الأربعاء، 10 سبتمبر 2008

البعض يفضلها اسكندريه

- لما الناس كلها تحب اسكندريه فى الصيف, بس أنت تعشقها فى الشتا .

- لما يبقى احلى حاجه عندك انك تتمشى على الكورنيش فى الشتا والميه بتخبط فى الصخور وتغرقك .

- لما تلاقى رجليك واخداك لحد بحرى والقلعه بعد الساعه 12 بالليل .

- لماتشترى الجيلاتى من عند عزه او الصعيدى والدنيا بتشتى وانت ماشى بالجيلاتى فى الشارع .

- لما تتفرج على ماتشات المنتخب على كافيتريا الشمندوره بالذات مش عارف ليه.

- لما تشترى فشار من عند جوجو انت وأصحابك وتركبوا الترام ابو دورين عشان تتفسحوا .

-لما تقف الساعه 1 الضهر على شارع ابو قير بالساعه عشان تلاقى حاجه تركبها .

- لما تنزل تتمشى فى سموحه ويبقى لازم تشرب بوريو او جرجير باللبن من عند مكه .

- لما تشترى ساندويتشات من عند مطعم الجمهوريه فى المنشيه وتطلع تاكلهم على البحر قدام النصب التذكارى للجندى المجهول.

-لما تموت فى ساندويتشات الفول والحمص بتاعت محمد احمد وساندويتسات الفلافل والباذنجان بتاعت جاد.

-لما تبقى زهقان من الدنيا و مش لاقى اى حد من اصحابك , وتروح تقعد على الكورنيش وتدى وشك للبحر وضهرك للشارع وتقعد كده بالساعات .

-لما تبقى بتعدى كل يوم من قدام مكتبة الاسكندريه وتحب تقف عنها وتتصور هناك وتقف تتأمل فى جمالها مع انك ما دخلتهاش فى حياتك ولا مره او يمكن هيه مره واحده.

-لما كنت بتركب قطر ابو قير وانت فى الثانوى , مع انه مش بيعدى على اى حته انت رايحها , بس انت عارف بقه كنت بتركبه ليه.

-لما تشجع نادى الاتحاد دايما وتزعل لما يتغلب مع انك عارف انه مافيش منه رجا.

-لما فى الصيف تفكك من الشواطئ المميزه والكلام الفاضى ده وتنزل الشواطئ المجانيه لأنك عارف اللى فيها.

-لما ما تحرمش من اللى حصل لك أخر مره رحت فيها شارع الغرفه التجاريه عشان تشترى بنطلون ,وبرضه تروح هناك تانى.

-لما ناكلوافلافل , ونشتروا مستيكه , ونركبوا التوكوسا , ونروحوا نتفرجوا على الموتوشا.

-لما تركب الأوتوبيس المكيف انت والحته , وانت عارف ايه بقه الأوتوبيس المكيف.

-لما جسمك يقشعر وانت بتسمع أغنية فيروز شط اسكندريه.

-لما تلعب كوره فى الحته الواسعه اللى على كورنيش الابراهيميه وبعدين تقعد تستريح وتكتب اسمك على الصخور.

-لو تعرف برنامج نايت فلايت بتاع الأغانى الاجنبيه اللى كان بييجى على القناه الخامسه دا انت تبقى واد بقى مالهوش حل واتصل بيا اديك جايزه.

هناك 10 تعليقات:

  1. دلوقت انا بقى اللي بقولهالك..سقفة كبيرة اوي وأرفع قبعتي ميت مرة بجد ياابو عمرو.. ايه ياراجل الكلام اللي مالهوش حل ده؟؟ انت الوحيد اللي بيموت في سندوتشات البدنجان في مصر كلها..الحاجات دي كلها عملتها مع شخص واحد عزيز عليا جدا بس مش قادر افتكر مين هو..

    ردحذف
  2. مادام عملت الحاجات دى يبقى نديلك الجنسيه, بس استنى انت تعرف برنامج نايت فلايت

    ردحذف
  3. للأسف معرفهوش .. بس اعرف برنامج تاكسي السهرة اللي كان بييجي على نفس القناة .. ينفع؟؟

    ردحذف
  4. للأسف يا كابتن ها نسحب منك الجنسيه برنامج نايت فلايت ده كان بييجى على القناه الخامسه , تاكسى السهره ده اى عيل عارف انه كان بييجى على القناه الاولى

    ردحذف
  5. بجد جامده
    انت تقريبا قولت حاجات اى اسكندرانى بيعملها
    بس اعتقد انى مش متحاجة اخد الجنسية لانى وخداها من يوم متولد وليا الشرف بكده

    اما برنامج نايت فلايت اكيد اعرفة بس المزيعة كانت رخمة موت

    تحياتى ليك على كل كلمة قولتها

    ردحذف
  6. ربنا يخليكى ومتشكر اوى على كلامك الجميل ,وطبعا انتى مش محتاجه الجنسيه ,اللى يحس بالكلام اوى كده بالتأكيد اسكندرانى , لا وكمان شكلك عارفه البرانامج بجد , مستني تعليقات تانيه

    ردحذف
  7. I love alex althoug iam from cairo S: but i love alex especially in winter . i do love it more after ur words which transfer how alex is the best ever .

    ردحذف
  8. شكرا يا ساره , بالتأكيد انتى كمان من عشاق اسكندريه لأنك بتحبيها فى الشتا, واسكندريه تنور بيكى فى اى وقت .

    ردحذف
  9. ممكن اعرف اية اللى بيحصل لما بتركبوا قطر ابو قير ايام الثانوىىىىىىىىىىى ممكن
    سوسو

    ردحذف
  10. كانوا بيركبوا قطر ابو قير ايام الثانوى عشان يلتحموا بجماهير الشعب

    ردحذف

اكتب رأيك أساحبى