خمسه وأربعين

تعيش تعيش تموت تموت مالكش ديه

أصل اللى زيك يا ابنى مش قضيه

تعيش خدام لللئام فى الوسيه

لحظة تفتكر انك عليت تموت فى اللحظه اللى جايه

مين اللى حرك حتة الجبنه بتاعتى يا ولاد ال...

التأقلم والتفاعل مع المتغيرات هو ده اساس الحياه على الأرض اللى بيقدر يتغير مع المتغيرات اللى حواليه يكمل واللى ما يقدرش جيم أوفر يطلع برا اللعبه , ألاف الفصائل النباتيه والحيوانيه انقرضت عشان ما قدرتش تلبى المتطلبات المتغيره للحياه حواليها , الجفاف , الحراره, البرد , نقص الغذاء , وجود كائن أقوى , الديناصورات انقرضت بكل قوتها الله أعلم ليه بس بالتأكيد ما قدرتش تكمل

المهم قريت كتاب مشهور جدا فى العالم كله بيتكلم عن فكرة التعامل مع التغيير اسمه من حرك قطعه الجبن الخاص بى who moved my cheese الكتاب بيتكلم عن متاهة عايش فيها فاربن وقزمين عايشين جوه المتاهه على الجبنه , فى يوم يصحوا الصبح يلاقوا الجبنه خلصت , الفيران عشان بتتبع غريزيتها فبدأت على طول تدور على الجبنه فى مكان تانى بس القزمين عشان بيفكروا شويه قالوا نستنى مكاننا بالتأكيد ها تييجى جبنه تانى مكان اللى خلصت , الخلاصه ان فى الاخر القزيمن بيوصلوا لفكره انهم لازم يتحركوا ويدورا على الجبنه فى مكان تانى لانهم لو فضلوا فى مكانهم مستنيين ها يموتوا من الجوع , الخلاصه انهم بيوصلوا لفكرة التفاعل مع المتغيرات المحيطه , تعرفوا ان الصراصير من أقدم الكائنات على سطح الارض عمرها اكتر من 6 مليون سنه , الصرصار قدر يكيف نفسه انه يعيش فى الحر والبرد الرطوبه والجفاف , فى الخشب فى الحجر فى المجارى فى اى حته وخلاص وبيتغى عل ا حاجه اى حاجه بيعيش كائن رهيب الى اقصى درجه كل ده وبيطير كمان قال كان ناقص يعنى , الانسان كمان قدر يعمل كده قدر يعيش فى روسيا وفى ساحل العاج وفى جزر القمر والبرازيل وايسلندا , والكائن المصرى خصوصا اتاقلم احسن من الصراصير تلاقيه فى قصور مارينا وتلاقيه فى عشش الصفيح فى افقر العشوائيات اللى حتى الصراصير هربت منها , بياكل الفول بسوسه والمش بدوده والقمح المشع والفاكهة المرشوشه بكل الكيماويات المحرم استعمالها دوليا والخضار اللى مرو بمية الصرف الصحى , ومع كل ده ما عندوش مانع انه ياكل اللحمه فى الاعياد والفراخ ف المواسم , او يشترى اللحمه بسعر رخيص جدا محليه أو مستورده ويتحمل مخاطره انها ممكن تكون لحمة حمير أو كلاب أو قطط او كائن يعيش فى ماوراء البحار الله اعلم نوعه ايه , وايه المشكله المهم انها لحمه , خلى العيال تاكل , و المصرى برضه هو اللى عايش على أفخر أنواع السيمون فيميه والكافيار ولحم النعام , المصرى اللى بيموت كل يوم فى قطارات وعبارات غير صالحه للأستخدام الأدمى والمصرى برضه اللى بيركب المرشيدس اس 500 والهامر والبى ام الفئه السابعه , المصرى اللى بيتحشر فى التكتك فى اضيق شوارع مصر , والمصرى اللى بيركب البيتش باجى على اوسع شواطئ مصر , المصرى اللى بيعيش هوه وافراد عيلته اللى على الاقل خمسه فى مساحة 80 متر والمصرى اللى عايش فى فيلا الجنينه بتاعتها بس 280 متر , مش عارف جبنة ايه اللى كان بيتكلم عليها مؤلف الكتاب , ايه يعنى صحوا مالقوش الجبنه , المصرى بيصحى كل يوم ما بيلاقيش مواصلات ما بيلاقيش رغيف العيش بيلاقى كيس السكر بضعف الثمن وأنبوبة البوتاجاز حسب الموسم واللحمه بقت للفرجه بس , مابيلاقيش تعليم , ما بيلاقيش رعايه صحيه , مش لاقى شغل , ولو اشتغل يبق بيشتغل نفسه لان مرتبه ما يغطيش مواصلاته اصلا , مش لاقى يجيب شقه يتلم فيها هو وشريكة حياته اللى مش لاقيها برضه ولما بيبص على الصحرا بيلاقيها مزروعه فيلات وقصور بالألاف والألاف مش عارف مين ها يسكنها بس بالتأكيد مصريين برضه .

الجزء الأخير من الكتاب بيوضح فكرة ازاى الأتنين الفيران بيعيشوا مع الوضع الحالى اللى هيه وجود الجبنه الجديده اللى لقيوها وبيكلوا ومدلعين نفسهم لغاية ما تخلص وها يرجعوا تانى بعد كده يدورا حسب غريزتهم لما ها يبقوا مضطرين وهو ده نفس المنطق اللى المصرى ماشى بيه المصرى مش بيتغير غيرلما يجبر على كده مش ها يلبس حزام الأمان غير لما يبقى عليه غرامه قد كده مش عشان مثلا الحزام ده لأمانه هوه حتى ساعتها ها يستعبط ويجيب ايد شنطة ابنه اللى فى الابتدائ ويعملها حزام , الست المصريه اللى بترمى الزباله فى منور البيت اللى هيه عايشه فيه وعلى سلالم العماره اللى ساكنه فيها , ومش ها تهتم بنضافة سلم العماره غير يمكن لما ييجى لبنتها عريس يزورهم فى بيتهم , المصرى اللى مش بياخد دورة الى سى دى ال غير لانهم طلبوها منه فى مصوغات التعيين وحتى بعد ما يخدها بيفضل برضه يستعمل الماوس بايديه الأتنين , المصرى اللى مش بيتقن شغله غير لما رئيسه يقف فوق دماغه , اللى مش بيجمل الشارع غير لما يبقى فيه زياره لمسئول كبير , المصرى اللى بكل بساطه بيعيش حالة رد الفعل عمره ما قرر انه يعيش الفعل , الشعب المفعول به دايما وليس الفاعل , الأقزام بقى فى الجزء التانى من الكتاب بيمثلوا الخيار المنطقى والتعامل الذ كى مع المتغيرات او لا يلدغ مؤمن من جحر مرتين الأقزام مش ها يتبعوا غريزتهم تانى لا المره دى قبل ما مخزون الجبنه يخلص ها يطلعوا يدورا على طرق جديده فى المتاهه ويرسموا خريطه ليها ويكتشفوا مناطق جديده فيها مخزون جديد من الجبنه ويمشوا الموضوع بشكل منطقى , الأقزام بيمثلوا الشعوب المتقدمه اللى اختارت انها تتغير من جواها عشان عايزه تعيش حياه أفضل مش عشان غيرهم بيجبرهم على كده مش عشان حد ماسكلهم الكرباج , سبنسر جونسون بفكرته البسيطه عن التعامل مع المتغيرات وصل لفكره متهيالى كلنا عارفيها اصلا ودى المصيبه لا يغير الله ما بقوم حتى يغيروا ما بأنفسهم , واحنا مش باين اننا ناويين , ماهى الحكومه منينا واحنا من الحكومه وبما ان الحكومه تيييييييييييت فده مش من حاجه غير ان كل واحد مننا من جواه تيييييييييت كبير اوى , طبعا سبنسر جونسون ما سمعش عن الكائن المصرى , تيجى ايه متاهته دى فى المتاهة اللى اسمها مصر يروح فين اقزامه وفرانه دول مع الكائن اللى بيحاول بقاله سبعتلاف سنه يفضل عايش , وعايش ليه مش عشان يحقق حاجه لا ده عايش عشان فى كل يوم يدى فرصه للكبار انهم يمصوا جزء من دمه ويبيعوا حته جديده من جسده ومن ترابه وأرضه , ها اقولك ايه ربنا يستر عرضك يا عم الحاج خليك انت فى الجبنه بتاعتك وخلينا احنا كمان بلاش الجبنه لحسن غليت خليها رغيف عيش على الأقل اللى بناكله مضطرين يمكن نتغير بس مش بكره بالتأكيد اصبر لليوم اللى نصحى ما نلقيهوش ساعتها ها نتغير بس برضه وأحنا مضطرين مش عشان عايزين .

أربعه وأربعين

يا غربه يا أم عيون مغربه

سيرتك بتلمسنى ولا ألف سلك كهربا

لياليكى الطويله والفكره المتعبه

كل ما عنك أبتعد ألاقيكى منى مقربه

الغباء السياسى

زى أى مواطن مصرى بيحترم نفسه اشتريت جرنان الجمعه بتاع امبارح مش عشان أقرى الجريده طبعا لأ , عشان اشوف اعلانات الوظايف وملحق السيارات و احرق فى دمى شويه , اذ فى احدى الصغحات لقيت البتاع اللى فوق ده , مش بقول بتاع قلة تقدير يعنى ولا حاجه , لا خالص انا بقول بتاع عشان مش عارف أوصفه فى الحقيقه , الله الله ماشى يا ستى وماله الله أكبر , ايه بقى اييييييييييييييه
يعنى مين حضرتها مش واخد بالى , مديرة مش عارف ايه وعضو ما ادركش ايه , ايوه وبعدين يا ست الحاجه بتبيعى ايه سيادتها يعنى مش فاهم , هل ده اعلان ولا حد صحا الصبح من النوم فرحان بنفسه يعنى فنزل صورته ووظيفته فى الجريده الرسميه وكتب الله الله عشان الحسد يعنى ولا ايه حد يفهمنا يا جدعان احترت صراحه عشان افهم , بس مر بخاطرى ان الغباء ده مش بيطلع غير من ناس معينه فى البلد الحزب الوثنى الديمقراطى اللهم أحفظنا , المنطق بيقولك ان البتاعه اللى فوق دى مالهاش اى معنى غير عند صاحبة الصوره غير انها كاتبه انها عضوه فى اربع جميعات من جمعيات المجتمع اى حد ماشى فى الشارع ممكن يكون عضو فى عشر جمعيات زيهم مش اختراع يعنى ودافعه الاف عشان تعرفى الناس انك عضوه فيهم بالطريقه دى الواحد ها يدفع نص مليون جنيه عشان يكتب اسامى جمعيات المجتمع اللى مشارك فيها وده لا يقدم ولا يأخر يعنى , ليه محسسانى انها اتت بما لم يأت به أحد , بص طبعا هيه كلمة أمين الاعلام فى الحزب الوطنى دى كافيه بتبرير الغباء السياسى اللى عايزله بردعه ولجام , اخدت اسم السيده الفاضله وكتبته فى جوجل والفيس بوك والحمد لله ما خبوش عليا حاجه , لقيت على الفيس بوك جروب اسمه الجروب الرسمي لمؤيدي فاطمة السباع فيه بتاع40 عضو , تقريبا كده الست الفاضله وجوزها والعيال والعيله والجيران يعنى والجروب ده ليه بقى لدعم الحمله الأنتخابيه للأستاذه اللى هيه مرشحة الحزب الوطنى الديمقراطى فى انتخابات مجلس الشعب فى جنوب سيناء , الست الفاضله ماسكه منصب أمين الاعلام بالحزب الوطنى الديمقراطى , لما يحب أمين الاعلام فى الحزب الوطنى الديمقراطى انه يعمل دعايه لنفسه فى الانتخابات فينشر صوره ليه فى الجريده الرسميه مكتوب فوقها الله الله وشويه كلام لا يودى ولا يجيب تحت صوره ممكن تنفع لألبوم جواز او حاجه زى كده , لازم ساعتها نعرف الاعلام فى البلد دى وصل لفين ومع الدم الجديد فى الحزب الوطنى ان شاء الله ها نوصل لفين ولفين

تلاته وأربعين

يا تعيش أسد فى الكون تزيط

يا تكون تعبان ألعبان حويط

أو سلحفه تتفرج من بعيد عامل عبيط

بس ويلك لو تعيش انسان طيب بسيط

فوزيه متين وأربعتاشر أت ياهو

تحذير : أى تشابه بين فوزيه وأى فوزيه تانيه هو تشابه غير مقصود ... مش انتى يا ماما بلاش استعباط

عرفت فوزيه من كام سنه على الانترنت عن طريق موقع من مواقع التعارف كان ليه شعبيه كويسه فى مصر قبل اكتساح الفيس بوك , على الموقع ده كنت حاطط صوره واحده على البروفايل بتاعى وكانت صوره للتطفيش أكتر منها للجذب لأن الموقع صراحه كنت تحسه مريب الى حد ما , اذ فى يوم فوزيه دخلت وعملت كومنت عل صورتى الوحيده , ده كان كفايه اوى ان الموضوع يتطور لرسايل وميلات بقه وشاتنج , صراحه فوزيه كانت مشكله كانت بتهلكنى من الضحك بس أسلوبها كان رجولى أوى لدرجة مره قلتلها والنعمه انتى ولد وبتشتغلينى , فوزيه قعدت تحلفلى بس انا كنت مقتنع من اسلوب كلامها صراحه انها ولد , وأخيرا قررت انها تفتح الكام عشان تقنعنى , وقد كان و فتحت الكاميرا لحوالى 3 ثوانى كانوا كافيين انى أتاكد انها بنت بس مالحقتش صراحه أخد بالى اذا كانت مزه ولا لأ , طبعا بعد شويه بدأنا تليفونات بقه وكده الغريب ان صوت فوزيه كان فيه بحه غريبه كده زى ما يكون نامت فى الطل وجالها التهاب فى الحنجره عارفين صوت شيرين أه يا ليل كده , وده اللى كان محسسنى برضه انها ولد وبيشتغلنى , وصلنا لمرحله تلت مكالمات فى اليوم مكالمة الصبح صحيتى ولا لسه رحت الشغل ولا لسه ومكالمة نص النهار روحت من الشغل ولا لسه ها تقعدىعلى النت بالليل , ومكالمة بالليل بقى ايه اللى مسهرك وخش نام بقى عندك شغل بدرى

كان لازم طبعا ننتقل للخطوه اللى بعدها نتقابل بقى عشان ما يتخربش بيتنا فى التليفونات بدل ما فودا فون مطلعه احلى سبوبه على قفانا , فوزيه صراحه حاولت تعمل تقيله شويه ودى خطوه تتحسبلها جدا , وده لو عرفنا ان فوزيه خريجة أحد المعاهد ذات السمعه الدوليه فى الشقط والتزبيط والبنات هناك مش بيحتاجوش أكتر من صباح الخير ولو زمزقت اوى معاك يبقى ديتها ساندوشت وحاجه ساقعه , المهم أتفقنا على يوم وميعاد الساعه 3 قدام مكانى المفضل فى المواعيد سينما أمير , وده مكان استراتيجى على فكره اول حاجه ممكن ندخل سينما تانى حاجه فيه قدامها جاد بتاع الساندوشتات وعليه واحد بتنجان ايه وجمبك خروب أمال تذرب شوية سوبيا ايه وورا السينما فيه جونينه حلوه كده متداريه لو طلبت معاكم كده يعنى واخدلى بالك , المهم وصلت متأخر عن ميعادى كالعاده وتخيلت طبعا ان فوزيه ها تكون مستنيانى وخدوا بالكم أنا كل ده ما أعرفش شكل فوزيه غير طشاش من التلت ثوانى بتوع الويب كام , وقفت قدام السينما كان فيه بنت واقفه لوحدها وواضح انها مستنيه حد وبتبص فى الساعه وبتتلفت حواليها كانت بنت ستايل صراحه وأموره كده وبسكوته , لخبرتى ببنات المعهد اللى فوزيه متخرجه منه قلت انى دى مش ممكن فوزيه , استنيت شويه وفضلت اراقب البنوته دى وهيه على نفس الحال , شكرت ربنا وقلت يا سلام لو دى هيه فوزيه فعلا يبقى موز موز موز بجد , مشيت خطوتين ووقفت قدامها مساء الخير انتى فوزيه , البنت تنحت كده وأنا مركز أوى ومستنيها تقول أه واذ بها بتقول لأ فى حاجه , قمة قمة الاحراج مش عايز اقولكم البنت بصتلى زى ما اكون لسه نازل من الطبق الطاير حالا , أنا اسف أوى معلش اصلك تشبهى جدا لحد أعرفه وسحبت نفسى ورجعت لركنى البعيد جمب السينما , يا خساره بجد ليه ما طلعتش فوزيه , ايه اللى اخرها البت دى كده الله يحرقك , قلت اتصل بيها وخلاص يا خساره الدقيقه , الو يا فوزيه انتى يا فين يا ماما انا هنا بقالى نص ساعه , فى السكه والله خمس دقايق خلاص , انجزى والنبى يلا

دقايق وظهرت بنت لأول وهله لازم تعرف انها فوزيه حسب التصور المنطقى , نضاره سوده كبيره من ام 5 جنيه فى المنشيه , مكياج أوفر أوى , اللبس ألوانه كتير بس للأمانه كانت عامله توليفه حلوه برضه للحق يعنى ذوقها حلو , شاورتلى وهيه جايه ناحيتى , اتحركت ناحيتها انا كمان وانا بألقى نظرة حسره على البنت اللى ما طلعتش فوزيه , ازيك , الحمد لله , انت عامل ايه , كويس اتأخرتى ليه , مواصلات وكده بقى ها نروح فين , يعنى ممكن نتمشى شويه وبعدين نقعد فى اى حته , لا ما بحبش امشى تعال نقعد على طول ,طبعا حسيت بالغدر اول ما قالتلى مش بمشى يعنى عايزه تقعد والقعاد بفلوس ماشى ماشى لما نشوف اخرها, طيب ماشى تحبى تقعدى فين , كنت متخيل فوزيه ها تقولى على البورصه مثلا أو قهوة فاروق , لقيت فوزيه بتقولى على اسامى كافيهات ما اعرفش عرفتها منين دى أنا ما اعرفهاش أصلا , حسيت ان فوزيه ناويه تقلبنى من اولها كده بفتح ال ق وكسر اللام, المشكله انى لو عودتها على كده من أول مره ها تتعود على كده على طول , بس معلش اول مره ادلعها وخلاص , اخدتها واتمشينا لحد سيتى كافيه فى شارع سيزوستريس , وقعدنا فى الدور التانى , انتى ليه لابسه النضاره دى يا بنتى ما تخلعيها بقى , عادى يعنى ادى النضاره , صراحه النضاره كانت مخبيه كتير هيه فوزيه ما كانتش وحشه صراحه عادى يعنى , بنت مصريه جدا خمريه مصابه بأنيميا البحر المتوسط بتلبس حاجات كتير كده فى ايديها وشنطه كبيره شايله فيها عزالها , بس كانت سكر والله دمها خفيف جدا ده اللى خلانى ما ازعلش على العزومه , تانى مره اتقابلنا صممت اننا نتمشى بقى عشان ما تاخدش على الكافيهات والكلام ده اللى ها نوفره من فودا فون يروح للخواجه كوستا ولا ايه اتمشينا عند القلعه وقعدنا هناك وغلست علينا البت بت التييييييييت بتاعت الورد اللى هناك دى وضربنا سندوتشين كبده وعصير قصب فى المنشيه, تالت مره قررنا ندخل سينما , اتقابلنا طبعا عند سينما أمير وسيبتها تختار الفيلم أختارت فيلم هابط ومنيل بنيله بس بيؤدى الغرض فيه افوره ومشهدين تيت وكده وجو مناسب للنيه السوده اللى كنت ناويها ,القاعه كانت الا من كام كابل كده متنتورين فى المكان أخدنا كرسين فى جمب القاعه كده , والفيلم بدأ قلت لفوزيه ما تيجى نعمل زى الحبيبه , استعبطت طبعا وقالتلى يعنى ايه , قلتها يعنى اعمل انى بحبك واعملى انك بتحبينى , وكده يعنى , كنت فاكر فوزيه عمليه أكتر من كده بس لقيتها بتقولى وليه تعمل ما انت بتحبنى فعلا , ضحكت وقلتها انت شايفه كده يعنى , اه طبعا , ماشى يا فوزيه زى ما تشوفى يعنى , مديت ايدى ومسكت ايديها بس ما حستش بالأحساس اللى كنت متوقعه خالص , اكتشفت ان ايد فوزيه أخشن من ايد عم محسن البواب يمين شمال مافيش فايده وبعدين فوزيه ما كانش عندها سينس كده , زى الكرسى اللى قاعد عليه , اتقفلت صراحه وطنشت موضوع مسك الايدين ده وما يليه من تبعات , المشكله ان فوزيه كان فيه حد مديها فكره انها الملكه فوزيه بنت الملك فؤاد مش فوزيه بنت الحاج فتحى , اتقابلنا كتير , عادى يعنى من غير أفوره خالص , شويه كده لقيتها بتستعبط بقى وبتعيش الدور وطبعا مش طالباها خالص , المره قبل الاخيره اللى اتكلمنا , ايه يا فوزيه فينك , موجوده اهوه انت اللى مش باين , لا خالص انا فى الدنيا اهو انتى فاضيه بكره, لا بكره ما ينفعش خالص , طب ايه نظامك يوم التلات , لا برضه خارجه مع البنات , ممممممممم طب خلاص يبقى الخميس بقى ان شاء الله , معلش بقى مش ها ينفع الاسبوع ده خالص مواعيدى مش متزبطه بص لو فضيت ها اكلمك أنا ونتفق , طيب يا فوزيه ماشى خلاص انتى عارفه مواعيدى عموما زبطى كده وكلمينى يلا سلام , الفار صراحه لعب فى عبى البت دى بتستهبل مواعيد ايه اللى مش متزبطه هيه البت دى وراها حاجه اصلا وبنات مين اللى خارجه معاهم فوزيه اصلا ما تعرفش بنات , استعباط واضح يعنى , المهم انها فعلا ما اتصلتش الاسبوع ده ولا الل بعديه ولا اللى بعديه وأنا كمان ما كلمتهاش لانى حسيت ريحه غريبه فى الموضوع

بعد شهرين كده من غير كلام , لقيت اسم فوزيه بينور ويطفى على الموبايل , استغربت اوى , الو فوزييييييييييييه ايه يا ماما ازيك , الحمد لله فينك يا ندل هوه انا اللى لازم اسال , شغل والله يا فوفو بقه انتى عارفه أخبارك ايه , انا كويسه واحشنى والله , وانتى كمان بس انتى اللى مش فاضيه , اه دا انت زعلان بقى , ههههههه لا خالص بس انتى اصلك بتستعبطى صح ولا غلط , عادى والله ايه اللى زعلك بس , بصى من الاخر انتى اخر مره كلمتك حسستينى انك الأميره ديانا وأنا يا بنتى مش دودى ( الجمله دى أقتبستها من فيلم تقريبا او مسلسل حاجه كده ) وانتى يا فوزيه مش ديانا برضه عموما ولا يهمك , ماشى يا سيدى خلاص انت فاضى امتى , بصى انا الاسبوع ده زفت خالص الاسبوع الجاى اكلمك ونزبط ونتقابل , خلاص ها استنى تليفونك سلام , بما انى جدع الاسبوع اللى بعديه كلمتها بس فوزيه ما كنتش بترد خالص , واضح ان موضوع ديانا ده زعل فوزيه أوى وهوه لازم يزعلها صراحه لو عندها دم , وانا كنت شاكك فى الموضوع ده , يلا بقى بس انتى اللى بوظتي الدنيا يا فوزيه عل فكره , أنا صعبان عليا بس الكابتشينو وساندوشتات الكبده و عصير القصب وتذ اكر السينما , الا عمرك ما عزمتينى على باكو شيبسى , بنضاراتك السوده دى عاملالى ناديه لطفى فى فيلم النظاره السوداء حد يلبس نضاره سوده فى السينما , ما علينا , يلا فوزيه تفوت ولا حد يموت .

أتنين وأربعين

اوعى يا شاطر تفتكر انك عايش
مش ده حلمك اللى عالأرض ممدد وفارش
مش دى أفكارك اللى عملتها حلق وغوايش
دايبه فيك أيه بس دا انت اللى جواها بايش

ولا ايه

يجد بجد التهييس ملا الكيس ودلدأ , دلوقتى عندنا الجبهة الشعبيه للتغييراللى أطلقها البرادعى مستمره فى حملة المليون توقيع عشان تغيير الدستور وضمان انتخابات ديموقراطيه وتمثيل حقيقى فى الأنتخابات ده غير أيمن نور وحمدين صباحى اللى كل واحد فيهم برضه بيحمل حملته المستقله اللى ليها نفس المطالب , كلام جميل أوى الناس دى بتطالب بحق هيه محرومه منه , قوم ايه تصحى الصبح تلاقى جمال مبارك هوه كمان عامل حمله لجمع مليون توقيع عشان ترشيحه ويفط يمين وملصقات شمال وأطبع يا جدع , الله الله الله ايه يا جدعان اللخبطه دى طب وهوه جمال محتاج حملة دعم للأنتخابات طب ماهو لو جمال كان مرشح الحزب الديمقراطى حزب تعداد أعضاء الحزب الوطنى البورقراطى العريق فالمليون دول مضمونين ايه كده بفرقعه صباع , والراجل فيه كل المواصفات لا محتاج دا ابن الريس يا جدعان توقيعات ايه اللى محتاجها والنعمه انتوا بتهزروا , المشكله بقى تصحى بعد بكره الصبح بقى تلاقى عمك صفوت الشريف بيقولك ان بابا حسنى هوه المرشح المتوقع لخوض الأنتخابات الرئاسيه وده بأجماع الحزب وده فى حالة موافقته لخوض الأنتخابات , لا حول ولا قوة الا بالله , طب ايه اييييييييييييه منين الناس حبايب أنكل جمال حبيبى قاعدين يصرفوا ملايين ويلموا توقيعات ويحطوا نفسهم فى مواقف وحشه والناس بدل ما تكتب موافقتها على دعم مبارك يغيروا البيان ل لا أوافق على ترشيح جمال مبارك , ويقولك ماشى معلش وهتافات ويا جما ويا جمال وبعدين تقولى فى الأخر ان الحزب ها يرشح بابا مبارك , هى حاجه من اتنين يا ده قمة الغباء السياسى يا ده قمة الذكاء واللعب بالبلد والشعب فى لعبه طويله ممله ما بتنتهيش طب أفرض مبارك دلوقتى والراجل صحته أحسن منى ماشاء الله قرر انه ها يرشح نفسه يحصل ايه دلوقتى حرام عليكوا يا ناس عايزين الراجل يزعل مع ابنه يعنى طب ده كلام , طب الراجل اللى مكلف نفسه شوف كام ألف جنيه ده وحاطط يافطه 10 متر على الكورنيش عشان خاطر أنكل جمال ياخد زومبه طب يرضى حد الكلام ده برضه , بس انا بحب اطمن صاحب اليافطه وبقوله ما تخافش يا عم الحاج فيه ناس بتقول ان دى مناوره سياسيه وفى اليوم القبل الخير لقفل باب الأنتخابات الريس ها يعلن عدم مشاركته فى الأنتخابات والحزب ها يعلن جمال مرشح وكده يبقى انت فى السليم , وعموما يعنى سيبك انت لو قفلت معاك زود بس على اليافطه نبايع أنكل جمال ووالده الريس وكل عام وانتم بخير ويبقى انت كده مسكت العصايه من النص وكده كده الريس ولا ابنه أهى فى بيتها ولا ايه .

واحد وأربعين

يا غربه يا أم عيون مغربه
سيرتك بتلمسنى ولا ألف سلك كهربا
لياليكى الطويله والفكره المتعبه
كل ما عنك أبتعد ألاقيكى منى مقربه

تخاريف صيام

حد شاف فيلم البحر بيضحك ليه بتاع محمود عبد العزيز ونجاح الموجى , فيلم كده لما تشوف مشهد منه هاتصنفه كفيلم مقاولات ونفسك مش ها تطاوعك تشوفه , بس مره وانا بدور فى ال500 قناة بتوع النايل سات على اى حاجه اشوفها لقيت الفيلم ده عند مشهد معين , محمود عبد العزيز أتخنق من حياته وعيشته فصحا فى يوم الصبح , لقى مراته راح ضاربها حتت قلم من غير ما يتكلم ولا كلمه وراح نازل رايح الشغل , دخل على الموظفين زمايله راح ضارب كل واحد منهم قلم وبعدين دخل مكتب المدير وراح مديله قلم برضه محترم , وراح نازل رايح لأصحابه فى المكان اللى بيقعدوا فيه وراح ضارب كل واحد فييهم قلم برضه , بعد ما فش غله من كل الناس اللى خانقينه , طلق مراته وساب شغله ودار فى الشوارع يشتغل حاوى , بذمتك مش نفسك تعمل زيه مش قصدى تشتغل حاوى يعنى , بس ما فيش يوم كده حسيت انك نفسك تصحى الصبح تخبط على جاركم اللى بيرمى الزباله فى مدخل العماره وتديله قلم , وتنزل للميكانيكى اللى جمبك اللى نازل ضرب فى الواد اللى شغال معاه طول النهار اشى شلاليت وبونيات وتضربه قلم , وتكمل بقى على سواق الميركوباص اللى بيغلى الأجره كل يوم على مزاجه , ومديرك فى الشغل اللى مؤهلاته أصلا ما تخليهوش يدير عربية كبده ده لو عربية الكبده ليها مدير يعنى , وزميلك ابن التييييييييت اللى ما بيعملش حاجه طول النهار غير نقل الكلام وتدبير الأسافين المحترمه , والراجل اللى بيدخل فى وسط طابور العيش ما تعرفش بيجى منين وتلاقيه طلع بطاوله عيش بحالها وانت مش عارف تجيب بنص حنيه , والموظف اللى بياخد الرشوه بوش مكشوف زى الأتاوه بتاعت بلطجيه نجيب محفوظ بس بلطجيه نجيب محفوظ ما كانوش موظفين حكومه , والواد والبت اللى قاعدين على كورنيش البحر حتى فى رمضان وعاملين فيلم للكبار فقط دول بقى باللذات عايزين ينضربوا بس على قفاهم كده عشان تدلقهم فى الميه , ما نفسكش تجيب الواد الرخم التكن اللى فى كل العبر اللى بيقدم برنامج ضحكنى شكرا وتحلقله زلبطه وتلبسه البوكسر بتاعه فى راسه , ما نفسكش تمسك ايناس الدغيدى و خالد يوسف ومعاهم غادة عبد الرازق وسميه الخشاب , وتشترى ب3 جنيه سبرتوا وسخ وتولع فيهم سوا , ما نفسكش تضرب ميلودى مان وعم أنور قلمين محترمين وتضرب بوبى بس مش على وشها , ما نفسكش تضرب اللى قتللوا خالد سعيد فى ميدان عام , ما نفسكش تضرب اللى سرقوا أراضى البلد عشان يبنوا عليها قصورهم , واللى سرقوا فلوسنا وسمموا أرضنا وميتنا , حتى الدوا بقى فاسد , ما نفسكش تدخل على رئيس الوزرا فى مكتبه وتديله قلم محترم كده تطلع فيه غل السنين , ووزير التعليم اللى كان السبب انك ما دخلتش الكليه اللى كان نفسك فيها عشان عشر درجه ولا دكتور الماده فى الكليه اللى بقالوا تلت سنين بيشيلك الماده عشان شفته فى وضع يحاسب عليه القانون مع زميلتكم فى سكشن 3 , ولا ولا ولا مش نفسك تنزل تصرخ كده فى الناس اللى ها تموت بعضها فى الطوابير والزحمه وسايبن ناس تانيه تبنى ملاعب جولف وما عندناش حد فى البلد بيعرف يلعبه أصلا , يلا أدينا بنفضفض , اهى دى باين اللى بيسموها تخاريف صيام