سته وتلاتين

لعبه لأتنين مش واحد ولا تلاته

تلاته يبقى فيه واحد داخل غتاته

وواحد يبقى ها تمشى يا حبة عينى تاتا تاتا

يا تلعبها أتنين يا صاحبى يا ماتلعبهاش بتاتا

دردشه مع صديقتى اللى ما بتعرفش ترسم (الحدق يفهم )

أنا المصرى : مساء الفل
صديقتى اللى ما بتعرفش ترسم : مساء الورد أبو ريحه
أنا المصرى : كيفك
صديقتى اللى ما بتعرفش ترسم : قهوة محوجه
أنا المصرى : أدينى فنجان زياده
صديقتى اللى ما بتعرفش ترسم : أسكت حلمت انى رايحة ليمان طرة
أنا المصرى : الله يسهله
صديقتى اللى ما بتعرفش ترسم : على عربية كارو والله بجد
أنا المصرى : وعلى عربية كارو كمان يعنى الزفه بلدى
أنا المصرى : متأكده انه ليمان طره باللذلت يعنى
صديقتى اللى ما بتعرفش ترسم : والله ما اعرف
صديقتى اللى ما بتعرفش ترسم : مع اني كنت اعرفه معرفة سطحية
صديقتى اللى ما بتعرفش ترسم : بس لما سالت نهى قالت لي دا بتاع احكام الاعدام والتأبيدة بس
أنا المصرى : طول عمرك بتحبى تجيبى من الأخر بس ها يحاكموكى بتهمة ايه بس رسم كارتون فى الطريق العام
صديقتى اللى ما بتعرفش ترسم : مش عارفه ... تفتكر؟
صديقتى اللى ما بتعرفش ترسم : بس ما كنتش لوحدي كان فيه شباب كتير ماليين الكارو بتاعتي وكاروهات تانيين
صديقتى اللى ما بتعرفش ترسم : والملفت للنظر ان اللي بيجر العربيات دي مش حمير ولا حصنة
صديقتى اللى ما بتعرفش ترسم : لا بغال وما تسألنيش عرفت انهم بغلة ازاي
أنا المصرى : اراهن انك ما تعرفيش تفرقى بين الحمار والحصان اصلا , ماعلينا
أنا المصرى : ده حلم سهل خالص
صديقتى اللى ما بتعرفش ترسم: : كان فيه بغل لونه بينك وواحد لبني وواحد اصفر
أنا المصرى :اهوه كده وضحت الرؤيه
صديقتى اللى ما بتعرفش ترسم : طيب ايه
أنا المصرى : اقولك بصى
أنا المصرى : البغال دول اللهم احفظنا بتوع الداخليه
أنا المصرى : الأصفر دول الأمن المركزى و اللبنى فرق الكاراتيه
صديقتى اللى ما بتعرفش ترسم :ها و البينك؟
أنا المصرى : البينك بقه دول اللى بيدخلوا فى وسط الناس العاديين ويضربوهم من جوه
صديقتى اللى ما بتعرفش ترسم :ربنا يزيدك علم ربنا يستر بقى
أنا المصرى : الشباب اللى معاكى دول بقه اللى همه بتوع 6 ابريل اللى ها يتجمعوا 6 ابريل الجاى قدام مجلس الشعب عشان تغييير الدستور
صديقتى اللى ما بتعرفش ترسم : طب وانا مالي انا تبع حركة 30 فبراير
أنا المصرى : انتى شكلك كنتى بتفكرى تروحى معاهم فعقلك الباطن بيعمل عبيط عشان ما تروحيش
أنا المصرى : ورايحيين ليمان طره طبعا دى النتيجه المنطقيه فى أخر اليوم
صديقتى اللى ما بتعرفش ترسم : عااااااااا
صديقتى اللى ما بتعرفش ترسم : طيب انا حراجع نفسي
صديقتى اللى ما بتعرفش ترسم : دا استايله هو اللي محليه
صديقتى اللى ما بتعرفش ترسم : ههههههههههههههه
صديقتى اللى ما بتعرفش ترسم : سوري
صديقتى اللى ما بتعرفش ترسم : كنت بتكلم على ابو الليف مع احدى الصديقات
أنا المصرى : : ابو الليف مين
صديقتى اللى ما بتعرفش ترسم : اللي بيغني دا
صديقتى اللى ما بتعرفش ترسم : اللي بيقول انا مش خرونج
صديقتى اللى ما بتعرفش ترسم : انا كينج كونج
أنا المصرى : : ميييييييييييييييييييييييييييييين
صديقتى اللى ما بتعرفش ترسم : يييييييه بقى ما تتريقش
صديقتى اللى ما بتعرفش ترسم : دا حيبقى ثورة في عالم الغناء
أنا المصرى : هوه انا أضربت عن قنوات الاعانى من زمان صحيح بس ما اعرفش انها وصلت لحد كده
صديقتى اللى ما بتعرفش ترسم : ما شفتهوش ع التلفزيون
أنا المصرى : لا ولا فى الميكروييف حتى
صديقتى اللى ما بتعرفش ترسم : دول حيجيبوه بكرة ف مصر انهاردة دا اللي بدل البيت بيتك
أنا المصرى : نعم
أنا المصرى : لا حول ولا قوة الا بالله
أنا المصرى : احييييييييه
أنا المصرى : هيه بقت كده
صديقتى اللى ما بتعرفش ترسم : ده فناااااااااااااااااااااان
أنا المصرى : طب يطلعونى انا
صديقتى اللى ما بتعرفش ترسم : ما انتا مش اسمك ابو الليف
أنا المصرى : اه صحيح دا انا المصرى وده فيه منه كتير
صديقتى اللى ما بتعرفش ترسم : معلش
صديقتى اللى ما بتعرفش ترسم : انت بس اعمل حاجة هبلة وملفته وهمه حيجيبوك
أنا المصرى : ربنا يقوينا على الهبل
صديقتى اللى ما بتعرفش ترسم : يا رب يا خويا
أنا المصرى : بس تفتكرى ابو الليف ده ها يفير مسار الأغنيه فى العالم العربى
صديقتى اللى ما بتعرفش ترسم : شوووووور
صديقتى اللى ما بتعرفش ترسم : انا بتنبأ له بمستقبل واعد
أنا المصرى : هوه بجد ها يطلع فى برنامج اسمه ايه الجديد ده
صديقتى اللى ما بتعرفش ترسم : اها
أنا المصرى : طب همه ليه لغوا برنامج البيض بيضك

صديقتى اللى ما بتعرفش ترسم : عشان أتفقس
أنا المصرى : قلتيلى طب والجديد اسمه ايه
صديقتى اللى ما بتعرفش ترسم : مصر توداي
أنا المصرى : يا حلاوه ده زى كفر الجبل توداى وواشنطن توداى وكده
صديقتى اللى ما بتعرفش ترسم : أيون يا ابنى عشان نوصل للعالميه زيهم
أنا المصرى : طب ومين ها يقدمه
صديقتى اللى ما بتعرفش ترسم : مين يعني نفس السحن
أنا المصرى : لا ما تقوليش تامر كهين وكده
صديقتى اللى ما بتعرفش ترسم : غيرو الاسم بس
أنا المصرى : ايون ايون فهمت زى الحسب الوطنى مصلحتك وكده وفكر جديد وبتاع
صديقتى اللى ما بتعرفش ترسم : بالظااااااابط
أنا المصرى : طب وابو الليف ايه دوره هوه ممثل الفكر الجديد
صديقتى اللى ما بتعرفش ترسم : ماهو تبع الحكومة الالكترونية
صديقتى اللى ما بتعرفش ترسم : وباين من اسمه
صديقتى اللى ما بتعرفش ترسم : ابو الليف تبع نظيف يعني
صديقتى اللى ما بتعرفش ترسم : ولسة بقى حيجيبوا الراقصة اللولبية صابونة
أنا المصرى : ايون ايون فخمتو فخمتو عشان ابو الليف فجاى ينضف اثار البرنامج القديم
صديقتى اللى ما بتعرفش ترسم : اها دا حينضف البلد كلها
أنا المصرى : هوه بيقول ايه فى الاغنيه
صديقتى اللى ما بتعرفش ترسم : ما تسمعها بوليف مي حتتكيففففف دا ايمن بهجت قمر اللي بيكتب له
أنا المصرى : مش بفهمه ايمن بهجت قمر ده ساعات خدى بالك من ساعات بيكتب حاجات مش بصدق انها طالعه منه بس فى الغالب بحس انه بيألف فى الكنيف
صديقتى اللى ما بتعرفش ترسم : ههههههههههههههههههههههههههههه لا والله ليه فلتاته بردو
أنا المصرى : قالولى ان هوه اللى كاتب سيناريو اسف على الأزعاج ما صدقتش حتى لما شفت بنفسى لسه شاكك لحد دلوقتى
أنا المصرى : وابوا الليف هوه اللى ها يغنى تتر البرنامج بدل محمد منير
صديقتى اللى ما بتعرفش ترسم : فكرة بردو
صديقتى اللى ما بتعرفش ترسم : اصلا منير مش ماشي
أنا المصرى : ازاى يعنى
صديقتى اللى ما بتعرفش ترسم : مش ماشي مع البرنامج
أنا المصرى : اه تصدقى من غبائهم كانوا بيشغلوا اغنيه البحر بيضحك ليه
صديقتى اللى ما بتعرفش ترسم : اها
أنا المصرى : والأغنيه اصلا كلها معانى سياسيه بس بعيد عنك البعدا فهمهم على قده
صديقتى اللى ما بتعرفش ترسم : تلاقيهم اصلا مش فاهمينها
صديقتى اللى ما بتعرفش ترسم : شكلك حتركب معايا لكارو قريب كلنا حنتشال هيلا بيلا
أنا المصرى : اه بس انا عايز اركب مع البغل المخطط
صديقتى اللى ما بتعرفش ترسم : هو فيه حاجة مخططة ف البلد دي ؟؟
صديقتى اللى ما بتعرفش ترسم : كله سلطااااااااا
أنا المصرى : انا اقصد البغل المخطط بضم الميم وكسر الط
صديقتى اللى ما بتعرفش ترسم : لغوه يابني انت مش من هنا ولا ايه
أنا المصرى : لا انا من عندنا فيه حاجات كتيره الظاهر بتحصل وانا مش عارف
صديقتى اللى ما بتعرفش ترسم : أه فعلا شكلك قاعد على المدونه بقالك شويه
أنا المصرى : لازم ابطل فرجه على النيل للاخبار الظاهر وأبدأ اتفرج على مولودى تتحدى البلل
صديقتى اللى ما بتعرفش ترسم : أه خد بالك من النيل للأخبار دى يا ابنى مش حلوه لصحتك
أنا المصرى: : أنا ها أقوم بقه عشان ألحق بغل الساعه 6 اللى بيروح عندنا
صديقتى اللى ما بتعرفش ترسم : ربنا معاك مابقاش فيه بغال مواعديها مظبوطه
أنا المصرى : يلا وخدى بالك والنبى بلاش تجيبينى فى حلم احلامك دى مش تاقصه شحططه
صديقتى اللى ما بتعرفش ترسم : لا ما تخافش الحلم النهارده كومبيلت محجوز كله
أنا المصرى : طمنتينى يلا تصبحى على بغل بجناحين
صديقتى اللى ما بتعرفش ترسم : تصبح على بغل مطلوق سلام

خمسه وتلاين

أصحى مالنوم أقوم أسعى

أشوف ألوان السما تسعه

سهرة مزاج بايته معايا ودماغى لاسعه

ولا حتى القوس الملون اتلون والسبعه بقوا تسعه

لو بتفكر تكون راهب فى التبت خد بالك

ضغط ضغط ضغط , فى الشغل ضغط فى البيت ضغط فى الحب موجود مش موجود ضغط برضه , حتى الأجازه بقت تشكل عبأ فى حد ذاتها وضغط برضه , خلاص يا جدعان حرام هوه احنا ايه الكمبيوتر ده اجدع منى هوه بيعمل ستارت وسليب زىنا بس هوه بيعمل شت داون كمان أشمعنى , ليه مش لاقى زرار الشت داون من حقى اعمل شت داون شويه يعنى , عايز اخد أجازة من الدنيا كلها صعبه دى يعنى أجازه شهر حتة ولا موبايل ولا كمبيوتر ولا تليفزيون ولا اى حاجه الكترونيه اصلا واحلى حاجه بقه لو مافيش بنى ادمين كمان ماهواصل مادام البنى ادم اتوجد يبقى المشاكل ها تيجى جرى وراه لو كنت فين , فكرت اطلع سيوه مثلا فى الصحرا كده مع نفسى او اطلع مطروح فى الشتا أو رحلة سفارى فى الواحات نتهوه فيها سنتين ولا حاجه , بس فيه مشكله برضه مش هوه ده اللى ها يخلينى افصل انا محتاج حاجه جامده فعلا , وأنا بتأمل كده فى البحر عدى فى دماغى صوره كوميديه لرهبان التبت اللى بيتاملوا فى دايره دول وبيطيروا وبتاع الفكره وقفت شويه فى دماغى صراحه ليه ما اسافرش رحله التبت والسياحه بره مصر ارخص يا راجل دا انا لو طلعت رحلة سفارى هنا ها ابيع هدومى , الموضوع تضخم فى دماغى ليه ما اطلعش اجازه طويله سنه مثلا ولا 6 شهور وأروح اعيش فى معبد من معابد التبت مش ها ابقى بوذى يعنى لا بس ها اعيش معاهم عادى ولا تكنولوجيا بقه ولا مواصلات ولا اى منغصات البس العبايه بتاعتهم دى واحلق زلبطه واربى السكسوكه ما ربتهاش من زمان والله وأقعد على قمة الجبل أتامل بقه يا ريس انا والطبيعه الروعه فى وسط التبت جبال وبحيرات وخضره ده الواحد ممكن يتعلم الطيران وأحرك الحاجات من بعيد بقه وحركات

للصدفه بقه كان فيه فيلم عن راهب تبتى على قناة National Geographic طلع ان معابد الشاولين اللى بتطلع رهبان مقاتلين دى موجوده بجد أه والله والراهب فيها بيتعلم فنون القتال بس بطرق صعبه جدا عشان يكون راهب مقاتل تخيل بقه يا حلاوه اروح بقه لاقى راهب عنده 190 سنه يدربنى بقه فى الغابه والحركات دى واكسر الخشب بصباعى واهد الحيطان براسى واجمع ايديا مع بعض ارح مطلع كوره زرقا كده تطير الاعداء يا لهوى على الجمال و مش ها احتاج فلوس اصلا ها اعمل بيها ايه مافيش لبس غير العبايه الحمرا كفايه انى اوفر مشواير شرا الهدوم اللى مش بحبها , وها اوفر المبالغ الرهيبه اللى بصرفها على الجل ما فيش احلى من الزلبطه يا ريس , وها اوفر فلوس شحن الموبايل وموتى بغيظك يا فودا فون , وفلوس اشتراك النت والاكل عند أبو ربيع وجاد والمدهش والحاج أبو كنتاكى وهارديز ها افقتقد يمكن السوبيا بتاعت خروب أمال بس مش مهم الواحد يصفى نفسه كده وويتخلى عن الماديات اللى مخليانا عبيد ليها ها اعيش زى الرهبان كفايه ربع رغيف فى اليوم ونص كباية ميه فل أوى , مش ها احتاج مواصلات عشان مش ها اخرج من المعبد أصلا وحتى لو احتاجت حاجه من بره ها اطلبها دليفرى بالتخاطر العقلى , الغريب بقه ان الراهب ده ساب معبده فى التبت وسافر يعيش فى امريكا فى نيويورك أزحم مدن الدنيا غريبه اوى الموضوع ده خلانى ادخل على النت عشام افهم اكتر عن الموضوع , لقيت حاجات غريبه برضه لقيت ان المعابد برضه ما بقتش زى الاول والتبت نفسه ما بقاش هوه نفس التبت دلوقتى التبت بقى فيه شبكات محمول وطبعا فيه شبكات محمول يعنى فيه محمول مع الناس

حتى الرهبان , يعنى مش بعيد الراهب تلاقيه مزوغ من جلسة التأمل الصباحيه كده ومستخبى ورا سور المعبد وماسك موبايله اللى فيه خط ألو كل الناس الدقيقه ب 8 قروش وبيكلم الجو بتاعه اللى ساكنه فى القريه اللى تحت الجبل ولا حاجه وهات يا رغى بقه , ايه ده امال فين الأنفصال عن العالم ومافيش بنات ومافيش حاجات كده وكده , بصيت لقيت كمان ان المعابد بقى فيه قرى حواليها يعنى والقرى دى فيها سايبرات وكده يا معلم , تبص تلاقى العيال الصغيرن اللى لسه فى كى جى تو رهبه ينطوا من على سور المعبد يا معلم ولا الواد سيد كوله اللى فى سارعنا ويهربوا ويروحوا سايبر ويلعبوا كاونترسترايك ونيض فور صبيييد ومش بعيد يكونوا بيلعبوا جى تى ايه كمان

الكبيره بقه بجد يا جماعه موضوع الأحتلال الصينى للتبت , التبت ده مش حاجه صغيره ده مساحته 2.5 مليون كيلو متر مربع , ودلوه قديمه ترجع لألفين سنه الصين احتلتها 1949 , الموضوع كبير اوى بقه من التعصب الدينى والطائفى من الحكومه الصينيه لشعب التبت وخصوصا الرهبان واغلاق المعابد وقوانين لتحديد عدد الرهبان فى التبت ومحو لثقافة وتراث التبت حاجه زى فلسطين بالظبط كده الصين بتقضى على ملامح التبتوما اقولكش بقه يا معلم على المظاهرات اللى بيتصدر فيها باللذات رهبان التبت وضرب وسحل وبهدله ايه يا معلم ما أقولكش

, ونفس السياسات بتاعت اسرائيل الصين بتتبعها برضه من تهجير سكان التبت وبناءمستوطنات وتوطين مستوطنين , التبت فيها حوالى نص مليون جندى صينى صحتهم كويسه اوى ولا الأمن المركزى عندنا , واضح ان الموضوع بعد أوى عن اللى كان فى دماغى على الأقل انا بنضرب هنا لقضيه فاهمها ومدركها انما ها اروح انضرب هناك عشان قضيه ليها الناس اللى اولى انهم ينضربوا عشانها , مافيش فايده عموما شكلها ها ترسى على اربع ايام وتلات ليالى فى شرم الشيخ فى فندق 3 نجوم شامل الأفطار ب 650 جنيه بس يا رب بس نعرف ندخل شرم ما يرجعوناش , ولا احنا فى التبت ولا ايه .

أربعه وتلاتين

أبص فى المرايه أشوف وش مرسوم

جبين عريض مكتوب عليه المقسوم

عيون مغمضه بس عمرها ما داقت نوم

شفايف مبرومه لو أتفتحت تطرش هموم

لقاء صحفى مع المصرى صاحب مدونة أحيه هية بقت كده

الصحفيه : أهلا بحضرتك

المصرى : أهلا بيكى يا أختى

الصحفيه : عرفنا ان الأيام دى عيد ميلاد أحيه الثانى كل سنه وأحيه طيبه

المصرى : وأنتى طيبه بس لما أنتى عارفه جايه بأيديك فاضيه ليه حتى ماجبتيش باكو بسكوت لوكس

الصحفيه : معلش يا فندم اصل الصحيفه اللى انا شغالها فيها على قد حالها وانت عارف بقه دا انا بدفعلهم فلوس مش بقبض منهم

المصرى : لا حول ولا قوة الا بالله , خلاص يا ماما انتى جايه تشحتى هنا لخصى

الصحفيه : اول حاجه انت ليه مخبى شخصيتك على المدونه مع ان الناس كلها عارفه انت مين ايه الأستعباط ده

المصرى : دى نقره ودى نقره أنا لما بكتب على أحيه ببقى المصرى لما بكتب على الفيس بوك ببقى واحد تانى لما بمشى فى الشارع ببقى واحد تالت فى البيت واحد رابع ومع اصحابى واحد خامس فى الشغل واحد سادس وكده يعنى فهمتى حاجه


الصحفيه : يعنى أقدر أفهم من كده ان حضرتك سيكو وعندك فصام وكدهون



المصرى : أيون صلاة النبى عليكى ابديتى تفهمى أهوه


الصحفيه : طب ليه أحيه مش شايف انها لفظ مش مؤدب شويه

المصرى : بصى يا قطه أحيه دى لفظه أعتراضيه توصف على أنها تعجب سماعى وبعدين فى اسكندريه دى عادى يعنى زى أيوووه كده

الصحفيه : طب مش شايف ان المدونه ساعات بيبقى فيها كلام خارج شويه

المصرى : بصى أنا فى الأول كنت مؤمن ميه فى الميه ان الواحد ما يقولش اى كلمه كده ولا كده بس بعد كده لقيتها أن هيه بقت كده أصلا وما ينفعش غير كده

الصحفيه : ممكن نعرف أنت بتشتغل ايه

المصرى : خليكى فى حالك


الصحيفه : هل لديك أى أنتماء سياسى تجاه أى حزب فى مصر

المصرى : يعنى ايه حزب

الصحفيه : طب مين هوه عبده

المصرى : ده عم عبده بتاع العسليه اللى بيفرش اول شارعنا بس بيقول كلام عنب

الصحفية : طب مين فوزية


المصرى : فوزيه دى تبقى بنت عم عبده بتاع العسليه وكنا بنلعب عريس وعروسه فى الشارع واحنا صغيرين


الصحفية : ايه رأيك فى النظام الحاكم فى مصر


المصرى : يعنى ايه رأى


الصحفيىة : مين أكتر مرشح عجبك فى انتخابات الرئاسه الأخيره


المصرى : الراجل أبو طربوش ده اللى أسمه الصباحى تقريبا


الصحفيه : يا سلام هوه ده اللى عجبك أسمعنى بقه


المصرى : عشان هوه الوحيد اللى كان صريح مع الشعب قال انه ها يلبس الناس الطرابيش , فيه مرشحين تانيين لبسوا الناس الطرابيش من غير ما يقولوا .


الصحفيه : مش فاهماك أوى بس شكلك كده ها تلبسنا فى الحيط يا عم أنا لسه صحفية صغنونه رئيس التحرير ها يسوحنى


المصرى : يا قطه مش قد السؤال ما تسأليش , ده ايه يا أخويا الصحفيين السيس دول


الصحفية : ما علينا ايه رأيك فى الغناء فى مصرحاليا وهل بيساهم فى الوعى القومى زى ماكنا بنسمع أغانى عبد الحليم حافظ الوطنيه زمان


المصرى : لا دلوقتى طبعا عندنا مغنيين كتير بتشارك فى الوعى القومى والحياه السياسيه بصوره واضحه جدا عندك سعد الصغير مثلا فى أغنيته وبحبك يا حمار وخدى عندك كملن أغنية أنا مش عارفنى بتاعت عبد الباسط حموده الأغنيتين دول فيهم أسقاطات سياسيه مهمه جدا


الصحفية :اللهم طولك يا روح , طب نتكلم عن الفن , ايه رأيك فى التنوع الدرامى الموجود حاليا فى القنوات العربيه


المصرى : ما أخدش بالى صراحه


الصحفيه : ليه مقالات المستثمر الصغير بقالها مده مختفيه


المصرى : معلش هوه الراجل بس عمل سبوبه حلوه فطلع يضرب يومين كده فى لندن وراجع قريب ان شاء الله وها يبدع تانى


الصحفيه : بمناسبة السفر ايه رأيك فى المواضيع المثاره حاليا حول سفر المسؤولين للعلاج فى الخارج من وزراء لأعضاء مجلس شعب للباقى بقه


المصرى : العلاج على نفقة الدوله


الصحفيه :مممم , مش فاهماك بالظبط بس ماعلينا , انت أهلاوى ولا زملكاوى


المصرى : متهيألى لو كنت أهلاوى المدونه دى ما كانش ها يبقالها وجود أو على الأقل ما كانش ها يبقى اسمها أحيه


الصحفية : الصورة اللى على البروفايل بتاعك على المدونه دى صورة مين


المصرى : دى صورة عم أدريس أول مواطن عادى كده صورته تنزل على الجنيه المصرى ,و بطلى رغى بقه خلينا نقوم نشوف مصالحنا


الصحفية : طب سؤال أخير هل أنت فعلا شايف أنها بقت كده


المصرى : يا خبر يعنى انتى مش شايفه كده , أحيه هيه بقت كده


الصحفيه : معلش سؤال سريع كده أنت خاطب او متجوز أو مرتبط

لا بس فيه بنت مدونه صينيه زميله متكلمه عليا بس ربنا يفك سجنها بقه أول ما تطلع ها نلبس دبل ان شاء الله

الصحفية : فى ختام الحوار نشكر المصرى صاحب مدونة أحيه هيه بقت كده على أستضافته


المصرى : ربنا يخليكى يا أختى مانجيلكيش فى حاجه وحشه


-----------------------------------------------

الصحفية : ايه يا عم مالك ما بالراحه علينا شويه


المصرى : انتى مش شربتى الشاى يا قطه طريقك زراعى بقه

الصحفيه : ماشى بس بقولك أنت فاضى النهارده فيه مسرحية حلوه أوى فى الساقيه عازماك

المصرى : لا ربنا يخليكى بطلت أ حضر مسرحيات فى الساقيه من بعد ما شفت مسرحية ( لا تنقذوا الغرقى ) لو فيه حفلة مزيكا ممكن تعزمينى براحتك

الصحفيه : طب ممكن نشرب حاجه سوا على البورصه مثلا

المصرى : لا لا لا لا بورصة ايه وبتاع ايه يا ماما , انا مش بقعد غير على ستار بقظ أو سيلانترو , ابقى عدى عليا هناك سلام يا قطه

----------------------------------------------

المصرى : ألو ازيك ياد يا حسنى عامل ايه يا ابن ال--- , اه تمام , انت فل المهم , طب قشطات ,هاته معاك , ماشى نتقابل 9 على البورصه تمام

تلاته وتلاتين

أنا حضنى من هنا لحد القمر

ها تلاقى احساس وناس تلاقى صحرا وشجر

لحظة أمان لحظة جنان لحظة خطر

وناس ناسيه انها ناس لكن لسه بشر

فينك يا عم فالنتين

بيقولك ايه بقه عم فالنتين ده كان راجل راهب فى القرن التالت فى روما ايام الدوله الرومانيه والحروب والحركات دى , بيقولك بقه كان فيه امبراطور رومانى بياخد كل الشباب للجيش ومانع عليهم الجواز , عشان الجندى من دول ما ينشغلش بشهر العسل و المدام حامل عايز اجازه اقعد جمبها والمدام ولدت والواد تعبان اوديه للدكتور , فريح دماغه وقالك مافيش جواز عشان الرجاله تتفرغ للحرب وبس مش فاضيين للمرقعه , طبعا الشباب فى روما ما بقوش عارفين يعملوا ايه بقه فيه مشكله كبيره طبعا , مش مشكله الجواز فى حد ذاتها لا همه الشباب فى روما الصراحه كانوا مقضينها خمر ونساء وعربده ل 6 الصبح وبنات روما برضه كانوا مكبيلن وكده يعنى , بس المشكله ان كل الولاد كانوا غلطاين مع المزز بتوعهم قبل ما يروحوا الجيش , طب دلوقتى الواد ها يسافر يحارب ويغيب والحروب الرومانيه بتطول بقه انتم عارفين لو الحمله طالعه منغوليا مثلا قول سنتين رايح وتلات سنين حرب وسنتين راجع ده لو رجع يعنى والبت بطنها ها تكبر مش عشان عندها انتفاخ طبعا , والفضيحه بقه وكده والناس فى روما صعايده ما يحبوش الحال المايل والبت فى روما ما حيلتهاش غير شرفها , ولو الراجل مات فى الحرب بقه دى الكبيره ايام زمان كانوا بيدفنوا الجثث مكان المعركه مش بيشحنوها بالطيارات زى دلوقتى , يعنى اهل البنت هايرفعوا قضية اثبات نسب وتحليل دى ان ايه وكده أزاى , يعنى مش ها يعرفوا يثبتوا الواد فى السجل المدنى الرومانى بأسم أبوه , كان عم فالنتين قاعد بيتفرج مش عاجبه الموضوع اللى حاصل ده , والسيزون كان مضروب طبعا لا فيه جواز ولا اى مصلحه , فالراجل قال يعمل بنط جدعنه قالك أجوز البنات والشباب دول فى السر ونستر عليهم أحنا برضه عندنا ولايه وأهوه كله بثوابه ومن عمل خير بيداه التقاه وأنتوا عارفين الباقى , الراجل طلع كفاءة وجوزهم والحال مشى والقشيه بقت معدن يا معلم , قوم بقه مستشار الأمبراطور شم خبر بأن عم فالنتين بيعمل سبوبه وبيجوز الشباب والبنات فى السر من غير ما ينصص معاه , طبعا الراجل أتجن قالك هاتولى فالنتين , جه فالنتين المستشار فالمستشار قاله أنا عارف انك راجل كويس وبتحب بلدك وكان نفس تخدم يعنى , واحنا ممكن نطرمخ على الموضوع يعنى بس أبو قسم يا حلو , طبعا فالنتين ضرب كف على كف وقالك أحيه هيه بقت كده , يا سعادة المستثار أنا بعمل الموضوع لوجه لله يعنى فور فرى كده ببلاش , طبعا روما ساعتها كانت لسه وثنيه فالمستشار لا يعرف ربنا ولا الكلام ده قالك أنفخوه , طبعا يمين شمال من هنا لهنا مالقاش فايده معاه , راح مبلغ الأمبراطور , طبعا الأمبراطور شاط وقالك هاتوهولى المشكله بقه ايه الامبراطور مش زعلان عشان هوه كسر اوامره لا زعلان عشان كان عنده بنت أميره طبعا حبت واد من عامة الشعب فالأمبراطور راح زاعط الواد ودخله الجيش مع ان الواد كان معاه اعفا عشان وحيد على بنتين , قوم ايه بقه فالنتين جوز البت بالواد فى السر مع اللى جوزهم , الأمبراطور قاله ازاى جرؤت تجوز بنتى للصعلوك ده , قاله يا باشا انا كنت عايز استر على بتك بدل ماهى دايره مع شباب روما نفر نفر , يا أبا الحاج الأمبراطور أحب أعلم سيادتك ان بنت سعادتك هيه السبب فى ان منتخب روما ما دخلش كاس العالم السنه اللى فاتت وأتغلبنا من منتخب الفرس 6 -1 فى التصفيات المؤهله , وانت طبعا مش فاضيلها ومشغول فى اللعب مع الأسود والدببه والمصارعين القرع العريانين بتوعك , الأمبراطور ما صدقش نفسه هوه ازاى بيقوله الكلام ده قاله انت ازاى تغلط فى المصارعين القرع بتوعى بص يا برنس انت كده جبت ضرفها , وحكم عليه بالأعدام بس مش عارفين اتعدم ازاى فى الحقيقه , وهكذا بيقولك بقه كانت الأحتفال بفالنتاين رمز للحب والحركات وكدهون , مين بقى اللى بيقولك ده مش عراف هيه زى اساطير كده يعنى , المهم اننا فى مصر وعلى بعد ألاف الاميال عن روما وعلى بعد 700 سنه من فالنتين نعيش فى ازهى عصور الامبراطوريه المصريه اللى وصلتنا لأننا مش بس اللى بيدخل الجيش مش بيتجوز لا واللى مش بيدخل كمان , جيل بأكلمه تقريبا لغى من قاموسه كلمة جواز دى عشان ما يتعبش من التفكير يا عينى وبيدور على كلمه بديله دلوقتى , والمتفائلين عندهم أمل انهم يتجوزا وهمه عندهم 35 سنه 40 كده قول 45 يعنى يتجوز فى الوقت الضايع يا دوب يجيب الجون الذهبى ويصفر الحكم على كده , والبنات نشفت يا عينى وجالها جفاف من كتر القعده والفرجه على المسلسلات التركى اللى بيسحوا الدموع عليها مستنين العريس اللى امه داعيه عليه , بصراحه محتاجين يتاع 100 فالنتاين عشان يحلوا مشكلتنا دى , وهابى زالنطاين عليكوا .

قلم حبر : 4

-فى صيف 2008 طلعت علينا الحكومه بالحمله الألمعيه اللوزعيه الميه ميه . حملة وقفة مصريه لتنظيم النسل وكعادة الحكومه فى خطواتها الجاده الموفقه المباركه , الحمله فشلت فشل زريع مالوش مثال , دلوقتى وبعد أكتر من سنه جاءت الحكومه من تانى عشان تثبت ان لا فيه لا فكر جديد ولا فكر قديم حتى , بعد أكتر من سنه بدأو نفس الحمله تانى بنفس الأسم ونفس الطريقه , وقفه مصريه , الحكومه اللى شايفه ان أكبر مشاكلها دلوقتى همه السكان ده مع التعداد الرسمى اللى بيقول ان سكان مصر وصل لحوالى 85 مليون نسمه , طب لو وصلنا بقه للتعدادات الغير رسمه اللى بتوصل الرقم ل 100 مليون نسمه يبقى الحكومه ها تعمل ايه , مشكله بالحجم ده ومع ذلك الحكومه ما كلفتش خاطرها عشان تجند عقولها العبقريه فى تنفيذ حمله تقدر تقنع الناس فعلا , لا أستسهلوا وبدأوا تانى نفس الحمله الفاشله بتاعة 2008 وبنفس الأسم وبنفس اللقكات القديمه المسجله فى الأعلانات , مع انى نصحتهم ايامها وقلتلهم على الأقل يغيروا اسم الحمله , مش قادرين يفهموا ان جملة وقفه مصريه دى مش ممكن تقلل الخلفه بالعكس , دى ليها مفعول السحر فى ان الشغل يبقى على ودنه والعدد يبقى فى اللمون , يعنى يسموها مثلا أنتخه مصريه , نومه مصريه , غفوه مصريه , أرتخائه مصريه واخدلى بالك انت أنما وقفه مصريه , وقفة ايه بس .

- ونحن على أعتاب سنه جديده , وكعادة حكومتنا المجيده كان فيه مفاجأة مستنيانا فى أول السنه توضح ايه خطه ونوايا وأسلوب الحكومه الجديد مع الشعب فى سنة 2010 , وما كانش فيه طبعا أحسن من يوسف بطرس غالى اللى بيتحفنا دايما بكل جديد عشان يوصل الأسلوب الجديد , وهو أسلوب ها أطلع تيت أهلكم , طبعا اللى حصل ان ناس كتير أوى أخدت الموضوع بحساسيه زايده أوى وطالبوا بأقالة الوزير ومحاكمته وحاجات تانيه كتير ما يصحش نتكلم فيهاهنا , أيه اللى حصل يعنى لما سيادة الوزير يستعمل جمله كجملة ها أطلع تيييت أهلهم , طبعا لو كان سبادة الوزير أستعمل كلمه زى دى مع أخوانا الصهاينه كان ها يتزبط قضايا أولها معاداةالساميه وأخرها ربنا لوحده اللى يعلمه ,انما لما يقول كده لناس مصريين عادى يعنى طب ما المصريين كلهم بيقولوا على الراجل أكتر من كده بكتييييييييييير , والراجل عمره ما فتح بقه يا جدعان وواخد المسأله بحب , يبقى يوم ما ييجى يهزر بجمله عابره كده فلتت منه الناس كلها تقفله على الواحده لا لا لا ماكنش العشم , بجد الراجل زعل يا جدعان ايه ده ما تراعوا العشره , سعادة الوزير قول كمان وأشجينا ما عادش خلاص يأثر فينا .

- فجأة طالعتنا كل الصحف المصريه ومواقع الأنترنت بقائمة الشخصيات المرشحه لخوض الأنتخابات الرئاسيه القادمه , وعلى رأسها الدكتور البرادعى والدكتور أحمد زويل , الحقيقه الناس أستغربت أوى هيه أيه العباره بالظبط , هوه الترشيح أتفتح للى معاه جايزة نوبل يعنى ولا ايه , ناس قالت يمكن عشان السادات كان واخد نوبل فنمشى على خطاه , ناس تانيه سألت طب ماكده نجيب محفوظ كمان يرشح نفسه بس ازاى نجيب محفوظ الله يرحمه , فى نفس الوقت كان نفس الجرايد برضه بتتطرح الخيار التانى وهوه جمال مبارك , الناس أستغربت بس ده ماعهوش نوبل , قالك لاه بقه ده معاه واسطه جامده أوى , الناس وصلها حاجتين بقه ان اللى ها يترشح يا يكون بالوراثه يا يكون معاه نوبل , فيه واحد ذكى قالك بقه طب ما يبقى ابن نجيب محفوظ يرشح نفسه أهوه وراثه ونوبل يعنى كفاءه , قالك لا بس نجيب محفوظ ما عندوش ولاد , واحد تانى قالى بقه انه سمع ان جمال مبارك ها يدفع عشان يأخد جايزة نوبل السنه دى فى السلام , قولتله ازاى يا عم ها تبقى مكشوفه اوى دى , قالى يعنى أشمعنى دى اللى ها تتكشف يا سلام .

أتنين وتلاتين

أنفض عنى أفكارى

أتعرى من أحزانى
أبلل قدمى من جداول الأفراح
ألقى برأسى على صدرك
أتـساءل هل تحررت