حكمة بنص جنية - 6

وأنا معدى على محطة مصر النهارده , قلت اعدى على الحكيم اللى بيبيع الحكمه بنص جنيه عشان فيه سؤال محشور فى سنانى , اول ما شافنى قالى فينك ما بتجيش تاخد حكم من زمان , بص عشان خاطرك ها اديلك حكمتين بنص جنيه النهارده , قلتله ماشى السؤال الاول ايه هية الاصابع الخفية , فعملى بصوابع ايديه حركة وحشه وقالى همه دول , قلت طب ايه هو الطرف التالت , بص لى وقالى ده بقى مش ها اقدر اوريهولك هنا انت تجيلى البيت

حكمه بنص جنيه - 5

وانا رايح لجنة الانتخابات الصبح عديت على الحكيم اللى بيقف يبيع الحكمه بنص جنيه فى محطة مصر , اديتله نص جنيه وسألته تفتكر مينن الحزب اللى ها يكتسح ويسيطر على مجلس الشعب , الحكيم بعد ما أخد النص جنيه بص لى وقالى حزب الريح ما تودى الريح ما تودى

احنا اللى حمينا الثوره

القوى السياسية

حكمه بنص جنيه - 4

وأنا رايح الشغل الصبح عديت على الحكيم اللى بيقف يبيع الحكمه بنص جنيه فى محطة مصر , اديتله نص جنيه وقلت له ما تدعيلنا دعوه حلوه كده عالصبح يا حكيم , الحكيم بعد ما أخد النص جنيه بص لى وقالى روح يا ابنى الهى ما يحكم فيك عسكر

حكمه بنص جنيه - 3

عديت على الحكيم اللى بيقف يبيع الحكمه بنص جنيه فى محطة مصر , اديتله نص جنيه وسألته يا ترى تفتكر الثورة ها تأثر على شكل عيد الأضحى السنه دى , الحكيم بعد ما أخد النص جنيه بص لى وقالى أه طبعا اللحمه الجملى سعرها نزل

حكمتين بنص جنيه

عديت على الحكيم اللى بيقف يبيع الحكمه بنص جنيه فى محطة مصر , اديتله نص جنيه وسألته ايه رأيك فى الثورة بعد 9 شهور كبرت ولا ماتت , الحكيم بعد ما أخد النص جنيه بص لى ولأول مره فى حياته قالى اقعد , قعدت على كرسى قش قدام الفرشه وطبعا كل الناس اللى واقفه فى الطابور مستنيين ياخدوا حكمة الصبح بيبصولى بحقد , الحكيم قالى شوف يا ابنى ها احكيلك حكايه وانت تفهم , شاور على كتكوت عمره يومين جمب الفرشه وقالى شايف الكتكوت ده , قلت له أه , قالى الكتكوت ده ممكن يعيش كام يوم فى الشارع كده , قلتله يومين تلاته بالكتير اوى , قالى شوف انا من شهر ونص كان عندى كتكوت زى ده راهنت كل البياعين اللى جمبى فى الشارع انى هااربط الكتكوت ده جمب الفرشه بتاعتى لحد ما يكبر و يبقى ديك, اول يوم جيت الصبح بدرى اطمن عليه قبل ما حد من البياعين يفرد فرشته لقيت الكتكوت فيص من طل وبرد الفجر , شيلته ورحت جايب كتكوت تانى بداله أكبر منه بيوم وهكذا بقى طول شهر ونص كل يوم اجى بدرى اوى قبل البياعين اجيب كتكوت جديد اكبر بيوم وأبدله لحد ما الكتكوت كبر وبقى ديك وطبعا ما حدش من البياعين كان مصدق ولا فاهم بس كسبت الرهان , قولى بقى فهمت كده الكتكوت كبر ولا مات , قلتله أنا اللى فهمته ان الكتاكيت بتموت عشان بتقف حافية فى الطل , الحكيم بص لى بقرف ورجع لى النص جنيه وقالى قوم روح يا ابنى , اديتله النص جنيه تانى وقلتله معلش معلش خلى النص جنيه واسأل سؤال كمان , قالى بنفاذ صبر ماشى اخلص واسأل , قلت له هو انتم كنتم متراهنين على ايه , بصى لى وضحك وقال ديك مشوى طبعا يا عبيط ...........

حكمه بنص جنيه

عديت على الحكيم اللى بيقف يبيع الحكمه بنص جنيه فى محطة مصر , اديتله نص جنيه وسألته هو ازاى الواحد يفضل سعيد , الحكيم بعد ما أخد النص جنيه , ها تبقى سعيد لو ما حاولتش تسأل السؤال ده تانى

عمو المجلس العسكرى ...

حسنى مبارك قعد 30 سنه يلعب لعبة العصا والجزره أو سيف المعز ودهبه , مع الاختلاف طبعا ان العصا هنا ما كانتش عشان الضرب , كانت عشان تتحط فى أماكن معينه , والدهب ما كانش دهب , كان رغيف العيش بالمسامير ودى الحمد لله كانت للأكل المره دى , 30 سنه بيلعب اللعبه دى بكل شطاره , 30 سنه والمصرين عايشين على الحافه , طبعا هو تخيل انه بعد كل الوقت ده بقى عنده الخبره الكافيه عشان يدور مصر ل 30 سنه كمان , بس ما خدش باله ان الحافه اللى المصريين كانوا واقفين عليها انهارت والردم بتاعها اتباع كمان لمستثمر بالأمر المباشر , رغيف العيش حتى ما بقاش موجود , والشباب لا بيشتغل ولا بيتجوز ولا بيخلف بالتبعيه يعنى , وحتى لو اتجوز فنص الشباب قطع الخلف اصلا , من الاخر الوقت كتير وفاضى والطاقه للصبح , فطبيعى يحصل ثوره ده عادى يعنى , ده الغريب انها اتأخرت كل ده , بس طبعا مبارك كان عبقرى قدر يحافظ على موازنة عدم الاتزان دى للمدة دى كلها .
طب عمو المجلس العسكرى اتدبس طبعا فى اللى حصل , فقالك الراجل كبر وخرف معلش نقده فى شرم يبلبط يومين والمصريين غلابه يومين كده وها ينسووا , ويعدوا اليومين والمصريين كل جمعه يا أخويا يقولك مليونيه , مره جمعة القصاص , ومره جمعة الحساب , مره جمعة التحدى , ومره جمعة العداله ومره جمعة الشوال , ايه يا أخويا الشعب اللى مش عايز يتهد ده , طب نقرص ودنهم كده شوية ما نفعش , طب نلهيهم فى استفتاء على الدستور ونعمل بعدها اعلان دستورى على مزاجنا برضه , مش نافع , اللعبه اللى لعبها مبارك الوقت ده كله , المجلس العسكرى بيحاول يعملها بأى طريقه ممكنه بس مش عارف نفسه يوصل لموازنة عدم الاتزان , فالناس ترجع تتلهى فى ازاى تعيش يوم بيوم أصلا وفى نفس الوقت كل كام يوم نديهم بيان فى تصريح فى زيارة فى مؤتمر وعلى أخر السنه الشعب يكون نسى , ده طبعا غير ورقة عصام شرف رئيس الوزراء المحبب للثوره , واللى للاسف المجلس العسكرى ممكن يخسره كورقة تصالح مع الشعب لو تكرر استخدامه فى القاء بيانات تهدئه زى بتاع 9 يوليو , وبكده ممكن يخسروا ورقه مهمه جدا .
برضه يا جماعه لازم نقول الحق مين جاب طنطاوى ومين جاب عنان ومين وافق على ترقية كل اللوائات فى المجلس العسكرى مع احترامى الشديد لكثير منهم , فى الاخر اللى عينهم كلهم هو حسنى مبارك الرجل العسكرى اللى كل المجلس العسكرى مدين له بالولاء كعسكريين ,
بس طبعا الموضوع وسع أوى أوى يعنى , لما كل الظباط المتهمين فى قضايا قتل المتظاهرين يطلعوا فله شمعه منوره والوزرا ياخدوا براءات بالجمله ومبارك تعبان وبيموت بقاله شهور وقضية خالد سعيد بقالها أكتر من سنه فى المحكمه , والاتنين اللى اتحكم عليهم مش موجودين حكم غيابى بالسجن على رشيد محمد رشيد اللى هربان اصلا , وحكم غيابى على أمين الشرطه اللى اسمه السنى اللى هربان برضه شرحه , طب صباح الفل يا عمو المجلس يعنى فيه أيه , طب نعمل ايه , نطلع على سجن طره ونهرب كل الوزرا من هناك ونهرب كل الظباط المتهمين فى قضايا قتل المتظاهرين ونجيب باباب مبارك من شرم وكده يبقوا هربانين فالمحكمه تحكم عليهم حكم غيابى فنقوم احنا بقى مرجعينهم عشان ينفذوا الحكم , ايه رأيكم فى الحل ده , وأهو كده يبقى شلنا الاحراج والكسوف من علي المجلس العسكرى برضه اللى لسه عامل خاطر بابا مبارك وحبايبه .
عمو المجلس العسكرى اسمحلى أقولك الزمن أتغير والثوره دى جات بالدم , والدم ما دام دخل فى الموضوع خلصت مش ها يخلص ولا بالدم , مش ها يخلص غير بالقصاص , مش ها يخلص غير بان الناس تشوف تغيير يستاهل انهم يقبلوا قصاده دم ولادهم اللى استشهدوا والمصابين اللى عينيهم راحت واللى اتسببلهم عاهات مستديمه والالاف اللى فقدوا عملهم ومصدر رزقهم عشان عايزين أحسن للبلد دى , مش وقت أى حاجه ولا اى لعبه سياسية اتلعبت قبل كده , لو ها تستميلوا الرموز عشان تأثر على الناس , خلاص عصر الرموز خلص وأى رمز ها يسقط بكل بساطه لو خالف ارادة الناس مهما كان , ها تستميلوا تيار أو حزب , خلاص اللعبه بقت على عينك يا تاجر والناس ما بقتش بتتوجه من تيار واحد بالسهولة دى , أو بتستنى تيار معين يتحرك عشان تتحرك , وان كان طبعا الاستفتاء على تعديلات الدستور كارثه لن تنسى , عمو المجلس العسكرى لو سمحت ما تحاولش تراهن على الوقت عشان مبارك نفسه راهن عليه أيام الثورة وما نفعش وانتم بقالكم 5 شهور بتراهنوا عليه ومكملين وبرضه مش ها ينفع صدقونى , الخساير أكبر من ان اى وقت يخلصها .
عمو المجلس العسكرى المسؤليه كبيره وربنا يقويك بس خلاص مافيش وقت نرجع فيه تانى لورا خلاص لازم نطلع قدام عشان كده قدامك خيارين ها تكمل اللى بتعمله ده ها تخسر كل حاجه من كل الجهات وكل الاطراف ومصر كلها ها تخسر كتيير جداا , الخيار التانى انكم تعملوا الصح واللى المفروض يتعمل واللى حضراتكم عارفينه واللى مافيش اتنين يختلفوا عليه .
عمو المجلس العسكرى أنا كبرت أوى خد بالك , زمان كان فيه بابا مبارك ودلوقتى عمو المجلس العسكرى , عمو المجلس العسكرى أول الثوره ما حسيتش ان فيه فرق بين الجيش والمجلس العسكرى كان همه الاتنين يعنى الجيش , دلوقتى الناس فصلت الاتنين عن بعض فى نظرتها ياريت تاخدوا بالكم مصر باقيه والشعب باقى والجيش باقى ياريت تفضل صورتكم فى كتب التاريخ هى صورة رجال الجيش اللى ساند الثوره مش صورة المجلس العسكرى اللى كرهته الثوره , نفسى أفضل أحترمكم , بس معلش دى أخر مره ها أقولك فيها عمو .

طلب زواج

واحد وخمسين

بين كل أهه وأهه فيه أهتين
والأهه طالعه ساكته والناس جمبى قايمين
متين بيقولوا لأه ومتين بيقولوا أمين
وألف هناك فى الركن البعيد ساكتين

تهييسات الجواز وتوابعه

طبعا بصفتك راجل ملو هدومك , وبدأ يظهر عندك ما يسمى مبادئ الكرش , وسنك فوق الخمسه وعشرين , مرتبك يادوب بيكفيك , بس بمقاييس المجتمع المصرى الخرافى بيقولولك انه ممكن يفتح بيت , ويفتح بيت دى مش اكتر من انه يفتحه دايما فى وش طالبى الاقساط من العفش للشقه للأجهزة الكهربائية لطقم الصينى اللى مش بتاكل فيه لحد النيش اللى بتجيبه عشان تحط فيه طقم الصينى اللى مش بتاكل فيه , طبعا حضرتك بتفكر فى الموضوع من ناحية المرتب والورقه والقلم وكل الناس بتقولك يا عم ما تحسبهاش هى بتيجى برزقها , ونعم بالله يا جدعان بس اهو واحد زائد واحد يساوى 11 , وانت طبعا مشاعرك مصديه يا عبنى خلاص والبارومه اكلتها ونفسك فى اى كائن مؤنث ييجى يكشط الصدا , ده طبعا غير الهرمونات اللى مبهدلاك , الله يسامحها , ويتداخل مع هذا الأنفجار النسوانى , واللبس اللى النسوان بتلبسه والله يدعقه اللى اخترع اللبس ده واللى اخترع الكارينا بالذات , تتداخل كل هذه العوامل فى مسلسل تأمرى عليك , وهكذا تصبح كما اصطلح المجتمع مشروع عريس مش بطال , ويبدأ بقى الشغل , طبعا لما تلاقى نظرة زميلة ليك فى الشغل اتغيرت وبدأت كورسين حنان معاك مع كورسين اهتمام مبالغ فيه مع واحده ازيك يا استاذ محمود كل يوم الصبح بتبعها غمزه وضحكه صاخبه لكن قصيره , هههههههههههههه قديم أوى الفيلم ده معلش خلينا فى سيناريوهات تانيه , مره تلاقى زميلتك فى الشغل بتأخرك شويه بعد مواعيد الشغل بحجة انها مش عارفه تعمل ريستارت للكمبيوتر , ما تفهموهاش غلط البنت مش قصدها حاجه غلط من اللى دماغطو راحتلها هى بس بتأخرك عشان تشوف اختها الحلوه اللذيذه اللى على وش جواز برضه واللى المفروض جايالها دلوقتى بس اتاخرت عشان حضرتك تشوفها ويمكن يحصل كيمياء تؤدى لفيزيا والعمليه تتزبط ويحصل أحياء , أو تلاقى زميلك اللى انت ما تعرفش أسمه اصلا بيعزمك على عيد ميلاد أخته اللى انتى بالتالى برضه ما تسمعش عنها أصلا , أو تلاقى أمك أو خالتك مرتبينلك ما يسمى بالصدفه المترتبه فتلاقى نفسك مزنوق فى قعده من بتاعت راسين فى الحلال ومفروض منك انك تعمل ايه ربنا وحده اللى يعلم , طبعا الموضوع ده بياخد منك وقت كبير وتجارب لحد ما تبقى متمرس فى الحاجات دى , يعنى ما تخافش لو أول 10 مواعيد من النوع ده ما نجحوش , ان شاء الله التلاتين الجايين ها ينفعوا , ده بالتأكيد ها يوصلنا ده ان وصلنا يعنى لأهم مرحلة مرحلة الزيارات المنزليه ودى طبعا مكلفه زى الزياره المنزليه للدكتور بالزبط , ليه بقى لأن الموضوع بيتم كالتالى , والدك أو والدتك أو أختك بيشوفوا بنت كويسه تنفع مشروع زوجه ده كمان ينطبق على أو خالتك او عمتك أو اى حد كان معدى فى الشارع بما انك مفضوح يعنى والناس كلها عارفه انك عايز تتجوز على نفسك , طبعا كما تقول البروتوكولات فى الحاله دى والدتك بتتصل بأم البنت وتاخد ميعاد . طبعا حضرتك بتتشيك وتشترى علبة شوكالاته أو دستة الجاتوه المتعارف عليها دوليا ودى تكلفه , وبتاخد تاكس انت والحاجه ودى برضه تكلفه , طبعا ممكن تكون معفن وما تشتريش حاجه وتخش بايدك فاضيه عليهم وتاخد الحاجه امك فى ميكروباص , ومش مهم الميعاد ومش مهم الحاجه , ما علينا , المهم ان السيناريو ده مكلف بقى وخصوصا بقى لو البنت عجبتك مبدأيا وانت لمست معاها فقررت تعمل زياره تانيه فها تتكلف تانى طبعا لازم تبان كريم يا ابنى , طبعا مش عايز اخدعكم واقولكم ان السيناريو ده هو اللى ها يجيب من الاخر وها يجوزك , عندك ابن عمى مثلا بيشتغل فى السعوديه عقبال املتك وطبعا بيرجع اجازه حوالى شهر فى الصيف , أمه طبعا بتقضى ماقبل اجازته بشهور عشان ترتب زيارته التاريخيه لمصر وترتبله 30 ميعاد فى تلاتين بيت مع تلاتين مشروع عروسه فى التلاتين يوم اللى بينزلهم أجازه و أقولكم ان ابن عمى بقاله بينزل أجازات من 5 سنين , وللأسف لسه سينجل حتى هذه اللحظه

يتبع......

ما بين محاربة الطواحين وأن تسقى عواميد الكهربا

عندى اعتقاد خاص ان كل مجذوب له حكمته الخاصه اللى ما بنقدرش نفهمها عشان كده بيبقى فى نظرنا مجذوب ومتهيألى ان كل مجذوب كمان عنده حكايه مليانه بالدروس المستفاده , بس طول عمرى بشوف ان اسمه ايه ده دون كيشوت أو دون كيخوته أو اى كان اسم اللى خلفوه ايه المهم ان عمو اللى بيحارب طواحين الهوا ده أكاد أجزم انه اكثر المجاذيب حماقة , حلوه أجزم دى , يعنى اول حاجه عدوانى أوى وخطر على المجتمع وعلى الطواحين بالتأكيد وكمان ما عندوش حكمه من محاربة طواحين الهوا غير اثبات عدم جدواه , طب شفتوا بذمتكم مجذوب أجذب من كده , احكيلكم أنا بقى حكاية مجذوب من أرض مصر الطيبه واللى ياما طلعت مجاذيب العالم كله ما انجبش ربعهم , مجاذيب أصلى مش طواحين و عبط مالوش داعى , وانا طفل صغير كده بتاع 8 سنين فى مدينتى الصغيره اللى كبرت فيها , زى اى طفل مصرى أصلى على رأى عمنا عمرو طاهر كنت بلعب فى الشارع وفى الطين واتعارك مع العيال وكل يوم أروح البيت مضروب بطوبه فى دماغى كانت خلافات الاطفال على مناطق السيطره فى الشارع لا تنتهى ولكن كنا كلنا بنتفق على حاجه واحده ألا وهى عم ابراهيم , كل يوم ساعة العصريه كان يطل علينا عم ابراهيم بجلابيته البنى الغامق اللى فيها رقعه عند الجيب أكبر من الجيب نفسه وشعره المحلوق زيرو دايما ومع ذلك ما اخبيش عليكم كان عم ابراهيم من المجاذيب الشيك جدا واللى عندهم كاريزما طاغيه , اول ما نشوفه كل عيال الشارغ يتلموا حواليه ونقعد نتابع هو بيعمل ايه , كان معاه دايما صفيحته المصديه اللى كانت فى يوم من الايام صفيحة سمنة النخلتين على الأرجح , كان ياخد صفيحته ويرفع جلابيته وينزل يملا الصفيحه ميه من النيل وبعدين يطلع ويكب الميه دى تحت عواميد الكهربا , ويفضل يعمل كده كل يوم لحد المغرب على كل عواميد الكهربا اللى على الكورنيش وكان لما يتعب أخر اليوم يقرر انه يسقى أخر عمودين بطريقته الخاصه بالرى الذاتى , شايفين قد ايه الراجل ده كان حكيم , عبقرى يا جدعان كان عنده رؤيه مستقبليه لاستخدام الطاقه النظيفه أو يمكن كان بيفكر ان العواميد ها تطول لما يسقيها أو ها تنور أكتر أو يمكن كل عمود نور يطلع فرعين نور زياده أو يطرح كام لمبه 200وات , شايفين الدماغ مش تقولى بيحارب طواحين الهوا طواحين ايه يا ابو طواحين , بعد المغربيه يكون عم ابراهيم خلص مهمته المقدسه تجاه البشريه التى لا تفهمه كان يهيم عم ابراهيم فى الشوارع يوزع حكمته , ممكن تسأله فى اى حاجه مش دايما ها يرد عليك بس فى الغالب ها يرد عليك برد ها تعجز عن فهمه بدماغك الغير ناضجه وعقلك القاصر عن ادراك عمق كلماته , لكن أشهر سؤال كان الناس بتحب تسأله لعم ابراهيم عشان كانوا بيحبوا ييسمعوا منه اغرب اجابه واللى كانت كافيه دايما انها تتركهم فى نوبة ضحك لا تنتهى , تقترب من عم ابراهيم وتسأله هى الدنيا دى متكونه من ايه يا عم ابراهيم يبص عم ابراهيم للسما والنيل ويرد عليك فى كل مره وكأنها أول مره يكنشف الاجابه , الدنيا متكونه من عسل وطحينه , ثم يتركك ويمضى كأنك غير موجود , لما كبرت شويه وعم ابراهيم كان زى ما هو ما بيزيدش حاجه ولا بينقص حاجه سألت ناس كبار فى مدينتى الصغيره هو مين عم ابراهيم وليه هو كده , ناس قالت انه كان موظف فى شركة الكهربا وناس قالت انه كان موظف فى شركة الميه وناس قالت انه كان صياد , بس اكتر حاجه سمعتها ان عم ابراهيم كان تاجر وكان غنى وزى الفل ومن الناس اللى بينضرب بيها المثل , ايه اللى حصله بقى , ابحث عن المرأه , الحكايه بتقول ان عم ابراهيم اتجوز واحده وحبها جدا ولكن الست كانت طماعه وهو كان بيحبها , المهم انها فلسته زخليته يكتبلها كل حاجه وسابته على الحديده واطلقت منه , وهكذا أصبح ابراهيم التاجر عم ابراهيم , لما كبرت شويه كمان وبرضه عم ابراهيم كان زى ما هو كان نفسى افهم قصد عم ابراهيم من الدنيا عسل وطحينه اللى عمر ما حد حاول ياخدها على محمل الجد ويفهمها مؤخرا افتكرت عم ابراهيم وفهمت ان الدنيا فيها حاجات حلوه زى العسل وفيها حاجات مره وطعمها قابض زى الطحينه بس الغريب انك لما بتحض الحاجتين المحتلفين عن بعض تماما العسل والطحينه بيطلعوا حاجه طعمها يجنن أحلى من اى حاجه تانيه وهى دى الدنيا عسل وطحينه , عم ابراهيم اللى ماحدش عرفه ولا كاتب تاريخ كتب عنه كان يستحق أكتر من كده , أخر مره شفته من حوالى 10 سنين وكان لسه زى ماهو برضه سلمت عليه كان نفسى اقوله فاكرنى انا العيل اللى كان بيغلس عليك مع كل عيال الشارع واحما صغيرين , عم ابراهيم ميل عليا وقالى ما تجيب نص ريال ثم تركنى ومضى ولا أكنه طلب حاجه ولا أكنى كنت موجود .

خمسين

الحب ماله كده أصبح غريب
ييجى يومين وسنين يغيب
مش قادرين نلاقى الحب ليه
والأرض فيها سته مليار حبيب

أحيه تالت سنه - أحيه هيه لسه كده

كل سنه وأحيه طيبه وانتم كلكم طيبين , الشهر ده أحيه بتتم تلت سنين يعنى خمسه الا اتنين فى عين العدو , اول ما بدأت أحيه كانت فى عز ايام الفساد والمصر كانت صراحه تربه عسل لاى حد عايز يكتب عن الفساد السياسى والجتماعى والاقتصادى وكله , شهر يناير اللى فات حصلت الثوره اللى طبعا كلنا شاركنا فيها , الثوره اللى أغلب المدونين والناشطين توقعوا وامنوا بحدوثها من زمان اوى , هنا على احيه قبل 6 ابريل فى 5 ابريل 2008 أحيه قالت حى على الاضراب وقلت خلاص ان الشعب المصرى اتفطم كنت بتريق على اللى بيقولوا ان المصريين لسه بيرضعوا سياسه ولسه صغيرين على كده , فى 10 يونيو بعد اللى حصل لخالد سعيد أحيه قالت لكل اللى لسه عايشين مقموعين ولسه مستعدين يعيشوا كده 100 سنه كمان قلنا أنا اعرف , أنا طنش , أنا ميت وبعدها لما الناس اتحركت فى وقفات خالد سعيد اللى انفجرت من عندنا هنا فى اسكندريه أحيه وصفت اللى بيحصل ببروفة النهايه للثوره الجايه اللى ها تحصل بصوره سلميه منظمه زى ما عملنا فى وقفات خالد سعيد , فى اكتوبر 2010 رصدنا قمة الغباء السياسى للحزب الوطنى غير المأسوف عليه فى الدعايه لأعضاءه المترشحين لمجلس الشعب وفى نوفمير 2010 طرحت أحيه المحاكاه الافتراضيه للانتخابات المصريه كرؤيه خاصه وواقعيه لما سيحدث فى انتخابات مجلس الشعب اللى كانت القشه اللى قصمت ظهر البعير بالنتيجه الغبيه والتزوير الغبى اللى طلع النتيجه فوق ال 95 % من المجلس حزب وطنى , فى 23 يناير اتكلمت على أول ثوره محدده بميعاد مسبق وقلت ازاى ها نشارك فى عصيان مدنى مفتوح ها ينضج ويبقى ثوره وما حبتش اقسميها ثوره ساعتها عشان انا نفى كنت خايف من مؤشرات كتير حصلت قبل يوم 25 والحمد لله اللى عملناه نضج واصبح فعلا ثوره حقيقه مكتملة الجوانب وعدت كل توقعاتنا حتى احنا اللى شاركنا من اول يوم 25 , شاركتكم جزء من احداث 28 فى المنشبه اللى اصاب فيها مئات من المصريين واالى اتشرف انى كنت واحد منهم , يوم الخميس 11 نوفمبر اتخيت زى كلنا ما اتخضينا من اللى حصل من حسنى مبارك فى خطابه التاريخى من ناحية غباء الخطاب السياسى وخفت زى كل الناس من ان الجيش الحصان الاسود فى اللعبه ما قدرش يحسم الموقف وكتبت يومها عشان نكر فى اللى بيبحصل , بس الحمد لله يوم الجمعه الجيش اثبت انه مازال الحصان الاسود وصوت الشعب اللى فضل متمسك بمواقفه لغاية ما جه الفرج الحمد لله وأصبح مبارك هو الرئيس المخلوع
عموما انا ما كنتش عايز اخليكم تملوا يعنى او اعمل نفسى ناصح اوى وقال يعنى الواد بقه عمود من اعمده الثوره لا فككم انا بس كنت عايز اوثق للى حصل من خلال أحيه المهم بقى ان بعد الثوره وبداية زوال رؤؤس الفساد الواحد حس ان الثوره كده ها تخرب بيتنا وتقفلنا السبوبه الفكريه اللى عاملينها على احيه والواحد مش ها يلاقى حاجه يكتب عنها بعد ما اباطرة الفساد يتحاكمو , بس خاب ظنى لان طلع ان المرحله الجايه هى المرحله الاصعب بجد مرحلة بناء الننفوس وبناء الوعى السياسى والفكرى فيها الاف من الحاجات اللى تستحق نقول عليها احيه هيه لسه كده , عشان كده أحيه ها تفضل شغاله عشان اللى كل يوم بيطلعوا علينا عشان يعملولنا الف حزب وطنى جديد , وطول ما عايزين بلدنا تفضل احسن احيه ها تفضل موجوده
فى حاجه غاظتنى كده الايام اللى فاتت عايز اقولكم عليها ايها الاوفياء لأحيه , لاحظت ظهور مواقع وحاجات غريبه كده بتقلد أحيه فى الفكره والأسم والتطبيق عايز أقولهم حا بالفم المليان أحييييييييييييييه هيه بقت كده وكمان حاجه بسيطه , من أنتممممممممممممممممممم

على قهوة الثورة ( بعره سابقا )

امبارح بالليل على الساعه 10 كده كنت قاعد مع جماعه ولا بلاش جماعه دى , مع مجموعه من أصحابى من كذا تيار فكرى مختلف كنا بنتكلم عن مصر وايه اللى المفروض نعمله فى الفتره الجايه كأفراد وهيئات مجتمع مدنى , اذ واحنا قاعدين وبنضرب فهوة زياده حليب , دخل علينا شاب فى اول العشرينات مظهره بسيط وميل علينا وسألنا أقول نعم ولا لأ , استغربنا الصراحه بس لقيناه شكله عايز يعرف بجد , قلتله اسحب كرسى بقى واقعد مش سهله كده , بدأنا نسمع منه هو ايه وجهة نظره بالظبط , قالنا فى البيت عندى قالولى اسال واحنا محتارين صراحه الشوره كانت حاجه حلوه واحنا عايزين الدنيا تبقى احسن , اللى حصل اننا بدانا نشرحله وجهتين النظر لان كان مننا ناس مع نعم وناس مع لا فشرحلناله ده وشرحناله ده ايه اللى يحصل لو نعم وايه اللى يحصل لو لا من غير ما حد مننا يقوله قول نعم ولا قول لا , بدأ يسألنا عن حاجات تانيه يعنى مجلس الشعب والرئيس والراجل بتاع المجلس اللى كان عندهم لنه راجل طيب بس حرامى ابن كلب , وان الأخوان كذا والبرادعة كذا , بسطناله المسأله خالص وفهمناه يختار على اساس ايه مش على اساس الراجل ده طيب ولا الراجل ده شكله مش عاجبنى , قعد معانا بتاع ساعه الا ربع , وبعد ما فهم الحمد لله شكرنا وقام , مش عايز اقولكم السعاده اللى كلنا كنا حاسين بيها اننا فعلا ساعدنا الشاب ده انه يفهم ماقلنلهوش خليك مع اليسار ولا اليمين ولا الاخوان ولا الوطنى ولا البرادعى ولا ايمن نور لا اديناله المعايير وهو كانسان واعى يقدر يشكل الفكر الخاص بيه ويوصل للصح متهيالى هو ده دور كل واحد منا مدرك وعنده الوعى انه يوصله للى حواليه مش مهمتنا اننا نخلى اللى حوالينا نسخ مننا ونقنعهم بافكارنا بالعافيه زى ما شوفنا اللى الاخوان المسلمين بيحاولوا يعملوه فى الايام اللى فاتت لدرجة وصلت للفتاوى اللى بتخلى اللى بيقول لا حد أثم وخلاضص ها يكفر , بجد أسف ان الأخوان لسه مش قادرين يكونوا رجال سياسه وبيكرروا نفس اساليب الحزب الوطنى اللى المفروض انهم عانوا منها , ما علينا لازم نوعى الناس لأن الناس اللى ما عندهاش اى وعى من اى نوع سهل انها تنقاد مع اى تيار عايز يفرض رايه لانهم ببساطه ما يعرفوش فاى حد ها ييجى يكلمهم هو بالنسبه لهم طوق نجاه , الشاب اللى كلمنا ده عاطل زى ما قالنا وتعليمه متوسط وبيحب مصر اوى وصدقونى مصر فيها ملايين ما يعرفوش زيه مش تعليم متوسط لا فيه ناس ممعاها دكتوراه بس ما تعرفش برضه واحنا بما اننا نعرف ربنا ها يحاسبنا على اننا ما افدناش حد بمعرفتنا دى , خلصنا القعده وقمنا نروح كان الشاب ده واقف بينظم المرور فى الشارع قدام القهوه سلمنا عليه وروحنا

قايمة الحياه (1) - أن تعيش بدون ورق التوت

فكرت فى ايه اللى ممكن يبسطنى , قعدت افكر فى كلام العالم بتوع التنميه البشريه دول لغاية ما دماغى اتخرمت صراحة بس قررت أخيرا اعمل حاجه ها اكتب قايمه بس مش قايمه باهداف بعيدة المدى ولاقصيرة المدى ولا أهداف باليستيه عابرة للقارات , انا ها اكتب قايمه بأمنياتى , الأمنيات اللى لو عملتها قبل ما اموت اموت وانا مستريح او كده بيتهيألى يعنى , مش عارف همه كام واحده ها اعدهم معاكم بس ها اتخليهم معاكم واحده واحده من غير خطه بقى ولا بتاع بس أنا واثق انى ها احققهم ولو جزئيا فى يوم ما :

1 . أكتر أمنيه بتمناها فى حياتى وما حدش يضحك , أنى أشترى جزيره وأعيش فيها لوحدى , هههههههههه, أضحكوا اضحكوا , بطل عبط يا ابنى منك له , انا دورت يا جدعان على النت ولقيت الجزر دى بتتباع عادى يعنى وعلى قفا مين يشيل , دى مرطرطه فى البحر الكاريبى وأسعارها حلوه مش حراقه اوى يعنى وبمختلف الأحجام , أنا حجزت واحده محندقه كده مساحتها بتاع كيلو كده تمنها 40 ألف دولاربس يا بلاش , بس ربنا يدينا ويديكم طولت العمر وأحوش المبلغ واروح استلمها وامضى العقد , وابنى لى بيت من البوص زى عم روبنوس كروزو دهون واحط فوق سطحه دش حلو كده ازبطه على الهوت بيرد ومالناش دعوه بالعرب فات ولا العرب مات ولا سات , ونقفل قنوات الاغانى ونفتح قنوات الافلام الأكشن , هههههههه, ولا بلاش بلاش حتى الافلام الامريكانى بتقلب عربى فى الاخر , بلاها تليفزيون ولا تليفون ولا اى جهاز اليكترونى ممكن تلاجه بس عشان ازازة ميه مشبره وأنا قاعد قدام الكوخ بتاعى كده على البحرساعة عصارى , واستنضف قيراطين كده فى وسط الجزيره ازرع فيهم اللى أكله وأكل اللى ازرعه , وشجرتين موز كده وشجرتين مانجا ونزرع ونقلع بقى , والقلع هنا متهيالى عا يبقى بصفه دايمه جزرتى بقى وأن حر , الواحد ممكن بقى يفكر يجيب يخت صغنن كده نقضى بيه الطلبات من على الجزيره اللى على أول المحيط وانت جاى , وده نجيبه مستعمل ونشده شده حلو مش ها يتكلف حاجه برضه , أهم حاجه بقى فين الجنس الاخر بقى اللى ها يخلى الجزيره جنه وها تطلعنا منها , الواحد يتجوز بقة بنت مصريه كده بايعه اهلها او لو لم يتوفر يبقى بنت من جزر الكاريبى الحلوين السمر المتغذيين دول ونعيش على الجزيره كما خلقنا من غير ورق التوت جزيرتنا بقى يا جدعان , وانا الحاكم وهى ملكة الجزيره, احنا اللى ها نحط القوانين واحنا برضه اللى مش ها ننفذها, ولا تقولى بقى طريق عام ولا قطاع عام ولا قطاع غرق, العام هنا خاص يا معلم , والحياة ها تبقى فل وما أظنش ان حياتنا الزوجيه ها تبقى فيها اى مشاكل ولا انا ها اخونها مع غوريلات الجزيره ولا ها ابص لأحلى منها ولا هى ها تقعد تقولى عايزه وعايزه عشان تقلد اللى بتشوفه فى التليفزيون او تقلد أصحابها , ونخلف عيال كده نربيهم فى الغابه بعيد عن العالم اللى بيموت بعضه عشان صفيحة بنزين ,ولو فشلت التجربه يعنى مش فارقه ها أأجر الجزيره مفروش وها اعمل مصلحه حلوه برضه

تو بى كونتينيود >>>>>>>>>

من أحداث 28 يناير بالمنشية - الأسكندرية

تسعه وأربعين

أنا يوم خمسه وعشرين

كان عمرى سنه بالكتير سنتين

النهارده بعد أسبوعين ويومين

أنا عمرى أصبح واحد وعشرين

ممكن نفكر بالمنطق خمسه

ممكن نفكر بالمنطق خمسه , دلوقتى حسنى حسب بيان الجيش ما بقاش القائد الأعلى للقوات المسلحه , وثانيا حسب بياته هو خلاص يعتبر قد تنحى لأن التفويض مش بيتم غير فى حالة السفر خارج البلاد أو عجز الرئيس عن تأدية مهامه لأسباب صحيه أو ايا كانت , وكمان هو أعلن طلب تعديل الدستور قبل التفويض لان ده مش من صلاحيات نائب الرئيس , والغاء المادة 179 من الدستور الخاصه بقانون الارهاب ده ها يسمح بألغاء الطوارئ , لو الرئيس تنحى رسميا ده ها يخلى رئيس المحكمه الدستوريه رئيس مؤقت لمدة 60 يوم حتى اجراء انتخابات رئاسية ها تخضع للدستور القديم لان مش من حق رئيس المحكمه الدستوريه تعديل الدستور او حل مجلس الشعب او اقالة الوزارة , وساعتها ها ييجى مرشح من الحزب الوطنى او الجيش فى انتخابات غير عادله , الحل الوحيد لالغاء الدستور تماما وتطبيق الشرعيه الثوريه بدل من الشرعيه الدستوريه هو القوة والقوة الوحيده هنا هى الجيش والجيش يا جماعه فى موقف حرج اصلا بين أمن المتظاهرين وأمن الشعب وأمن مصر وحدودها ةفى نفس الوقت الخفاظ على شرعية الخكومه الحاليه عشان كده الجيش يشكر جدا بس ماحدش يقدر ياكد ان الجيش دلوقنةيقدر ياخد الخيار او الحل ده , يا جدعان ما نخافوش زى ما عملنا الثوره دى بيمعاد مسبق ومعلن ونجحت نقدر لو ما اتنفذش اللى عايزينه ننزل ونطالب تانى وتالت ورابع ولا هى الشوارع ها تتلغى والميادين ها تتشال , منهيالى ان ثقافة التظاهر والمطالبه بالحقوق بجد موجوده خلاص عندنا كلنا لازم نكون كسرنا حاجز الخوف خلاص ونق فى قدرتنا على التغيير ومحاربة الفساد دايما المعركه طويلة جدا مش ها تنتهى بكره ولا بعده ولا كمان سنة وات سنتين حنى قدامنا سنين نصلح فيها المجتمع ها ننزل فيها ونتظاهر ونحارب الفساد برضه مش اليومين دول همه يومين المظاهرات وخلاص كده يعنى ها نقعد فى بيوتنا , بس خلونا نشم نفسنا وندى فرصه للى بيحصل ونشوف من غير ما يموت جوانا الفارس اللى لازم يكون متأهب دايما انه يطلع تانى وتالت ورابع لو شاف ظلم أو فساد تانى, أنا نزلت من يوم 25 واصبت فى عينيا يعنى ليا طار وجامد اوى عند كل رموز الفساد دى بس مش عايز ثورتنا وكل اللى حققته والتأييد اللى حققته فى مصر وكل العالم يتبدل لو كملنا فى سكه ممكن تبوظ كل حاجه عملناها وتفقد الثوره مصداقيتها ده روئتى فى اللحظه , تحتمل الصواب أو الخطأ بس حسيت ان لازم اقولها , لو كنا واثقين فى الجيش فعلا , البيان التانى للجيش حسم موقف الجيش فى حاجات كتير من المطالب الشعبيه وطبعا الجيش دلوقتى لا يرأسه حسنى مبارك يعنى قوة محايده تماما وليها مواقفها اللى كلنا بنحترمها , القرار اللى ناخده دلوقتى بأننا نقف ونفكر وناخد نفسنا هو القرار القوى والمسؤول واللى ها يبين حرصنا على البلد بجد وكل حد فى الشعب , لو كملناها عتد للأخر ما حدش عارف ساعتها التوقف ها يبقى ازاى يمكن يكون بالدم وساعتها يمكن نخسر كتير أوى , الحكومه بتراهن على الوقت وبين الخطاب الثانى والثالث لمبارك كان عشر أيام , هل تعتقدوا ان البلد ممكن تتحمل 10 أيام تانييى ولو اتحملناهم وطلع ساعتها وتنحى ساعتها ها تبقى المطالب زادت برضه لزيادة التضحيات وها ندخل فى حلقة من المزايدات لن نتنهى , انا عن نفسى لو الوعود اللى التزموا بيها ما اتحققتش ها انزل تانى وتالت ورابع , بس دلوقتى خلونا ناخد فترة تفكير وفرصه للبلد عشان تتنفس

اعتصام مش ثوره

بالتأكيد كلنا تحمسنا لما الشعب التونسى عمل ثورته وكسر حواجز الحاكم الأبدى فى الوطن العربى كله , ومبسوط بأن الناس فى مصر وصلها ده وناس كتير اتحركت وعايزه تتحرك عشان نحقق اللى حقققه الشعب التونسى واللى احنا كنا اولى بيه من زمان أوى , ان شاء الله أنا ناوى اشارك يوم 25 مع كل الناس اللى يا رب تشارك بس موضوع الثوره دع صراحه مش عاجبنى , من يوم ما اتعلن عن مظاهرات 25 دى وسمعنا كلام وشوفنا فيديوهات كتير الموضوع مثير لتساؤلات غريبه مش ها اقول لكم بقى عملا اجانب بيحرك الشعب للثوره والكلام ده بس اللى احنا بنتكلم عليه دلوقتى بالتأكيد مش هو نفس الثوره العفويه اللى حصلت فى تونس , لما حسبتها حسب حسبتى البسيطه لقيت لن ثوره فى بلد زى بلدنا ووضع زى وضعنا ها تبقى ثوره مدمره بكل الاحوال , البلد ها تتدمر ماديا من كله وها يحصل حالة انفلات امنى مش ممكن نقدر نتايجها فى بلد أصلا محكومه بالحديد والنار عشان تفضل متلصمه أمنيا ما حدش عارف ايه ممكن يحصل فى حالة حدوث انفلات أمنى على مستوى الدوله بحالها , اللى شايفه ان حركتنا تكون اعتصام أو عصيان مدنى يشارك فيه الشعب كله ويستمر لمدة مفتوحه ايا كانت المده لحد ما تتحقق المطالب الشعبيه بس من غير انفلات أمنى , اعتصامنا ما ينتهيش غير بتحقيق المطالب , زيادة الحد الأدنى للأجور 1200 , حل مجلس الشعب واعادة الانتخابات تحت اشراف قضائى , اقالة الحكومه واعادة تشكيل حكومه انتقاليه حتى الانتخابات الرئاسيه القادمه , تعديل الدستور وخصوصا المواد الخاصه بمدة الرئاسه والانتخابات الرئاسيه بما يحقق النزاهة والديمقراطيه وتمثيل ارادة الشعب الحقيقه فى الانتخابات القادمه , اقامة انتخابات رئاسية تحت اشراف دولى .
كل اللى بتمناه من ربنا من الحكومه والرئيس انهم ما يكملوش مسلسل الغباء للأخر ويصحو ويعملوا حاجه كوبسه فى دنيتهم قبل ما البلد دى تتكسر فى ثورة لو حصلت ربنا وحده يعلم نتايجها ويموت ناس أكتر من اللى بيموتوا كل يوم من غير ذنب غير أنهم عايزين يكونوا بنى أدمين