الجمعة، 12 فبراير 2010

فينك يا عم فالنتين


بيقولك ايه بقه عم فالنتين ده كان راجل راهب فى القرن التالت فى روما ايام الدوله الرومانيه والحروب والحركات دى , بيقولك بقه كان فيه امبراطور رومانى بياخد كل الشباب للجيش ومانع عليهم الجواز , عشان الجندى من دول ما ينشغلش بشهر العسل و المدام حامل عايز اجازه اقعد جمبها والمدام ولدت والواد تعبان اوديه للدكتور , فريح دماغه وقالك مافيش جواز عشان الرجاله تتفرغ للحرب وبس مش فاضيين للمرقعه , طبعا الشباب فى روما ما بقوش عارفين يعملوا ايه بقه فيه مشكله كبيره طبعا , مش مشكله الجواز فى حد ذاتها لا همه الشباب فى روما الصراحه كانوا مقضينها خمر ونساء وعربده ل 6 الصبح وبنات روما برضه كانوا مكبيلن وكده يعنى , بس المشكله ان كل الولاد كانوا غلطاين مع المزز بتوعهم قبل ما يروحوا الجيش , طب دلوقتى الواد ها يسافر يحارب ويغيب والحروب الرومانيه بتطول بقه انتم عارفين لو الحمله طالعه منغوليا مثلا قول سنتين رايح وتلات سنين حرب وسنتين راجع ده لو رجع يعنى والبت بطنها ها تكبر مش عشان عندها انتفاخ طبعا , والفضيحه بقه وكده والناس فى روما صعايده ما يحبوش الحال المايل والبت فى روما ما حيلتهاش غير شرفها , ولو الراجل مات فى الحرب بقه دى الكبيره ايام زمان كانوا بيدفنوا الجثث مكان المعركه مش بيشحنوها بالطيارات زى دلوقتى , يعنى اهل البنت هايرفعوا قضية اثبات نسب وتحليل دى ان ايه وكده أزاى , يعنى مش ها يعرفوا يثبتوا الواد فى السجل المدنى الرومانى بأسم أبوه , كان عم فالنتين قاعد بيتفرج مش عاجبه الموضوع اللى حاصل ده , والسيزون كان مضروب طبعا لا فيه جواز ولا اى مصلحه , فالراجل قال يعمل بنط جدعنه قالك أجوز البنات والشباب دول فى السر ونستر عليهم أحنا برضه عندنا ولايه وأهوه كله بثوابه ومن عمل خير بيداه التقاه وأنتوا عارفين الباقى , الراجل طلع كفاءة وجوزهم والحال مشى والقشيه بقت معدن يا معلم , قوم بقه مستشار الأمبراطور شم خبر بأن عم فالنتين بيعمل سبوبه وبيجوز الشباب والبنات فى السر من غير ما ينصص معاه , طبعا الراجل أتجن قالك هاتولى فالنتين , جه فالنتين المستشار فالمستشار قاله أنا عارف انك راجل كويس وبتحب بلدك وكان نفس تخدم يعنى , واحنا ممكن نطرمخ على الموضوع يعنى بس أبو قسم يا حلو , طبعا فالنتين ضرب كف على كف وقالك أحيه هيه بقت كده , يا سعادة المستثار أنا بعمل الموضوع لوجه لله يعنى فور فرى كده ببلاش , طبعا روما ساعتها كانت لسه وثنيه فالمستشار لا يعرف ربنا ولا الكلام ده قالك أنفخوه , طبعا يمين شمال من هنا لهنا مالقاش فايده معاه , راح مبلغ الأمبراطور , طبعا الأمبراطور شاط وقالك هاتوهولى المشكله بقه ايه الامبراطور مش زعلان عشان هوه كسر اوامره لا زعلان عشان كان عنده بنت أميره طبعا حبت واد من عامة الشعب فالأمبراطور راح زاعط الواد ودخله الجيش مع ان الواد كان معاه اعفا عشان وحيد على بنتين , قوم ايه بقه فالنتين جوز البت بالواد فى السر مع اللى جوزهم , الأمبراطور قاله ازاى جرؤت تجوز بنتى للصعلوك ده , قاله يا باشا انا كنت عايز استر على بتك بدل ماهى دايره مع شباب روما نفر نفر , يا أبا الحاج الأمبراطور أحب أعلم سيادتك ان بنت سعادتك هيه السبب فى ان منتخب روما ما دخلش كاس العالم السنه اللى فاتت وأتغلبنا من منتخب الفرس 6 -1 فى التصفيات المؤهله , وانت طبعا مش فاضيلها ومشغول فى اللعب مع الأسود والدببه والمصارعين القرع العريانين بتوعك , الأمبراطور ما صدقش نفسه هوه ازاى بيقوله الكلام ده قاله انت ازاى تغلط فى المصارعين القرع بتوعى بص يا برنس انت كده جبت ضرفها , وحكم عليه بالأعدام بس مش عارفين اتعدم ازاى فى الحقيقه , وهكذا بيقولك بقه كانت الأحتفال بفالنتاين رمز للحب والحركات وكدهون , مين بقى اللى بيقولك ده مش عراف هيه زى اساطير كده يعنى , المهم اننا فى مصر وعلى بعد ألاف الاميال عن روما وعلى بعد 700 سنه من فالنتين نعيش فى ازهى عصور الامبراطوريه المصريه اللى وصلتنا لأننا مش بس اللى بيدخل الجيش مش بيتجوز لا واللى مش بيدخل كمان , جيل بأكلمه تقريبا لغى من قاموسه كلمة جواز دى عشان ما يتعبش من التفكير يا عينى وبيدور على كلمه بديله دلوقتى , والمتفائلين عندهم أمل انهم يتجوزا وهمه عندهم 35 سنه 40 كده قول 45 يعنى يتجوز فى الوقت الضايع يا دوب يجيب الجون الذهبى ويصفر الحكم على كده , والبنات نشفت يا عينى وجالها جفاف من كتر القعده والفرجه على المسلسلات التركى اللى بيسحوا الدموع عليها مستنين العريس اللى امه داعيه عليه , بصراحه محتاجين يتاع 100 فالنتاين عشان يحلوا مشكلتنا دى , وهابى زالنطاين عليكوا .

هناك 9 تعليقات:

  1. جميييييييييييله اوى اوى بجد تسلم ايدك يا مصرى وهابى زلانيطين عليك انت كمان
    بس اكيد باذن الله فى امل
    الموضوع مش موضوع جواز او لأ الموضوع ان الدنيا بقت مش زى زمانوالحال بقى غريب بجد ويحير
    ربنا معانا بقى
    عشان فعلا احيه بجد على اللى بقينا فيه

    ساره

    ردحذف
  2. و الله حلو الكلام ده
    بقى الحج زلانطين كان بيضرب ورق عرفي و عامل سبوبة
    و حبة الشباب الغلبان يا عيني عمال يقول زلانطين زلانطين
    و يجروا يترموا على الامبيثريهات يسمعوا الشئ تامور حسني
    حتى الشباب الفاهم بقى بتعلق في الزلانطين على رايك علشان مفيش امل للشرعي

    يبقى بصلاة عل النبي كده
    هابي فلانتين عليك يا مصري
    و على الاسكندرانيه كلهم
    :):)

    ردحذف
  3. يخربيت كده
    ايه الحلاوة دى ياراجل.

    عارف احلى حاجة عجبتنى بجد انك اتكلمت عن المدعوك اللى اسمه ايه ده الزالانطاين داى بطريقة غير اللى قريتلهم بيتكلموا عنه .
    والى بيتكلموا ياما بيقولوا حب ماما حب بابا حب نينة على قد م تقدر حب
    وفى ناس تطلع تقول حرام وحتة وهتقولك يا كافر.

    وبصراحة التأصيل التاريخى اللى انت عملته يستحق يدرس فى حصص التاريح.

    تسلم ايدك.

    ردحذف
  4. - تسلم ايديكى انتى يا ساره على االتعليق الحلو ده وهابى زالنطاين

    - مساء الفل يا زيما فينك مش باين , العيال بقت سيس صراحه , والمجتمع بقى استهلاكى وهايف فوق الحدود , ربنا يستر بقه , هابى زالنطاين ليك نيابه عن الاسكندرانيه

    - دى يحلاوة الرشيدى الميزان يا بث تجريبى , لو حبيتى ممكن ادى دروس فى التاريخ المعاصر كمان بس الحصه ب20 جنى

    ردحذف
  5. هابى زلا نطين
    بمناسبة ان النهارده يوم الزلانطين
    كلامك عسل هات القشطه ورغيفين عيش وتعالا نغمز

    ردحذف
  6. ههههههههههههههههههه ... بقى الامبراطور بيقول لعم فالنتين يابرنس وبتعمل سبوبه؟؟؟ هو الامبراطور ده من شبرا ؟؟ حلوة جدا يا كبير تسلم والى الامام

    ردحذف
  7. يا سلام يا ذكاء بقه مع القشطه فراوله اهيه حاجه حمرا برضه مش فالنتين ده ولا ايه

    ردحذف
  8. ايه يا ابن الدنيا انت ما تعرفش برنس الكبده فى امبابه وامراطور الكشرى فى شبرا دول مشهرين اوى , تكرم يا ريس

    ردحذف
  9. هههههههههه
    لا بجد حوار بن ناس اوووى
    وكلام حضرتك فى الجول والله .... وطريقة عرضه دمها خفيف جدا
    موضوع مميز بجد :D

    ردحذف

اكتب رأيك أساحبى