عنوان ملخص الأحداث الموسفه لورشة السيرك القومى , بالتأكيد ال25 دعوه دول مش همه الرد على اللى حصل لك انت والناس اللى معاك , الموضوع مش بسيط خالص فعلا بس الكويس انه جه بصورته المقرفه دى مع ناس قدرت تشوف وتحكى وده جزء مهم أوى من حقك وحقك الناس اللى معاك يا كريم انك وصلتنا صورة حقيقيه حصلت فعلا , لأن المشكله مش مشكلة جرو in focus المشكله مشكلة بلد بحالها مشكلة المصرى اللى بقى يستعر من جنسينه مش وهوه بره بلده لأه وهوه فى قلب بلده , كمية المشاكل والقرف والتمييز فى المعامله اللى بيقابلها المصرى فى كتير من الأماكن التاريخه والسياحيه والأثريه حاجه تخلى المصرى يسب ويلعن ميت تيييييييييييييت وهوه شايف انه بمصريته مش جدير انه يتعامل معاملة نضيفه على عكس الأجانب دى مش دعوه لأن احنا نعامل الأجانب معامله وحشه أظن الناس فاهمانى طبعا والناس هنا بطبعها مش بتعرف تعامل الغريب غير بطريقه كويسه المشكله مش فى الأجانب الناس أخدت تأشيره ودخلت البلد عشان تستمتع ومن حقها طبعا ومن حق مصر علينا احنا كمان اننا نوريهم بلدنا فى احسن صوره , المشكله فى العناصر الغبيه المتخلفه فى البشر اللى مش عايزين ينضفوا ومش عايزين يبقوا أدميين من أمن لناس شغاله فى مجال الخدمات عموما منظومه كامله , ازاى الواحد يبقى مصرى ومش قادر يستمتع ببلده واذا كنت مش قادر أبقى محترم فى بلدى وسط المصريين اللى زى الطبيعى جدا ان مافيش أى بنى أدم فى اى حته فى العالم ها يحترمنى , لما تبقى مثلا شاب زى الفل كده وماشى فى منطقة الهرم زيك زى ألاف السياح مع اصحابك وتلاقى اللى بيوقفك ويقولك بطاقتك , أو فى مكان تانى تلاقى مخبر جاى يقولك انت واصحابك تعالوا كلموا الباشا , أو تبقى فى متحف مثلا وبتصور عادى بالكاميرا بتاعتك وتلاقى الظابط سايب كل الأجانب اللى فى المكان اللى مع ان كل واحد منهم تلات كاميرات وييجى يسألك انت عن تصريح دخول الكاميرا , يا أخى أحيه على البنى ادمين أحيه على ده احساس لما تحس ان فيه تمييز بيمارس عليك وانت فى بلدك , حريق قصر ثقافة بنى سويف ده نوع من التمييز على أساس ان الناس دى مالهاش ديه فا مش مهم نعملهم اجراءات حمايه , ألف حريق وألف مصيبه حصلت والف موقف تقابله كل يوم وها تقالبه لسه , الناس اللى رايحه مكان يتبع وزارة الثقافه ورايحيين يمارسوا نشاط محترم وبطريقه محترمه ومنظمه لا تتداخل مع نشاط المكان يطلع لهم شوية موظفين المفروض انهم برضه موظفين فى وزارة الثقافه وأمن وناس تانيه مش عارف نصنفهم تبع ايه ويمنعوهم ويهينوهم ويضربوهم يلا ماهى بلطجه بقه وهوه عارف انه حتى لو اتعمله محضر فى القسم ها يعمل هوه كمان واحد زيه ويبقى الحل ان الضارب والمضروب يدخلوا التخشيبه وعرض على النيابه وبما ان الراجل التانى ده محترم ومالوش فى وجع الدماغ فاها يعمل صلح ويتفرق دمه بين القبائل , مش فاهم ايه الجهل اللى وصلناله ده رحمتك يا رب بعبادك ده زى مايكون مثلا الناس اللى جايه تصور دى جايه تعمل سبوبه مثلا على قفا السيرك وها يقفوا يصوروا الناس مع الأسد والتعبان ويبيعوا الصوره بخمسبن جنيه قدام السيرك حاجه غريبه ولا يمكن خايفين لا يصوروا مناظر فى السيرك مش عايزيين حد يشوفها بالعكس يا أغبيا دى ناس بتصور كويس وكانوا ها يطلعوا السيرك شكله حلو كان ممكن يعملوا من الفسيخ شربات , فلسفة البشر المتخلفه هيه هيه من بتوع السيرك دول للعسكرى اللى واقف فى متحف ممنوع فيه التصوير بس لو اديتله خمسه جنيه فى جيبه يخليك تصور فيلم اباحى لو عايز , نفس العسكرى اللى واقف فى مكان أثرى تانى جواه حته مقفوله ممنوع الزوار يدخلوها بس لو اديتله نفس الخمسه جنيه ممكن يفتحلك المكان ده وتبات فيه لو تحب , نفس الخمسه جنيه اللى بتديها لعسكرى مرور واقف بيستهبل وعامل نفسه بيكتبلك مخالفه بس دلوقتى المخالفات غليت والخمسه جنيه ما بقتش تنفع , كلها سلسله ملضومه فى بعضها , ناس بايعه دماغها لغيرها وناس مكبراها وناس بتستبهل وخلاص المحصله انهم كلهم جماجمهم مجوفه , المسؤولية على كتير اوى وزراة الثقافه ووزارة الداخليه ووزارة السياحه وداخل معاهم هيئات كتير أوى وقبل كل دول المسئووليه على المصريين على الناس اللى خلاص حتى مجهود أنها تفكر ما بقتش قادره عليه , ربنا لا تأخذنا بما فعل السفهاء منا .
ليست هناك تعليقات:
إرسال تعليق
اكتب رأيك أساحبى